ဇွန်လ ၁၉ ရက်၊ ၂၀၁၄
M-Media
– အစ္စလာမ်ဘာသာဝင်တို့၏ ရမသွာန် ဥပုသ်လမှ အခြေတည်လာသော မွတ်သိပ်မှု တွန်းလှန်ရေး လှုပ်ရှားမှုတစ်ခုဖြစ်သည့် Give 30 လှုပ်ရှားမှုမှာ ကနေဒါနိုင်ငံတွင် အောင်မြင်မှုများ ရရှိနေသည်ဟု သိရသည်။
“Give 30 လှုပ်ရှားမှုဟာ အောက်ခြေလူတန်းတွေ အတွက် လုပ်ဆောင်တာဖြစ်ပြီး ထင်ထားတာထက် မြန်မြန်အောင်မြင်လာပါတယ်။ ဒီနှစ် Give 30 လှုပ်ရှားမှုကို ကနေဒါက ပြည်နယ် ၅ ခုမှာ ပြုလုပ်သွားမှာဖြစ်ပြီး အစားအသောက်တွေ ထောက်ပံ့မယ့် မိတ်ဖက် ၉ ခုရှိပါတယ်” ဟု Give 30 လှုပ်ရှားမှုကို တည်ထောင်သူ ဇီယဒ် မီယာက OnIslam.net သို့ ပြောကြားခဲ့သည်။
ရှေ့နေတစ်ဦးဖြစ်ပြီး လူမှုရေးလုပ်ငန်းများကို တက်ကြွစွာလုပ်ဆောင်သည့် မီယာမှာ တိုရွန်တိုတွင်နေထိုင်ပြီး ၂၀၁၂ ခုနှစ် ရမသွာန် ဥပုသ်လမတိုင်ခင် တစ်ရက်က ၎င်း၏ ကော်ဖီခွက်ကိုဆေးခဲ့ရာမှ နောက်ထပ် ရက်ပေါင်း ၃၀ ကော်ဖီသောက်ရတော့မည် မဟုတ်ဟု အတွေးဝင်လာခဲ့ပြီး ထိုအတွေးမှတစ်ဆင့် Give 30 လှုပ်ရှားမှု ပေါ်ပေါက်လာခဲ့ခြင်း ဖြစ်သည်။
ရမသွာန် ဥပုသ်လတွင် ဥပုသ်သီလ ဆောက်တည်ကြသည့် အစ္စလာမ်ဘာသာဝင်များ အနေဖြင့် ထိုတလလုံး အစားသောက် နည်းခြင်းကြောင့် ပိုထွက်လာမည့် နေ့စဉ်သုံးငွေများကို လှူဒါန်းရေးအတွက် လှုံ့ဆော်ရန် Give 30 လှုပ်ရှားမှုကို ဖော်ဆောင်ခဲ့ခြင်းဖြစ်သည်။ လွန်ခဲ့သည့် ၂နှစ်က စတင်ခဲ့သည့် အဆိုပါလှုပ်ရှားမှုမှာ ယနေ့အချိန်တွင် ဒေါ်လာ ထောင်ပေါင်းများစွာဖြင့် လည်ပတ်နေပြီး ဆင်းရဲသူ အမြောက်အများကို ကူညီနိုင်ပြီဖြစ်သည်။
ဥပုသ်သီလ ဆောက်တည်ခြင်းမရှိသူများလည်း ၎င်း၏ လှုပ်ရှားမှုတွင်ပါဝင်နိုင်ပြီး ၂ နှစ်တာကာလအတွင်း အခြားဘာသာဝင်များနှင့် လူတန်းစား အသီးသီးကလည်း လာရောက် လှူဒါန်းကြသည်ဟု မီယာက ဆိုသည်။
“ဥပုသ်လ တစ်လလုံး မစားမဲ့ နေ့လည်စာကိုယူလာပါ။ ဒါမှမဟုတ် ရက် ၃၀ စာ ကော်ဖီဖိုးကို တွက်ပြီးလှူပါ။ ဘာပဲဖြစ်ဖြစ် ဒါတွေဟာ စားဖို့မလောက်တဲ့သူတွေရဲ့ ဘ၀မှာ ထူးခြားမှုကို ပြုလုပ်ပေးနိုင်မှာပါ” ဟု မီယာက တိုက်တွန်းခဲ့သည်။
မတတ်နိုင်သူများအား အစားသောက်များကို ထောက်ပံ့နေသည့် ကနေဒါ Food Banks ၏ နှစ်စဉ် လေ့လာမှုများအရ ကနေဒါနိုင်ငံတွင် လူဦးရေ ၈၃၃၀၀၀ ကျော်မှာ Food Bank များကို မှီခိုနေရပြီး ထိုပမာဏ၏ လေးပုံသုံးပုံမှာ ကလေးများဖြစ်သည်ဟု ဆိုသည်။
Food Banks မှာ ယမန်နှစ်က ပြည်နယ် ၃ ခုတွင်ပြုလုပ်ခဲ့သည့် Give 30 လှုပ်ရှားမှုများတွင် ပါဝင်ကူညီခဲ့ပြီး ယခုနှစ်တွင်ပြုလုပ်မည့် လှုပ်ရှားမှုများတွင်လည်း ပါဝင်ဆောင်ရွက်သွားမည် ဖြစ်သည်။
၎င်း၏ဖြူစင်သောစိတ်ကူးနှင့် ဆိုရှယ်မီဒီယာများ၏ အားကောင်းမှုတို့ကြောင့် Give 30 လှုပ်ရှားမှုမှာ သိသာစွာတိုးတက်လာခြင်းဖြစ်သည်ဟု မီယာက မှတ်ယူထားသည်။
“ရမသွာန် ဆိုတာ လှူဒါန်းခြင်း၊ လူ့အဖွဲ့အစည်းတည်ဆောက်ခြင်းနဲ့ ဆာလောင်မွတ်သိပ်ခြင်းရဲ့ စိန်ခေါ်မှုတွေကို နာလည်ခြင်းလို့ အဓိပ္ပါယ်သက်ရောက်ပါတယ်။ ဒါကြောင့် လှူဒါန်းဖို့အတွက် လူတွေကို လှုံ့ဆော်တဲ့နေရာမှာ ကောင်းကောင်းအလုပ်ဖြစ်တာပါ။ လူတိုင်းဟာ ရမသွာန် ကနေ ဖြစ်လာတဲ့ ဒီလှုပ်ရှားမှုမှာ ပါဝင်နိုင်ပါတယ်။ ဆာလောင်မွတ်သိပ်မှုကို အရွယ်စုံခံစားနေရတာဖြစ်ပြီး ဒါ့ကြောင့် Give 30 လှုပ်ရှားမှုကို ဆက်သွယ်ဖို့ လူတိုင်းအတွက် အရေးကြီးပါတယ်” ဟု မီယာကဆိုသည်။
