ဆရာမ ဒေါက်တာစိန်စိန်သိန်း သို့ အိတ်ဖွင့်ပေးစာ

ဆရာမ ခင်ဗျား –

၂၇ – ၁၀ – ၂၀၁၀ နေ့ထုတ် စောင့်ကြည့်သတင်းဂျာနယ် (News Watch)အတွဲ(၆)၊ အမှတ်(၁၅) စာမျက်နှာ ၃၀ မှာ ဒေါက်တာစိန်စိန်သိန်း အမည်နဲ့ရေးထားတဲ့ ”ပေးဆပ်ခဲ့သူသာ အလေးမြတ်ပြုခံရ” ဆိုတဲ့ ဆရာမရဲ့ ဆောင်းပါး တစ်ပုဒ်ကို ဖတ်လိုက်ရပါတယ်။
ဆရာမ ရေးသားတဲ့ အဲဒီဆောင်းပါးရဲ့ ခေါင်းစဉ်က ထိမိလှပါတယ်။ ဆရာမတင်ပြချင်တဲ့ သဘောတရား အချို့ကိုလည်း နားလည်လိုက်ပါတယ်။ မဟတ္တမဂန္ဓီကြီးဟာ ”ဟိန္ဒူ၊ မွတ်စလင် လူမျိုးရေးအဓိကရုဏ်းတွေကို မလိုလားကြောင်း၊ မတူညီတဲ့ ဘာသာရေးကို အကြောင်းပြုပြီး နိုင်ငံသားအချင်းချင်း သတ်ဖြတ်နေကြတာကို အလုပ်မဟုတ်ဘူးလို့ ခံယူထားသူဖြစ်ကြောင်း

– တောင်အာဖရိကနိုင်ငံမှာ အိန္ဒိယလူမျိုးတွေအတွက် တရားမျှတမှုရဖို့ တိုက်ပွဲဝင်ခဲ့ရကြောင်း။
– အိန္ဒိယ လွတ်လပ်ရေးအတွက် ဗြိတိသျှအစိုးရကို တိုက်ပွဲဝင်တဲ့အခါ တားဆီးမှု ကြိမ်ဖန်များစွာ ခံခဲ့ရပြီး၊ ထောင်ထဲကို ၀င်လိုက်ထွက်လိုက်နဲ့ ဘ၀တစ်ခုလုံးအနစ်နာခံခဲ့ရကြောင်းတွေ ရေးထားတာ ဖတ်ရပါတယ်။
ကောင်းပါတယ်။ ခေါင်းစဉ်နဲ့လည်း ကိုက်ပါတယ်။ မဟတ္တမဂန္ဓီကြီးကိုလည်း ပိုပြီး ကရုဏာသက် ကြပါတယ်။ တစ်ချို့ ခေါင်းဆောင်တွေဆိုရင် မဟတ္တမဂန္ဓီကြီးကို စံနမူနာယူနေတာကိုလည်း တွေ့နေရပါတယ်။
မကောင်းတာတစ်ခုလည်း ဆရာမရေးထားတဲ့စာထဲမှာ ဖတ်လိုက်ရပါတယ်။ ဆွမ်းဆန်ထဲ ကြွက်ချေးရောသလို ဖြစ်သွားပါတယ်။ မကောင်းတာဆိုတာထက် သမိုင်းအမှားကြီးတစ်ခုလို့ဆိုရင် ပိုမှန်ပါလိမ့်မယ်။ အဲဒါကတော့ ကော်လံ(၃) ပထမပိုဒ် စာကြောင်းရေ(၄)နဲ့ ကော်လံ(၅) နောက်ဆုံးအပိုဒ်အစမှာ ရေးထားတဲ့ မဟတ္တမဂန္ဓီကြီးကို လုပ်ကြံသတ်ဖြတ်သူဟာ ”အလွန်အယူသည်းသော မွတ်စလင်လူငယ်တစ်ဦး”ဆိုပြီး ရေးထားတဲ့ အချက်ပါပဲ။ တကယ်တော့ အဲဒီအချက်ဟာ တက်တက်စင်အောင် လွဲသွားတာပါပဲ။
ဆရာမဟာ ဒေါက်တာဆိုတော့ ဆေးပညာဒေါက်တာပဲဖြစ်ဖြစ်၊ ပညာရေး Ph.D ဒေါက်တာပဲဖြစ်ဖြစ် အဲဒီပါရဂူမြောက်ဘွဲ့တွေရဖို့ သုတေသနကျမ်းအလီလီပြု၊ စာတမ်းအစောင်စောင် တင်ပြီးမှ ရခဲ့တာပါ။ အဲဒီလို ဒေါက်တာဘွဲ့ရဆရာမတစ်ဦးက စာရေးဆရာလည်းဖြစ်တော့ ပိုပြီး နှံ့စပ်သေချာဖို့လိုပါတယ်။ မရေမရာနဲ့ မစူးစမ်း မဆင်ခြင်မလေ့လာဘဲ စာတစ်ပုဒ်ဖြစ်ရင်ပြီးရောဆိုပြီး ရေးလိုက်တာကတော့ ဆရာမရဲ့ ဂုဏ်ပုဒ်သိက္ခာ ဒေါက်တာ ဆိုတာနဲ့ အလှမ်း အရမ်းကြီးကွာဝေးနေပါတယ်။ ဗရမ်းဗတာရေးတတ်တဲ့ သူတွေထဲမှာ ဆရာမဒေါက်တာစိန်စိန် သိန်း တစ်ယောက် မပါစေချင်ပါဘူး။
တကယ်တော့ ဆရာမရေးထားတဲ့အတိုင်း မဟတ္တမဂန္ဓီကြီးဟာ လူမျိုးရေးမုန်းတီးမှု၊ လူများစုက လူနည်းစု အပေါ် တစ်ဖက်သတ်ဖိနှိပ်မှု၊ ဘာသာရေးစော်ကားမှုတွေကို လိုလားသူမဟုတ်ပါ။ ဟိန္ဒူမွတ်စလင်တို့ အဓိကရုဏ်း တွေ အကြီးအကျယ်ဖြစ်တဲ့ ၁၉၄၇ ခုနှစ် ဇန်န၀ါရီမှာ အဓိကရုဏ်းတွေ ပပျောက်ဖို့နယ်လှည့်တရားဟော ခဲ့တယ်။ ဟိန္ဒူနဲ့ မွတ်စလင်တို့ သင့်တင့်လာစေရန် အစာငတ်ခံခဲ့တယ်။ နှစ်ဘက် ခေါင်းဆောင်တွေဆီက သင့်မြတ် ပါ့မယ်ဆိုတဲ့ ကတိရရင် အစာပြန်စားတယ်။ ၁၉၄၇ ခုနှစ် စက်တင်ဘာလမှာ တစ်ကြိမ်၊ ၁၉၄၈ ခုနှစ် ဇန်န၀ါရီလ ၁၃ ရက်နေ့မှာ တစ်ကြိမ် အစာငတ်ခံပြန်တယ်။ အဲဒီလို အစာငတ်ခံပြီး နာရီပေါင်း ၁၇၁ နာရီနဲ့ ၄၅ မိနစ်စေ့တဲ့အခါ ဟိန္ဒူနဲ့မွတ်စလင်ခေါင်းဆောင်တွေက နှစ်ဖက် သင့်မြတ်ညီညွတ်ပါ့မယ်လို့ ဂတိပေးတဲ့အတွက် အစာကို ပြန်စား ပါတယ်။
နောက်ပိုင်း ဘာဖြစ်သွားသလဲ၊ ဂန္ဓီကို ဘယ်သူသတ်သလဲဆိုတဲ့ သမိုင်းအထောက်အထားတွေကို ကျွန်တော်အမြောက်အများ တင်ပြနိုင်ပါတယ်။ ဒါပေမယ့် အခိုင်လုံဆုံးအထောက်အထားတစ်ခုနဲ့တင် လုံလောက် လို့ အဲဒီတစ်ခုကိုပဲ ကျွန်တော်တင်ပြပါရစေ။
ဂန္ဓီကြီး ကျဆုံးပြီး (၈)နှစ်ပဲကြာသေးတဲ့ ၁၉၅၆ ခုနှစ်မှာ ရန်ကုန်မြို့ မြန်မာနိုင်ငံဘာသာပြန်စာပေ အသင်း၊ စာပေဗိမာန်ရဲ့ ရုပ်ပြဗဟုသုတဘဏ်အဖြစ်ထုတ်ဝေတဲ့ မြန်မာ့စွယ်စုံကျမ်း အတွဲ(၃)၊ စာမျက်နှာ (၉၁-၉၄)မှာ ဖော်ပြထားတဲ့ မဟတ္တမဂန္ဓီကြီးအကြောင်းကို ဖတ်ကြည့်ဖို့ မူရင်းအတိုင်း ဖော်ပြပေးလိုက်ပါတယ်။
(၁၉၄၈ ခုနှစ်) ”ဇန္န၀ါရီ ၂၁ ရက်နေ့တွင် ဟိန္ဒူလူငယ်တစ်ဦးသည် ဟိန္ဒူမွတ်စလင် ငြိမ်းချမ်းရေးကို မလိုလားသော ဆန္ဒကိုပြသည်အနေနှင့် ဂန္ဓီ၏ နေအိမ်အနီး၌ ဗုံးဖောက်ခွဲသည်။ ဂန္ဓီသည် ထိုလူငယ်အား အပြစ်မှ ခွင့်လွှတ်ပါရန် မေတ္တာရပ်ခံလေသည်။
ဇန္န၀ါရီ ၃၀ ရက်နေ့ ညနေ ၅ နာရီ ၁၀ မိနစ်အချိန်တွင် ဂန္ဓီသည် ဒေလီမြို့ရှိ သူ၏နေအိမ် ဗီယာလာ နေအိမ်၌ ဘုရားဝတ်ပြုရန်အလာတွင် ဟိန္ဒူလူငယ်တစ်ဦးဖြစ်သော ဂတ်ဆေးဆိုသူသည် ဂန္ဓီကို ခြောက်လုံးပူး နှင့် သုံးချက်ပစ်သည်။ ဂန္ဓီသည် နာရီဝက်ခန့်ကြာသောအခါ အနိစ္စရောက်လေသည်။”
ဒါကြောင့် ဆရာမ စွပ်စွဲရေးသားထားသလို ဂန္ဓီကြီးကို သတ်တာ မွတ်စလင်လူငယ်မဟုတ်ပါဘူး။ ဟိန္ဒူ လူငယ်သာဖြစ်တယ်ဆိုတာ သိလောက်ပြီထင်ပါတယ်။ စာပေဗဟုသုတများကို ဆက်လက်လေ့လာပြီး အများအကျိုးပြု စာပေများ ရေးသားနိုင်ပါစေလို့ ဆန္ဒပြုလျက် –

ရွှင်လန်းချမ်းမြေ့ပါစေ

မောင်သဲနီ

————————————————————————————————————————————–

၂၂-၁၂-၂၀၁၀ (ဗုဒ္ဓဟူး)နေ့ထုတ် News Watch (စောင့်ကြည့်)ဂျာနယ်၊ စာမျက်နှာ ၃၆ မှာ

မောင်သဲနီရဲ့ “ဆရာမ ဒေါက်တာစိန်စိန်သိန်းသို့ အိတ်ဖွင့်ပေးစာ” ကို ဖော်ပြခံရပါတယ်…။

စာပေစိစစ်ရေးက ဖြတ်တောက်ထားတာတော့ ရှိပါတယ်..

မူရင်းဆောင်းပါး