ဒီဇင်ဘာ ၂၁၊ ၂၀၁၉
M-Media
-ပါလက်စတိုင်းပိုင်နက်တွေမှာ အစ္စရေးက ကျူးလွန်တဲ့ စစ်ရာဇဝတ်မှုတွေအတွက် အပြည့်အ၀ စုံစမ်းစစ်ဆေးသွားမယ်လို့ နိုင်ငံတကာ ရာဇဝတ်ခုံရုံး ICC ရဲ့ ရှေ့နေချုပ် ဖာတူ ဘန်ဆူဒါက မနေ့မှာ ပြောကြားလိုက်ပါတယ်။
ICC ရဲ့ ဒီထုတ်ပြန်ချက်ကို ပါလက်စတိုင်းခေါင်းဆောင်ပိုင်းက ကြိုဆိုခဲ့ပြီး၊ အစ္စရေးကတော့ ရှုတ်ချခဲ့ပါတယ်။
“ပါလက်စတိုင်းက အခြေအနေနဲ့ပတ်သက်ပြီး စုံစမ်းစစ်ဆေးမှု ပြုလုပ်ဖို့ ကျိုးကြောင်းဆီလျောတဲ့ အခြေခံအကြောင်းအရင်း ရှိနေတဲ့အတွက် ကျွန်မ ကျေနပ်မိပါတယ်။ အနောက်ဖက်ကမ်း၊ အရှေ့ဂျေရုစလင်နဲ့ ဂါဇာကမ်းမြှောင်တွေမှာ စစ်ရာဇဝတ်မှုတွေ ကျူးလွန်ခဲ့တာ၊ ကျူးလွန်နေတာ ရှိနေတယ်လို့ အကြမ်းဖျင်း ပြောချင်ပါတယ်” လို့ ဘန်ဆူဒါရဲ့ ထုတ်ပြန်ချက်မှာ ဖော်ပြထားပါတယ်။
အစ္စရေးဟာ အဖွဲ့ဝင်နိုင်ငံ မဟုတ်တဲ့အတွက် ပြည့်၀တဲ့ စုံစမ်းစစ်ဆေးမှုမလုပ်ခင် ICC မှာ တရားစီရင်ပိုင်ခွင့် တောင်းဆိုသွားမှာဖြစ်ပြီး နှောင့်နှေးကြန့်ကြာခြင်းမရှိဘဲ ခွင့်ပြုပေးဖို့လည်း တရားသူကြီးတွေကို ဘန်ဆူဒါက တောင်းဆိုခဲ့ပါတယ်။
ကြိုဆို
ပါလက်စတိုင်း နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဘန်ဆူဒါရဲ့ ပြောကြားမှုကို ကြိုဆိုခဲ့ပါတယ်။
“ကနဦး စုံစမ်းမှုကို ၅ နှစ်ကြာအောင် ခက်ခက်ခဲခဲ ဆောင်ရွက်ခဲ့ရပြီးနောက် ရှေ့ဆက်ဖို့ ဖြစ်လာတဲ့ ဒီခြေလှမ်းကို ပါလက်စတိုင်းက ကြိုဆိုပါတယ်”
ပါလက်စတိုင်းပြည်သူ ၂၂၅၁ ဦးသေဆုံးခဲ့တဲ့ ၂၀၁၄ ခုနှစ် ဂါဇာကမ်းမြှောင်ကို အစ္စရေးက ကျူးကျော်တိုက်ခိုက်မှု ပြီးတဲ့နောက် ၂၀၁၅ ခုနှစ်မှာ ICC ရှေ့နေချုပ် ဖာတူ ဘန်ဆူဒါက ကနဦး စုံစမ်းစစ်ဆေးမှု ပြုလုပ်ခဲ့တာ ဖြစ်ပါတယ်။
ပါလက်စတိုင်းဟာ ၂၀၁၅ ခုနှစ်က ICC မှာ လက်မှတ်ရေးထိုးခဲ့ပြီး ပါလက်စတိုင်းပိုင်နက်တွေမှာ အစ္စရေးရဲ့ ကျူးလွန်မှုတွေအတွက် စုံစမ်းစစ်ဆေးမှု မြန်မြန်လုပ်ဆောင်ဖို့ အကြိမ်ကြိမ် တိုက်တွန်းခဲ့ပါတယ်။
ICC ဟာ နိုင်ငံတစ်ခုကို တရားစွဲဆိုပိုင်ခွင့်မရှိဘဲ စစ်ရာဇတ်မှု ကျူးလွန်သူတွေကိုသာ တရားစွဲဆိုခွင့် ရှိပါတယ်။
အစ္စရေးဝန်ကြီးချုပ် နေတန်ယာဟုက ဘန်ဆူဒါရဲ့ ထုတ်ပြန်ချက်ကို ဝေဖန်ခဲ့ပြီး ‘အမှန်တရားနဲ့ တရားမျှတမှု အမှောင်ကျတဲ့နေ့’ ဖြစ်တယ်လို့ ပြောကြားခဲ့ပါတယ်။
Ref: Aljazeera
