သြဂုတ် ၂၁၊ ၂၀၁၈
M-Media
– ကလေးငယ်တွေအပေါ် လိင်ပိုင်းဆိုင်ရာ ကျူးလွန်တဲ့ ခရစ်ယာန် ကက်သလစ် ဘုန်းတော်ကြီးတွေရဲ့ကိုယ်ရေးအချက်အလက်တွေနဲ့ သူတို့ရဲ့ ကျူးလွန်မှုတွေကို စုစည်းထားမယ့် အွန်လိုင်း ဒေတာဘေ့စ်တစ်ခုကို နိုင်ငံတကာ သုတေသနအဖွဲ့ BishopAccountability.org က ဖန်တီးလိုက်ပါတယ်။
ဒေတာဘေ့စ်ဖန်တီးထားကြောင်းကို မနေ့က ကြေငြာခဲ့တာဖြစ်ပြီး ခရစ်ယာန် ကက်သလစ်အသင်းတော်ထဲမှာ ကလေးငယ်တွေကို လိင်ပိုင်းဆိုင်ရာ ကျူးလွန်တဲ့ ဘုန်းကြီးတွေရဲ့ အမည်အားလုံးကို ထုတ်ပြန်ကြေငြာရေး ပုပ်ရဟန်းမင်းကြီး ဖရန်စစ်ကို ဖိအားပေးဖို့ ရည်ရွယ်တယ်လို့လည်း ဒီအဖွဲ့က ဆိုပါတယ်။
“ကလေးငယ်တွေအပေါ် မတော်မတရားပြုသူတွေရဲ့ အမည်တွေကို မထုတ်ပြန်ဘဲထားတာဟာ ကလေးငယ်တွေအတွက် အန္တရာယ်ရှိပါတယ်။ ကျူးလွန်တဲ့ကိစ္စတွေရဲ့ ခိုင်လုံမှုကို အားနည်းသလိုဖြစ်စေတယ်၊ လူဝတ်ကြောင်တွေအနေနဲ့ သူတို့ရဲ့ မိသားစုဝင်တွေကို ကာကွယ်ဖို့၊ ကျူးလွန်သူတွေကို တရားစွဲဖို့ အဟန့်အတား ဖြစ်စေပါတယ်” လို့ အဖွဲ့ရဲ့ ပူးတွဲဒါရိုက်တာ အန်နီ ဘာရတ် ဒွိုင်လီက ပြောကြားခဲ့ပါတယ်။
အမေရိကန်ပြည်ထောင်စု မက်ဆာချူးဆက်ပြည်နယ်မှာ အခြေစိုက်တဲ့ BishopAccountability.org ဟာ ကျူးလွန်သူ ဘုန်းကြီးတွေနဲ့ပတ်သက်တဲ့ ရနိုင်သမျှအချက်အလက်တွေကို ရှာဖွေစုဆောင်းနေပြီး၊ ကျူးလွန်သူတွေ အရေးယူခံရဖို့ ကြိုးစားနေတဲ့အဖွဲ့လည်း ဖြစ်ပါတယ်။
သူတို့ဖန်တီးထားတဲ့ ဒေတာဘေ့စ်မှာ ကလေးငယ်တွေအပေါ် လိင်ပိုင်းဆိုင်ရာ ကျူးလွန်ခဲ့တဲ့ ကက်သလစ်ဘုန်းကြီးတွေရဲ့ အမည်တွေ၊ သူတို့ကျူးလွန်မှု အကျဉ်းချုပ်တွေကို ထည့်သွင်းထားပါတယ်။
ခရစ်ယာန်ကက်သလစ်အသင်းတော်က ဘုန်းကြီးတွေဟာ ကလေးငယ်တွေကို လိင်ပိုင်းဆိုင်ရာ စော်ကားတဲ့ကိစ္စဟာ အမေရိကန်၊ ချီလီ၊ သြစတေးလျနဲ့ အိုင်ယာလန်တို့မှာ အခုနှစ်ပိုင်းအတွင်း လူသိရှင်ကြား ဖော်ထုတ်ခံလာရပါတယ်။
အဲဒီလိုကျူးလွန်မှုတွေကို ခေါင်ဆောင်ပိုင်း ဘုန်းကြီးတွေက စနစ်တကျ ကာကွယ်ပေးခဲ့တာတွေကိုလည်း စုံစမ်းစစ်ဆေးမှုမှာ တွေ့ရှိခဲ့ရပါတယ်။
ပုပ်ရဟန်းမင်းကြီး ဖရန်စစ်က ကမ္ဘာတစ်ဝှမ်း ၁.၂ ဘီလီယံရှိတဲ့ ကက်သလစ်ဘာသာဝင်တွေကို ရည်ညွှန်းတဲ့ ပန်ကြားစာတစ်စောင်ကို မနေ့က ထုတ်ပြန်ခဲ့ပြီး အသင်းတော်မှာ ဒီကိစ္စကို အမြစ်ပြတ်အောင်လုပ်ဖို့ တိုက်တွန်းခဲ့ပါတယ်။
Ref: Aljazeera
