Blog

မတ် ၂၇၊ ၂၀၂၄

M-Media 

-ဂါဇာမှာ ချက်ခြင်း အပစ်ရပ်ဖို့အတွက် ကုလ လုံခြုံရေးကောင်စီက အခုတစ်ပတ် အစောပိုင်းမှာ ဆုံးဖြတ်ချက် ချမှတ်ခဲ့ပေမယ့် အစ္စရေးက တိုက်ခိုက်သတ်ဖြတ်မှုတွေ တိုးမြှင့်လုပ်ဆောင်လာပါတယ်။

အောက်တိုဘာ ၇ ရက်နေ့နောက်ပိုင်း အစ္စရေးရဲ့တိုက်ခိုက်သတ်ဖြတ်မှုတွေကို တားဆီးဖို့ ကြိုးစားတဲ့ လုံခြုံရေးကောင်စီရဲ့ ဆုံးဖြတ်ချက်တွေကို ဗီတိုအာဏာသုံးပြီး တောက်လျှောက်ပယ်ချလာတဲ့ အမေရိကန်ဟာ ဒီတစ်ပတ် ဆုံးဖြတ်ချက်ကို ကန့်ကွက်ခြင်း မပြုတော့ပါဘူး။ 

ဒါဟာ အစ္စရေးရဲ့ အကြမ်းဖက်မှုတွေအပေါ် မနှစ်မြို့မှုကို အမေရိကန်က လူသိရှင်ကြား ထုတ်ပြလာတာ ဖြစ်ပါတယ်။ 

အစ္စရေးကတော့ လုံခြုံရးကောင်စီရဲ့ ဆုံးဖြတ်ချက်ကို ဂရုမစိုက်ဘဲ တိုက်ခိုက်သတ်ဖြတ်မှုတွေ တိုးမြှင့်လုပ်ဆောင်နေပါတယ်။ 

ဒုတိယကမ္ဘာစစ်အတွင်း နာဇီရန်ကြောင့် ပါလက်စတိုင်းကို ထွက်ပြေးလာတဲ့ ဂျူးတွေ လက်နက်ကိုင်ပြီး ပါလက်စတိုင်းတွေကို သတ်ဖြတ်မောင်းထုတ်ကာ နိုင်ငံထူထောင်တဲ့အချိန်က ကုလရဲ့ ဆုံးဖြတ်ချက်တွေကို အဓိကအသုံးချ အကာအကွယ်ယူခဲ့တာ ဖြစ်ပါတယ်။

သိပ်လွန်နေပြီ 

ပြီးခဲ့တဲ့ ၅ လအတွင်း ဂါဇာကမ်းမြှောင်က အစ္စရေးရဲ့ လုပ်ရပ်တွေဟာ အရမ်းလွန်နေပြီလို့ အမေရိကန် ကာကွယ်ရေး၀န်ကြီး လွိုက်အော်စတင်က မတ်လ ၂၆ ရက်နေ့မှာ အစ္စရေးကာကွယ်ရေး၀န်ကြီးကို  ထပ်မံ သတိပေးလိုက်ပါတယ်။  

ဂါဇာမှာ အရပ်သားတွေ သတ်ဖြတ်ခံရမှုဟာ အလွန်အမင်း များပြားနေပြီး၊ ပါလက်စတိုင်းပြည်သူတွေဆီ လူသားချင်းစာနာမှု အကူအညီ ရောက်ရှိမှုဟာ အလွန်နည်းနေတယ်လို့ အော်စတင်က ဆိုပါတယ်။ 

အစ္စရေးအပေါ် အမေရိကန်တာ၀န်ရှိသူတွေရဲ့ ၀ေဖန်ရှုတ်ချမှု မြင့်တက်လာပေမယ့်လည်း တိုက်ခိုက်သတ်ဖြတ်မှုတွေ လုပ်ဆောင်ဖို့ လိုအပ်တဲ့ လက်နက်ခဲယမ်းတွေကို အမေရိကန်က အစ္စရေးထံ ဆက်လက်ထောက်ပံ့နေဆဲ ဖြစ်ပါတယ်။ 

လူမျိုးတုန်းသတ်ဖြတ်မှု 

ပါလက်စတိုင်းဆိုင်ရာ ကုလအထူးကိုယ်စားလှယ် ဖရန်ဆက်ဆကာ အလ်ဘန်းနီးစ်က ဂါဇာမှာ အစ္စရေးက လူမျိုးတုန်းသတ်ဖြတ်မှု ကျူးလွန်နေတဲ့ ခိုင်မာတဲ့ အထောက်အထားတွေ တွေ့ရတယ်လို့ မတ်လ ၂၅ ရက်နေ့မှာ ပြောကြားခဲ့ပါတယ်။ 

မြေပြင်အဖွဲ့အစည်းတွေထံက ရရှိတဲ့ အချက်အလက်တွေ၊ စုံစမ်းစစ်ဆေးမှု အစီရင်ခံစာတွေ၊ အသက်ရှင်လွတ်မြောက်လာသူတွေရဲ့ ပြောကြားမှုတွေကို သုံးသပ်ရင် အစ္စရေးဟာ ကုလရဲ့ လူမျိုးတုန်းသတ်ဖြတ်မှု တားဆီးရေးသဘောတူညီချက်မှာ ပါ၀င်တဲ့ အချက် ၅ ချက်မှာ အနည်းဆုံး ၃ ချက်ကို ကျူးလွန်နေတယ်ဆိုတာ တွေ့ရတယ်လို့ အလ်ဘန်နီးစ်က ပြောပါတယ်။

ပြီးခဲ့တဲ့နှစ် အောက်တိုဘာ ၇ ရက်နေ့ကစတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အသတ်ခံရသူအရေအတွက်ဟာ ၃၃၀၀၀ နီးပါးရှိလာပြီး အများစုဟာ အမျိုးသမီးနဲ့ ကလေးငယ်တွေဖြစ်ပါတယ်။ 

အစ္စလာမ်ဘာသာ၀င်တွေရဲ့ ရမ်ဇာန်ပုသ်လဖြစ်တဲ့အတွက် တိုက်ခိုက်သတ်ဖြတ်မှုတွေကို ရပ်ဆိုင်းဖို့ နိုင်ငံတကာအသိုင်းအ၀ိုင်းက တိုက်တွန်းထားပေမယ့် အစ္စရေးက မရပ်တန့်ဘဲ သတ်ဖြတ်မှုတွေ တိုးမြှင့်ပြုလုပ်နေပါတယ်။ 

ဂါဇာကမ်းမြှောင်က အဆောက်အဦးတွေရဲ့ ၈၀ ရာခိုင်နှုန်းကျော်ကို အစ္စရေးက ဖျက်ဆီးထားပြီး၊ အစ္စရေးရဲ့ အကူအညီတားဆီးပိတ်ပင်မှုတွေကြောင့် ၂ ဒဿမ ၂ သန်းသော ပါလက်စတိုင်းပြည်သူတွေဟာ အငတ်ဘေးဆိုက်နေပြီ ဖြစ်ပါတယ်။ 

Ref: Aljazeera 

မတ် ၂၅၊ ၂၀၂၄
M-Media

• 

• 

-၅ လကျော် ကြာမြင့်နေပြီဖြစ်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အသတ်ခံရသူအရေအတွက်ဟာ ၃၂၃၃၃ ဦး ရှိလာပြီဖြစ်ပါတယ်။

ပြီးခဲ့တဲ့ ၂၄ နာရီအတွင်း အစ္စရေးဟာ ပါလက်စတိုင်း ၁၀၇ ဦးကို သတ်ဖြတ်ခဲ့ပြီး ဒဏ်ရာရသူအရေအတွက်က ၁၇၆ ဦး ရှိပါတယ်။

လတ်တလောမှာ အစ္စရေးဟာ ဂါဇာက ဆေးရုံတွေကို ပစ်မှတ်ထား တိုက်ခိုက်နေတာပါ။ ဂါဇာကမ်းမြှောင်က အကြီးဆုံး အလ်ရှီဖာဆေးရုံ အပါအ၀င် ဆေးရုံ အနည်းဆုံး ၃ ခု တိုက်ခိုက်ခံနေရပါတယ်။

အစွန်းရောက် အစ္စရေး

ဂျော်ဒန်နိုင်ငံခြားရေး၀န်ကြီး အေမန် ဆာဖာဒီက နိုင်ငံတကာက တားဆီးဟန့်တားတာမျိုး မရှိတဲ့အတွက် အစ္စရေးအစိုးရဟာ စစ်ရာဇ၀တ်မှုတွေ ကျူးလွန်နေတယ်လို့ ၀ေဖန်ခဲ့ပါတယ်။

“လူမျိုးရေးအစွန်းရောက် လူသွမ်းတွေ အစ္စရေးအစိုးရကို ဦးဆောင်နေပါတယ်။ ဒေသတစ်ခုလုံး အခြေအနေ ပိုဆိုးသွားစေမှာမျိုး ကျွန်တော်တို့ ဆက်ပြီး ခွင့်ပြုထားလို့ မရတော့ပါဘူး”

Ref: Aljazeera

မတ် ၂၃၊ ၂၀၂၄

M-Media

-တရားမ၀င် ဂျူးအခြေချအိမ်ယာတွေ ဆောက်လုပ်ဖို့အတွက် ပါလက်စတိုင်းနိုင်ငံ အနောက်ဖက်ကမ်းက မြေ ၁၉၇၇ ဧကကို အစ္စရေးက ထပ်မံခိုးယူလိုက်ပါတယ်။

ဒီခိုးယူမှုကို အစ္စရေးဘဏ္ဍာရေး၀န်ကြီး ဘီဇာလီလ် စမိုထရစ်ချ်က လူသိရှင်ကြား ကြေငြာခဲ့တာဖြစ်ပါတယ်။ 

အနောက်ဖက်ကမ်းကို အနာဂတ်ပါလက်စတိုင်းနိုင်ငံရဲ့ အစိတ်အပိုင်းအဖြစ် ကုလက သတ်မှတ်ပေးထားတာဖြစ်ပြီး ဒီဒေသတွေမှာ အစ္စရေးက ဆောက်လုပ်ထားတဲ့ ဂျူးအခြေချ အိမ်ယာတွေဟာ နိုင်ငံတကာဥပဒေအရ တရားမ၀င်ပါဘူး။ 

နိုင်ငံတကာအသိုင်းအ၀ိုင်းက ဒီလုပ်ရပ်တွေကို ပြင်းပြင်းထန်ထန် ရှုတ်ချပေမယ့် အစ္စရေးက ဂရုမစိုက်ပါဘူး။ အခု ခိုးယူမှုဟာ အမေရိကန်နိုင်ငံခြားရေး၀န်ကြီး အန်တိုနီဘလင်ကန် အစ္စရေးကို ရောက်ရှိနေချိန် ပေါ်ထွက်လာတာ ဖြစ်ပါတယ်။ 

ပါလက်စတိုင်း နိုင်ငံခြားရေး၀န်ကြီးဌာနရဲ့ ထုတ်ပြန်ချက်မှာ ဒီလုပ်ရပ်ဟာ ရာဇ၀တ်မှုဖြစ်ပြီး အနောက်ဖက်ကမ်းကို ကျူးကျော်သိမ်းပိုက်ဖို့နဲ့ အနာဂတ်ပါလက်စတိုင်းနိုင်ငံ ပေါ်ပေါက်မလာအောင် ကျင့်သုံးတဲ့ မူ၀ါဒ တစ်စိတ်တစ်ပိုင်း ဖြစ်တယ်လို့ ရှုတ်ချခဲ့ပါတယ်။

နိုင်ငံကတာအသိုင်းအ၀ိုင်းဟာလည်း အစ္စရေးနဲ့ ကြံရာပါဖြစ်တယ်လို့ ၀ေဖန်ခဲ့ပါတယ်။

“ကျွန်တော်တို့လူမျိုးတွေအပေါ် ကာကွယ်ပေးဖို့ နိုင်ငံတကာအသိုင်းအ၀ိုင်းရဲ့ ပျက်ကွက်မှုဟာ အစ္စရေးနဲ့ ကြံရာပါဖြစ်စေပြီး အရေးယူခံရမှုကနေ လွတ်မြောက်အောင် အစ္စရေးကို ကာကွယ်ပေးနေတာလည်း ဖြစ်ပါတယ်”

ပါလက်စတိုင်းပိုင် အနောက်ဖက်ကမ်းမှာ အစ္စရေးရဲ့ တရားမ၀င် ဂျူးအခြေချအိမ်ယာ ထောင်ချီရှိပြီး၊ လူသိန်းချီ နေထိုင်နေကြပါတယ်။

Ref: Aljazeera 

(ဓာတ်ပုံ – ပါလက်စတိုင်းပိုင်နက်များမှ အစ္စရေး၏ တရားမ၀င် အိမ်ယာများ)