သြဂုတ် ၂၃၊ ၂၀၁၈
M-Media
ပါလက်စတိုင်းတွင် တရားမ၀င်အိမ်ယာ တစ်ထောင်ကို အစ္စရေးက ထပ်ဆောက်မည်
=================
ပါလက်စတိုင်းပိုင် အနောက်ဖက်ကမ်းမှာ တရားမ၀င်အိမ်ယာ ၁၀၀၀ ကျော် ဆောက်လုပ်ဖို့အတွက် အစ္စရေးက မနေ့မှာ အတည်ပြုလိုက်ပါတယ်။ ပါလက်စတိုင်းပိုင်နက်တွေမှာ အစ္စရေးရဲ့ ဒီလို ကျူးကျော်အိမ်ယာတွေဟာ နိုင်ငံတကာဥပဒေအရ တရားမ၀င်ဘဲ ကမ္ဘာ့နိုင်ငံတော်တော်များများကလည်း ကန့်ကွက်ထားပါတယ်။ ပါလက်စတိုင်းက အစ္စရေးရဲ့တရားမ၀င်အိမ်ယာတွေမှာ နေထိုင်သူ အရေအတွက်ဟာ ၆ သိန်းအထိ ရှိလာပြီး ပါလက်စတိုင်းတွေက သူတို့ရဲ့ပိုင်နက်တွေကို ကျူးကျော်မှုအတွက် ဒီတရားမ၀င်အိမ်ယာတွေကို ဆန့်ကျင်တိုက်ခိုက်မှုတွေလည်း မကြာခဏ ပြုလုပ်ခဲ့ကြပါတယ်။
ဗီယက်နမ်က ကွန်မြူနစ်ဆန့်ကျင်ရေးသမား ၁၂ ဦးကို ထောင်ချ
=================
ပြီးခဲ့တဲ့နှစ်မှာ အစိုးရဆန့်ကျင်ရေးစာရွက်စာတမ်းတွေ ဝေငှကာ ဆူပူအောင်လုပ်ပြီး အစိုးရကို ဖြုတ်ချဖို့ ကြိုးစားတယ်ဆိုတဲ့ စွပ်စွဲချက်နဲ့ ဗီယက်နမ်က အမေရိကန်နိုင်ငံသား ၂ ဦးအပါအ၀င် လူ ၁၂ ယောက်ကို မနေ့မှာ ထောင်ဒဏ် ၅ နှစ်ကနေ ၁၄ နှစ်အထိ ချမှတ်လိုက်ပါတယ်။ အဲဒီလူတွေဟာ အမေရိကန်အခြေစိုက် ကွန်မြူနစ်ဆန့်ကျင်ရေး Provisional National Government of Vietnam (PNGV) အဖွဲ့ကဖြစ်ပြီး ဗီယက်နမ်ဟာ ဒီအဖွဲ့အပါအ၀င် ကွန်မြူနစ်အစိုးရကို ဆန့်ကျင်တဲ့အဖွဲ့အားလုံးကို အကြမ်းဖက်အဖွဲ့အဖြစ် သတ်မှတ်ထားပါတယ်။ ဗီယက်နမ်မှာ ကွန်မြူနစ်အစိုးရကို ဆန့်ကျင်တဲ့ တက်ကြွလှုပ်ရှားသူတွေ လူ့အခွင့်အရေး ရှေ့နေတွေကို တရားစွဲဆိုကာ ထောင်ချလေ့ရှိပါတယ်။
မြောက်ကိုရီးယား နျူဖျက်သိမ်းရေးကတိက၀တ်ကို မလိုက်နာဟု The 38 North အဖွဲ့ပြော
================
မြောက်ကိုရီးယားဟာ ဒုံးကျည်စမ်းသပ်တဲ့နေရာ Sohae Satellite Launching Station ဖြိုဖျက်မှုကို သြဂုတ်လအစောပိုင်းမှာ ရပ်တန့်လိုက်ပြီး နျူဖျက်သိမ်းရေး ကတိက၀တ်ကို ဆက်လက် အကောင်အထည်မဖော်တော့ဘူးလို့ ဂြိုဟ်တုဓာတ်ပုံတွေကို ကိုးကားပြီး အမေရိကန်အခြေစိုက် တတ်သိပညာရှင်များအဖွဲ့ The 38 North က ပြောကြားလိုက်ပါတယ်။ ဇွန်လ ၁၂ ရက်နေ့ စင်ကာပူဆွေးနွေးပွဲမှာ ကင်ဂျုံအွန်က နျူဖျက်သိမ်းရေး ကတိပြုခဲ့ပြီးတဲ့နောက် ဇူလိုင်လကစလို့ ဒီနေရာကို ဖြိုချခဲ့တာ ဖြစ်ပါတယ်။
ရုရှားဦးဆောင်သည့် ငြိမ်းချမ်းရေးညီလာခံသို့ မတက်ဟု အာဖဂန်ပြော
===========
ရုရှားက ဦးဆောင်ပြီး နောက်လအစောပိုင်းမှာ ပြုလုပ်ဖို့ စီစဉ်ထားတဲ့ ငြိမ်းချမ်းရေးဆွေးနွေးပွဲကို တက်ရောက်မှာမဟုတ်ဘူးလို့ အာဖဂန်နိုင်ငံခြားရေးဝန်ကြီးဌာနက မနေ့မှာ ထုတ်ပြန်လိုက်ပါတယ်။ ရုရှားဟာ ငြိမ်ချမ်းရေးညီလာခံအတွက် အမေရိကန်အပါအ၀င် နိုင်ငံပေါင်း ၁၂ နိုင်ငံကို ဖိတ်ကြားထားပြီး အမေရိကန်က တက်ရောက်မှာမဟုတ်ဘူးလို့ ဆိုပါတယ်။ ဒီဆွေးနွေးပွဲကို တာလီဘန်အဖွဲ့လည်း တက်ရောက်ဖို့ရှိနေပြီး အာဖဂန်နိုင်ငံခြားရေးဝန်ကြီးဌာနက သူတို့အနေနဲ့ အာဖဂန်နဲ့ တိုက်ရိုက်ဆွေးနွေးသွားမှာဖြစ်ကာ နိုင်ငံခြားတိုင်းပြည်က ၀င်စွက်မှုကို မလိုလားဘူးလို့ ဆိုပါတယ်။
Ref: CNA, Aljazeera
