Blog

မတ် ၂၈၊ ၂၀၂၄

M-Media 

• 

• 

-ကမ္ဘာကျော် တိုက်တန်းနစ်ရုပ်ရှင်ထဲက နာမည်ကြီးသစ်သားပြားကို ပြီးခဲ့တဲ့တစ်ပတ် လေလံတင်ရောင်းချရမှာ ဒေါ်လာ ၇၁၈၇၅၀ ရရှိခဲ့ပါတယ်။ 

မင်းသမီးရို့စ် အသက်ရှင်သန်ရေးအတွက် အရေးပါတဲ့ သစ်သားပြား ဖြစ်ပါတယ်။ တိုက်တန်းနစ်သင်္ဘော တိမ်းမှောက်ပြီး လူတွေ ရေပေါ် မျောနေစဥ်မှာ မင်းသားဂျက်က ရေထဲမှာ မျောလာတဲ့ သစ်သားပြားကို ယူပြီး မင်းသမီးရို့စ်ကို တင်ပေးခဲ့တာပါ။ 

အဲဒီသစ်သားပြားကြောင့်ပဲ ရို့စ်ဟာ အသက်ရှင်ခဲ့တာ ဖြစ်ပါတယ်။ ရုပ်ရှင်ထဲက ဒီသစ်သားပြားဟာ တကယ့် တိုက်တန်းနစ်သင်္ဘောက ပျက်ဆီးနေတဲ့ သစ်သားပြားကို နမူနာယူကာ အသေးစိတ် ဖန်တီးထားတာ ဖြစ်ပါတယ်။ 

အငြင်းပွားဖွယ်သစ်သားပြား 

မင်းသားဂျက် သေဆုံးသွားခဲ့တဲ့ ဒီဇာတ်၀င်ခန်းအတွက် ပရိတ်သတ်တွေထံက ၀ေဖန်မှုတွေ ရခဲ့တယ်လို့ တိုက်တန်းနစ်ဒါရိုက်တာ ဂျိမ်းစ် ကင်မရွန်းက ပြောပါတယ်။ 

ရို့စ်ဟာ တစ်ကိုယ်ကောင်းဆန်သူဖြစ်ပြီး ဂျက်ကလည်း ငပိန်းတစ်ယောက်ဖြစ်တယ်လို့ ပရိတ်သတ်တွေက ဆိုပါတယ်။ ဒီသစ်သားပြားဟာ ၂ ယောက်စလုံး တက်နေနိုင်တဲ့ အနေအထား ရှိတယ်လို့ စောဒက တက်ခဲ့ကြတာပါ။ 

အလျား ၈ ပေ၊ အနံ ၃ ပေကျော်ရှိတဲ့ အဲဒီသစ်သားပြားမှာ လူနှစ်ယောက် တက်နေနိုင်တယ်ဆိုတဲ့ အငြင်းပွားမှုတွေ ရှိပေမယ့် ဇာတ်လမ်းအရ မင်းသားဂျက်ဟာ သေဆုံးရမှာဖြစ်တယ်လို့ ဒါရိုက်တာ ကင်မရွန်းက ပြန်လည်ဖြေရှင်းခဲ့ပါတယ်။ 

Ref: BBC

မတ် ၂၇၊ ၂၀၂၄

M-Media 

-အမေရိကန်ပြည်ထောင်စု မေရီလန်းပြည်နယ် ဘာလ်တီမိုးမြို့က Francis Scott Key တံတား ကျိုးကျမှုအတွင်း အနည်းဆုံး လူ ၆ ဦးသေဆုံးဖွယ်ရှိတယ်လို့ အာဏာပိုင်တွေက ပြောပါတယ်။ 

မတ်လ ၂၆ ရက်နေ့မနက်ပိုင်းက တံတားတိုင်တစ်ခုကို  ကွန်တိန်နာသင်္ဘောကြီး ၀င်တိုက်ခဲ့တာကြောင့် ကျိုးကျခဲ့တာပါ။ အခင်းဖြစ်ပွားစဥ် တံတားပေါ်မှာ လူ ၈ ဦး ရှိခဲ့ပြီး ၂ ဦးကို အသက်ရှင်လျက် ကယ်တင်နိုင်ခဲ့ပါတယ်။ 

ရှာမတွေသေးတဲ့ အခြား ၆ ဦးကို သေဆုံးသွားပြီလို့ ယူဆကြောင်း အာဏာပိုင်တွေက ထုတ်ပြန်ပါတယ်။ အန္တရာယ်ရှိတဲ့ အနေအထားကြောင့် ရှာဖွေကယ်ဆယ်မှုတွေကို မတ်လ ၂၈ ရက်နေ့မှ ပြန်လည်လုပ်ဆောင်နိုင်မယ်လို့ ဆိုပါတယ်။ 

သေဆုံးသွားပြီလို့ ယူဆရသူ ၆ ဦးဟာ ဂွါတီမာလာ၊ အလ်ဆာဗေဒိုးနဲ့ မက္ကဆီကိုတို့က ဆောက်လုပ်ရေးလုပ်သားတွေ ဖြစ်ပါတယ်။

တံတားကို ၀င်တိုက်ခဲ့တဲ့ ကွန်တိန်နာသင်္ဘော Dali ဟာ စင်ကာပူအလံလွှင့်ထားတဲ့ သင်္ဘောပါ။ တံတားကိုမတိုက်ခင်မှာ ကမ်းခြေစောင့်အဖွဲ့ကို အန္တရာယ်ရှိနေကြောင်း သတင်းပေးပို့ခဲ့ပြီး တံတားက ကားအသွားအလာကို ရှင်းလင်းထားဖို့ အကြောင်းကြားခဲ့ပါတယ်။ 

တံတားကို၀င်မတိုက်ခင် Dali သင်္ဘောဟာ အင်ဂျင်ရော၊ လျှပ်စစ်စနစ်အားလုံး ပြတ်တောက်သွားကြောင်း ကနဦးစစ်ဆေးမှုမှာ တွေ့ခဲ့ရပါတယ်။ 

ဒီသင်္ဘောဟာ ပြီးခဲ့တဲ့နှစ်က အင်ဂျင်ပိုင်းနဲ့ စက်ကိရိယာပိုင်းဆိုင်ရာ ပြဿနာကြောင့် ချီလီနိုင်ငံမှာ တစ်ထောက်နား ပြင်ဆင်ခဲ့ရဖူးပါတယ်။ 

Francis Scott Key တံတား ကျိုးကျမှုကြောင့် အမေရိကန်အရှေ့ဘက်ကမ်းရိုးတန်းက ကုန်သွယ်ရေးကို ထိခိုက်မယ်လို့ ကျွမ်းကျင်သူတွေက သုံးသပ်ပါတယ်။ 

Ref: CNN