မေ ၂၃၊ ၂၀၂၁
M-Media

-စစ်တပ်က အာဏာရယူထားတာဟာ ခဏသာဖြစ်ပြီး ရွေးကောက်ပွဲကျင်းပပေးကာ အရပ်သားအစိုးရလက်ထဲ အာဏာလွှဲပြောင်းပေးမယ်လို့ အာဏာသိမ်းစစ်ကောင်စီအကြီးအကဲ ဗိုလ်ချုပ်မှူးကြီးမင်းအောင်လှိုင်က ပြောကြားလိုက်ပါတယ်။

စစ်ကောင်စီအကြီးအကဲဟာ ဟောင်ကောင်မီဒီယာ Phoenix Television ရဲ့ အွန်လိုင်းကတစ်ဆင့် တွေ့ဆုံမေးမြန်းခန်းမှာ အခုလို ပြောကြားလိုက်တာပါ။ ဒါဟာ အာဏာသိမ်းပြီးနောက်ပိုင်း သူ့ရဲ့ ပထမဆုံး မီဒီယာတွေ့ဆုံမှု ဖြစ်ပါတယ်။

အာဏာသိမ်းပြီးကတည်းက ကာကွယ်ရေးဦးစီးချုပ်သက်တမ်း ၆၅ နှစ်ပြည့်ရင် အငြိမ်းစားယူရမယ်ဆိုတဲ့ စစ်တပ်စည်းကမ်းကို ပယ်ဖျက်တာ၊ မီဒီယာတွေကို နှိပ်ကွပ်တာ၊ နိုင်ငံပိုင်မီဒီယာတွေကနေ လူမျိုးရေး၊ ဘာသာရေး သွေးထိုးဝါဒဖြန့်တာ၊ အပြစ်မဲ့ပြည်သူတွေကို သတ်ဖြတ်ညှမ်းပမ်းတာ၊ တရားလက်လွတ်ဖမ်းဆီးထောင်ချတာ စတဲ့ အာဏာရှင်တွေရဲ့ အမူအကျင့်တွေအတိုင်း စစ်ကောင်စီက ​တစ်စိုက်မတ်မတ် လုပ်ဆောင်လာတာ ဖြစ်ပါတယ်။

ဗိုလ်ချုပ်မှူးကြီးကတော့ ရွေးကောက်ပွဲမှာ မဲမသမာမှုဖြစ်တဲ့အတွက် အာဏာသိမ်းရတာဖြစ်ပြီး ပါတီစုံ ဖက်ဒရယ်ဒီမိုကရေစီတိုင်းပြည်ထူထောင်ဖို့ စစ်တပ်မှာ ရည်ရွယ်ချက်ရှိတယ်လို့ Phoenix Television ကို ပြောကြားခဲ့ပါတယ်။

လွတ်လပ်တဲ့ ပြည်ပရွေးကောက်ပွဲစောင့်ကြည့်တဲ့အဖွဲ့တွေက ၂၀၂၀ ခုနှစ် နိုဝင်ဘာရွေးကောက်ပွဲမှာ ရလဒ်ပြောင်းလောက်တဲ့ အမှားအယွင်းမျိုး မရှိခဲ့ဘူးလို့ ထုတ်ပြန်ထားပါတယ်။

ဖေဖော်ဝါရီ ၁ ရက်နေ့နောက်ပိုင်း စစ်ကောင်စီတပ်တွေရဲ့ အကြမ်းဖက်မှုကြောင့် အရပ်သားပြည်သူ ၈၀၀ ကျော်သေဆုံးထားတယ်ဆိုတဲ့ စောင့်ကြည့်အဖွဲ့တွေရဲ့ ထုတ်ပြန်မှုဟာ မမှန်ကန်ဘူးလို့လည်း စစ်ကောင်စီအကြီးအကဲက ပြောပါတယ်။

အမှန်တကယ်သေဆုံးသူဟာ ၃၀၀ လောက်သာရှိပြီး ရဲ့တပ်ဖွဲ့ဝင် ၄၇ ဦးသေဆုံးကာ ၂၀၀ ကျော် ဒဏ်ရာရတယ်လို့ သူက ဆိုပါတယ်။

နိုင်ငံတော်အတိုင်ပင်ခံ ဒေါ်အောင်ဆန်းစုကြည်နဲ့ ပတ်သက်ပြီးတော့လည်း စစ်ကောင်စီအကြီးအကဲက Phoenix Television နဲ့ တွေ့ဆုံမေးမြန်းမှုမှာ ထည့်သွင်းဖြေကြားခဲ့ပါတယ်။

ဒေါ်အောင်ဆန်းစုကြည်ဟာ ကျန်းကျန်းမာမာရှိနေပြီး မကြာခင်ရက်ပိုင်းအတွင်း တရားရုံးကို လူကိုယ်တိုင်လာရောက်ကာ တရားရင်ဆိုင်မှာဖြစ်ကြောင်း၊ သူမဟာ တိုင်းပြည်အတွက် တတ်စွမ်းနိုင်သမျှ လုပ်ဆောင်ခဲ့တယ်လို့ ယူဆကြောင်း ဗိုလ်ချုပ်မှူးကြီးက ဆိုပါတယ်။

Ref: NHK

မေ ၂၁၊ ၂၀၂၁
M-Media

-ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း ပြည်သူလူထုကို အကြမ်းဖက်သတ်ဖြတ်မှုကြောင့် မြန်မာနိုင်ငံအပေါ် ပေးအပ်နေတဲ့ အကူအညီတွေအားလုံး ရပ်ဆိုင်းသွားဖွယ် ရှိတယ်လို့ ဂျပန်နိုင်ငံခြားရေးဝန် တိုရှီမစ်ဆု မိုတီဂီက ပြောကြားလိုက်ပါတယ်။

မြန်မာနိုင်ငံကို အကူအညီအသစ်တွေ ထပ်မပေးတော့ဘူးလို့ ဂျပန်က ကြေငြာထားတာပါ။ လက်ရှိပေးနေတာတွေကိုလည်း ရပ်ဆိုင်းဖွယ် ရှိနေပါတယ်။

“ကျွန်တော်တို့ လုံး၀ မလုပ်ချင်ပါဘူး။ ဒီလိုအခြေအနေမျိုးဆိုရင် ရှေ့ဆက်ဖို့ ခက်ခဲမယ်ဆိုတာကိုတော့ သိသိသာသာ ပြရပါလိမ့်မယ်။ မြန်မာနိုင်ငံရဲ့ ဒီမိုကရေစီအသွင်ကူးပြောင်းမှုကို မိတ်ဖက်အဖြစ် နည်းလမ်းအသွယ်သွယ်နဲ့ ထောက်ခံအားပေးတဲ့ နိုင်ငံတစ်ခုဖြစ်တဲ့ ကျွန်တော်တို့ဟာ နိုင်ငံတကာအသိုင်းအ၀ိုင်းကို ကိုယ်စားပြုကြောင်း ရှင်းရှင်းလင်းလင်း သတင်းစကားပါးဖို့ လိုအပ်ပါတယ်” လို့ နိုင်ငံခြားရေးဝန်ကြီး မိုတီဂီက ပြည်တွင်း သတင်းဌာနတွေကို ပြောကြားခဲ့ပါတယ်။

စစ်ကောင်စီတပ်တွေရဲ့လက်ချက်ကြောင့် နိုင်ငံတစ်ဝှမ်း အနည်းဆုံး လူ ၈၀၀ လောက် သေဆုံးပြီး ထောင်ချီဒဏ်ရာရတာ၊ ဖမ်းဆီးခံထားရတွေ ရှိတယ်လို့ စောင့်ကြည့်​လေ့လာသူတွေက ပြောပါတယ်။

၂၀၁၉ ဘဏ္ဍာရေးနှစ်မှာ ဂျပန်ဟာ မြန်မာကို ကန်ဒေါ်လာ ၁.၇၄ ဘီလီယံဖိုးလောက် အကူအညီတွေ ပေးခဲ့တာပါ။ မြန်မာပြည်သူတွေအတွက် ကန်ဒေါ်လာ ၄ သန်း တန်ဖိုးရှိမယ့် အရေးပေါ်အကူအညီတွေကို WFP ကတစ်ဆင့် ပေးအပ်သွားမယ်လို့ မကြာသေးခင်ကပဲ ဂျပန်က ထုတ်ပြန်ထားပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို လွှတ်ပေးရေးနဲ့ ဒီမိုကရေစီ ပြန်လည်ဖော်ဆောင်ရေးလုပ်ဖို့ မိုတီဂီက တိုက်တွန်းခဲ့သလို၊ ဂျပန်ဟာ စစ်ကောင်စီနဲ့ ဆက်လက် ဆွေးနွေးညှိနှိုင်းမယ်လို့ ပြောကြားခဲ့ပါတယ်။

“စစ်တပ်၊ ဥရောသမဂ္ဂနဲ့ အမေရိကန်အပါအဝင် မြန်မာနိုင်ငံမှာ ကျွန်တော်တို့ ဆက်သွယ်ရေးလမ်းကြောင်း တော်တော်များများရှိပါတယ်”

Ref: The Star