စက်တင်ဘာ ၁၈၊ ၂၀၂၀
M-Media
-မလေးရှားနိုင်ငံ မြို့တော်ကွာလာလမ်ပူ ဆင်ခြေဖုံးမှာ တည်ရှိတဲ့ Kampung Tunku ဗလီဝတ်ကျောင်းတော်ဟာ အပြင်ကနေကြည့်မယ်ဆိုရင် ဝတ်ပြုရာနေရာတစ်ခု၊ ဒေသခံ အစ္စလာမ်ဘာသာဝင်တွေအတွက် ဘာသာရေးအရအားကိုးအားထားပြုစရာ နေရာတစ်ခုသာ ဖြစ်ပါတယ်။
ဒါပေမယ့် ပြီးခဲ့တဲ့ ၂ နှစ်ခွဲတာကာလအတွင်း ဒီဗလီကို အစ္စလာမ်ဘာသာဝင်မဟုတ်သူတွေ ပိုပိုပြီး ရောက်လာကြပါတယ်။ ဘာသာရေးအတွက် လာရောက်တာမဟုတ်ဘဲ အော်တစ်ဇင်ဖြစ်နေတဲ့ သူတို့ရဲ့ ကလေးငယ်တွေအတွက် ခိုလှုံရာအဖြစ် လာရောက်ကြတာ ဖြစ်ပါတယ်။
အော်တစ်ဇင်ကလေးငယ်တွေကို ပြုစုပြိုးထောင်ပေးတဲ့ Kumpulan Anak Autisme Masjid (Kami) Playgroup အဖွဲ့ကို ဒီဗလီမှာ ၂၀၁၇ ခုနှစ်က စတင် တည်ထောင်ခဲ့တာပါ။ မိဘတွေနဲ့ မိသားစုတွေပါ ပါဝင်နိုင်တဲ့ ပန်းချီဆွဲတာ၊ ဂိမ်းကစားတာနဲ့ အားကစားလှုပ်ရှားမှုတွေ လုပ်ဆောင်ပေးတဲ့ ဒီနေရာလေးဟာ အော်တစ်ဇင်ကလေးငယ်တွေအတွက် ခိုနားရာနေရာတစ်ခု ဖြစ်လာပါတယ်။
ဗလီဂေါပကအဖွဲ့အကြီးအကဲ ၀မ် ဟူဇိုင်နီ ဝမ် ဟူစိန်က Kami Playgroup ဟာ ဘာသာလူမျိုးမခွဲခြားဘဲ လာရောက်သမျှလူ အားလုံးကို စောင့်ရှောက်ပျိုးထောင်ပေးနေတယ်လို့ ပြောကြားခဲ့ပါတယ်။
“အော်တစ်ဇင်ကလေးငယ်တွေရဲ့ အထူးလိုအပ်ချက်တွေကို ဖြည့်ဆည်းပေးဖို့က အဓိကအရေးကြီးဆုံးပါ”
ကလေးငယ်များ ပန်းချီဆွဲနေစဉ်
ဗလီကဦးစီးပြီး ဆောင်ရွက်နေတဲ့ အော်တစ်ဇင်ကလေးငယ်များ ကူညီရေးလှုပ်ရှားမှုမှာ ပါဝင်နေတဲ့ ဆရာတစ်ဦးက ဒီအဖွဲ့ဖွဲ့ဖို့ အကြံရခဲ့တာလို့ ဝမ်ဟူစိန်က ပြောပါတယ်။
အဖွဲ့စဖွဲ့ပြီးကတည်းက ကလန်းဗာလီမြို့နယ်က မိဘတွေရဲ့ ချီးကျူးမှုကို ရခဲ့ပြီ လူသတင်းလူချင်းဆောင်ကာ အခြားမြို့နယ်တွေက မိဘတွေရဲ့ ပူးပေါင်းမှုကိုပါ နောက်ပိုင်းမှာ ရခဲ့တယ်လို့ ဝမ်ဟူစိန်က ထည့်သွင်းပြောကြားခဲ့ပါတယ်။
“Kami Playgroup ဟာ အော်တစ်ဇင်ကလေးငယ်ရှိတဲ့ မိဘတွေ သူတို့ရဲ့ စိတ်ခံစားမှု၊ ပြဿနာတွေနဲ့ သတင်းအချက်အလက်တွေကို မျှဝေရာ နေရာတစ်ခုဖြစ်တယ်လို့ ကျွန်တော် အမြဲ ပြောပါတယ်။ သူတို့ဟာ အထီးကျန်စရာမလိုဘဲ ကျွန်တော်တို့ဆီ့က ပံ့ပိုးကူညီမှု ရရှိမှာ ဖြစ်ပါတယ်”
ဒေသခံပြည်သူတွေက ဒီလှုပ်ရှားမှုကို လက်ခံရုံသာမက ပံ့ပိုးကူညီကြတဲ့အတွက် အလွန်ကျေးဇူးတင်တယ်လို့လည်း ဟူစိန်က ဆိုပါတယ်။ Kami Playgroup ကို စေတနာ့ဝန်ထမ်းတွေနဲ့ လည်ပတ်နေတာ ဖြစ်ပါတယ်။
“ဗလီဆိုတာ ဝတ်ပြုဆုတောင်းရာ နေရာတစ်ခုသာ မဟုတ်ဘူးဆိုတာကို ပြသဖို့အတွက် သူတို့အားလုံးဟာ အစွမ်းကုန် ပံ့ပိုးကူညီကြပါတယ်”
အော်တစ်ဇင်ကလေးငယ်တွေအတွက် သီးသန့် ပုဂ္ဂလိကကျောင်းတွေဟာ စျေးအရမ်းကြီးတဲ့အတွက် Kami Playgroup ဟာ ဝင်ငွေနည်းတဲ့ မိသားစုတွေ အားထားရာ နေရာတစ်ခု ဖြစ်လာတယ်လို့ အဖွဲ့အကြီးအကဲ အဒ်လင်း အဘ်ဒူလ် ဂနီက ပြောပါတယ်။
ဆရာ၊ ဆရာမများ
“ကျွန်မမှာ အော်တစ်ဇင်ကလေးရှိပြီး ဒီလိုကလေးမျိုးရှိတဲ့ အခြားမိဘတွေလိုပဲ အခက်အခဲတွေကို ကြုံရပါတယ်။ ဒါ့ကြောင့် သူတို့ရဲ့လိုအပ်ချက်ကို ကျွန်မ နားလည်ပါတယ်။ ကလေးတွေဟာ ကစားခုန်စားဖို့နဲ့ လှုပ်ရှားမှုတွေလုပ်ဖို့ နေရာတစ်ခု လိုပ်ပါတယ်” လို့ အဒ်လင်းက ပြောပါတယ်။
Kami Playgroup အတွက် လခက တစ်လကို မလေးရှားရင်းဂစ် ၃၀ (ကျပ်တစ်သောင်းဝန်းကျင်) သာ ဖြစ်ပါတယ်။
အဖွဲ့ဟာ အော်တစ်ဇင်ကလေးငယ်တွေရဲ့ ဆက်သွယ်ပြောဆိုမှု၊ စိတ်ခံစားမှု၊ လူမှုရေးဆက်ဆံရေးနဲ့ မိမိကိုယ်ကို ယုံကြည်မှုရှိရေး စတဲ့စွမ်းရည်တွေ တိုးတက်အောင် ဆောင်ရွက်ပေးနေတယ်လို့လည်း အဒ်လင်းက ထည့်သွင်းပြောကြားခဲ့ပါတယ်။
“စိန်ခေါ်မှုတစ်ခုက အသက်အရွယ်မတူတဲ့ ကလေးတွေအတွက် သီးခြားလှုပ်ရှားမှုတွေကို စီစဉ်ပေးရတာပါ။ အသက် ၃ နှစက်နေ ၁၃ နှစ်အရွယ်အထိ ကျွန်မတို့ လက်ခံပါတယ်”
Covid-19 ကပ်ရောဂါကို ဒီကျောင်းကို ခေတ္တပိတ်ထားပေမယ့် မကြာခင်မှာ ပြန်ဖွင့်ခွင့်ရအောင် စီစဉ်နေတယ်လို့ အဒ်လင်းက ပြောပါတယ်။ ဒီလှုပ်ရှားမှု ပြန်လည်ဖွင့်လှစ်နိုင်ဖို့ အဒ်လင်းတို့အဖွဲ့က အာဏာပိုင်ကို စာတင်သွားမှာဖြစ်ပြီး၊ ကလေးတွေနဲ့ အုပ်ထိန်းသူတွေ အန္တရာယ်ကင်းစေဖို့အတွက် ဆောက်ရွက်ထားတာတွေကိုလည်း တစ်ပါတည်း အသိပေးသွားမှာ ဖြစ်ပါတယ်။
“အရင်အခြေအနေမျိုး မဟုတ်ဘူးဆိုတာ ကျွန်မတို့ သိပါတယ်။ ဒါ့ကြောင့် ကလေးငယ်တွေကို ကာကွယ်ဖို့ စည်းမျဉ်းစည်းကမ်းတွေ လိုပါတယ်။ ကျွန်မတို့ကိုယ်တိုင်နဲ့ သာမန်ကလေးတွေတောင် အိမ်မှာနေရတဲ့ စိတ်ဖိစီးမှုကို ကျော်လွှားနေရတယ်ဆိုရင် အော်တစ်ဇင်ကလေးငယ်တွေက ပိုဆိုးတာပေါ့။ ဘာတွေဖြစ်နေလဲဆိုတာ သူတို့လေးတွေ သိမှာတောင် မဟုတ်ပါဘူး” လို့ အဒ်လင်းက ထည့်သွင်း ပြောကြားခဲ့ပါတယ်။
ကျောင်း ဘယ်တော့ပြန်ဖွင့်မလဲဆိုတာကို မိဘတွေက လှမ်းလှမ်းမေးကြတယ်လို့လည်း သူမက ဆိုပါတယ်။
Ref: Free Malaysia Today
