ပြင်သစ်နှင့် အမေရိကန်မှ တိုက်လေယာဉ်အမြောက်အများ အင်ဒိုနီးရှား ဝယ်ယူမည်

ဖေဖော်ဝါရီ ၁၁၊ ၂၀၂၂
M-Media

-တောင်တရုတ်ပင်လယ်မှာ တင်းမာမှုတွေ မြင့်တက်လာတဲ့အချိန် လေတပ်ကို အဆင့်မြှင့်နိုင်ဖို့အတွက် အင်ဒိုနီးရှားဟာ ပြင်သစ်နဲ့ အမေရိကန်တို့ကနေ အဆင့်မြင့်တိုက်လေယာဉ်တွေနဲ့ ဆက်စပ်ပစ္စည်း အမြောက်အများ မှာယူလိုက်ပါတယ်။

အင်ဒိုနီးရှား ကာကွယ်ရေးဝန်ကြီး ပရာဘို၀ို ဆူဘီယန်တိုနဲ့ ပြင်သစ် ကာကွယ်ရေးဝန်ကြီး ဖလောရင့် ပါလီတို့ရဲ့ ဂျကာတာမှာ မနေ့က တွေ့ဆုံဆွေးနွေးမှုအပြီး ပြင်သစ်လုပ် Rafale တိုက်လေယာဉ် ၄၂ စီး အင်ဒိုနီးရှားက ဝယ်ယူမယ့် အစီအစဉ်ကို ထုတ်ပြန်ခဲ့ပါတယ်။

လက်နက်အပြည့်အစုံပါ ပါဝင်မယ့် အဲဒီသဘောတူညီချက်ဟာ အမေရိကန်ဒေါ်လာ ၈.၁ ဘီလီယံတန်ဖိုး ရှိပါတယ်။ အင်ဒိုနီးရှားဟာ ပြင်သစ်လုပ် Scorpene ရေငုပ်သင်္ဘော ၂ စင်းကိုလည်း ဝယ်ယူမှာပါ။

အမေရိကန်အစိုးရက နောက်ဆုံးပေါ် F15 တိုက်လေယာဉ်တွေ၊ အင်ဂျင်တွေ၊ လက်နက်ခဲယမ်းနဲ့ လေကြောင်းဆက်သွယ်ရေးပစ္စည်း စုစုပေါင်း ဒေါ်လာ ၁၃.၉ ဘီလီယံဖိုး အင်ဒိုနီးရှားကို ရောင်းချဖို့ မနေ့က အတည်ပြုလိုက်ပါတယ်။

ကန်အစိုးရရဲ့ ထုတ်ပြန်ချက်မှာ အာရှိပစိဖိတ်ဒေသ နိုင်ငံရေးတည်ငြိမ်မှု၊ စီးပွားရေးတိုးတက်မှု မောင်းနှင်အားတစ်ခုဖြစ်တဲ့ မဟာမိတ်နိုင်ငံရဲ့ လုံခြုံရေး အားကောင်းအောင် ကူညီပံ့ပိုးပေးရမယ်ဆိုတဲ့ နိုင်ငံရေးမူဝါဒအတိုင်း ဒီလိုရောင်းချဖို့ သဘောတူလိုက်တာ ဖြစ်တယ်လို့ ဖော်ပြထားပါတယ်။

သမ္မတ ဂျိုးဘိုင်ဒန်လက်ထက်မှာ အမေရိကန်ဟာ အင်ဒိုနီးရှားနဲ့ ပိုမိုနီးကပ်တဲ့ဆက်ဆံရေးရဖို့ ကြိုးစားလာပြီး ဒီဇင်ဘာလတုန်းက နိုင်ငံခြားရေးဝန်ကြီး အန်တိုနီဘလင်ကန် အင်ဒိုနီးရှားကို လာရောက်ခဲ့ပါတယ်။

တောင်တရုတ်ပင်လယ်မှာ တရုတ်နဲ့ နယ်မြေအငြင်းပွားမှုဖြစ်နေတဲ့ အာဆီယံနိုင်ငံတွေထဲမှာ အင်ဒိုနီးရှားနိုင်ငံလည်း ပါဝင်ပါတယ်။

Ref: Reuters