ကာဘာကျောင်းတော်ပုံစံ ဆော်ဒီ၏ ဖွံ့ဖြိုးရေးစီမံကိန်းတစ်ခု ၀ေဖန်ခံနေရ

ဖေဖော်၀ါရီ ၁၉၊ ၂၀၂၃

M-Media 

-ပြီးခဲ့တဲ့ရက်ပိုင်းမှာ ဆော်ဒီက ထုတ်ပြခဲ့တဲ့ အနာဂတ်မြို့သစ်စီမံကိန်း အဆောက်အဦးဒီဇိုင်းနဲ့ပတ်သက်ပြီး အာရပ်ကမ္ဘာမှာ ၀ေဖန်မှုတွေ မြင့်တက်နေပါတယ်။ 

မြို့တော်ရီယာ့ဒ်ဆင်ခြေဖုံးမှာ ဖန်တီးမယ့် အဲဒီမြို့သစ်မှာ Al Mukaab (ကုဗတုံး) လို့ခေါ်တဲ့ ခေတ်ရှေ့ပြေးအဆောက်အဦးတစ်ခု ပါ၀င်မှာဖြစ်ပါတယ်။ 

အမေရိကန်က Empire State Building အဆောက်အဦး အခု ၂၀ စာလောက်ကြီးမယ့် Al Mukaab မှာ လူနေအဆောက်အဦး၊ စီးပွားရေး လုငန်းတွေ၊ ရှော့ပင်းမောတွေ၊ ဟိုတယ်၊ ဖျော်ဖြေရေးစင်တာတွေ ပါ၀င်မှာပါ။

ဒီမြို့သစ်ကို အနာဂတ် သိပ္ပံနဲ့ နည်းပညာမြို့တော်၊ အာကာသမြို့တော်အဖြစ် ရည်ရွယ်တယ်လို့ ဆော်ဒီအာဏာပိုင်တွေရဲ့ ထုတ်ပြန်ချက်မှာ ဖော်ပြထားပါတယ်။

၀ေဖန်မှုရှိ

——-

ဒါပေမယ့် Al Mukaab အဆောက်အဦးဟာ အစ္စလာမ်ဘာသာ၀င်တွေ အထွဋ်အမြတ်ထားတဲ့ မက္ကာမြို့က ကာဘာ၀တ်ကျောင်းတော်နဲ့ ပုံစံတူ ဖြစ်နေပါတယ်။ 

ဒီအတွက် အာရပ်ကမ္ဘာက ဆိုရှယ်မီဒီယာအသုံးပြုသူတွေကြားမှာ ၀ေဖန်မှုတွေ မြင့်တက်နေပါတယ်။ 

ကာဘာ၀တ်ကျောင်းတော်ကို သေးသိမ်အောင်လုပ်တယ်၊ တစ်ကမ္ဘာလုံးက အစ္စလာမ်ဘာသာ၀င်တွေနဲ့ သက်ဆိုင်တဲ့ ၀တ်ကျောင်းတော်ကို ဆော်ဒီအာဏာပိုင်တွေက လက်၀ါးကြီးအုပ် အမြတ်ထုတ်သလို ဖြစ်နေတယ်ဆိုပြီး ထောက်ပြပြောဆိုမှုတွေလည်း ရှိနေပါတယ်။ 

ဘုရင် ဆလ်မန်၊ အိမ်ရှေ့မင်းသား မိုဟာမက် ဘင် ဆလ်မန်တို့ ဦးဆောင်တဲ့ ဆော်ဒီအစိုးရဟာ ၂၀၃၀ ရည်မှန်းချက်ထားကာ ဆော်ဒီကို ဖွံဖြိုးတိုးတက်အောင် စီမံကိန်းချဆောင်ရွက်နေတာ ဖြစ်ပါတယ်။ 

Ref: Doha News