မတ် ၂၄၊ ၂၀၂၅
M-Media
ဂါဇာကမ်းမြှောင် ခန်ယူနစ်မြို့က အလ်နာဆာဆေးရုံကို အစ္စရေးတပ်ဖွဲ့တွေက တနင်္ဂနွေနေ့မှာ ဗုံးကြဲတိုက်ခိုက်ခဲ့ပြီး အဲဒီတိုက်ခိုက်မှုကြောင့် အနည်းဆုံး လူနှစ်ယောက်သေဆုံးကာ ရှစ်ယောက်ဒဏ်ရာရခဲ့ပါတယ်။
ဒီဆေးရုံဟာ ပဋိပက္ခကာလအတွင်း အကြိမ်ကြိမ် ပစ်မှတ်ထားခံခဲ့ရဖူးပါတယ်။ သေဆုံးသူတွေထဲမှာ ဟားမားစ်ရဲ့ နိုင်ငံရေးဗျူရိုအဖွဲ့ဝင် အစမာအီလ် ဘာဟုမ်း ပါဝင်နေပြီး၊ တိုက်ခိုက်မှုဖြစ်တဲ့အချိန် သူဟာ ဆေးရုံအတွင်း ကုသမှုခံယူနေတာ ဖြစ်ပါတယ်။
ဂါဇာကျန်းမာရေးဝန်ကြီးဌာနက ဗုံးကြဲမှုကြောင့် ဆေးရုံမီးလောင်ကာ လူသားချင်းစာနာမှုအခြေအနေကို ပိုမိုဆိုးရွားစေခဲ့တယ်လို့ ပြောပါတယ်။ ဒီဆေးရုံဟာ အရင်ကလည်း အစ္စရေးရဲ့ အကြမ်းဖက်တိုက်ခိုက်မှုကို အကြိမ်ကြိမ် ခံခဲ့ရပါတယ်။
နာဆာဆေးရုံလို ကျန်းမာရေးဌာနတွေကို ဆက်တိုက်ပစ်မှတ်ထားတိုက်ခိုက်မှုတွေဟာ ဂါဇာမှာ မြင့်တက်လာနေတဲ့ အကြမ်းဖက်မှုနဲ့ လူသားချင်းစာနာမှုအကျပ်အတည်းတွေကို ထင်ဟပ်စေပြီး၊ နိုင်ငံတကာအသိုင်းအ၀ိုင်းကလည်း ပြင်းပြင်းထန်ထန် ရှုတ်ချခဲ့ပါတယ်။
Ref: Aljazeera