လျှို့ဝှက်သတင်း ဖွင့်ချမှုဖြင့် အမေရိကန် စစ်သည် တစ်ဦးအား ခုံရုံးတင် စစ်ဆေးနေ

ဇွန် ၄၊ ၂၀၁၃၊

M-Media

လွန်ခဲ့သော သုံးနှစ်အတွင်း WikiLeaks  websites မှတဆင့်မှ သတင်းများ ခိုးယူပြီး ထိပ်တန်းလျှို့ဝှက်သတင်းပေါက်ကြားစေသည်ဟု စွပ်စွဲခံရသူ အမေရိကန် စစ်သားအား တနင်္လာနေ့တွင် တဖက်သက် ခုံရုံးတင်စစ်ဆေးသွားမည်ဟု အမေရိကန် စစ်အာဏာပိုင်များက ပြောကြားခဲ့သည်။

Photo- washingtonpost

သို့သော်ငြားလည်း တရားခံဖြစ်သူ ပထမဆင့်စစ်သည် Bradley Manning (အသက် ၂၅နှစ်) ၏ ရှေ့နေ David Coombs က “ Manning ဒီလို လျှို့ဝှက်စာရွက်စာတမ်းတွေ ၊ ဗွီဒီယိုတွေ နဲ့ အခြားအချက်အလက်တွေကို နှိုက်ယူခဲ့တယ်ဆိုတာ အာဖဂန်နစ္စတန်နဲ့ အီရတ်မှာတုန်းက စစ်ကုန်ကျစရိတ်တွေကို လူတွေကို ချပြချင်လို့ပဲဖြစ်တယ် ” ဟု   Maryland ရှိ Fort Meade ၌ ရုံးတင်စစ်ဆေးသော ပထမနေ့တွင် လျှောက်လဲပြောဆိုလိုက်ပါသည်။

အစိုးရ၏စစ်ရေးနှင့်သံတမန်ရေးရာ၌ ပိုမိုပွင့်လင်းမြင်သာမှုကိုလိုလားသော ပြည်တွင်းလွတ်လပ်အဖွဲ့အစည်းများက Manning ၏ အမှုကို လျှော့ပေါ့စေချင်နေကြသည်။ ထိပ်တန်းလျှို့ဝှက်သတင်းပေါက်ကြားမှုမှာ လူ့အသက်နှင့်သံတမန်ရေး၌ အန္တရာယ်ဖြစ်စေသည်ဟု စွပ်စွဲထားသည်။
ထောက်လှမ်းရေးပညာရှင်ဟောင်း Manning သည် (၂၀၁၀) ခုနှစ်အတွင်း လျှို့ဝှက်စာရွက်စာတမ်း (၇၀၀, ၀၀၀) ကျော် ပြင်ပသို့ပေါက်ကြားစေမှု  ထင်ရှားလျှင် သူသည် လွတ်ငြိမ်းချမ်းသာခွင့်မရှိ ထောင်ဒဏ် တစ်သက်တစ်ကျွန်း ကျနိုင်ပါသည်။

အမေရိကန်စစ်တပ်ကပ္ပတိန် Joe Morrow မှ  “ ဒီလို သတင်းပေါက်ကြားအောင်လုပ်တာဟာ  ကျွန်တော်တို့ ရန်သူတွေနဲ့ ဆန့်ကျင်သူတွေအတွက် တကယ့် အကျိုးအမြတ်ကြီး ဖြစ်သွားပါလိမ့်မယ် “  ဟု ထုတ်ဖော်ပြောဆိုပါသည်။

စစ်ယူနီဖောင်းဝတ်ဆင်လျက် တရားခံ Manning  သည် စစ်ဆေးကြားနားချက် (၂၁)ကြိမ်အတွင်း   ရန်သူအား အကူအညီပေးမှုအပါအ၀င် နိုင်ငံ၏လျှို့ဝှက်ချက်ပေါက်ကြားမှုအက်ဥပဒေ (၁၉၁၇) Espionage Act နှင့်ငြိစွန်းနေသဖြင့် သူ၏ပြစ်ဒဏ်လျှော့ပေါ့ရေးသနားခံစာကို ဖေဖော်ဝါရီလက တင်ခဲ့သော်လည်း ပယ်ချခံရပြီး မူလစွဲချက်များကိုသာ ဆက်လက်ရင်ဆိုင်နေရသည်။

“ Manning ဖော်လိုက်တဲ့ အကြောင်းတွေထဲမှာ (၂၀၀၉) ခုနှစ် ခရစ်စမတ်အကြိုည ဗုံးခွဲမှုမှာ အမေရိကန်စစ်သားတွေ ဘာမှမထိခိုက်ဘဲ  အီရတ်မိသားစု လေးဦးသေဆုံးမှု ၊ (၂၀၀၇) ခုနှစ်တုန်းက Apache လက်နက်ကိုင်တိုက်ခိုက်မှုမှာ  ဘဂ္ဂဒက်က သတင်းထောက် (၂)ဦးအပါအ၀င် လူ (၁၂)ယောက်ကို သေဆုံးစေမှု ရဲ့ ဗွီဒီယိုသတင်း အချက်အလက်တွေပါဝင်နေတယ်။ ဒီအချက်တွေဟာ ပြည်သူကို အသိပေးဖို့လိုအပ်တယ်လို့ သူကယုံကြည်တယ်။
Manning ဟာ လူတွေရဲ့အသက်ကိုတန်ဖိုးထားတဲ့သူ ၊ လူသားချင်းစာနာစိတ်ရှိတဲ့သူ၊  (၂၁) ရာစုစစ်မက်ရေးရာရဲ့ သရုပ်မှန်အပေါ် မျှတတဲ့အမြင်ရှိတဲ့ စစ်သားငယ် ၊ ရိုးသားပြီး ရည်ရွယ်ချက်ကောင်းတဲ့ လူငယ်တစ်ယောက်ပါ ” ဟု သူ၏ရှေ့နေ David Coombs ကရှင်းပြခဲ့သည်။

Manning သည် ပြည်တွင်းရေးအချက်အလက်ပေါင်း ၂၅၁,၂၈၇ ခုကို တစ်နာရီလျှင် ၁၀၀၀ နှုန်းမက ဒေါင်းလုတ် လုပ်ခဲ့ကြောင်း Morrow က တရားရုံးသို့တင်ပြခဲ့သည်။

Manning အမှု၏ ပထမဆုံးမျက်မြင်သက်သေမှာ စစ်ထောက်လှမ်းရေးတပ်ကြပ်ကြီး Thomas Smith ဖြစ်သည်။ Manning ကို ကွန်ပျူတာများ ၊ disc ၊ အခြားဆက်စပ်ပစ္စည်များနှင့်တကွ ဘဂ္ဂဒက်အရှေ့ဖက် အီရတ် စစ်စခန်း၌ မိခဲ့ခြင်းဖြစ်ပြီး ၊ Manning ၏အခန်းဖော် Eric Baker က  Manning သည် ကွန်ပျူတာများဖြင့်သာ အချိန်ကုန်နေလေ့ရှိသူဖြစ်သည်ဟု  တရားရုံးတွင် ထွက်ဆိုခဲ့ပါသည်။

တရားသူကြီး Colonel Denise Lind အနေဖြင့် Manning ၏အမှုအစိတ်အပိုင်းအချို့ကို လျှို့ဝှက်ချက်ပေါက်ကြားမှုအား ကာကွယ်ရန်အလို့ငှာ လူသိရှင်ကြား မဖြစ်စေလိုဟု ဆိုသည်။  Manning ကို သြဂုတ်လနှောင်းပိုင်းအထိ စစ်ဆေးစီရင်သွားမည်ဟု ခန့််မှန်းရသည်။

တရားခွင်၌ သတင်းမီဒီယာသမားများ နှင့် လေ့လာစောင့်ကြည့်သူများ လူဦးရေ ၄၀ အနက် နယူးယောက်မှ လူ့အခွင့်အရေးနှင့်နိုင်ငံရေးလှုပ်ရှားသူ Cornel West လည်း ပါဝင်သည်။ ” ဒီလို ရဲရဲရင့်ရင့်လုပ်ဆောင်ခဲ့တဲ့ Bradley Manning အတွက်ကြောင့် ကျွန်တော် ဒီကိုလာတာပါ၊ သူဟာ သတ္တိရှိတဲ့လူငယ်တစ်ယောက်ဖြစ်ပါတယ်  ” ဟု ၄င်းမှ တရားခွင်အပြင်ဖက်၌ ပြောကြားခဲ့ပါသည်။

Refး ရိုက်တာ