News @ M-Media

Blog

  • မြန်မာခရီးတွင် သက်ဆိုင်သူအားလုံးနှင့် တွေ့ခွင့်ရရန် အာဆီယံအထူးကိုယ်စားလှယ် တောင်းဆို

    မြန်မာခရီးတွင် သက်ဆိုင်သူအားလုံးနှင့် တွေ့ခွင့်ရရန် အာဆီယံအထူးကိုယ်စားလှယ် တောင်းဆို

    ဩဂုတ် ၇၊ ၂၀၂၁
    M-Media

    -မြန်မာနိုင်ငံကို သွားရောက်တဲ့အခါ နိုင်ငံရေးနယ်ပယ်က သက်ဆိုင်သူတွေအားလုံးနဲ့ တွေ့ဆုံခွင့်ရချင်တယ်လို့ မြန်မာနိုင်ငံဆိုင်ရာ အာဆီယံအထူးကိုယ်စားလှယ် အရ်ဝမ် ယူစွဖ်က ပြောဆိုလိုက်ပါတယ်။

    ဘရူးနိုင်း ဒုတိယနိုင်ငံခြားရေးဝန်ကြီး အရ်ဝမ်ဟာ ဒီကနေ့ ဘန်ဒါဆီရီဘဂ်ဝမ်မှာ သတင်းစာရှင်းလင်းပွဲတစ်ခု လုပ်ခဲ့ပါတယ်။ မြန်မာနိုင်ငံကို ဘယ်အချိန် သွားမလဲဆိုတာ အတိအကျ မပြောခဲ့ဘဲ စီစဉ်နေဆဲသာ ရှိသေးတယ်လို့ ဆိုပါတယ်။

    “မြန်မာနိုင်ငံကို သွားရောက်ဖို့ စီစဉ်နေတယ်။ ဇွန်လမှာ သွားခဲ့သလိုမျိုးမဟုတ်ဘဲ သေသေချာချာ စီစဉ်ပြီးမှ သွားရမှာပါ”

    သွားတဲ့အခါ ထိရောက်တဲ့ ဆွေးနွေးမှုတွေ အထူးသဖြင့် အကြမ်းဖက်မှု ရပ်တန့်ရေး၊ ဆွေးနွေးညှိနှိုင်ရေး၊ ကြားဝင်စေ့စပ်ပေးရေး လုပ်ဆောင်ဖို့ ရည်ရွယ်ထားတယ်လို့လည်း အရ်ဝမ်ယူစွပ်က ပြောပါတယ်။ မြန်မာနိုင်ငံက သက်ဆိုင်သူအားလုံးနဲ့ တွေ့ခွင့်ရဖို့ အရေးကြီးတယ်ဆိုတာကိုလည်း သူက ထောက်ပြခဲ့ပါတယ်။

    မြန်မာနိုင်ငံက နိုင်ငံရေးမတည်ငြိမ်မှုတွေကို ဖြေရှင်းပေးရေးအပြင် စစ်ကောင်စီရဲ့ အကြမ်းဖက်မှုနဲ့ ကိုဗစ်ဒဏ်ကို ပူးတွဲခံစားနေရတဲ့ မြန်မာပြည်သူတွေအတွက် အာဆီယံအဖွဲ့က လူသားချင်း စာနာထောက်ထားမှုဆိုင်ရာ အကူအညီ ပေးအပ်မယ့်ကိစ္စကိုလည်း အရ်ဝမ်က ကြီးကြပ်ရမှာ ဖြစ်ပါတယ်။

    အကူအညီတွေပေးအပ်မယ့် အချိန်အတိအကျကို အရ်ဝမ်က မနေ့ကသတင်းစာရှင်းလင်းပွဲမှာ မပြောခဲ့ပါဘူး။ ဒီအတွက် လိုအပ်တဲ့ ကူညီပံ့ပိုးပေးမှုတွေ ရမယ်လို့ မျှော်လင့်ကြောင်း သူက ဆိုပါတယ်။

    မြန်မာ့အရေးအတွက် ဧပြီလအတွင်းကပြုလုပ်ခဲ့တဲ့ အာဆီယံ ထိပ်သီးအစည်းအဝေးမှာ အာဆီယံ အထူးကိုယ်စားလှယ်တစ်ဦး ခန့်ထားရေးအပါအဝင် အချိက် ၅ ​ချက်ကို သဘောတူခဲ့ကြတာပါ။ ဒါပေမယ့် ဒီသဘောတူညီချက်တွေကို အကောင်အထည်ဖော်နိုင်ရေး မြန်မာစစ်အာဏာရှင်တွေက စိတ်ဝင်စားမှု သိပ်မပြဘဲ အာဆီယံဟာ ထိထိရောက်ရောက် ဖြေရှင်းပေးနိုင်မှာမဟုတ်ဘူးဆိုတဲ့ ဝေဖန်မှုတွေလည်း ရှိနေပါတယ်။

    Ref: Nikkei Asia

  • ကာကွယ်ဆေးမတိုးသည့် ပုံပြောင်းကိုဗစ်အသစ် Lambda အတွက် ပညာရှင်များ သတိပေး

    ကာကွယ်ဆေးမတိုးသည့် ပုံပြောင်းကိုဗစ်အသစ် Lambda အတွက် ပညာရှင်များ သတိပေး

    ဩဂုတ် ၇၊ ၂၀၂၁
    M-Media

    -မူရင်းကိုဗစ်ပိုးထက် ပိုမိုပြန့်နှံ့လွယ်ကာ၊ ကာကွယ်ဆေးဒဏ်ကို ပိုခံနိုင်မယ့် ပုံပြောင်းကိုဗစ်အသစ် Lambda ကို သတိထားကြဖို့ ပညာရှင်တွေက သတိပေးလိုက်ပါတယ်။

    Lambda ဗိုင်းရပ်စ်ကို ပြီးခဲ့တဲ့နှစ် ဩဂုတ်လက ပီရူးနိုင်ငံမှာ စတင်တွေ့ရှိခဲ့တာဖြစ်ပြီး အဲဒီနောက် တောင်အမေရိကတစ်ဝှမ်း ပြန့်နှံခဲ့ပါတယ်။ အာရှမှာတော့ ဂျပန်က Lambda ကူးစက်သူတစ်ဦးကို ပထမဆုံးတွေ့ရကြောင်း မနေ့က ထုတ်ပြန်ခဲ့ပါတယ်။ ကူးစက်ခံရသူ အသက် ၃၀ ကျော် အမျိုးသမီးဟာ ဇူလိုင်လ ၂၀ ရက်နေ့ ပီရူးနိုင်ငံကနေ ပြန်လာသူပါ။

    Lambda ဟာ နိုင်ငငံတော်တောာ်များများမှာ လက်ရှိပြန့်နှံ့နေတဲ့ Delta ထက် ပိုပြီးအန္တရာယ်ရှိလားဆိုတာကို ရှင်းရှင်းလင်းလင်း မသိရပေမယ့် တိုကျိုတက္ကသိုလ်က ပညာရှင်တွေကတော့ လူ့အဖွဲ့အစည်းအပေါ် ခြိမ်းခြောက်မှုသစ် ဖြစ်လာနိုင်တယ်လို့ သတိပေးခဲ့ပါတယ်။

    ဓာတ်ခွဲခန်း စမ်းသပ်မှုတွေအရ Lambda ဟာ လက်ရှိ ထိုးပေးနေတဲ့ ကိုဗစ်ကာကွယ်ဆေးတွေက ထုတ်ပေးတဲ့ ကိုယ်ခံစွမ်းအားကို ခံနိုင်ရည်ရှိတယ်ဆိုတာ တွေ့ခဲ့ရပါတယ်။

    ကမ္ဘာ့ကျန်းမာရေးအဖွဲ့ WHO က ပုံပြောင်းကိုဗစ် Lambda ဟာ variant of interest (VOI) အမျိုးအစား ဗိုင်းရပ်စ်မျိုးဖြစ်တယ်လို့ ဇွန်လ ၁၄ ရက်နေ့မှာ သတ်မှတ်ခဲ့ပြီး ဒါဟာ သာမန် ပုံပြောင်းကိုဗစ်ပိုးထက် ပိုပြီး အန္တရာယ်ရှိနိုင်တယ်လို့ ရည်ညွှန်းတာဖြစ်သလို၊ နောက်ထပ် ကြီးမားတဲ့ ခြိမ်းခြောက်မှုတစ်ခု ဖြစ်လာနိုင်တယ်ဆိုတာ ကမ္ဘာ့နိုင်ငံတွေကို သတိပေးလိုက်တာလည်း ဖြစ်ပါတယ်။

    ဧပြီလနောက်ပိုင်း ပီရူးမှာဖြစ်ပွားတဲ့ ကိုဗစ်ကူးစက်မှုရဲ့ ၈၁ ရာခိုင်နှုန်းဟာ Lambda ဗိုင်းရပ်စ်ကြောင့် ဖြစ်ပြီး အဲဒီမတိုင်ခင် ၅၀ ရာခိုင်နှုန်းရှိရာကနေ သိသိသာသာ မြင့်တက်လာတာ ဖြစ်ပါတယ်။ အမေရိကန်မှာလည်း Lambda ကိုဗစ်ကူးစက်မှု ၁၀၃၇ ခု ရှိနေပါတယ်။

    Ref: Reuters, Japan Times

  • ကုလမြန်မာသံအမတ် ဦးကျော်မိုးထွန်းကို ကားမတော်တဆပုံစံ လုပ်ကြံရန် ကြံစည်ခဲ့ကြ

    ကုလမြန်မာသံအမတ် ဦးကျော်မိုးထွန်းကို ကားမတော်တဆပုံစံ လုပ်ကြံရန် ကြံစည်ခဲ့ကြ

    ဩဂုတ် ၇၊ ၂၀၂၁
    M-Media

    -မြန်မာစစ်တပ်ကို လက်နက်ရောင်းနေတဲ့ ထိုင်းလက်နက်ပွဲစားနဲ့ပေါင်းပြီး ကုလဆိုင်ရာ မြန်မာသံအမတ် ဦးကျော်မိုးထွန်းကို လုပ်ကြံဖို့ကြံစည်တဲ့ မြန်မာနိုင်ငံသား နှစ်ဦးကို ဖမ်းဆီးထားကြောင်း အမေရိကန်က မနေ့မှာ ထုတ်ပြန်ပါတယ်။

    အသက် ၂၈ နှစ်အရွယ် ဖြိုးဟိန်းထွဋ်နဲ့ အသက် ၂၀ အရွယ် ရဲဟိန်းဇော်တို့ဖြစ်ပြီး နယူးယောက်မြို့မှာ နေထိုင်ကြသူတွေပါ။

    နယူးယောက် တောင်ပိုင်းခရိုင်တရားရုံးက အစိုးရရှေ့နေ အော်ဒရီ စထရာအက်စ်ရဲ့ သောကြာနေ့ ထုတ်ပြန်ချက်မှာ ဒီအမျိုးသားနှစ်ဦးဟာ မြန်မာစစ်တပ်ကို လက်နက်ရောင်းနေတဲ့ ထိုင်းနိုင်ငံက လက်နက်ပွဲစားနဲ့ပေါင်းပြီး သံအမတ် ဦးကျော်မိုးထွန်းကို အပြင်းအထန် ထိခိုက်နာကျင်အောင်၊ ဒါမှမဟုတ် သေဆုံးအောင် ပြုလုပ်ဖို့ စီစဉ်ခဲ့ကြတယ်လို့ ဖော်ပြထားပါတယ်။

    ဦးကျော်မိုးထွန်းက ဒီကိစ္စကို အင်္ဂါနေ့မှာ သိရှိခဲ့ပြီးတဲ့နောက် အမေရိကန်အစိုးရနဲ့ ဥပဒေစိုးမိုးရေးအဖွဲ့တွေကို သတင်းပို့တိုင်ကြားခဲ့တယ်လို့ ပြောပါတယ်။ လက်ရှိမှာတော့ အမေရိကန်စုံစမ်းစစ်ဆေးရေးဗျူရို FBI နဲ့ နယူးယောက်ရဲတပ်ဖွဲ့က ဦးကျော်မိုးထွန်းကို ၂၄ နာရီ လုံခြုံရေးပေးထားပါတယ်။

    ဖြိုးဟိန်းထွဋ်က ထိုင်းလက်နက်ပွဲစားတစ်ဦးဟာ သူ့ကို Facebook နဲ့ FaceTime ကနေ ဆက်သွယ်လာပြီး ဦးကျော်မိုးထွန်းကို ရာထူးကနေဆင်းပေးရေး ဖိအားပေးဖို့ ကြိုးပမ်းရာမှာ ကြေးစားတွေငှားပြီး တိုက်ခိုက်ပေးဖို့ ပြောဆိုခဲ့တယ်လို့ FBI ကို ထွက်ဆိုခဲ့ကြောင်း တရားစွဲဆိုမှုမှတ်တမ်းမှာ ဖော်ပြထားပါတယ်။

    ဒီလိုခြိမ်းခြောက်ပေမယ့် ဦးကျော်မိုးထွန်းက ရာထူးကနေ မဆင်းပေးဘူးဆိုရင် ကြေးစားတွေက ဦးကျော်မိုးထွန်းကားတာယာကို တစ်ခုခုဖြစ်အောင်လုပ်ထားကာ ကားမောင်းတဲ့အချိန် မတော်တဆဖြစ်တဲ့ပုံစံမျိုး လုပ်ကြံဖို့အတွက် ထိုင်းလက်နက်ပွဲစားက ပြောခဲ့ပါတယ်။

    လုပ်ကြံဖို့အစီအစဉ်အတွက် ကြိုတင်စရံငွေအဖြစ် အမေရိကန်ဒေါ်လာ ၄ ထောင်ကို ရဲဟိန်းဇော်က ဖြိုးဟိန်းထွဋ်ကို လွှဲပေးခဲ့ပြီး၊ နောက်ထပ် ဒေါ်လာ တစ်ထောင်ပေးမယ်လို့ ဖုန်းနဲ့ ပြောဆိုခဲ့ကြောင်း တရားစွဲဆိုမှု မှတ်တမ်းမှာ ထည့်သွင်းဖော်ပြထားပါတယ်။ ဖြိုးဟိန်းထွဋ်နဲ့ ​ရဲဟိန်းဇော်တို့ရဲ့ ဖုန်းပြောဆိုမှုမှတ်တမ်းကိုလည်း အမေရိကန်ရဲတပ်ဖွဲ့က ရရှိထားပါတယ်။

    မြန်မာသံအဖွဲ့ရဲ့ စေတနာ့ဝန်ထမ်း လုံခြုံရေးအစောင့်တစ်ဦးကို ဖြိုးဟိန်းထွဋ်က ချဉ်းကပ်စည်းရုံးရာကနေ ဒီအစီအစဉ်ပေါက်ကြားခဲ့တာပါ။ ဒီလိုစီစဉ်မှုတွေဟာ ဇူလိုင်လကနေ ဩဂုတ်လ ၅ အတွင်း ဖြစ်ပွားခဲ့တာဖြစ်ပြီး လုပ်ကြံမှုကိုတော့ ဦးကျော်မိုးထွန်းနေထိုင်တဲ့ နယူးယောက်မြို့ ဝက်စ်ချက်စတာကောင်တီမှာ ပြုလုပ်ဖို့ စီစဉ်ထားတာပါ။

    နယးယောက်ရဲတပ်ဖွဲ့ ကော်မရှင်နာ ဒါမော့ရှီယာရဲ့ ထုတ်ပြန်ချက်မှာ ဒီလိုစီစဉ်သူတွေကို တိုက်ခိုက်မှုမပြုလုပ်ခင် တရားဥပေဒအတိုင်း စီရင်နိုင်ဖို့ မိမိတို့ရဲဌာန၊ နယူးယောက်တောင်ပိုင်းခရိုင် တရားရေးဌာနတို့က မနားမနေကြိုးပမ်းဆောင်ရွက်ခဲ့တယ်လို့ ဖော်ပြထားပါတယ်။

    ဖြိုးဟိန်းထွဋ်နဲ့ ရဲဟိန်းဇော်တို့ဟာ နိုင်ငံခြားတာဝန်ရှိသူတစ်ဦးကို အပြင်းအထန်နာကျင်အောင် တိုက်ခိုက်ဖို့ ကြံစည်မှုစွဲချက်နဲ့ တရားစွဲဆိုခံထားရပြီး ပြစ်မှုထင်ရှားရင် အမြင့်ဆုံး ထောင်ဒဏ် ၅ နှစ်အထိ ကျခံရမှာ ဖြစ်ပါတယ်။

    ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက် ပြုလုပ်တဲ့ ကုလသမဂ္ဂ အစည်းအဝေးတစ်ခုမှာ ဦးကျော်မိုးထွန်းက ပြည်သူ့ဖက်ကရပ်တည်ကြောင်း ပြောကြားခဲ့တဲ့အတွက် စစ်ကောင်စီဟာ ဖေဖော်ဝါရီ ၂၇ ရက်နေ့မှာ ဦးကျော်မိုးထွန်းကို ဖြုတ်ခဲ့ပါတယ်။ ဒါပေမယ့် ရာထူးကနေဆင်းပေးဖို့ ဦးကျော်မိုးထွန်းက ငြင်းဆိုခဲ့ပြီး ကုလသမဂ္ဂကလည်း သူ့ကိုသာ မြန်မာသံအမတ်အဖြစ် ဆက်လက်အသိအမှတ်ပြုထားပါတယ်။

    ဒီလိုလုပ်ကြံဖို့ကြိုးစားမှု နောက်ကွယ်မှာ မြန်မာစစ်အာဏာရှင်တွေ ပါဝင်ပတ်သက်နေတယ်ထင်လားလို့ မေးမြန်းရာမှာတော့ ဒီအစီအစဉ်ကို ဘယ်သူဘယ်၀ါက လုပ်တယ်ဆိုတာမျိုး မစွပ်စွဲလိုကြောင်း၊ မိမိအနေနဲ့ လုပ်ငန်းတာဝန်တွေကို ဆက်လက်ထမ်းဆောင်သွားမှာဖြစ်ကြောင်း ဦးကျော်မိုးထွန်းက CNN သတင်းဌာနကို ပြောကြားခဲ့ပါတယ်။

    “ဖြစ်လာတာတွေက တကယ့်ကို စိတ်ပျက်စရာပါ။ ဒါပေမယ့် ကျွန်တော့်ရဲ့ နေ့စဉ်အလုပ်ကိုတော့ ထိခိုက်မှာမဟုတ်ပါဘူး။ လုပ်စရာရှိတာကို ဆက်လုပ်သွားမှာဖြစ်ပြီး တိုင်းပြည်အတွက်၊ ပြည်သူအတွက် ကျွန်တော် လုပ်ဆောင်နေတာတွေကို ဒီအဖြစ်အပျက်က အဟန့်အတား ဖြစ်စေမှာ မဟုတ်ပါဘူး”

    မိမိကို ထောက်ခံအားပေးမှု၊ ကူညီမှု၊ ဒီကိစ္စအပေါ်မှာ ပရော်ဖက်ရှင်နယ်ပီသစွာ တုန့်ပြန်ဆောင်ရွက်မှုအတွက် အမေရိကန်အစိုးရနဲ့ ဥပဒေစိုးမိုးရေး အေဂျင်စီတွေကို ကျေးဇူးတင်တယ်လို့လည်း ဦးကျော်မိုးထွန်းက ထည့်သွင်းပြောဆိုခဲ့ပါတယ်။

    “ကျွန်တော့်ရဲ့အသက်ကို သူတို့ကယ်တင်ပြီး၊ ကျွန်တော့်ဆီလာမယ့်အန္တရာယ်ကို တားဆီးပေးခဲ့တာပါ”

    Ref : CNN

  • ကာကွယ်ဆေးသွားထိုးလျှင် အဖမ်းခံရမည်ကို မလေးရှားရှိ အထောက်အထားမဲ့ နိုင်ငံခြားသားများ စိုးရိမ်နေ

    ကာကွယ်ဆေးသွားထိုးလျှင် အဖမ်းခံရမည်ကို မလေးရှားရှိ အထောက်အထားမဲ့ နိုင်ငံခြားသားများ စိုးရိမ်နေ

    ဩဂုတ် ၆၊ ၂၀၂၁
    M-Media

    Peoples queueing for the walk-in vaccination at the IDCC PPV in Shah Alam yesterday. — IZZRAFIQ ALIAS/The Star

    -နိုင်ငံအတွင်းရှိနေတဲ့ အထောက်အထားမဲ့ နိုင်ငံခြားသားတွေ၊ တရားမဝင်အလုပ်သမားတွေ၊ ဒုက္ခသည်တွေ ကာကွယ်ဆေးထိုးဖို့ မလေးရှားအစိုးရက ဖိတ်ခေါ်ထားပေမယ့် ဆေးသွားထိုးတဲ့အချိန် အဖမ်းခံရမှာကို နိုင်ငံခြားသားတွေက ကြောက်ရွံ့နေကြပါတယ်။

    မလေးရှားမှာ အထောက်အထားမဲ့ နိုင်ငံခြားသား ၂ သန်းကနေ ၄ သန်းလောက်ရှိတယ်လို့ နိုင်ငံတကာ ပြောင်းရွှေ့အခြေချသူများအဖွဲ့ (IOM) က ထုတ်ပြန်ထားပါတယ်။ ၂၀၂၁ ခုနှစ် ဇွန်လအထိ ကုလသမဂ္ဂ ဒုက္ခသည်များဆိုင်ရာအဖွဲ့ UNHCR ရဲ့ မလေးရှားရုံးခွဲမှာ မှတ်ပုံတင်ထားတဲ့ ဒုက္ခသည်အရေအတွက်က ၁ သိန်း ၈ သောင်းလောက် ရှိနေပါတယ်။

    တစ်နိုင်ငံလုံး ကိုဗစ်ခံနိုင်ရည်စွမ်း ရရှိဖို့ မလေးရှားက လုပ်ဆောင်နေရာမှာ ဒုက္ခသည်တွေ၊ အထောက်အထားမဲ့ နိုင်ငံခြားသားတွေပါ ကာကွယ်ဆေးထိုးဖို့ တိုက်တွန်းအားပေးတာတွေ ရှိလာပြီး ဇူလိုင်လနှောင်းပိုင်းကစလို့ အလွယ်တကူ ဝင်ထိုးလို့ရမယ့် walk-in စင်တာတွေပါ ဖန်တီးပေးလာပါတယ်။

    ဒါပေမယ့် ကိုဗစ်ကပ်ရောဂါစတင်ပြီးနောက်ပိုင်း နိုင်ငံခြားသားတွေနဲ့ ဒုက္ခသည်တွေအပေါ် ​ပြစ်တင်ပြောဆိုတာ၊ ဖမ်းဆီးထိန်းသိမ်းမှု တိုးမြှင့်ဆောင်ရွက်လာတာတွေ ရှိတာကြောင့် အထောက်အထားမဲ့ နိုင်ငံခြားသားတွေက ကာကွယ်ဆေးသွားထိုးဖို့ တွန့်ဆုတ်နေကြပါတယ်။

    ကွာလာလမ်ပူမှာနေထိုင်တဲ့ ရိုဟင်ဂျာအမျိုးသား မိုဟာမက် ဇူဘိုင်းက ဩဂုတ်လအစောပိုင်းမှာ ကာကွယ်ဆေးထိုးဖို့ စာရင်းပေးထားပေမယ့် ဇနီးဖြစ်သူက ဒုက္ခသည်အဖြစ် တရားဝင်အထောက်အထား မရသေးတာကြောင့် နိုင်ငံခြားသားတွေအတွက် ဖွင့်လှစ်ထားတဲ့ walk-in ကာကွယ်ဆေးစင်တာမှာ သွားထိုပေးရမလား မဆုံးဖြတ်တတ်အောင် ဖြစ်နေတယ်လို့ ပြောပါတယ်။ ဖမ်းဆီးခံရမှာကိုလည်း သူက ကြောက်ရွံ့နေပါတယ်။

    “ကျွန်တော့်ဇနီးကို ကာကွယ်ဆေးထိုးဖို့ ခေါ်သွားရင် လမ်းမှာ ရဲက တားပြီး စစ်နိုင်တယ်။ သွားတဲ့လမ်းမှာ၊ ကာကွယ်ဆေးစင်တာမှာ အထောက်အထားမဲ့သူတွေကို မဖမ်းဘူးလို့ အစိုးရက အာမခံမှသာ ကျွန်တော့်ဇနီးကို ခေါ်သွားလို့ရမှာပါ ”

    ကာကွယ်ဆေးစထိုးတဲ့ ဖေဖော်ဝါရီလကတည်းက နိုင်ငံအတွင်းနေထိုင်တဲ့ သန်းနဲ့ချီတဲ့ အထောက်အထားမဲ့ နိုင်ငံခြားသားတွေနဲ့ ယုံကြည်မှုတည်ဆောင်ဖို့ မလေးရှားအစိုးရက ကြိုးစားခဲ့ပေမယ့် ဇွန်လအတွင်း ဖမ်းဆီးမှုတွေပြုလုပ်ခဲ့တဲ့အတွက် ယုံကြည်မှုတွေ ပျက်ပြားသွားခဲ့ပါတယ်။

    ကိုဗစ်ကပ်ရောဂါစတင်တဲ့အချိန်တုန်းကလည်း စမ်းသပ်ရေးနဲ့ ကုသရေးတို့မှာ နေထိုင်ခွင့်အထောက်အထားနဲ့ ပတ်သက်ပြီး စစ်ဆေးမှာမဟုတ်ဘူးလို့ မလေးရှားအစိုးရက ကြေငြာခဲ့ပေမယ့် နောက်ပိုင်းမှာ ဖမ်းဆီးမှုတွေ လုပ်ခဲ့ပါတယ်။

    ချော့တစ်လှည့်ခြောက်တစ်ခါ

    အရင်က ကာကွယ်ရေးဝန်ကြီးဖြစ်ခဲ့ပြီး လက်ရှိ ဒုတိယဝန်ကြီးချုပ်ဖြစ်နေတဲ့ အစ္စမာအီလ် ဆာဘရီ ယာကွဘ်က ကိုဗစ်စမ်းသပ်မှု၊ ကုသမှုတွေလုပ်တဲ့အခါ တရားမဝင် နေထိုင်နေသူတွေကို အရေးယူတာမျိုး မလုပ်သင့်ဘူးလို့ ကိုဗစ်ကပ်ရောဂါ စတဲ့ ၂၀၂၀ ခုနှစ် မတ်လမှာ ပြောကြားခဲ့ဖူးပါတယ်။ ဒါပေမယ့် နောက်ပိုင်းမှာတော့ ဆာဘရီကိုယ်တိုင်က လွတ်ငြိမ်းချမ်းသာခွင့်ပေးတဲ့ကာလ ကုန်သွားပြီလို့ပြောခဲ့ကာ ကိုဗစ်လော့ဒေါင်းကာလမှာ အထောက်အထားမဲ့ နိုင်ငံခြားသားတွေ နေထိုင်တဲ့ အဆောက်အဦးတွေ အလုပ်လုပ်တဲ့ နေရာတွေကို အာဏာပိုင်တွေက စီးနင်းဖမ်းဆီးတာတွေ လုပ်ဆောင်ခဲ့ပါတယ်။

    သိပ္ပံဆိုင်ရာဝန်ကြီးဖြစ်ပြီး ကာကွယ်ဆေးထိုးပေးရေးလုပ်ငန်းကို တာဝန်ယူဆောင်ရွက်နေတဲ့ ခိုင်ရီ ဂျမာလွတ်ဒင်က ကာကွယ်ဆေးထိုးပေးရေးမှာ နေထိုင်ခွင့် အထောက်အထား ရှိ၊ မရှိကိစ္စက အဟန့်အတားမဖြစ်သင့်ဘူးလို့ ကာကွယ်ဆေးထိုးတဲ့အစီအစဉ် စတင်တဲ့အချိန်မှာ ပြောကြားခဲ့ပါတယ်။

    ဒါပေမယ့် တစ်ချို့ အစိုးရတာဝန်ရှိသူတွေက အထောက်အထားမရှိသူတွေကို သတိပေးပြောဆိုတာတွေလည်း ရှိပါတယ်။

    ပြည်ထဲရေးဝန်ကြီး ဟမ်ဇာ ဇိုင်နွတ်ဒင်က မလေးရှားနိုင်ငံသားတွေကို ကာကွယ်ဖို့အတွက် အထောက်အထားမဲ့ နိုင်ငံခြားသားတွေကို ဖမ်းဆီးထိန်းသိမ်းထားသင့်ပြီး ဒါဟာ သူတို့ကို ကူညီရာလည်းရောက်တယ်လို့ မေလနှောင်းပိုင်းမှာ ပြောကြားခဲ့ပါတယ်။

    မလေးရှားဟာ တရားမဝင်အလုပ်သမားတွေ၊ နေထိုင်ခွင့်အထောက်အထားမရှိတဲ့သူတွေ ဖမ်းဆီးတာကို ဆက်လက်လုပ်ဆောင်နေပြီး ဇွန်လအတွင်းမှာပဲ UN ကဒ် ကိုင်ဆောင်ထားသူအပါအဝင် လူပေါင်း ၅၀၀ ကျော်လောက် ဖမ်းဆီးခံခဲ့ရပါတယ်။

    ဖမ်းဆီးထားတဲ့သူတွေကို ထားဖို့အတွက် ယာယီထိန်းသိမ်းရေးစင်တာတွေကိုလည်း မလေးရှားအစိုးရက ဆက်လက်ဆောက်လုပ်နေပါတယ်။

    ကုလသမဂ္ဂ ဒုက္ခသည်ကဒ်(UN ကဒ်) ကိုင်ဆောင်ထားတဲ့ ကချင်အမျိုးသမီး မနော်နော်က ဇူလိုင်လအတွင်း ဘူကစ်ဂျာလီအားကစားကွင်းမှာ ကာကွယ်ဆေးသွားထိုးတဲ့အချိန် မနှစ်မြို့ဖွယ်ရာ အခြေအနေနဲ့ ကြုံတွေ့ခဲ့ရတယ်လို့ ပြောပါတယ်။

    မနော်နော်တစ်ယောက် ကာကွယ်ဆေးအတွက် သဘောတူကြောင်း ဖောင်ဖြည့်နေတဲ့အချိန် မလေးရှား ပြည်သူ့စစ် စေတနာ့ဝန်ထမ်းအဖွဲ့ RELA က အဖွဲ့ဝင်တစ်ယောက် အနားကပ်လာပြီး မေးမြန်းစစ်ဆေးတာကို ခံခဲ့ရပါတယ်။ RELA အဖွဲ့ဟာ မလေးရှား ပြည်ထဲရေးဝန်ကြီးဌာန လက်အောက်ကဖြစ်ပြီး တရားမဝင် နိုင်ငံခြားသားတွေကို ကိုင်တွယ်ရာမှာ ပါဝင်တဲ့အဖွဲ့လည်း ဖြစ်ပါတယ်။ ကိုဗစ်ဆိုင်ရာ ကန့်သတ်ချက်တွေကို လိုက်နာစေရေး ကြပ်မတ်ဖို့အတွက် ဒီအဖွဲ့ကို ကာကွယ်ဆေးစင်တာတွေမှာ ချထားတာပါ။

    “(RELA အဖွဲ့သားတစ်ဦးက) လူအုပ်ကြားထဲမှာ ကျွန်မကို အော်ကျယ်ကျယ်နဲ့ပြောတယ်။ ရာဇဝတ်သားတစ်ယောက်လို၊ ဆက်ဆံတယ် လူအုပ်ကြားထဲမှာ အရှက်ခွဲတယ်လို့ ကျွန်မ ခံစားရပါတယ်။ ကျွန်မရဲ့ UN ကဒ်ကို သူနားမလည်ဘူး။ နိုင်ငံကူးလက်မှတ်မရှိဘဲ ငါတို့နိုင်ငံထဲကို ဘယ်လိုဝင်လာလဲ – လို့ သူက မလေးလို မေးပါတယ်”

    အဲဒီနောက် RELA အဖွဲ့ အရာရှိတစ်ဦးက မနော်နော်ရဲ့ အထောက်အထားတွေကို စစ်ဆေးပြီးနောက် သီးခြားအခန်းတစ်ခုထဲ ခေါ်သွားကာ ရဲအရာရှိတွေက ထပ်မံ စစ်ဆေးပြီး အဲဒီနောက်မှာမှ ကာကွယ်ဆေးထိုးခွင့် ရခဲ့ပါတယ်။

    လူဝင်မှုကြီးကြပ်ရေးဌာနရဲ့ စစ်ကြောရေးစခန်းထဲကို ရောက်သွားသလို ခံစားရတယ်လို့ မနော်နော်က သူ့အတွေ့အကြုံကို ဖွင့်ဟပါတယ်။

    “အဖမ်းများခံရမလားဆိုပြီး တော်တော်လေး စိုးရိမ်ခဲ့ရပါတယ်။ UN က အထောက်အထားရှိနေတာတောင်မှ ကျွန်မကို သူတို့ စစ်လားဆေးလားလုပ်တယ်။ အထောက်အထားမရှိတဲ့သူတွေ ဘယ်လိုလုပ် ကာကွယ်ဆေး သွားထိုးရဲမလဲ”

    Ref: Aljazeera

  • မြန်မာ့အရေး အာဆီယံကိုယ်စားလှယ်အပေါ် အလွန်အကျွံမမျှော်လင့်ရန် စင်ကာပူပြော

    မြန်မာ့အရေး အာဆီယံကိုယ်စားလှယ်အပေါ် အလွန်အကျွံမမျှော်လင့်ရန် စင်ကာပူပြော

    ဩဂုတ် ၆၊ ၂၀၂၁
    M-Media

    -မြန်မာနိုင်ငံက နိုင်ငံရေးပြဿနာကို ဖြေရှင်းဖို့အတွက် အာဆီယံအထူးကိုယ်စားလှယ်တစ်ဦး ခန့်အပ်ခဲ့ပေမယ့် အဲဒီအပေါ်မှာ လက်တွေ့မကျတဲ့ မျှော်လင့်ချက်တွေ မထားဖို့ စင်ကာပူနိုင်ငံခြားရေးဝန်ကြီး ဗီဗီယံ ဘာလာကရစ်ရှ်နန်က ပြောကြားလိုက်ပါတယ်။

    အာဆီယံဟာ ဘရူနိုင်းနိုင်ငံ ဒုတိယနိုင်ငံခြားရေးဝန်ကြီး အရ်ဝမ်ယူစွဖ်ကို မြန်မာနိုင်ငံဆိုင်ရာ အာဆီယံကိုယ်စားလှယ်အဖြစ် ဗုဒ္ဓဟူးနေ့က ခန့်အပ်ခဲ့ပါတယ်။ ဒါဟာ ဧပြီလက အာဆီယံထိပ်သီးအစည်းအဝေးမှာ မြန်မာ့အရေးဖြေရှင်းဖို့ သဘောတူညီခဲ့တဲ့ အချက်တွေထဲက တစ်ခု ဖြစ်ပါတယ်။

    စင်ကာပူနိုင်ငံခြားရေးဝန်ကြီး ဘာလာကရစ်ရှ်နန်က အာရ်ဝမ်ယူစွဖ်တစ်ယောက် မြန်မာ့နိုင်ငံရေးနယ်ပယ်က သက်ဆိုင်သူတွေအားလုံးနဲ့ တွေ့ခွင့် ရ၊ မရဟာ အဓိကမေးခွန်း ဖြစ်နေတယ်လို့ အာဆီယံနိုင်ငံခြားရေးဝန်ကြီးတွေရဲ့ တစ်ပတ်တာ အစည်းအဝေးအပြီး ဒီကနေ့ညနေပိုင်းကလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။

    “နိုင်ငံရေးအရ အဖြေရှာမှုဟာ အရေးပါပေမယ့် ခက်ခဲပြီး ဆွေးနွေးညှိနှိုင်းမှုတွေကလည်း အချိန်ကြာပါလိမ့်မယ်။ လက်တွေ့မကျတဲ့ အချိန်သတ်မှတ်ချက်မျိုးကို ကျွန်တော် ရှောင်ချင်တယ်။ အချိန်တော့ပေးရမှာပါ”

    စင်ကာပူဟာ လက်ရှိ မြန်မာ့နိုင်ငံရေးနယ်ပယ်က အားလုံးနဲ့ ထိတွေ့ဆက်ဆံနေတယ်လို့ ဘာလာကရစ်ရှ်နန်က ထည့်သွင်းပြောဆိုခဲ့ပြီး အသေးစိတ်ကိုတော့ ထပ်မပြောပါဘူး။

    “နိုင်ငံတစ်နိုင်ငံမှာ ပြည်ပက ဝင်ရောက်စွက်ဖက်မှု မရှိရဘူးဆိုတာ စင်ကာပူက ခိုင်ခိုင်မာမာ ယုံကြည်ပါတယ်။ နိုင်ငံတစ်ခုရဲ့ အလုံးစုံသောကံကြမ္မာဟာ ပြည်သူတွေရဲ့လက်ထဲမှာပဲ ရှိပါတယ်”

    ၂၀၂၀ နိုဝင်ဘာက ဒီမိုကရေစီနည်းကျ ရွေးကောက်တင်မြှောက်ခံရတဲ့ အစိုးရကို ​ဖြုတ်ချပြီး စစ်တပ်က အာဏာသိမ်းခဲ့တဲ့ ဖေဖော်ဝါရီ ၁ ရက်နေ့နောက်ပိုင်း မြန်မာနိုင်ငံမှာ ဖြစ်ပေါ်နေတဲ့ အခြေအနေတွေကို ထိထိရောက်ရောက် မဖြေရှင်းနိုင်မှုအတွက် အာဆီယံဟာ ပြစ်တင်ပြောဆိုခံနေရတာပါ။

    အာဆီယံအထူးကိုယ်စားလှယ် အရ်ဝမ်ယူစွဖ်ဟာ စက်တင်ဘာလမှာ မြန်မာ့အရေး ဖြစ်ပေါ်တိုးတက်မှုတွေကို အာဆီယံအဖွဲ့ထံ အစီရင်ခံရမှာ ဖြစ်ပါတယ်။

    စင်ကာပူနိုင်ငံခြားရေးဝန်ကြီးကတော့ အထူးကိုယ်စားလှယ်ခန့်အပ်မှုဟာ မြန်မာ့နိုင်ငံရေးနယ်ပယ်က သက်ဆိုင်သူတွေအားလုံးနဲ့ တွေ့ဆုံပြီး မျှတတဲ့ကြားဝင်စေ့စပ်သူအဖြစ် နိုင်ငံရေးဆွေးနွေးမှုတွေလုပ်နိုင်အောင် တိုက်တွန်းအားပေး၊ စီစဉ်ဖို့ ဖြစ်တယ်လို့ ထည့်သွင်းပြောဆိုခဲ့ပါတယ်။

    “ဒါဟာ ကြီးမားတဲ့ စမ်းသပ်မှုကြီးပါ။ အရ်ဝမ်အနေနဲ့ သက်ဆိုင်သူအားလုံးနဲ့ တွေ့နိုင်ပါ့မလားဆိုတာလည်း ရှိပါသေးတယ်”

    Ref: Straits Times