စက်တင်ဘာ ၈ ၊ ၂၀၁၄
M-Media
– ဆိုရှယ်မီဒီယာများတွင် ပြန့်နှံ့ခဲ့သော လိင်တူလက်ထပ်မှု ဗီဒီယိုတွင် ပါဝင်ခဲ့သည့် အမျိုးသား ၇ ဦးကို အပျော်အပါးလိုက်စားမှုနှင့် ကိုယ်ကျင့်တရား ပျက်ဆီးစေမှုတို့ဖြင့် အီဂျစ်ရဲတပ်ဖွဲ့က ဖမ်းဆီးထိန်းသိမ်းလိုက်သည်ဟု သိရသည်။
နိုင်ငံ၏ ပထမဆုံး လိင်တူလက်ထပ်ပွဲဖြစ်သည့် အဆိုပါဗီဒီယိုတွင် အမျိုးသားနှစ်ဦးမှာ လက်ထပ် လက်စွပ်လဲလှယ်သည့် ပုံရိပ်များလည်း ပါဝင်ခဲ့သည်။
“ဒီလက်ထပ်ပွဲမှာ ပါဝင်ကြတဲ့ ၁၆ ယောက်ထဲက ၉ ယောက်ကို ဘယ်သူဘယ်ဝါမှန်း ဖော်ထုတ်ခဲ့ပြီး ၇ ယောက်ကို ဖမ်းဆီးနိုင်ခဲ့ပါတယ်” ဟု နိုင်ငံပိုင် သတင်းဌာန MENA က ဖော်ပြခဲ့သည်။ သို့သော်လည်း ဖမ်းဆီးထားသူ ၇ ဦးတွင် လက်ထပ်ခဲ့သူနှစ်ဦး ပါဝင်ခြင်း ရှိ၊ မရှိကို ဖော်ပြခဲ့ခြင်းမရှိချေ။
ဖမ်းဆီးထားသူများကို အပျော်အပါးလိုက်စားစေရန် လှုံ့ဆော်မှု၊ မလျော်ကန်သော ပုံရိပ်များကို ဖော်ပြမှုတို့ဖြင့် ဖမ်းဆီးထားခြင်းဖြစ်ပြီး လေးရက်အထိ ထိန်းသိမ်းထားနိုင်မည် ဖြစ်သည်။
သြဂုတ်လအတွင်း ဆိုရှယ်မီဒီယာများတွင် ပြန့်နှံ့ခဲ့သည့် အဆိုပါလိင်တူ လက်ထပ်ပွဲမှာဧပြီလက ကျင်းပခဲ့ခြင်းဖြစ်သည်ဟု တရားသူကြီးရုံးမှ ထုတ်ပြန်သောကြေညာချက်တွင် ဖော်ပြထားသည်။
အီဂျစ်နိုင်ငံ၏ ဥပဒေအရ လိင်တူဆက်ဆံမှုမှာ လိင်ပိုင်းဆိုင်ရာနှင့် ပတ်သက်သည့် ပြစ်မှုများတွင် ပါဝင်ခြင်းမရှိသော်လည်း ထိုလုပ်ရပ်ကို ကိုယ်ကျင့်တရားနှင့်ဆိုင်သည့် အခြာသော ဥပဒေများဖြင့် အရေးယူနိုင်သည်။
ပြီးခဲ့သည့်ဧပြီလကလည်း ပါတီတစ်ခုတွင် လိင်တူဆက်ဆံသည့် လုပ်ရပ်များ ပါဝင်ခဲ့သောကြောင့် အမျိုးသား ၈ ဦးအား အပျော်အပါးလိုက်စားမှုဖြင့် ထောင်ဒဏ် ၈ နှစ်စီ ချမှတ်ခဲ့သည်။
လိင်တူဆက်ဆံမှုများနှင့်ပတ်သက်၍ အီဂျစ်အစိုးရ၏ အကြီးဆုံးတုံ့ပြန်မှုမှာ ၂၀၀၁ ခုနှစ်က ဖြစ်ပြီး Queen Boat အမည်ရသည့် ရေပေါ်ဒစ္စကိုတစ်ခုအား ရဲတပ်ဖွဲ့ဝင်များက ၀င်ရောက်စီးနင်းခဲ့ကာ အမျိုးသား ၅၂ ဦးကို ဖမ်းဆီးခဲ့သည်။ အီဂျစ်အစိုးရ၏ ထိုလုပ်ရပ်ကို လူ့အခွင့်အရေး အဖွဲ့များနှင့် အနောက်နိုင်ငံများမှ အစိုးရများက ဝေဖန်ခဲ့ကြသည်။
ref_Agencies
