၂၀၁၅ အထွေထွေရွေးကောက်ပွဲ ဖြစ်လာရင် ဘယ်သူ့ကိုမဲပေးမလဲ ?

မတ် ၂၁ ၊ ၂၀၁၅

ဂျူလိုင်ရဲရင့် ရေးသည်။

(မြန်မာနိုင်ငံသားမုစ်လင်မ်များကိုသာ ဦးတည်ရေးသားပါသည်)
.
ဒါက ကျနော့် တစ်ဦးတည်းရဲ့အမြင်လို့ စကားဦးသန်းပါရစေ။ သုံးနှစ်ကျော် မျက်ခြေမပြတ်လေ့လာချက်များအရ ဒီနှစ်ရွေးကောက်ပွဲဖြစ်လာခဲ့ရင် (ဘာအနှောင်အဖွဲ့မှ မရှိဘူးဆိုရင်) မြန်မာနိုင်ငံသားမုစ်လင်မ်များအဖို့ ဘယ်နိုင်ငံရေးပါတီကိုမှ မဲမပေးတာ အကောင်းဆုံးပါပဲ။ မသွားဘူး – မထည့်ဘူးဆိုရင် မလေးစားရာ ရောက်တဲ့အပြင် အပြစ်ရှာမယ်ဆိုရင်ရှာနိုင်တဲ့ရာခိုင်နှုန်း များပါတယ်။ မဲသွားမထည့်နဲ့လို့ တားမြစ်တာ မဟုတ်ပါဘူး။ သွားပါ၊ ထည့်ပါ၊ ဘာကိုမှ မရွေးချယ်ဘဲ “ဗလာမဲ” ထည့်တာကို ဆိုလိုတာပါ။ နိုင်ငံသားတစ်ဦးအနေနဲ့ မိမိနှစ်သက်ရာ ပါတီကို ရွေးချယ်ရေးသွင်းခွင့် ရှိသလို ဘယ်ပါတီကိုမှ မနှစ်သက်ရင်လည်း ဘာမှ မရေးသွင်းဘဲ မဲထည့်ခဲ့လို့ ရပါတယ်။ ဥပဒေဘောင်အတွင်းက လုပ်နိုင်တဲ့အခွင့်အရေးပါ။ ဘယ်အကြောင်းနဲ့မှလည်း အရေးယူလို့မရပါဘူး။ မုစ်လင်မ်ရယ်မှမဟုတ်၊ မည်သူမဆို လိပ်ပြာသန့်သန့်နဲ့ ပြုလုပ်နိုင်ပါတယ်။ ဒီအကြောင်းကိုတင်ပြလို့ ဒေါင်းအကထဲမျောပါနေသူတွေ – ခြသေ့င်္အမြီးနဲ့ညှိနေသူတွေ မနှစ်မြို့မှာ အမှန်ပါပဲ။ ဒါပေမယ့် အများအတွက် ခြုံငုံရေးသားခြင်းဖြစ်ကြောင်း တချို့သူတွေကို နားလည်စေချင်ပါတယ်။
.
မစ္စတာဂျဂရာများကတော့ ပြောပါလိမ့်မယ်။ ဘာမှမရေးသွင်းဘဲ မဲစာရွက်ကို ဒီအတိုင်းပေးရင် လိမ်ချင်သူတွေက သူတို့ကြိုက်ရာရေးထည့်လိုက်မှာပေါ့လို့။ ကောင်းလေပြီ။ ကိုယ်တိုင်ရေးထည့်ပေမယ့်လည်း နည်းတစ်မျိုးမျိုးသုံးပြီး မိမိမျက်ကွယ်မှာ လိမ်လည်ပြင်ဆင်ရေးသွင်းလိုက်ရင် ခင်ဗျားတို့ရော ဘာတတ်နိုင်မှာလဲ။ အဓိကကတော့ ကိုယ့်လိပ်ပြာကိုယ်လုံဖို့ပါပဲ။ ရေးဖြည့်ရမယ့်အကွက်တွေထဲ သို့မဟုတ် ပါတီတံဆိပ်တွေအပေါ် မဲမထည့်ကြောင်း အမှတ်အသားပြုပေးလိုက်ရင် လုံလောက်ပါပြီ။ မိမိရဲ့မဲတစ်စောင်ကြောင့် ပါတီတစ်ခုခုက အာဏာရပြီး အများလူထုအပေါ် မတရားမှုဖုံးလွှမ်းစေမယ်ဆိုရင် မိမိရဲ့အားပေးထောက်ခံမှုသည်လည်း တာဝန်မကင်းရာ ရောက်ပါတယ်။ လောကီမှာ လျှာအရိုးမရှိတိုင်း လွတ်ကင်းအောင် လှည့်ပတ်ရှောင်နိုင်သော်လည်း နောင်တမလွန်မှာ ပြေးလွတ်မယ်မထင်ပါ။ ဒါက ဘာသာရေးရှုထောင့်ကနေ တစွန်းတစ လှစ်ဟပြခြင်းရယ်ပါ။
.
ဒေါင်း၊ ခြသေ့င်္နဲ့ သက်ဆိုင်ရာဒေသန္တရပါတီ – ဒီသုံးမျိုး အဓိကအားပြိုင်ပါလိမ့်မယ်။ ယေဘူယျအားဖြင့် (အားလုံးကိုမဆိုလို) ဒီသုံးမျိုးစလုံးက မြန်မာနိုင်ငံသား မုစ်လင်မ်များရေရှည်အကျိုးအပေါ် လျစ်လျူရှုထားပါတယ်။ မတရားမှုတွေနဲ့ပတ်သက်ပြီး အသံထုတ်ရပ်တည်မှုမျိုး (အများစုမှာ) အလျဉ်းမရှိပါဘူး။ ဒါ့အပြင် မုစ်လင်မ်တွေဖက်က မခံချင်စိတ်နဲ့အမှန်တရားတွေကို တင်ပြနေကြသည့်တိုင် မြန်မာ့သမိုင်းကြောင်းထဲ မုစ်လင်မ်တို့ရဲ့ စွန့်လွှတ်အနစ်နာခံမှု၊ ကျားကန်အားဖြည့်မှုများအပေါ် ဘယ်အစုအဖွဲ့မှ လိုလိုလားလား အသိအမှတ်မပြုတာကို တွေ့နေရဆဲပါ။ မဲဆွယ်မယ့်အချိန်ကျမှ တက်သုတ်ရိုက်ပေးမယ့်ကတိ မှန်သမျှ အမှန်အကန်ဖြည့်ဆည်းပေးမယ့်အချက်တွေလို့ ယုံစားခြင်းဟာ အသိဥာဏ်ကင်းမဲ့ခြင်းပါ။ သဘောထားအမှန်ကို ရေရှည်ရပ်တည်ချက်နဲ့သာ အကဲဖြတ်ရမှာ ဖြစ်ပါတယ်။ ကနဦးပိုင်းအလိမ်ခံရခြင်းက အလိမ်ခံရသူရဲ့ ရိုးသားမှု၊ ယုံကြည်မှုတွေကို အလွဲသုံးစားလုပ်တာပါ၊ တုံးလို့ အလို့ မဟုတ်ပါဘူး။ သို့သော် အကြိမ်ကြိမ်အလိမ်ခံရခြင်းက အလိမ်ခံနေသူရဲ့အပြစ်သာဖြစ်ပါတယ်။
.
၁။ ပြည်လုံးကျွတ်သန်းခေါင်စာရင်း
၂။ နိုင်ငံအ၀ှမ်း အစ္စလာမ်သာသနာဝင်များအပေါ် အကြောင်းအမျိုးမျိုးနဲ့ ပြဿနာရှာ အကြမ်းဖက်မှုဖြစ်စဉ်များ
၃။ မကြာသေးမီက ကျောင်းသားသပိတ်

အကဲဆတ်လှတဲ့ ဘာသာရေး၊ လူမျိုးရေးကိစ္စတွေမှာ စဉ်ဆက်တောက်လျှောက် မီးမွှေးမပြီး သွေးထိုးမဆုံး ဖြစ်နေတာ သိပါလျက် အထက်က ဥပမာပေးတဲ့ ဖြစ်စဉ်သုံးရပ်စလုံးမှာ မုစ်လင်မ်တွေကို ဘယ်လိုသဘောထားခဲ့ကြပါသလဲ။ နိုင်ငံသားဆိုတဲ့အသိစိတ်ဓာတ်နဲ့ တက်တက်ကြွကြွ ပါဝင်ကြသော်လည်း အကောင်းပြောသံတစ်ခွန်း ကြားဖူးထားပါသလား။ ပွင့်လင်းရှင်းပြတ်တဲ့ သဘောထားအမှန်ထုတ်ဖော်ချက်တွေ၊ အသိအမှတ်ပြုမှုတွေကို မတွေ့ရသလောက်ဆိုတာ မြင်သာပါလိမ့်မယ်။ သုံးသပ်ရယင် နိုင်ငံရေးအကြပ်အတည်းဖြစ်လာတိုင်း မုစ်လင်မ်လူ့အဖွဲ့အစည်းကို ဓားစာခံအဖြစ် ဆက်လက် အသုံးချဦးမယ့် နိမိတ်လက္ခဏာဖြစ်ပါတယ်။ “နိုင်ငံရေးလမ်းစဉ်မှန်သမျှမှာ ဓားစာခံအုပ်စုတစ်စု အနည်းဆုံး လျာထားရတယ်ဆိုတဲ့ လျှို့ဝှက်ချက်ရှိကြောင်း” နားလည်ထားဖို့ အချိန်တန်နေပါပြီ။ ဓားစာခံအမှတ်စဉ် ၁ နေရာမှာ ကျနော်တို့ ဘာကြောင့် အမြဲတစေ ရောက်နေရပါသလဲ။ ကျနော်တို့လူ့အဖွဲ့အစည်းက ကျန်တာတွေနဲ့စာရင် (လူဦးရေနည်းခြင်းများခြင်းနဲ့မဆိုင်) လူမှုဘ၀ရေးရာတိုင်းမှာ အားနည်းပျော့ညံ့နေလို့ ဖြစ်တယ်။ ရှိသင့်ရှိအပ်သော Infrastructure ခိုင်ခိုင်မာမာ မရှိနေလို့ဖြစ်တယ်။ မရှိနိုင်အောင် – ဖန်တီးလို့မရနိုင်အောင် ပုံသွင်းခံထားရလို့ဖြစ်တယ်။ အနာဂတ်ရည်မှန်းချက်တွေ မထားရှိကြလို့ဖြစ်တယ်။ ဒီလိုလူ့အဖွဲ့အစည်းမျိုးထက် လွယ်လွယ်ကူကူ အရံသင့်ဓားစာခံအဖြစ် လျှပ်တစ်ပြက် အသုံးချလို့ကောင်းတာ ရှိသေးသလား ? ထားပါ – ဒီအချက်က သီးသန့်ကဏ္ဍတစ်ရပ်အနေနဲ့ လက်တွေ့ကျကျ ဆွေးနွေးပြုပြင်သွားရမယ့်အရေးအရာ ဖြစ်ပါတယ်။
.
ရခိုင်အရေးအခင်းမဖြစ်ခင် ၂ နှစ်အလိုလောက်ကတည်းက (အထူးသဖြင့် အွန်လိုင်းဆိုဒ်တွေမှာ) ဘာသာရေး၊ လူမျိုးရေး အမုန်းတရားတွေ လမ်းခင်းနေပြီးဖြစ်တယ်။ ပြင်ပလောကမှာလည်း တဖြည်းဖြည်း တင်းမာလာတာ တွေ့ရတယ်။ လူ့အဖွဲ့အစည်းထဲ နီးစပ်ရာကို လက်တို့သတိပေးတဲ့တိုင်အောင် အကဲပိုတယ်၊ ပုံကြီးချဲ့တယ်၊ ဘယ်တော့မှမဖြစ်နိုင်တာတွေ စသဖြင့် ဝေဖန်ပုတ်ထုတ်ခံရသူများအနက် ကျနော်လည်း ထိပ်ဆုံးက ပါဝင်ခဲ့တယ်။ အဲ့ဒီတုန်းက facebook လည်း ခေတ်မစားသေးတော့ ဆွေးနွေးတင်ပြလို့ရတဲ့နေရာဆိုတာ မရှိသလောက် ဖြစ်ခဲ့ပါတယ်။ အဲ့ဒီကာလတုန်းက ကျနော့်ကို မိတ်ဆွေတစ်ဦး မေးဖူးပါတယ်။ “ကျနော်တို့ လူ့အဖွဲ့အစည်းထဲ ကြုံတွေ့စပြုနေတဲ့ အကျဉ်းအကြပ်အတွက် အခရာအကျဆုံးက ဘာလဲ၊ ဘယ်အရေးကို အဓိကထား လုပ်သင့်တယ်ထင်သလဲ၊ ဘယ်လို idea ရှိပါသလဲ” ဆိုပြီးတော့ ……။ ကျနော် လိုတိုရှင်းတစ်ခွန်းတည်း အဖြေပေးခဲ့ဖူးပါတယ်။ “The Right of Citizenship”။
.
ကမ္ဘာ့ဘယ်နေရာမှာမဆို နိုင်ငံသားဖြစ်သူ သို့မဟုတ် နိုင်ငံသားဖြစ်ရန်သေချာသူမှသာ မဲပေးခွင့်ရှိပါတယ်။ ထို့နည်းတူ မဲပေးခွင့် ရှိခြင်းဟာ နိုင်ငံသားဖြစ်ခြင်းလို့ အဓိပ္ပာယ်ထွက်နေပါတယ်။ ဒါကြောင့် ဒီနှစ်မှာ မဲပေးခွင့် ရှိတာနဲ့ ဒီနှစ်ကစလို့ အလိုအလျောက် ရာသက်ပန် နိုင်ငံသားဖြစ်သွားခြင်းပါပဲ။ (အခြားနိုင်ငံသားခံယူတာ၊ နိုင်ငံသားဖြစ်ခြင်း ငြင်းပယ်ခံရစေတဲ့ ပြစ်မှုဒုစရိုက်မျိုး ကျူးလွန်တာကတော့ သီးခြားကိစ္စဖြစ်ပါတယ်)။ ယခင် နိုင်ငံသား၊ ယခု နိုင်ငံမဲ့၊ နောင်တစ်ချိန် နိုင်ငံခြားသားဆိုပြီး ပါးစပ်ထဲတွေ့ရာ ပေါက်ကရသတ်မှတ်လို့ မရပါဘူး။
.
နိုင်ငံတော်ဖွဲ့စည်းပုံအခြေခံဥပဒေထဲ တိတိကျကျ ရေးသွင်းပြဋ္ဌာန်း ကျင့်သုံးရပါတယ်။ ပြဋ္ဌာန်းပြီးမကျင့်သုံးရင် အဲ့ဒီဥပဒေစည်းမျဉ်းက အသက်မ၀င်ပါဘူး။ နိုင်ငံသားဖြစ်ခွင့်ပေးမယ် သို့မဟုတ် နိုင်ကဒ် ရအောင် လုပ်ပေးမယ် ဆိုတဲ့ မဲဆွယ်ချက်မက်လုံးတွေ ထွက်လာရင် အထူးသတိထားရပါလိမ့်မယ်။ မလှိမ့်တပတ်လုပ်မယ့်အခွင့်အရေး ထပ်မံ မပေးအပ်သင့်ပါဘူး။ ဝေါဟာရလှည့်ဖြားမှုတွေကိုလည်း သတိချပ်ဖို့လိုအပ်ပါတယ်။ ဥပမာ – လက်ရှိဖွဲ့ခြေဥထဲ “နှစ်သက်ရာဘာသာတရားကို လွတ်လပ်စွာ ရွေးချယ်ယုံကြည်ကိုးကွယ်ခွင့်ရှိတယ်”လို့ ရေးထားပေမယ့် “လွတ်လပ်စွာ ကျင့်သုံးခွင့်ရှိတယ်”လို့ မဖော်ပြထားဘူး။
.
ဒါကြောင့်မို့ ကျင့်သုံးမှုတွေအပေါ် ပုံသဏ္ဍာန်အမျိုးမျိုးနဲ့ အကြောင်းရှာ ကန့်သတ်/ပိတ်ပင်/နှောင့်ယှက်/ဖျက်ဆီးလို့ရနေခြင်းဖြစ်ပါတယ်။ ဒီလိုအချက်မျိုး အချိန်တိုတိုအတွင်း မှန်မှန်ကန်ကန် အကောင်အထည်ဖော်မယ့် – အာမခံချက်ပေးနိုင်တဲ့ ဘယ်အဖွဲ့တစ်ဖွဲ့ရှိပါသလဲ။ ပြည်လုံးကျွတ် သန်းခေါင်စာရင်းထဲက လူမျိုး၊ ဘာသာဝင်ဆိုင်ရာ ပမာဏကိုပင်လျှင် ပွင့်လင်းမြင်သာစွာ ထွက်မလာနိုင်သေးဘဲနဲ့ – မဲပေးခွင့်ရှိတဲ့နိုင်ငံသားဦးရေ မဖော်ပြနိုင်သေးဘဲနဲ့ ရွေးကောက်ပွဲအတွက် မဲအတိအကျ ဘယ်လိုရေတွက်လို့ရပါမလဲ။ အကယ်၍များ မိမိသည် မဲပေးခွင့်ရှိသူစာရင်းထဲ ပါဝင်ပြီဆိုရင် နိုင်ကဒ်ကလည်း လက်ဝယ်ရှိပြီးသားဖြစ်နေမှသာ သဘာဝ ကျပါလိမ့်မယ်။
.
အဓိကအကျဆုံးအချက်တစ်ချို့ကို ကျနော်တို့ မကြာခဏ ကျော်လွှားမိတတ်ကြတယ်။ အတ္တစွဲကိုရှေ့တန်းတင်ပြီး အငြင်းအခုံတွေမှာ အားသန်နေတာကြောင့်ဖြစ်ပါတယ်။ ကျနော့်အနေနဲ့ လူတတ်ကြီးလုပ်ပြီး တင်ပြရေးသားခြင်း မဟုတ်ပါဘူး။ လှုပ်နိုးခြင်းရယ်ပါ။ ဒီစာထဲမှာ မပြည့်စုံမှုတွေ အများကြီးပါဝင်ပါဦးမယ်။ သို့သော် ထိုက်သင့်တဲ့ message တွေ ပေးလိုက်နိုင်ရင် ကျေနပ်ပါပြီ်။ ကျနော်၊ ကျနော့်မိသားစု၊ ကျနော့်မျိုးဆက်အတွက် နိုင်ကဒ်ပြဿနာ မရှိတာကြောင့် ဒီစာကို ကိုယ်ရေးကိုယ်တာ မပါဝင်ဘဲ အစွဲကင်းကင်း လိပ်ပြာသန့်သန့် ရေးထုတ်တာလို့ အတိအလင်း ဆိုချင်ပါတယ်။ ဆက်လက်ပြီး ကျယ်ကျယ်ပြန့်ပြန့် ကြိုတင်ဆွေးနွေးပြင်ဆင်နိုင်ကြစေဖို့ ရည်ရွယ်ခြင်းသာ ဖြစ်ပါတယ်။ မျက်တောင်တဆုံးထက် မျက်စေ့တဆုံး ကြည့်မြင်နိုင်ကြပါစေ။

ဂျူလိုင်ရဲရင့်
၂၀.၃.၂၀၁၅

မှတ်ချက်
ရခိုင်ပြည်နယ်မှမုစ်လင်မ်များအဖို့ သီးခြားအခြေအနေ ဖြစ်နိုင်ပါပါသည်။

စာရေးသူ၏ FB စာမျက်နှာမှ ကူးယူဖော်ပြပါသည်။