ဇန်နဝါရီ ၁၆၊ ၂၀၁၄
M-Media
ဟန်ဆောင်လှဲချသည်ဟု စွပ်စွဲခြင်းအား နေးမာငြင်းဆို
– ပွဲကစားနေစဉ်အတွင်း ဟန်ဆောင် လှဲချသည်ဟု စွပ်စွဲမှုများအား ဘာစီလိုနာ အသင်း၏ ဘရာဇီးတိုက်စစ်မှူး နေးမာက ငြင်းဆိုလိုက်ပြီး ၎င်းအနေဖြင့် ဒဏ်ရာရရှိမည့် အခြေအနေအား ရှောင်ရှားခြင်းသာဖြစ်သည်ဟု ပြောကြားလိုက်သည်။
အသက် ၂၁ နှစ်အရွယ်ရှိ နေးမာမှာ ပြိုင်ဘက်အသင်း နောက်ခံလူများ၏ ဖျက်ထုတ်မှုကို အများဆုံးခံရပြီး၊ ထိုကဲ့သို့ ဖျက်ထုတ်မှုများအတွင်း ဟန်ဆောင် လှဲချလေ့ရှိသည်ဟု ဆဲလ်တစ် နည်းပြ အပါအ၀င် လူအများ၏ ဝေဖန်မှုများ ထွက်ပေါ်လာခဲ့သည်။
“ဟန်ဆောင် လှဲချတာမျိုး ကျွန်တော်မလုပ်ပါဘူး။ ပြိုင်ဘက် အသင်းသားတွေက ကျွန်တော့်ကို ကြမ်းကြမ်းတမ်းတမ်း ဖျက်ထုတ်တဲ့အခါ ကျွန်တော့်ကို ကျွန်တော် ကာကွယ်ရုံပါ။ ပြီးတော့ ဆိုးဆိုးရွားရွား မထိခိုက်အောင် ဒါမှမဟုတ် သူတို့ မခိုက်မိအောင်ပဲ ကျွန်တော် လုပ်တာပါ” ဟု Sport အားကစား စာစောင်သို့ နေးမာက ပြောကြားခဲ့သည်။
ထို့ပြင် မိမိအနေဖြင့် ကမ္ဘာ့အကောင်းဆုံး ဘောလုံးသမားများနှင့် ကစားရခြင်း အတွက် ဖိအားများ မရှိကြောင်း၊ ဘာစီလိုနာသို့ပြောင်းရွှေ့ရန် ဆုံးဖြတ်ခဲ့ခြင်းမှာ မှန်ကန်သော ဆုံးဖြတ်ချက်ဖြစ်ကြောင်း၊ ဘာစီလိုနာသို့ ရာက်ရှိလာခြင်းမှာ အိပ်မက်များ အမှန်တကယ်ဖြစ်လာခြင်းဖြစ်ကြောင်း ထည့်သွင်းပြောကြားခဲ့သည်။
————————————————————–
ဘင်ဖီကာ ကွင်းလယ်လူ မာတစ်အား ချယ်ဆီးခေါ်ယူ
– ဘင်ဖီကာအသင်း၏ ကွင်းလယ်ကစားသမား နီမန်ဂျာ မာတစ်အား အသင်းမှ ခေါ်ယူလိုက်ကြောင်း ချယ်ဆီးအသင်းက အတည်ပြုပြောကြားခဲ့သည်။
ပြီးခဲ့သည့် တနင်္လာနေ့က လစ္စဘွန်းမြို့တွင် ဘင်ဖီကာအသင်းနှင့် နောက်ဆုံးအဆင့် ဆွေးနွေးမှုပြုလုပ်ခဲ့ပြီးနောက် ယူရို ၂၅ သန်းဖြင့် ခေါ်ယူရန် သဘော တူညီခဲ့ခြင်းဖြစ်သည်။ မာတစ်မှာ အင်္ဂါနေ့က လန်ဒန်သို့ရောက်ရှိလာခဲ့ပြီး ဆေး စစ်ဆေးမှု ခံယူခဲ့ပြီးနောက် ၅ နှစ်ခွဲ သက်တမ်းရှိ စာချုပ်အား ချုပ်ဆိုခဲ့ခြင်းဖြစ်သည်။
မာတစ်မှာ ၂၀၀၉ခုနှစ်မှ ၂၀၁၁ ခုနှစ် အထိ ချယ်ဆီးအသင်းတွင် ကစားခဲ့ဖူးပြီး ယခုကဲ့သို့ ပြန်လည်ရောက်ရှိလာခြင်းနှင့် ပက်သက်၍ “ဒီအသင်းကို ပြန်လည်ရောက် ရှိလာရတာကို ကျွန်တော်ပျော်ပါတယ်။ အသင်းကို ကူညီဖို့အတွက် ကျွန်တော့်ရဲ့အကောင်းဆုံးကို ပေးဆပ်သွားပါမယ်။ ပြီးတော့ ချယ်ဆီး ပရိတ်သတ်တွေကို ပျော်ရွှင်အောင် လုပ်ချင်ပါတယ်” ဟု အသင်း၏ ၀ဘ်ဆိုဒ်သို့ ပြောကြားခဲ့သည်။
