ဝင်းအောင်ကြီး – သမ္မတ အရသာနဲ့ မန်းဝင်းမောင်

အောင်တိုဘာ ၈ ၊ ၂၀၁၅
ဝင်းအောင်ကြီး ရေးသည်။

ကျနော်တွေးမိသလို ရေးပါမည် (၆၇)

၁၉၅၇ ခု၊ ကရင်တိုင်းရင်းသား အလှည့်ကျလို့ သမ္မတလုပ်ဖို့ မန်းဝင်းမောင် အကြောက်အကန် ငြင်းနေပုံ သတင်းစာထဲ ဖတ်ရတယ်။ ဗိုလ်ချုပ်အောင်ဆန်းထက် တနှစ်ငယ်၊ ဘွဲ့ရ လွတ်လပ်ရေး တိုက်ပွဲဝင် ၁၉၄၇ ခုကတည်းက ၀န်ကြီး၊ သူ့ဌာနက မီးရထားနဲ့ ဧရာဝတီ(ရေကြောင်း) ကန်တိုင်း နိုင်တဲ့ အသင်းကို ဆုငွေ ၁၀၀ိ ( အဲဒီအချိန်က ရွှေတကျပ်သား ၂၄၀ိ) မှန်မှန်ပေးသူကို၊ သမ္မတဖြစ်လည်း ဘောလုံးပွဲကြည့် ခွင့်ပြုပါ့မယ်လို့ ဖဆပလ တဖွဲ့လုံးက အာမခံ၊ ပါလီမန်ကသဘောတူနဲ့ သမ္မတဖြစ်လာတဲ့ မန်းဝင်းမောင်အား 2nd SEAP Games ကိုဖွင့်ပေးပိတ်ပေးပုံ အဝေးကကြည့်ရ၊ အိမ်တော်က ဆုပေးပွဲ အခမ်းအနားမှ တိုက်ရိုက် အသံလွှင့်ရင်း သူ့အားအနီးကပ်တွေ့မြင်ဖူးရပြီ။

ကြိုးစင်တက်ဖို့စောင့်နေတဲ့ ဗိုလ်မှူး ချစ်ကောင်းအား လွတ်ငြိမ်းခွင့် တန်းပေးလိုက်ခြင်းဟာ အစိုးရအဖွဲ့ရဲ့ ခွင့်ပြုချက်နဲ့လုပ်ရမည့် အစဉ်အလာကိုဖျက်လို့ ဒေါပွတဲ့ ဦးနု၊ ဘတ်ဂျက် ပါလီမန်တင်ရင် ယိုင်ယိုင်နဲ့နဲ့ သန့်ရှင်း ၀န်ကြီးချူပ်အဖြစ် ပြုမှာမို့ သမ္မတအမိန့်နဲ့ အတည်ပြုပေးလိုက်တယ်။

၁၉၆၂ ခု၊ ရောက်လာတော့ ကချင်အလှည့် ဆမားကြီးကိုရွေးထားပြီမို့ သမ္မတ ၀ဋ်ကကျွတ်တော့မည့်ဆဲဆဲ မတ်လ ၂ ရက်နေ့မှာ ရေကြည်အိုင်ရောက်သွားတယ်။

ဗိုလ်ချုပ်နေ၀င်း အာဏာသိမ်းလိုက်ကြောင်း ရေဒီယိုကကြားလို့ အပေါ်ထပ်မှာ အိပ်ပျော်နေတဲ့ ဦးနုကိုနှိုးပြီးပြောတော့ မဟုတ်တာ၊ သူက ကျုပ်တို့ကို လာကယ်မှာ ဆိုကာ ဒေါပွပြန်တယ်။

၁၉၈၉ ခု၊ ဇူလိုင်လ ၄ ရက်နေ့မှာ ထောင် ၅ နှစ်ရဲ့ဒဏ်နဲ့ ကွယ်လွန်သွားတဲ့ မန်းဝင်းမောင် အသုဘကို ဟံသာဝတီအ၀ိုင်း အနီးလူအုပ်ကြား ကျနော်ကြည့်နေစဉ်၊ နိုင်ငံခြားသတင်းထောက် အတူလုပ်ဖူးသူ ကိုမောင်မောင်က ဦးနုလိုက်ပို့လား ကူပြီးကြည့်ပေးပါတဲ့။ တွေ့လိုက်လို့ BBC ကိုသတင်းပို့ဖို့ ထွက်သွားပြီ။ မန်းဝင်းမောင် သမ္မတလုပ်ရတာ ၀ဋ်လို့ထင်ချင်ထင်၊ ဗိုလ်မှူးချစ်ကောင်းနဲ့တော့ ဖတ်ဆစ်တော်လှန်ရေးကာလ၊ လေထီးနဲ့ဆင်းဖို့လာခဲ့ကြရင်း လေယာဉ်ပျက်လို့၊ လေထီးမပွင့်လို့၊ သစ်ပင်နဲ့ငြိလို့၊ ဂျပန်တွေမိသွားလို့ စသဖြင့်မသေကြဘဲ အတူတိုက်ခဲ့ကြတယ်၊လွတ်လပ်ရေးရလာတော့ သူက ဗကပ၊ ငါက ဖဆပလ၊ ဟော သူသေဒဏ်ကျခံနေရပြီ၊ ငါက သမ္မတ၊ သူမသေသင့်ဆိုတဲ့စိတ်နဲ့ လွတ်ငြိမ်းချမ်းသာခွင့်အမိန့် လက်မှတ်ထိုးရတာဟာ၊မန်းဝင်းမောင်ရဲ့ စိတ်ထား၊အတွေ့အကြုံအရ၊ အရည်အချင်းအရ အစိုးရအဖွဲ့ရဲ့ ခွင်ပြုချက်တောင်းဖို့မေ့လို့ မဖြစ်နိုင်၊စဉ်းစားချင့်ချိန်ပြီးလုပ်တာ၊ ဒီတကြိမ်မတော့ ၀ဋ်မဟုတ် သမ္မတအရသာလို့ ခံစားမလေမိလားလို့ ၁၉၈၉ ခု၊ ကကျနော့အတွေးကို ခုမှရေးလိုက်ရကြောင်းပါ။

၂၀၁၅ ခု၊အောက်တိုဘလ ၆ ရက်။