စက်တင်ဘာ ၂၂၊ ၂၀၁၄
M-Media
– ပရီးမီးယားလိဂ် ပွဲစဉ် ၅ ရဲ့ လက်ကျန်လေးပွဲကို ယမန်နေ့ညမှာ ကစားခဲ့ပြီး မထင်မှတ်တဲ့ ရလဒ်တွေလည်း ထွက်ပေါ်လာခဲ့ပါတယ်။
ဘောလုံးပိုင်ဆိုင်မှုအသာရပြီး ၅၇ မိနစ်အထိ ၃ ဂိုး ၁ ဂိုးနဲ့ ဦးဆောင်နိုင်ခဲ့တဲ့ မန်ယူတို့ တန်းတက် လက်စတာကို ရှုံးခဲ့သလို၊ စောစောစီးစီး ဦးဆောင်ဂိုးရခဲ့တဲ့ အဲဗာတန်တို့လည်း ခရစ္စတယ်ပဲလေ့စ်ကို ရှုံးခဲ့ပါတယ်။ ဒီတစ်ပတ်ရဲ့ Match of The Week ဖြစ်တဲ့ မန်စီးတီးနဲ့ ချယ်ဆီးတို့ ပွဲမှာတော့ ၁ ဂိုးစီ သရေကျခဲ့ပါတယ်။
ပြီးခဲ့တဲ့ တစ်ပတ်ကမှ ပရီးမီးယားလိဂ် နိုင်ပွဲစရခဲ့တဲ့ မန်ယူတို့ အဝေးကွင်းမှာ လက်စတာကို သိသိသာသာပဲ ဖိကစားနိုင်ခဲ့ပါတယ်။ ၁၃ မိနစ်နဲ့ ၁၆ မိနစ်တို့မှာ ဗန်ပါစီနဲ့ ဒီမာရီယာတို့က ဦးဆောင်ဂိုတွေသွင်းခဲ့ပြီး ၅၇ မိနစ်အရောက်မှာ မန်ယူတို့ ၃ ဂိုး ၁ ဂိုးနဲ့ ဦးဆောင်နိုင်ခဲ့ပေမယ့် နောက်ပိုင်းမှာတော့ မန်ယူခံစစ်ဟာ လက်စတာရဲ့ ဂိုး ၄ ဂိုးကို ခွင့်ပြုခဲ့ရပါတယ်။ မန်နောက်တန်းရဲ့ အမှားလို့ ပြောလို့ရပေမယ့် တစ်ပွဲလုံးမှာ ဂိုးကန်သွင်းခွင့် ၅ ကြိမ်သာရပြီး ၅ ဂိုး သွင်းယူနိုင်ခဲ့တဲ့ လက်စတာ ကစားသမားတွေရဲ့ အဆုံးသတ်သေချာမှုကတော့ ချီးကျူးစရာပါပဲ။
ဒီနိုင်ပွဲဟာ လက်စတာတို့အတွက် ၁၉၉၈ နောက်ပိုင်း မန်ယူကို ပထမဆုံး အနိုင်ရခြင်းလည်းဖြစ်ပါတယ်။ နည်းပြဗန်ဂါးလ်ကတော့ စိတ်ပျက်စရာ ရလဒ်ဖြစ်တယ်လို့ဆိုပြီး မိမိတို့အသင်း တိုးတက်လာပါလိမ့်မယ်လို့ ပွဲအပြီးမှာ ပြောကြားခဲ့ပါတယ်။
မန်စီးတီးနဲ့ ချယ်ဆီးတို့ပွဲမှာတော့ အိမ်ရှင်မန်စီးတီးတို့ ချယ်ဆီးကစားသမားဟောင်း လမ်းပတ်ရဲ့ သွင်းဂိုးနဲ့ အဖိုးတန် တစ်မှတ်ရခဲ့ပါတယ်။ မန်စီးတီးတို့ ပွဲကိုစိုးမိုးခဲ့ပြီး ဂိုးသွင်းခွင့်တွေလည်းရခဲ့ပေမယ့် ၆၆ မိနစ်မှာ နောက်ခံလူ ဇာဘလက်တာ နှစ်ဝါတစ်နီနဲ့ အထုတ်ခံလိုက်ရတာက ထိုးနှက်ချက်တစ်ခုဖြစ်ခဲ့ပါတယ်။ အဲဒီနောက်မှာ ချယ်ဆီးတို့ ပထမဆုံးအကြိမ် မန်စီးတီးဂိုးပေါက်ကို ခြိမ်းခြောက်နိုင်ခဲ့ပြီး အဲဒီအခွင့်အရေးကနေပဲ ၇၁ မိနစ်မှာ အန်ဒရီ ရှူရဲလ်က ဦးဆောင်ဂိုး သွင်းပေခဲ့ပါတယ်။ ဒါပေမယ့် ကိုလာရော့ဗ်အစား ၀င်လာတဲ့ လမ်းပတ်က မီလ်နာရဲ့ ဖန်တီးမှုကတစ်ဆင့် ၈၅ မိနစ်မှာ ချေပဂိုး သွင်းယူပေးခဲ့တာကြောင့် အိမ်ရှင်မန်စီးတီးတို့ အဖိုးတန် သရေတစ်မှတ် ရခဲ့တာဖြစ်ပါတယ်။
မာတီနက်ဇ်ရဲ့ အဲဗာတန်ကတော့ အိမ်ကွင်းမှာ ပွဲအစ ၉ မိနစ်မှာပဲ ဦးဆောင်ဂိုးရခဲ့ပြီး ဘောလုံးပိုင်ဆိုင်မှုအသာနဲ့ ပွဲကို တစ်ဖက်သတ် စိုးမိုးထားခဲ့ပေမယ့် မထိန်းနိုင်ခဲ့ပဲ ဂိုးတွေပြန်ပေးလိုက်ရတာကြောင့် ပွဲအပြီးမှာ ၃ ဂိုး ၂ ဂိုးနဲ့ ရှုံးနိမ့်ခဲ့ရပါတယ်။ စပါးကလည်း အိမ်ကွင်းမှာပဲ ၀က်စ်ဘရွန်းကို နောက်ကျဂိုး တစ်ဂိုးတည်းနဲ့ အရှုံးပေးခဲ့ရပါတယ်။
ပရီးမီးယားလိဂ် ပွဲစဉ် ၅ ရဲ့ ရလဒ်များကတော့ အောက်ပါအတိုင်းဖြစ်ပါတယ်။
လက်စတာ ၅-၃ မန်ယူ
စပါး ၀-၁ ၀က်စ်ဘရွန်း
အဲဗာတန် ၂-၃ ခရစ္စတယ်ပဲလေ့စ်
မန်စီးတီး ၁-၁ ချယ်ဆီး
ကျူပီအာရ် ၂-၂ စတုတ်စီးတီး
အက်စတွန်ဗီလာ ၀-၃ အာဆင်နယ်
ဘန်လေ ၀-၀ ဆန်းဒါးလန်း
နယူးကာဆယ် ၂-၂ ဟားလ်စီးတီး
ဆွမ်ဆီး ၀-၁ ဆောက်သက်တမ်
ဝက်စ်ဟမ်း ၃-၁ လီဗာပူးလ်
