ဩဂုတ် ၁၁၊ ၂၀၂၀
M-Media
-တမန်တော်မိုဟာမ္မဒ်ကို စော်ကားပြောဆိုတယ်ဆိုတဲ့ စွပ်စွဲချက်နဲ့ မွတ်စလင်အဆိုတော်တစ်ဦးကို နိုက်ဂျီးရီးယား ရှရီအာတရားရုံးက သေဒဏ်ချမှတ်လိုက်ပါတယ်။
နိုင်ငံမြောက်ပိုင်း ကာနိုပြည်နယ်က အသက် ၂၂ နှစ်အရွယ် အဆိုတော် ယာယာ ရှာရစ်ဖ် အမီနူဆိုသူဟာ သူရေးစပ်ထားတဲ့ သီချင်းတစ်ပုဒ်ကို မတ်လအတွင်းက WhatsApp မှာ ဖြန့်ဝေခဲ့တာပါ။
ဒီသီချင်းမှာ ဆူဖီဝိပဿနာဂိုဏ်းတစ်ခုက အကြီးအကဲတစ်ဦးကို တမန်တော်မိုဟမ္မဒ်ထက် ပိုမိုကြီးမြတ်သယောင်ယောင် ရေးသားစပ်ဆိုထားတယ်လို့ ဝေဖန်မှုတွေရှိလာခဲ့ပြီးတဲ့နောက် အမီနူဟာ ဖမ်းဆီး တရားစွဲဆို ခံခဲ့ရတာ ဖြစ်ပါတယ်။
ကာနိုပြည်နယ်ရဲ့ ရရှီအာ တရားရုံးက အမီနူဟာ ဘာသာသာသနာကို ညှိုးနွမ်းစေမှုနဲ့ အပြစ်ရှိကြောင်း တွေ့ရတဲ့အတွက် ကြိုးပေးကွပ်မျက်ဖို့ မနေ့မှာ အမိန့်ချမှတ်ခဲ့ပါတယ်။ အမီနူကတော့ အပြစ်မရှိကြောင်း ထွက်ဆိုခဲ့ပါတယ်။
အစ္စလာမ်ဘာသာဝင်အများစုရှိတဲ့ ကာနိုပြည်နယ်မှာ ပြစ်မှုဆိုင်ရာဥပဒေအပြင်၊ ရရှီအာဥပဒေကိုလည်း ပြဌာန်းထားပြီး အစ္စလာမ်ဘာသာဝင်တွေရဲ့ လက်ထပ်မှု၊ ကွာရှင်းမှု၊ ဘာသာရေးအရ တားမြစ်ထားတဲ့ကိစ္စတွေ ကျူးလွန်လုပ်ဆောင်မှုတွေကို ကိုင်တွယ်ပါတယ်။ ရှရီအာဥပဒေဟာ အစ္စလာမ်ဘာသာဝင်တွေအပေါ်မှာပဲ သက်ရောက်တာ ဖြစ်ပါတယ်။
နိုက်ဂျီးရီးယားနိုင်ငံမှာ ရှရီအာ တရားရုံးတွေကို ၁၉၉၉ ခုနှစ်ကစတင်က ပြန်လည် အသုံးပြုခဲ့တာဖြစ်ပြီး အခုအချိန်အထိ ကွပ်မျက်မှုတစ်ခုသာ ရှိပါတယ်။ ဒါကတော့ ဇနီးနဲ့ သားသမီး ၂ ဦးကို သတ်ဖြတ်ခဲ့တဲ့ အမျိုးသားကို ၂၀၀၂ ခုနှစ်မှာ ကြိုးပေးကွပ်မျက်ခဲ့တာပါ။
အမီနူရဲ့သီချင်းကြောင့် ပြည်နယ်အတွင်း ဆန္ဒပြမှုတွေ ဖြစ်ပေါ်ခဲ့ပြီး သူ့ရဲ့ မိသားစုနေအိမ်လည်း မီးရှို့ ဖျက်ဆီးခံခဲ့ရပါတယ်။
ယာယာ ရှာရစ်ဖ် အမီနူဟာ Tijaniya ဆူဖီဝိပဿနာဂိုဏ်းဝင်ဖြစ်ပြီး ဂိုဏ်းဝင်တွေအကြား ဓမ္မတေးသီဆိုသူအဖြစ် သိကြပါတယ်။
Ref: BBC
