ကိုဗစ်မြင့်တက်လာမှုကြောင့် ကွာရန်တင်းမလိုဘဲ ဝင်ရောက်ခွင့်ကို ထိုင်းက ဆက်ပိတ်ထား

ဇန်နဝါရီ ၈၊ ၂၀၂၂
M-Media

-ကိုဗစ်မျိုးကွဲသစ် အိုမီခရွန်ကူးစက်မှု မြင့်တက်လာတာကြောင့် နိုင်ငံခြားသားတွေ ကွာရန်တင်းမလိုဘဲ ဝင်ရောက်ခွင့်ကို ဆက်လက်ပိတ်ပင်ထားမှာဖြစ်ပြီး၊ ကန့်သတ်မှုအသစ်တွေ တိုးမြှင့်လုပ်ဆောင်မယ်လို့ ထိုင်းအာဏာပိုင်တွေက ​ပြောကြားလိုက်ပါတယ်။

ထိုင်းမှာ မနေ့က ကိုဗစ်ကူးစက်မှုအရေအတွက်ဟာ ပြီးခဲ့တဲ့နှစ် နိုဝင်ဘာနောက်ပိုင်း အမြင့်ဆုံးဖြစ်ခဲ့ပြီး ဇန်နဝါရီ ၁ ရက်နေ့ကထက် ၂ ဆ လောက်မြင့်တက်လာတာ ဖြစ်ပါတယ်။

နိုင်ငံခြားသားတွေ ကွာရန်တင်းမလိုဘဲ ဝင်ရောက်ခွင့်ကို နိုဝင်ဘာလမှာ ထိုင်းက စတင်ခွင့်ပြုခဲ့ပေမယ့် ကိုဗစ်ကူးစက်မှု မြင့်တက်လာတာကြောင့် ဒီဇင်ဘာ ၂၂ ရက်နေ့မှာ ရပ်ဆိုင်းခဲ့ပါတယ်။ ထင်ရှားတဲ့ ခရီးသွားနေရာတွေမှာ တစ်နေရာတည်း ၇ ရက် နေထိုင်ရမယ်ဆိုတဲ့ အစီအစဉ်ကိုလည်း ထိုင်းက တစ်ပါတည်း ရပ်ဆိုင်းခဲ့ပါတယ်။

ကွာရန်တင်းမလိုဘဲ ဝင်ရောက်ခွင့်ကို ဆက်လက်ရပ်ဆိုင်းထားမှာဖြစ်ပေမယ့် ​တစ်ချို့ခရီးသွားနေရာတွေမှာ တစ်နေရာတည်း ၇ ရက် လွတ်လွတ်လပ်လပ်နေထိုင်ခွင့် ပြန်ပေးသွားမယ်လို့ ကိုဗစ်ထိန်းချုပ်ရေးဆိုင်ရာအဖွဲ့ ပြောရေးဆိုခွင့်ရှိသူ တာဝီဆင်က ပြောပါတယ်။

ပြည်တွင်းကူးစက်မှု လျော့ကျစေဖို့အတွက် ဘန်ကောက်အပါအ၀င် ပြည်နယ် ၈ ခုက စားသောက်ဆိုင်တွေမှာ ည ၉ နာရီနောက်ပိုင်း အရက်သောက်သုံးမှုတွေကို ​တားမြစ်မှာဖြစ်ပါတယ်။ တာဝီဆင်က အရပ်စုသောက်မှုကြောင့် ကူးစက်မှု မြင့်တက်လာတာကို အချက်အလက်တွေအရ တွေ့ရတယ်လို့လည်း ထည့်သွင်းပြောဆိုခဲ့ပါတယ်။

အာဖရိကနိုင်ငံ ၈ ခုကို ကူးစက်မှု စိုးရိမ်စရာအကောင်းဆုံး နိုင်ငံအဖြစ် သတ်မှတ်ထားမှုကိုလည်း ဇန်နဝါရီ ၁၁ ရက်နေ့ကျရင် ထိုင်းနိုင်ငံက ဖယ်ရှားပေးတော့မှာ ဖြစ်ပါတယ်။

Ref: CNA