စက်တင်ဘာ ၂၊ ၂၀၂၁
M-Media
-မန်ချက်စတာယူနိုက်ကနေ ထွက်ခွာသွားတာ ၁၂ နှစ်ကြာပြီးတဲ့နောက် ပေါ်တူဂီတိုက်စစ်မှူး ခရစ္စတီယာနို ရော်နယ်ဒိုဟာ သူအောင်မြင်ရာမြေကို ပြန်လည်နင်းခဲ့ပြီ ဖြစ်ပါတယ်။
အသက် ၃၆ နှစ်အရွယ်ရော်နယ်ဒိုဟာ ပြီးခဲ့တဲ့တစ်ပတ်ကမှ ရုတ်တရက် မန်ယူနဲ့ သဘောတူညီချက်ရခဲ့ပြီး ဩဂုတ်လ ၃၁ ရက်နေ့က အဆုံးသတ်ခဲ့တဲ့ နွေရာသီအပြောင်းအရွှေ့မှာ စိတ်ဝင်စားစရာ အကောင်းဆုံးအဖြစ်အပျက်လည်း ဖြစ်ပါတယ်။
စက်တင်ဘာ ဒုတိယပတ်လောက်မှာ မန်ယူနဲ့အတူ ပွဲထွက်ဖို့ရှိနေတဲ့ ရော်နယ်ဒိုရဲ့ ရင်ခုန်သံတွေကို မန်ယူအသင်းက အင်တာဗျူးပြီး သူတို့ရဲ့ ဝဘ်ဆိုက်မှာ လွှင့်တင်ပေးထားပါတယ်။
အိမ်ပြန်လာရတာ ပျော်တယ်
ကြီးကျယ်တဲ့သမိုင်းကြောင်းရှိတဲ့ မန်ယူကို ပြန်လာရတာပျော်ရွှင်တယ်လို့ ရော်နယ်ဒိုက ဖွင့်ဟပါတယ်။
“ခင်ဗျားတို့သိတဲ့အတိုင်းပဲ။ ဩအံ့ဖွယ်ရာကောင်းတဲ့ ဒီအသင်းမှာ ကျွန်တော်ဟာ သမိုင်းကောင်းတွေရှိခဲ့တယ်။ အသက် ၁၈ နှစ်သားမှာ ကျွန်တော်ဒီကိုရောက်ခဲ့တာပါ။ ၁၂ နှစ်တာနောက်ပိုင်း ဒီနေရာကို ပြန်လာရတာ အရမ်းပျော်တာပေါ့။ ပွဲကစားဖို့လည်း မစောင့်နိုင်တော့ပါဘူး”
ဖာဂူဆန်အကြောင်း
မန်ယူရဲ့ မြို့ခံပြိုင်ဘက် မန်စီးတီးအသင်းကို ရော်နယ်ဒို ပြောင်းတော့မယ်လို့ သတင်းတွေ ကျယ်ကျယ်ပြန့်ပြန့်ထွက်ပြီး ၂၄ နာရီအတွင်းမှာပဲ မန်ယူနဲ့ ရော်နယ်ဒို သဘောတူညီချက် ရခဲ့တာပါ။ ရော်နယ်ဒိုကို အသက် ၁၈ နှစ်အရွယ်ကတည်းကနေ ပြုစုပျိုးထောင်ပေးခဲ့တဲ့ မန်ယူနည်းပြဟောင်း ဖာဂူဆန်က ဒီအပြောင်းအရွှေ့မှာ အဓိကကျတဲ့အခန်းကဏ္ဍကနေ ပါဝင်ခဲ့ပါတယ်။
ရော်နယ်ဒိုကလည်း ဖာဂူဆန်ဟာ သူ့ရဲ့အောင်မြင်မှုမှာ အရေးပါခဲ့ပြီး၊ သူ့ရဲ့ ဘောလုံးဖခင်ဖြစ်တယ်လို့ ထပ်မံဖွင့်ဟ ပြောဆိုခဲ့ပါတယ်။
“ကျွန်တော့်အတွက်တော့ ဆာအဲလက်စ်ဖာဂူဆန်ဟာ ဘောလုံးလောကရဲ့ ဖခင်ပါပဲ။ ကျွန်တော့်ကို အများကြီးကူညီပေးတယ်၊ သင်ပေးတယ်။ ကြီးမားတဲ့ အခန်းကဏ္ဍကနေ ပါဝင်ခဲ့ပါတယ်။ ကျွန်တော်တို့မှာ ဆက်ဆံရေးကောင်းရှိတယ်၊ အမြဲတမ်း အဆက်အသွယ်ရှိတယ်။ သူ့ကို ကျွန်တော် တော်တော်လေး ချစ်ပါတယ်။ သူဟာ တစ်မူထူးခြားတဲ့ ပုဂ္ဂိုလ်ပါ။ ကျွန်တော် ဒီလိုအခြေအနေ ဖြစ်လာတာ၊ မန်ယူကို ပြန်ရောက်လာတာတွေဟာ အဓိကက သူ့ကြောင့်ပါ”
အကောင်းဆုံး ဆုံးဖြတ်ချက်
မန်ယူကို ပြန်လာဖို့ ဆုံးဖြတ်မှုဟာ အကောင်းဆုံး ဆုံးဖြတ်ချက်ဖြစ်ပြီး စာမျက်နှာသစ် ဖွင့်လှစ်တိုက်တာ ဖြစ်တယ်လို့ ရော်နယ်ဒိုက ဆိုပါတယ်။
“စာမျက်နှာသစ် ဖွင့်လိုက်တယ်။ အရမ်းလည်း ပျော်ရွှင်ကျေနပ်မိပါတယ်။ ကျွန်တော် ရှေ့ဆက်မယ်၊ သမိုင်းသစ်ရေးမယ်၊ မန်ယူကို ကြီးမားတဲ့ ရလဒ်တွေရအောင်၊ ဖလားတွေရအောင်၊ နံပါတ်တစ်အသင်းဖြစ်ပြီး အောင်မြင်မှုတွေရအောင် ကျွန်တော် ကူညီပေးသွားမှာပါ”
ပရိတ်သတ်တွေအတွက် သတင်းစကား
နည်းပြဆိုးလ်ရှားနဲ့ အရင်က ကစားဖော်ဖြစ်ခဲ့ပြီး ကောင်းမွန်တဲ့ဆက်ဆံရေးရှိကြောင်း၊ လက်ရှိမှာ ဆိုးလ်ရှားက နည်းပြဖြစ်နေတဲ့အတွက် အသင်းအောင်မြင်ရေး နည်းပြလိုချင်တာ ဘာမဆို လုပ်ပေးသွားမယ်လို့ ရော်နယ်ဒိုက ဆိုပါတယ်။
ရော်နယ်ဒိုအမည်နဲ့သီချင်းကို အမြဲတမ်းဆိုနေပြီး၊ အသင်းပြန်ရောက်လာတာကို သောင်းသောင်းဖျဖျ ကြိုဆိုနေတဲ့ ပရိတ်သတ်ကို ဘာပြောချင်လဲလို့ မေးမြန်းရာမှာတော့ ရော်နယ်ဒိုက မန်ယူပရိတ်သတ်တွေဟာ အထူးစပါယ်ရှယ်ဖြစ်ပြီး၊ အရင်ရော်နယ်ဒိုကို မကြာခင်ပြန်မြင်ရတော့မယ်လို့ သတင်းစကားပါးချင်ကြောင်း ဖြေကြားခဲ့ပါတယ်။
“ပရိတ်သတ်ဆိုတာ ဘောလုံးအားကစားရဲ့ သော့ချက်ပါ။ အရင်တစ်နှစ်နဲ့မတူတာက အခုနှစ်မှာ ဘောလုံးကွင်းတွေထဲ ပရိတ်သတ်တွေ ပြန်ရောက်လာကြပါပြီ။ ပရိတ်သတ်တွေက အဓိကဖြစ်ပါတယ်။ မန်ယူပရိတ်သတ်တွေကတော့ အထူးစပါယ်ရှယ်ပါ။ ကျွန်တော် သူတို့ကို ကောင်းကောင်းမှတ်မိတယ်။ သူတို့ ကျွန်တော့်နာမည်နဲ့သီချင်းကို အမြဲတမ်းဆိုနေတာကို ကျွန်တော်သိတယ်။ အဲဒီအတွက်လည်း တော်တော်ပျော်ရွှင်ရပါတယ်။ အရင်ကလိုပဲ ကွင်းထဲမှာ အဆုံးစွန်ဆုံးလုပ်ပြဖို့ ကျွန်တော် ဆုံးဖြတ်ထားတယ်။ အကောင်းဆုံးဖြစ်အောင် ကြိုးစားမယ်။ ဂိုးတွေသွင်းမယ်၊ အသင်းဖော်တွေကို ဖန်တီးပေးမယ်၊ ဖလားတွေယူမယ်။ ပရိတ်သတ်တွေနဲ့ အရမ်းအရမ်းကို တွေ့ချင်နေပါပြီ”
Ref: manutd.com
