ဆိုလာဓာတ်အားပေးစနစ်ပါသည့် ဘတ်စ်ကားများ စင်ကာပူတွင် ပထမဆုံး ပြေးဆွဲ

မတ် ၃၀၊ ၂၀၂၁
​M-Media

-​နေစွမ်းအင်သုံး ဓာတ်အားပေးစနစ် ပါဝင်တဲ့ ခရီးသည်တင် ဘတ်စ်ကားနှစ်စီးကို စင်ကာပူမှာ ဒီကနေ့ ပထမဆုံး စတင်ပြီး စမ်းသပ်ပြေးဆွဲပါတယ်။

၁.၆ မီလီမီတာထူပြီး ကားခေါင်မိုးပေါ်မှာတပ်ဆင်ထားတဲ့ အဲဒီဆိုလာပြားတွေဟာ ၂၀ ကီလိုဂရမ်လေးပြီး၊ ဓာတ်အား ၁၀၀၀ ဝပ် ထုတ်လုပ်နိုင်မှာပါ။ ရတဲ့ဓာတ်အားနဲ့ ​ကားဘတ္ထရီကို အားသွင်းနိုင်မှာဖြစ်သလို ဘတ်စ်ကားမှာ လိုအပ်တဲ့ ဓာတ်အားကိုလည်း ဖြည့်ဆည်းပေးနိုင်မှာပါ။

ဒီစနစ်ကြောင့် အင်ဂျင် အလ်တာနေတာကနေ ဘတ္ထရီကို အားသွင်းပေးစရာ မလိုတော့ပါဘူး။

စင်ကာပူ ဘတ်စ်ကား ကုမ္ပဏီ Go-Ahead ရဲ့ ဒီ စမ်းသပ်ပြေးဆွဲမှုဟာ ၆ လ ကြာမြင့်မှာဖြစ်ပြီး နေစွမ်းအင် ထိထိရောက်ရောက် သုံးစွဲနိုင်မှု၊ လောင်စာဆီ ချွေတာနိုင်မှု၊ အပူအချိန်မြင့်တက်မှုနဲ့ နေ့စဉ် ကားဆေးကြောမှုကို ဆိုလာပြားတွေ ခံနိုင်ရည်ရှိမှုကို စတာတွေကို သုံးသပ်သွားမှာပါ။

ဒီစနစ်ကြောင့် ဘတ်စ်ကားတွေမှာ တစ်နှစ်ကို လောင်စာဆီ လီတာ ၁၄၀၀ ချွေတာနိုင်မှာဖြစ်ပြီး၊ ကာဘွန်ထုတ်လွှတ်မှုကိုလည်း ၃.၇ တန် လျော့ကျစေမှာ ဖြစ်ပါတယ်။

Ref: The Star