ဩဂုတ် ၇၊ ၂၀၂၀
M-Media
-ဘေရွတ်မြို့ ဆိပ်ကမ်းက ဧရာမ ပေါက်ကွဲမှုနဲ့ပတ်သက်ပြီး လူ ၁၆ ယောက်ကို ဖမ်းဆီးထားတယ်လို့ လက်ဘနွန် အာဏာပိုင်တွေက ထုတ်ပြန်ပါတယ်။
အင်္ဂါနေ့က ပေါက်ကွဲမှုကြောင့် အနည်းဆုံး ၁၅၇ ဦး သေဆုံးပြီး ၅ ထောင်ကျော် ဒဏ်ရာရကာ နေအိမ်အဆောက်အဦးတွေ ပျက်ဆီးသွားတာကြောင့် လူပေါင်း ၂ သိန်းလောက် အိုးမဲ့အိမ်မဲ့ ဖြစ်ခဲ့ပါတယ်။ ဒီအဖြစ်အပျက်အတွင်း ပျောက်ဆုံးသူတွေအတွက် ရှာဖွေကယ်ဆယ်ရေးလုပ်ငန်းတွေ လုပ်ဆောင်နေပါတယ်။
လွန်ခဲ့တဲ့ ၆ နှစ်ကတည်းက ဆိပ်ကမ်းကုန်လှောင်ရုံမှာ သိမ်းဆည်းထားတဲ့ အမိုနီယံ နိုက်ထရိတ် တန်ပေါင်း ၂ ထောင်ကျော်ကြောင့် ဒီလိုပေါက်ကွဲအား ပြင်းထန်သွားတာလို့ လက်ဘနွန်အာဏာပိုင်တွေက ထုတ်ပြန်ထားပါတယ်။
လက်ရှိမှာ ဆိပ်ကမ်းနဲ့ အကောက်ခွန်တာဝန်ရှိသူတွေ၊ အလုပ်သမားတွေ စုစုပေါင်း ၁၆ ဦးကို ဖမ်းဆီးထားသလို အခြား တာဝန်ရှိတဲ့သူတွေကိုလည်း စစ်ဆေးနေတယ်လို့ အစိုးရက ထုတ်ပြန်ပါတယ်။ လက်ဘနွန် ဗဟိုဘဏ်ကလည်း ဆိပ်ကမ်းနဲ့ အကောက်ခွန်ဌာနက တာဝန်ရှိသူတွေရဲ့ ဘဏ်စာရင်းတွေကို ယာယီ ပိတ်ထားလိုက်ပါတယ်။
ဒီကိစ္စနဲ့ဆက်စပ်ပြီး အစိုးရနှုတ်ထွက်ပေးဖို့ လက်ဘနွန်ပြည်သူတွေ မနေ့က ဘေရွတ်မြို့လယ်ခေါင်မှာ ဆန္ဒပြခဲ့ကြပြီး လုံခြုံရေးတပ်ဖွဲ့တွေက အင်အားသုံး လူစုခွဲခဲ့ရပါတယ်။
Ref: Aljazeera
