Blog

မတ် ၂၅၊ ၂၀၂၁
M-Media

-အာဏာသိမ်းစစ်ခေါင်းဆောင်တွေရဲ့ ဧရာမ စီးပွားရေးလုပ်ငန်းနှစ်ခုကို အမည်ပျက်စာရင်းသွင်းပြီး ပိတ်ဆို့အရေးယူဖို့ အမေရိကန်က စီစဉ်နေတယ်လို့ ဒီကိစ္စကို သိရှိသူ သတင်းရင်းမြစ်နှစ်ခုက ရိုက်တာသတင်းဌာနကို ပြောကြားခဲ့ပါတယ်။

မြန်မာ့ စီးပွားရေး ကော်ပိုရေးရှင်း (MEC) နဲ့ မြန်မာ့ ဦးပိုင်လုပ်ငန်း (MEHL) တို့ဖြစ်ပြီး ဒီစီးပွားရေးလုပ်ငန်းနှစ်ခုရဲ့ အမေရိကန်မှာရှိတဲ့ ပိုင်ဆိုင်မှုတွေကို ကြာသာပတေးနေ့က စတင်ပြီး ကန်အစိုးရက ထိန်းချုပ်သွားမှာ ဖြစ်ပါတယ်။

MEHL ရဲ့ မန်နေဂျာ လှမျိုးက လက်ရှိမှာ စီးပွားရေးကိုပဲ အာရုံစိုက် လုပ်ကိုင်နေပြီး ဒီကိစ္စအတွက် ပြောစရာမရှိဘူးလို့ ရိုက်တာသတင်းဌာနကို ဖြေကြားခဲ့ပါတယ်။ MEC ကိုတော့ ဆက်သက်သွယ်လို့ မရဘူးလို့ ရိုက်တာက ရေးပါတယ်။

ကာကွယ်ရေးဦးစီးချုပ် ဗိုလ်ချုပ်မှူး မင်းအောင်လှိုင် အပါအဝင် ထိပ်တန်းစစ်ခေါင်းဆောင်တွေ အုပ်စီးထားတဲ့ MEC နဲ့ MEHL တို့ဟာ ကျောက်စိမ်း၊ ရေနံ၊ သဘာ၀ဓာတ်ငွေ့၊ ကျွန်းသစ်၊ သတ္တုတွင်းလုပ်ငန်း၊ ဘီယာနဲ့အရက်လုပ်ငန်း အပါအဝင် မြန်မာနိုင်ငံရဲ့ဝင်ငွေအကောင်းဆုံး စီးပွားရေးလုပ်ငန်း အနည်းဆုံး ၁၃၀ လောက် လုပ်ကိုင်နေတာ ဖြစ်ပါတယ်။

အမေရိကန်အပါအဝင် အနောက်နိုင်ငံတစ်ချို့ဟာ အာဏာသိမ်းစစ်ခေါင်းဆောင်တွေနဲ့ သူတို့ရဲ့ စီးပွားရေးလုပ်ငန်းတွေအပေါ် ပိတ်ဆို့အရေးယူတာမျိုး လုပ်ထားပေမယ့် စစ်တပ်ပိုင် စီးပွားရေးလုပ်ငန်းတွေကို အရေးယူတာဟာ ဒါ ပထမဆုံး ဖြစ်ပါတယ်။

Ref: Reuters

မတ် ၂၄၊ ၂၀၂၁
M-Media

-အရပ်သားတွေအပေါ် စစ်ကောင်စီက အကြမ်းဖက်နေမှုကို ဘာဆင်ခြေမှ ပေးလို့မရဘူးလို့ မလေးရှားနဲ့ စင်ကာပူနိုင်ငံခြားရေးဝန်ကြီးတွေက ပြောကြားလိုက်ပါတယ်။

မလေးရှားကို ရောက်ရှိနေတဲ့ စင်ကာပူနိုင်ငံခြားရေးဝန်ကြီး ဗီဗီယန် ဘာလာခရစ်ရှ်နန်ဟာ မလေးရှား နိုင်ငံခြားရေးဝန်ကြီး ဟီရှာမွတ်ဒင် တွန် ဟူစိန်နဲ့​ မ​နေ့က တွေ့ဆုံဆွေးနွေးခဲ့ပြီး ပူးတွဲကြေငြာချက် ထုတ်ပြန်ခဲ့တာ ဖြစ်ပါတယ်။

မြန်မာနိုင်ငံက ပြဿနာမှာ ပါဝင်ပတ်သက်သူတွေအားလုံး တွေ့ဆုံဆွေးနွေး အဖြေရှာဖို့ တိုက်တွန်းတယ်လို့လည်း ကြေငြာချက်မှာ ဖော်ပြထားပါတယ်။

“မြန်မာနိုင်ငံက အခြေအနေတွေအတွက် မလေးရှားနဲ့ စင်ကာပူ နှစ်နိုင်ငံစလုံးက အလွန်အမင်း စိုးရိမ်မိပါတယ်။ ဒါဟာ လူသားချင်း စာနာထောက်ထားမှုဆိုင်ရာ ဘေးအန္တရာယ်ပါ။ လက်နက်မဲ့ အရပ်သားတွေအပေါ် အကြမ်းဖက်မှုကို ဆင်ခြေပေးလို့မရဘူးလို့ ကျွန်တော်တို့ ယုံကြည်ပါတယ်”

မြန်မာနိုင်ငံရဲ့ ပြည်တွင်းရေးကိစ္စကို ပြင်ပက ဝင်ရောက်စွက်ဖက်တာမျိုး မရှိသင့်ဘူးလို့ ယုံကြည်ကြောင်းလည်း နိုင်ငံခြားရေးဝန်ကြီးနှစ်ဦးက ထည့်သွင်း ပြောဆိုခဲ့ပါတယ်။

“ဒါပေမယ့် အာဆီယံအဖွဲ့ဝင်နိုင်ငံအနေနဲ့ ဒီထက်ပိုကောင်းတဲ့အခြေအနေနဲ့ ထိုက်တန်တဲ့ မြန်မာပြည်သူတွေကို အကောင်းဆုံး ကူညီပံ့ပိုးမှုတွေပေးဖို့ ကျွန်တော်တို့ အဆင်သင့်ရှိပါတယ်”

စင်ကာပူနိုင်ငံခြားရေးဝန်ကြီးဟာ အာဆီယံဥက္ကဌဖြစ်တဲ့ ဘရူနိုင်းနဲ့ အင်ဒိုနီးရှားနိုင်ငံတို့ကိုလည်း သွားရောက်ဖို့ ရှိနေပါတယ်။

Ref: Malay Mail

မတ် ၂၃၊ ၂၀၂၁
M-Media

-စစ်ကောင်စီလက်အောက်ခံ ပြည်ထဲရေး၀န်ကြီးဌာနက အကြီးအကဲနှစ်ဦးနဲ့ စစ်တပ်က တပ်မနှစ်ခုတို့ကို အမေရိကန် ဘဏ္ဏာရေးဌာနက အမည်ပျက်စာရင်း သွင်းလိုက်ပါတယ်။
ပြည်ထဲရေးဝန်ကြီးဌာန ဒုဝန်ကြီး ဒုတိယ ဗိုလ်ချုပ်ကြီး သန်းလှိုင်၊ ဒုတိယ ဗိုလ်ချုပ်ကြီး အောင်စိုး နဲ့ မြန်မာ စစ်တပ်ရဲ့ တပ်မ ၃၃ နဲ့ ၇၇ တို့ ဖြစ်ပါတယ်။ ဒီဗိုလ်ချုပ်နှစ်ဦးနဲ့ တပ်မ နှစ်ခုဟာ လက်ရှိဖြစ်ပေါ်နေတဲ့ ပြည်သူတွေကို အကြမ်းဖက်သတ်ဖြတ်မှုမှာ အဓိက တာ၀န်ရှိသူတွေ ဖြစ်ပါတယ်။
အမေရိကန်အစိုးရဟာ အာဏာသိမ်းစစ်ခေါင်းဆောင်တွေနဲ့ သူတို့ပိုင်တဲ့ စီးပွားရေးလုပ်ငန်းတွေကို ပိတ်ဆို့အရေးယူမှုတွေ လုပ်ထားပါတယ်။
“အာဏာသိမ်းခေါင်းဆောင်တွေ၊ အကြမ်းဖက်မှု ကျူးလွန်သူတွေကို အရေးယူသွားမယ်ဆိုတဲ့ ကျွန်တော်တို့ရဲ့ ကတိက၀တ်ကို ဆက်လက်စောင့်ထိန်းသွားမယ်ဆိုတာ ဒီကနေ့ပိတ်ဆို့မှုကနေ ခိုင်မာတဲ့သတင်းစကား ပေးလိုက်တာ ဖြစ်ပါတယ်” လို့ အမေရိကန်နိုင်ငံခြားရေး၀န်ကြီး အန်တိုနီ ဘလင်ကန်က ပြောကြားခဲ့ပါတယ်။
ပိတ်ဆို့ခံရသူတွေဟာ အမေရိကန်မှာ ပိုင်ဆိုင်မှုရှိရင် ခေတ္တ အသိမ်းခံရမှာဖြစ်ပြီး၊ အမေရိကန်နိုင်ငံသားတွေကိုလည်း သူတို့နဲ့ ဆက်ဆံမှုမလုပ်ဖို့ တားမြစ်မှာ ဖြစ်ပါတယ်။
တပ်မ ၃၃ နဲ့ ၇၇ တို့ဟာ ပြည်သူတွေကို တရားလက်လွတ် ပစ်ခတ်သတ်ဖြတ်နေတယ်လို့ အမေရိကန် ဘဏ္ဏာရေး၀န်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။
“ဒီအဖွဲ့တွေဟာ ထရပ်ကားတွေကိုစီးပြီး ပြည်သူတွေရဲ့ နေအိမ်တွေအပါအ၀င် မြင်မြင်သမျှကို ကျည်အစစ်တွေနဲ့ တရားလက်လွတ် ပစ်ခတ်တဲ့ ဗီဒီယိုတွေကို တွေ့ရပါတယ်”
ခြေမြန်တပ်မ ၃၃ နဲ့ ၇၇ တို့ဟာ တိုင်းရင်းသားဒေသတွေမှာ အကြမ်းဖက်မှုတွေကြောင့် အရင်ကတည်းက နာမည်ဆိုးရှိတဲ့ တပ်ဖွဲ့တွေ ဖြစ်ပါတယ်။ ၂၀၁၇ ခုနှစ် ရိုဟင်ဂျာတွေအပေါ် အကြမ်းဖက်မှုကြောင့် အမေရိကန်က ပိတ်ဆို့အရေးယူမှုလုပ်ထားတဲ့ တပ်မ ၂ ခုမှာ တပ်မ ၃၃ ပါ၀င်ပါတယ်။
ဥရောပသမဂ္ဂကလည်း အာဏာသိမ်းစစ်ကောင်စီက အဖွဲ့၀င် ၁၁ ဦးကို မနေ့က ပိတ်ဆို့မှုတွေ ထပ်လုပ်ခဲ့ပါတယ်။
Ref: Reuters