ဇွန် ၁၃၊ ၂၀၁၈
M-Media
ဘောလုံးလူဆိုး ၁၂၀၀ ကျော်ကို အင်္ဂလန်က ရုရှားသွားခွင့်ပိတ်
===============
အင်္ဂလန်ဘောလုံးလူဆိုး ၁၂၀၀ ကျော်ကို ရုရှားကမ္ဘာ့ဖလားသွားရောက်မှု ပိတ်ပင်ခဲ့တယ်လို့ အင်္ဂလန်ပြည်ထဲရေးဝန်ကြီးဌာနက ဒီနေ့မှာ သတင်းထုတ်ပြန်ပါတယ်။ ဘောလုံးလူဆိုး ၁၃၁၂ ဦးမှာ ၁၂၅၄ ဦးက သူတို့ရဲ့ နိုင်ငံကူးလက်မှတ်တွေကို ပြန်အပ်ခဲ့ပြီး နောက်ထပ် ၅၈ ဦးကိုလည်း နောက်ကြောင်းလိုက်နေတယ်လို့ ဆိုပါတယ်။ ပြည်ထဲရေ၀န်ကြီး နစ်ဟာ့ဒ်က ဒီလိုတားမြစ်တာဟာ ပြိုင်ပွဲကို မထိခိုက်စေချင်လို့ဖြစ်တယ်လို့ ပြောကြားခဲ့ပါတယ်။ ရုရှားကို အင်္ဂလန်ဘောလုံးပရိတ်သတ် တစ်သောင်းလောက် သွားရောက်မယ်လို့ ခန့်မှန်းထားပါတယ်။
စပိန်လက်ရွေးစင်အသင်းနည်းပြ ရာထူးမှ ထုတ်ပယ်ခံရ
================
ကမ္ဘာ့ဖလားပြိုင်ပွဲကျင်းပဖို့ တစ်ရက်သာ လိုတော့တဲ့အချိန်မှာ စပိန်အသင်းက နည်းပြ ဂျူလီယန် လိုပေတေဂီကို ရာထူးကနေ မနေ့မှာ ထုတ်ပယ်လိုက်ပါတယ်။ ရီးယဲလ်က လိုပေတေဂီဟာ ကမ္ဘာ့ဖလားပြိုင်ပွဲအပြီးမှာ သူတို့အသင်းကို ကိုင်တွယ်မယ်လို့ မနေ့မှာ ကြေငြာခဲ့တာပါ။ စပိန်ဘောလုံးအဖွဲ့ချုပ်က ရီးယဲလ်နဲ့ လိုပေတေဂီတို့ကိစ္စကို ရီးယဲလ်က ကြေငြာချက်မထုတ်ပြန်မီ ၅ မိနစ်အလိုကျမှသာ သိရှိခဲ့ရကြောင်း၊ စပိန်လိုအသင်းမျိုးရဲ့ နည်းပြတစ်ဦးဟာ ဒါမျိုးလုပ်လို့မရတဲ့အတွက် ရာထူးကနေ ထုတ်ပယ်ရတာဖြစ်ကြောင်း ထုတ်ပြန်ခဲ့ပါတယ်။ စပိန်ဟာ သောကြာနေ့မှာ ပေါ်တူဂီနဲ့ ကမ္ဘာ့ဖလားအဖွင့်ပွဲ ကစားရမှာဖြစ်ပြီး အားကစားဒါရိုက်တာဖြစ်သူ ဖာနန်ဒို ဟီယာရိုက အသင်းကို ကိုင်တွယ်သွားမှာ ဖြစ်ပါတယ်။
ကမ္ဘာ့ဖလားတွင် ဘရာဇီလ်းဗိုလ်စွဲချိန်တန်ပြီဟု ရော်နယ်ဒိုပြော
=============
အခုနှစ် ရုရှားကမ္ဘာ့ဖလားမှာ ဘရာဇီးလ်အသင်းဗိုလ်စွဲဖို့ အချိန်တန်ပြီလို့ ကမ္ဘာ့ဖလားကိုင်မြှောက်နိုင်ခဲ့တဲ့ ဂန္တ၀င်တိုက်စစ်မှူး ရော်နယ်ဒိုက ပြောကြားလိုက်ပါတယ်။ ဘရာဇီးလ်ဟာ ၂၀၀၂ ခုနှစ်နောက်ပိုင်း ကမ္ဘာ့ဖလားမှာ ဗိုလ်မစွဲနိုင်တော့ပါဘူး။ ရော်နယ်ဒိုက စပိန်၊ ဂျာမနီ၊ ပြင်သစ်နဲ့ အာဂျင်တီးနားတို့ဟာ တော်တော်လေးကို ကောင်းမွန်ကြပြီး အခုနှစ်ကမ္ဘာ့ဖလားဟာ ဘရာဇီးလ်အတွက် ခက်ခဲတဲ့ပွဲ ဖြစ်မယ်လို့ ထည့်သွင်း ပြောဆိုခဲ့ပါတယ်။
နေးမာကိစ္စ တရားစွဲခံရမှု ပီအက်စ်ဂျီ ကွင်းလုံးကျွတ်လွတ်
==============
ဘာစီလိုနာကနေ နေးမာကို ပေါင် သန်း ၂၀၀ နဲ့ ၂၀၁၇ ခုနှစ်မှာ ခေါ်ယူခဲ့တဲ့ကိစ္စနဲ့ပတ်သက်ပြီး ယူအီးအက်ဖ်အေရဲ့ ဘဏ္ဍာရေးမျှတမှုစည်းမျဉ်း ချိုးဖောက်မှုနဲ့ စွဲချက်တင်ခံထားရတဲ့ ပီအက်စ်ဂျီအသင်းဟာ အမှုကနေ ကွင်းလုံးကျွတ် လွတ်သွားပါတယ်။ ယူအီးအက်ဖ်အေဟာ ပြီးခဲ့တဲ့နှစ် စက်တင်ဘာလကစပြီး ပီအက်စ်ဂျီကို စုံစမ်းစစ်ဆေးမှုတွေ ပြုလုပ်ခဲ့တာပါ။ အမှုက လွတ်သွားပေမယ့် အသင်းရဲ့ ဘဏ္ဍာရေးကိစ္စနဲ့ပတ်သက်ပြီး ယူအီးအက်ဖ်အေရဲ့ စောင့်ကြည့်မှုကို ဆက်လက်ခံနေရမှာ ဖြစ်ပါတယ်။
Ref: Goal, BBC
