” ပြည်ခိုင်ဖြိုး ပါတီဥက္ကဌ ပြောတဲ့ ‘အမျိုး၊ဘာသာ၊ သာသနာ’ ထိန်းသိမ်းစောင့်ရှောက်ခြင်း”ကို သုံးသပ်ခြင်း

နိုဝင်ဘာ ၈ ၊ ၂၀၁၆
ဂျက်ဖရီတင်အုန်း ( R.I.T ရန်ကုန်စက်မှုတက္ကသိုလ် ) ရေးသည်။

ပြည်ခိုင်ဖြိုး ပါတီဥက္ကဌ ဦးသန်းဌေး (ဓါတ်ပုံ- ဦးသန်းဌေး FB)

မြန်မာနိုင်ငံကို တစ်ပါတီအာဏာရှင်စနစ်ဖြင့် ( ၂၆ )နှစ်ကြာ အုပ်ချုပ်ခဲ့သောကြောင့် ကမ္ဘာ့ အဆင်းရဲဆုံးနိုင်ငံ စာရင်းဝင်အောင်ပြုလုပ်ခဲ့သူ ဦးနေဝင်းသည် ၁၉၈၈ခုနှစ်မှာ မြန်မာ့ဆိုရှယ်လစ်ပါတီ အထွေထွေညီလာခံကြီးတွင် မြန်မာပြည်သူ လူထုအား ပြောကြားသည့်မိန့်ခွန်းတွင် “ စစ်တပ်ဆိုတာ ပစ်ရင် မိုးပေါ် ထောင်မပစ်ဘူး။ တည့်တည့်ပစ်တယ်။” ဟူ၍ လူမိုက်ဆံဆံပြောကြားခဲ့သော ကြောင့် ပြည်သူလူထု အများစုက မကျေမနပ်ဖြစ်ခဲ့ရသည်။ “မဆလ” ပါတီကိုယ်စားပြု ဥက္ကဋ္ဌ တစ်ဦးအနေဖြင့် ပြောကြားခဲ့သည့် အတွက် ထို “မဆလ” ပါတီအား ပြည်သူလူထုက ရွံရှာမုန်းတီး ခဲ့ကြသည်။

အလားတူ အောက်တိုဘာ ၂၉၊ ၂၀၁၆ခု တွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (ပြည်ခိုင်ဖြိုးပါတီ) ဥက္ကဋ္ဌ ဦးသန်းဌေးက ဧရာဝတီခရိုင်၊မြို့နယ်အလိုက်ဥက္ကဋ္ဌများ၊ ကော်မတီဝင် များနှင့် တွေ့ဆုံပွဲတွင် “(၁) အမျိုးဘာသာ သာသနာ (၂) တိုင်းပြည်လုံခြုံရေး (၃) သဘာဝဘေး အန္တရာယ်ကျရောက်ခြင်းဆိုတဲ့ အခြေအနေ (၃) ရပ်တွင် အမိန့်စောင့်ရန်မလိုဘဲ မိမိစိတ်ကြိုက် လုပ်ဆောင်နိုင်ကြောင်း ‘ဘယ်လိုပဲလုပ်လုပ်’ တရားသည်”ဟု မှတ်ယူကြောင်း “အဲ့ဒီ (၃)ချက်နဲ့ ပတ်သက်လာရင် ခင်ဗျားတို့လုပ်ချင်ရာလုပ် အကုန်မှန်တယ်။ အကုန်တရားတယ်။ ဘာအမိန့်မှ မလိုဘူး။  အဲဒါယေဘုယျ လမ်းညွှန်ချက်ပဲ” ဟုပြောကြားခဲ့ပေသည်။

“ ထို့အပြင် ရခိုင်ဒေသအတွင်း ဖြစ်ပွားခဲ့သည့်အခြေအနေများကို ပြန်လည်သုံးသပ်ကြည့် မည် ဆိုပါက ဘယ်လိုပဲဖြစ်ဖြစ် မိမိတို့အမျိုးများ အတိ ဒုက္ခရောက်ကြသည် ဖြစ်၍ ပြည်ခိုင်ဖြိုးပါတီ အနေဖြင့် ထိပ်ဆုံးခေါင်းစဉ်ဖြင့် ပြုလုပ်သွားရမည့်လမ်းစဉ်ဖြစ်သည်” ဟူ၍လည်း ပြောကြား ခဲ့ပါ သည်။ ထို့အပြင် ဧရာဝတီတိုင်းဒေသကြီးသည် ဗုဒ္ဓဘာသာ အမျိုးသားရေးဝါဒီ အဖွဲ့များ စုစည်းရာ၂၀၁၅ နိုဝင်ဘာလ၊ ၈ရက်နေ့ ပါတီစုံ ဒီမိုကရေစီရွေးကောက်ပွဲကြီးတွင် ပြည်ခိုင်ဖြိုးပါတီဝန်ကြီး အများစု ရွေးကောက်ပွဲ ဝင်ရောက်ယှဉ်ပြိူင်ရာနေရာဒေသ တစ်ခုလည်း ဖြစ်သည်။ ထို့အပြင်အမျိုး ဘာသာ သာသနာစောင့်ရှောက်ရေး အဖွဲ့များ (မဘသ)အဖွဲ့များ ကိုယ်တိုင် ပြည်ခိုင်ဖြိုးပါတီအား ရွေးကောက်ပွဲအောင်နိုင်ရေးအတွက် ပေါ်ပေါ်ထင်ထင် မဲဆွယ်စည်းရုံးလှုံ့ဆော်ရာ ဒေသကြီး တစ်ခု လည်းဖြစ်ခဲ့သည်။ ပြည်ခိုင်ဖြိုးပါတီ ဝန်ကြီးဟောင်းများ ရွေးကောက်ပွဲတွင် ဝက်ဝက်ကွဲ ရှုံးနိမ့်ခဲ့ရာ ဒေသကြီးလည်းဖြစ်ပါသည်။

ထိုတိုင်းဒေသကြီးတွင် ပြည်ခိုင်ဖြိုးပါတီဥက္ကဋ္ဌကြီးက အစွန်းရောက် အမျိုးသား ရေးဝါဒီများ၊ ပြည်ခိုင်ဖြိုး ပါတီခေါင်းဆောင်များနှင့် တွေ့ဆုံပွဲတွင် “ လူ့အခွင့်အရေးထက် ပြည်သူ လူထုလုံခြုံရေးနှင့် စားဝတ်နေရေးကို ဦးဆောင်ပေးဆောင်ရွက် ရမည်” ဟုလည်းမိန့်ချွေသွားခဲ့သေးသည်။ ထို့ကြောင့် စာရေးသူသည် ဆရာတော်ဘုရားကြီး အရှင်သံဝရာ လင်္ကာရ ၏ တရားတော်တစ်ခုကို သွားသတိရမိခဲ့သည်။ ဆရာတော်ဘုရားကြီးက “ အမျိုးကိုစောင့်ချင်ရင် ပညာတတ်အောင်လုပ်ကြ၊ အလုပ်ကောင်းကောင်းရှိအောင်လုပ်ကြ၊ ဝင်ငွေကောင်းအောင်လုပ်ကြ၊ “ဘာသာ” ကိုစောင့်ချင်ရင် ငါးပါးသီလကို လုံအောင်စောင့်ကြ။ “သာသနာ” ကိုစောင့်ချင်ရင် ရဟန်းသာမဏေများ၊ ဂန္ထစုရ ဝိပသာနစုရ ပရိပတ္တိ ပဋိပတ္တိ အလုပ်ကိုသာ သေသေချာချာ လုပ်ကြ၊ ကြီိးကြီးကျယ်ကျယ်တွေ လျှောက်ပြော လျှောက်လုပ်မနေနဲ့။ ကြီးကျယ်ဆိုတာ ကြီးမှကျယ်တာပဲကောင်းတယ်။ မကြီးပဲနဲ့၊မကျယ်ချင်ပါနဲ့။ “ကြီး” ဆိုတာပညာ ဗဟုသုတ၊ အသိဥာဏ်ကြီးတာကို ပြောတာ” ဟုမိန့်တော်မူခဲ့သည်ကို ပြန်ပြောင်းသတိရမိသည်။ ပညာရှိပီသလှ၍ စိတ်ထဲ ကြိတ်ပြီး လေးစားမိခဲ့သည်။

ပြည်ခိုင်ဖြိုးပါတီ ဥက္ကဋ္ဌကြီးဆိုလိုသည့် “ အမျိုးဘာသာ၊သာသနာ” ဟူသည် “ဗုဒ္ဓဘာသာကိုးကွယ်သည့် လူမျိုးအရေးကိုသာ လုပ်ဆောင်မည်”ဟု စာရေးသူနားလည်မိသည်။ ဥက္ကဋ္ဌကြီး သည် တစ်ချိန်က လွတ်လပ်ရေး ဗိသုကာကြီး ဗိုလ်ချုပ်အောင်ဆန်း ထူထောင်ခဲ့သည့် တပ်မတော် တွင် ဗိုလ်ချုပ် ရာထူးအဆင့်ထိ တာဝန်ထမ်းဆောင်ခဲ့ဖူးကြောင်း လေ့လာမိပါသည်။ မီးရထားဝန် ကြီးတစ်ဦးအနေဖြင့်လည်း တာဝန်ယူခဲ့ဖူးကြောင်း သိခဲ့ရပါသည်။ မြန်မာလွတ်လပ်ရေးအတွက်
ဗြိတိသျှနယ်ချဲ့များနှင့် ဖက်ဆစ် ဂျပန် တို့အား တွန်းလှန်ခဲ့ရာတွင် တိုင်းရင်းသားပေါင်းစုံ၊ဘာသာပေါင်းစုံ၊ လူမျိုးပေါင်းစုံ ပါဝင်ခဲ့သည်ကို ဗိုလ်ချုပ်အောင်ဆန်း၏ ရွှေစကား၊ ရွှေမိန့်ခွန်း” များတွင် ဥက္ကဋ္ဌကြီး လေ့လာနိုင်ပါသည်။ ထို့အပြင် ၂၀၀၈ ဖွဲ့စည်းပုံ အခြေခံဥပဒေပုဒ်မ ၃၄၇ နှင့် ၃၄၈ တွင် “မည်သူမဆို ဥပဒေအရာတွင် တန်းတူ ညီမျှ အခွင့်အရေး ရရှိစေရမည့်အပြင် ဥပဒေ၏ အကာအကွယ်ကိုလည်း တန်းတူညီမျှ ရယူပိုင်ခွင့် ပေးရမည်” ဟုလည်းကောင်း၊ “မည်သည့်နိုင်ငံသားကိုမျှ လူမျိုးဇာတိ၊ကိုးကွယ်သည့်ဘာသာ၊ ရာထူး၊ဌာနန္တရ၊ အဆင့်အတန်း၊ယဉ်ကျေးမှု၊အမျိုးသား၊အမျိုးသမီး၊ဆင်းရဲချမ်းသာတို့ကို အကြောင်းပြု၍ ခွဲခြားဆက်ဆံခြင်းမပြုရ” ဟူ၍ဖော်ပြထားကြောင်း တွေ့ရပါသည်။ ထို့အပြင် ဖွဲ့စည်းပုံ ပုဒ်မ ၃၆၂တွင် “ ခရစ်ယာန်ဘာသာ၊အစ္စလာမ်ဘာသာ၊ ဟိန္ဒူဘာသာ၊ နတ်ကိုးကွယ်သောဘာသာတို့ကို နိုင်ငံတော်တွင် တည်ရှိ နေသော ကိုးကွယ်ယုံကြည်ရာဘာသာများ”ဟူ၍ အသိအမှတ်ပြုထားကြောင်း၊ ဥက္ကဋ္ဌကြီး ဂဃနဏ လေ့လာထားလျှင် “အမျိုးဘာသာ၊သာသနာ” ဟူသောစကားကို ရှေ့တန်းတင်ပြော ဆိုလိမ့်မည်ဟု စာရေးသူမထင်ပါ။

တပ်မတော်၏ အရေး (၃)ပါးတွင် တိုင်းရင်းသား စည်းလုံးညီညွတ်မှု မပြိုကွဲရေးသည် အဓိက အသက်သွေးကြောတစ်ခုဖြစ်ပါသည်။ ပါတီဥက္ကဋ္ဌကြီး၏ “ အမျိုး၊ဘာသာ၊သာသနာ” အရေးဟူသော စကားလုံးသည် ပျားရည်ထက်လည်း ချိုမြိန်လှပါသည်။ ဂီတသံစဉ်တွေလိုလည်း နားဝင်ချိုလှပါသည်။သို့သော် “ ဓားသွားထက်က ပျားရည်စက်လို” ထိလွယ်ရှလွယ် လှပါသည်။  ဗုဒ္ဓဘာသာ မဟုတ်သူ တိုင်းရင်းသား/နိုင်ငံသားများအား စည်းလုံးညီညွတ်မှုကို ထိခိုက်စေပါသည်။ ပွတ်တိုက်မှုကို ဖြစ်စေပါသည်။ ပါတီထိပ်တန်းခေါင်းဆောင်တစ်ဦး၏ “ အမျိုးဘာသာ၊သာသနာ နှင့်ပတ်သက်ရင် ဘာလုပ်လုပ် တရားတယ်။ အမိန့်တောင်းရန်မလိုဘူး” ဟူသော စကားသည် မတူကွဲပြား လူမျိုးများအတွက် ခြိမ်းခြောက်ခံရသည့် ခံစားမှုများကိုဖြစ်စေသည့်အပြင် ပြည်ခိုင်ဖြိုး ပါတီအပေါ် မြန်မာပြည်သူလူထု၏ ယုံကြည်ထောက်ခံမှုကိုလည်း လျော့နည်းကျဆင်း စေမည် ဖြစ်ကြောင်း သတိထားမိပါသည်။

“ တိုင်းရင်းသား စည်းလုံးညီညွတ်မှုသည်” မြန်မာနိုင်ငံ၏ အသက်သွေးကြောတစ်ခုဖြစ် သည်။ ထို့ကြောင့်လည်း အမျိုးသားခေါင်းဆောင်ကြီး ဗိုလ်ချုပ်အောင်ဆန်းက “တိုင်းရင်းသား အချင်းချင်းညီညွတ်ရေး၊ တိုင်းသူပြည်သားလူထု ညီညွတ်ရေး အဲဒီညီညွတ်ရေး နှစ်ခု မရှိသမျှ ကာလပတ်လုံး ဒီတိုင်းပြည်ဟာ လွတ်လပ်ပင်၊လွတ်လပ်သော်ငြားလည်း ဘယ်ပါတီ တက်တက် ဘယ်အစိုးရလုပ်လုပ် “ဖာသည်” တိုင်းပြည် ဖြစ်နေမှာပဲလို့ကျွန်တော်ပြောချင်ပါတယ်။ အဲဒီတော့ ကား ဒီနှစ်ခုကိုခင်ဗျားတို့ မပျက်ပြားစေနဲ့။ ဘယ်သူက ဘာလုပ်လုပ်၊ မပျက်စေပါနဲ့ အဲဒါအင်မတန် အရေးကြီးပါတယ်” ဟု “ စည်းလုံးခြင်းသည် ခွန်အား၊ ညီညွတ်ခြင်းသည် အင်အားဖြစ်သည်”ကို မီးမောင်းထိုးပြခဲ့သည်။

မြန်မာနိုင်ငံသည် ၁၉၄၈ ခုနှစ်၊ ဒီဇင်ဘာလ ၁၀ရက်နေ့တွင် အပြည်ပြည်ဆိုင်ရာ လူ့အခွင့် အရေးကြောင်းစာတမ်းပါ အပိုဒ်ပေါင်း(၃၀)ကို လက်မှတ်ရေးထိုးထားသည့် နိုင်ငံပေါင်း ၁၉၃ နိုင်ငံ စာရင်းဝင်ဖြစ်ပါသည်။လူ့အခွင့်အရေးကို တန်ဘိုးထား လေးစား လိုက်နာသော နိုင်ငံများသည် ကမ္ဘာ့အလယ် ဂုဏ်တင့်တယ်လှသည်။ထိုနိုင်ငံများသို့ ကမ္ဘာ့စီးပွားရေးလုပ်ငန်းရှင်များ ရင်းနှီးမြှပ်နှံ ကြသည်။ အကျိုးရလဒ်အနေနဲ့ တိုင်းပြည်၏ အခွန်ဘဏ္ဍာငွေများ ရရှိသလို နိုင်ငံသူ၊နိုင်ငံသားများ၏ အလုပ်အကိုင် အခွင့်အလမ်းကောင်းများလည်း များပြားလာသည်။ ပြည်သူလူထု၏ စားဝတ်နေရေး များသည်လည်း ပြေလည်ကြသည် ကိုတွေ့ရသည်။ ထို့ကြောင့်လည်း ခိုး၊ဆိုး၊လုယက်၊ လိမ်ညာ၊ လှည့်ဖြား၊ဥပဒေမဲ့လုပ်ရပ်များ မရှိသလောက်ဖြစ်သည်ကိုသတိပြုမိသည်။ “ ချိန်ခွင်လျှာပမာမျှတသော တရားဥပဒေစိုးမိုးမှု ကာကွယ်စောင့်ရှောက်မှု” အောက်တွင် နေထိုင်ကြသော နိုင်ငံသူ နိုင်ငံသားများသည် တရားဥပဒေကို လေးစားလိုက်နာကြသည့် အတွက် အထွေအထူး လုံခြုံရေးအစီမံများ မလိုအပ်ကြောင်း လေ့လာမိသည်။ ထို့ကြောင့် လူ့အခွင့်အရေး ကြေညာစာတမ်းပါ အချက်များ ကို မထီမဲ့မြင် ပြူလုပ်ပြောဆိုခြင်းသည် နိုင်ငံတော်၏ပုံရိပ်ကို ကျဆင်းစေသည့် လုပ်ရပ်ဖြစ်၍အထူး ရှောင်ကြဉ် အပ်ပေသည်။

ယခုအချိန်အခါသည် အပြောင်းအလဲတစ်ခုကို “အလျင်” တစ်ခုနှင့် သွားနေသောအချိန်ဖြစ် သည်။ ပြည်သူလူထုအများစုကြီး၏ စားဝတ်နေရေး ပြေလည်စေရေးအတွက် နိုင်ငံတော်၏ အတိုင် ပင်ခံ ဒေါ်အောင်ဆန်းစုကြည်သည် ကမ္ဘာ့နိုင်ငံ အသီးသီးသို့သွားကာ စီးပွားရေး၊ ပညာရေး၊ ကျန်းမာရေး၊ ရင်းနှီးမြှပ်ရေးစတဲ့ အကူအညီတွေကို မြန်မာနိုင်ငံကြီး ပြန်လည်ဦးမော့လာစေရေး အတွက် မမောနိုင် မပမ်းးနိုင် ကြိုးပမ်းနေချိန် ဖြစ်ပါသည်။ နိုင်ငံတော်၏ အတိုင်ပင်ခံ ပုဂ္ဂိုလ်က  “ကျမတို့နိုင်ငံမှာ ပြုပြင်ပြောင်းလဲဖို့ အလိုအပ်ဆုံးအရာက လူ့သဘာဝဖြစ်လေ့ဖြစ်ထရှိသော “မနာလို ဝန်တိုစိတ်၊ လူမျိုးရေး ခွဲခြားဆက်ဆံလိုစိတ်” စသည်တို့ကိုပြုပြင်ပြောင်းလဲရန် အဓိက သော့ချက်ဖြစ်ကြောင်း” စေတနာထား ထောက်ပြခဲ့ခြင်းဖြစ်သည်။ ခေါင်းဆောင်ကောင်းတစ်ဦး၏ အဖိုးတန်စကား ရတနာတစ်ခုဖြစ်သည်။ သီတဂူဆရာတော်ကြီးကလည်း “ဘယ်ကိစ္စမဆို အစွန်းမရောက်ဘဲ အလယ်အလတ် လမ်းစဉ်လိုက်မှသာ အောင်မြင်နိုင်မယ်။ ဂျိုပေါက်တဲ့ နွားလို၊ အစွမ်း ထက်တဲ့ တောဝက်လို မာနခဲနဲ့ မြင်မြင်သမျှ တိုက်ခိုက်နေရင်လည်း အများမုန်းပြီး မအောင်မြင်တတ်ကြောင်း” ဟောကြားခဲ့သည်ကို ခေါင်းဆောင်နေရာရထားသူများကို နားလည်စေချင်သည်။

ထို့အပြင် သီတဂူဆရာတော်ဘုရားကြီးက “ လူတွေကို ကုလားလား? ဗမာလား? မွတ်စလင်လား? ခရစ်ယာန်လား? ခွဲနေစရာမလိုဘူး။ လူဆိုးလား? လူကောင်းလား? ခွဲနိုင်ရင်တော်ပြီ။ အဲဒါမှ ဗုဒ္ဓဝါဒ မြန်မာ့ဝါဒ” ဟုမိန့်ကြားခဲ့ခြင်းသည် လူသားဝါဒ လူ့အခွင့်အရေးကို လေးစား တန်ဖိုးထားလိုက်နာသင့်ကြောင်း သွယ်ဝိုက်ပြောဆိုရာလည်း ရောက်ပေသည်။

မြန်မာနိုင်ငံသား တစ်ယောက်အနေနဲ့ မထားအပ်သော စိတ်ဓာတ်တို့ကို လွတ်လပ်ရေး ဗိသုကာ ဗိုလ်ချုပ်အောင်ဆန်းက ၂၀.၄.၁၉၄၃ ခုက “ဟိုရှေးရှေးတုန်းက ရှိခဲ့တဲ့ သေးသိမ်တဲ့ စိတ်ဓာတ်၊ စိတ်ဖျင်းတွေကိုဖျောက်။ကျွန်စိတ်၊ကျေးစိတ်တွေ ကိုဖျောက်။ဂိုဏ်းဂဏစိတ်တွေ ဖျောက်။ ဒါမှမြန်မာနိုင်ငံတော် ကြီးပွားချမ်းသာမှာပဲ။ ဒီလိုစိတ်ဓာတ်တွေကို မဖျောက်နိုင်ဘူးဆို ရင်တော့ အဲဒီသူတွေဟာ ဒီနိုင်ငံရဲ့ “သွေးသစ္စာ” ကိုဖောက်ဖျက်သူတွေပဲလို့ ကျွန်တော်ဒီကနေ အတိအလင်း ကြေငြာပါတယ်”ဟု မိန့်ကြားခဲ့ပါသည်။

ထို့ကြောင့် မြန်မာနိုင်ငံတော်ကြီး ခေတ်မှီ ဖွံ့ဖြိုးတိုးတက်လာစေရန် စိတ်ဆန္ဒရှိသူတိုင်း လူသား သဘာဝ အမှားမကင်းသည့် အတွက် “ပျက်အစဉ်၊ ပြင်ခဏ” ဆိုသည့်အတိုင်း တိုင်းပြည်အတွက် ထိခိုက်စေမည့် အပြောအဆို အမူအကျင့်များ လုပ်ရပ်များကို  သတိ၊အသိထားပြီး ရှောင်ရှားသင့် ဖို့ အချိန်တန်ပြီဟု စာရေးသူနားလည်မိပါသည်။ သို့မဟုတ်ပါက “ ကြမ်းပေါက်ကျွံလျှင် နှုတ်၍ရ၊ စကားကျွံလျှင် နှုတ်၍မရ” ဆိုသည့်စကားကို နိုင်ငံတော်၏ အရေးပါ အရာရောက်သော အဖွဲ့အစည်း ခေါင်းဆောင်များ၊ ပါတီခေါင်းဆောင်များ၊ အစိုးရဌာနဆိုင်ရာ ဝန်ကြီးများ၊နိုင်ငံတော် အကြီးအကဲဆိုသူများအနေဖြင့် “မပြောခင်စကား စဉ်းစားထား။ ပြောနေစဉ်လည်း စဉ်းစားထား။ ပြောပြီးရင်လည်း ပြန်စဉ်းစားပါ။” ဟု အကြံပြု တိုက်တွန်းရင်း တိုင်းပြည်တိုးတက်ရေးအတွက် အားလုံး အတူတကွ အလုပ်လုပ်ကြပါစို့ ဟုအကြံပြုလိုက်ရပါသည်။

ဂျက်ဖရီတင်အုန်း ( R.I.T ရန်ကုန်စက်မှုတက္ကသိုလ် )