ဩဂုတ် ၁၁၊ ၂၀၂၁
M-Media
– လေထုကနေ သန့်ရှင်းတဲ့ သောက်သုံးရေပြောင်းတဲ့ စက်တွေကို အာရပ်စော်ဘွားများပြည်ထောင်စု (ယူအေအီး) နိုင်ငံ မြို့ကြီးတစ်ချို့က ပန်းခြံတွေနဲ့ ကမ်းခြေတွေမှာ စတင် စမ်းသပ်သုံးစွဲနေပါတယ်။
အစ္စရေးနဲ့ ယူအေအီးတို့ ၂၀၂၀ ခုနှစ် စက်တင်ဘာ ၁၅ ရက်နေ့က သံတမန်ဆက်ဆံရေးထူထောင်ဖို့ သဘောတူညီခဲ့ပြီးတဲ့နောက် အဘူဒါဘီအခြေစိုက် ကုမ္ပဏီ Al Dahra Holding က အောက်တိုဘာလမှာ ကိုယ်စားလှယ်အဖွဲ့တစ်ခု အစ္စရေးကို စေလွှတ်ခဲ့ပြီး စိုက်ပျိုးရေး၊ ရေပေးဝေရေးနဲ့ နည်းပညာပိုင်းမှာ ပူးပေါင်းဆောင်ရွက်နိုင်ဖို့ လေ့လာ ဆန်းစစ်ခဲ့ကြပါတယ်။
အဲဒီခရီးစဉ်အတွင်း အစ္စရေး နည်းပညာကုမ္ပဏီ Watergen နဲ့ သဘောတူစာချုပ် ချုပ်ဆိုကာ လေထုကနေ သန့်ရှင်းတဲ့ သောက်သုံးရေထုတ်တဲ့ စက်တွေကို ယူအေအီးမှာ စတင်သုံးစွဲလာတာ ဖြစ်ပါတယ်။ ယူအေအီး စည်ပင်ဌာနကလည်း Watergen စက်တွေကထုတ်ပေးတဲ့ ရေဟာ သန့်ရှင်းကောင်းမွန်တယ်ဆိုတာ တွေ့ရကြောင်း ထောက်ခံချက် ပေးခဲ့ပါတယ်။
ရှေ့ပြေးစီမံကိန်းအနေနဲ့ အလတ်စား Watergen စက် ၁၅ လုံးကို အဘူဒါဘီ၊ အလ်အိန်းတို့အပါအဝင် မြို့ကြီးတစ်ချို့က ပန်းခြံတွေ၊ ကမ်းခြေတွေမှာ စတင်ထားရှိ သုံးစွဲခဲ့ကြပါတယ်။
Al Dahra Holding ကုမ္ပဏီက Watergen စက် အလုံး ၇၀၀ ကို မှာထားပြီး အဲဒီအထဲက အလုံး ၅၀၀ ဟာ နောက်ဆုံးထုတ်တွေဖြစ်တယ်လို့ ဆိုပါတယ်။
နိုင်ငံအတွင်း သောက်သုံးရေဖူလှုံရေး မဟာဗျူဟာ ( Water Security Strategy 2036) ကို ယူအေအီးက ၂၀၁၇ ခုနှစ်မှာ ထုတ်ပြန်ခဲ့ပါတယ်။ အဲဒီမဟာဗျူဟာမှာ သောက်သုံးရေ ရရှိဖို့အတွက် ပြည့်ဖြိုးမြဲရင်းမြစ်တွေကို ပိုမိုသုံးစွဲရေး၊ နိုင်ငံရဲ့ အရန်သောက်သုံးရေ သိုလှောင်မှုပမာဏကို တိုးမြှင့်ရေးတွေ ပါဝင်ပါတယ်။
အစ္စရေးကုမ္ပဏီ Watergen ဟာ သူတို့ရဲ့ ဒီနည်းပညာကို အရှေ့အလယ်ပိုင်းနဲ့ အာဖရိကဒေသတွေအထိ ရောင်းချနိုင်အောင် ရည်ရွယ်ထားပါတယ်။
Ref: Khaleej Times
