ဂါဇာရှိ ဒုက္ခသည်စခန်းများကို အစ္စရေးက ဗုံးထပ်ကြဲ

နို၀င်ဘာ ၁၊ ၂၀၂၃

M-Media 

-ဂါဇာကမ်းမြှောင်က ဂျာဘာလီယာ၊ အလ်ရှာတီနဲ့ နူစီရတ် ဒုက္ခသည်စခန်းတွေကို အစ္စရေးက အောက်တိုဘာ ၃၁ ရက်နေ့မှာ ဗုံးထပ်ကြဲခဲ့ပြီး အနည်းဆုံး လူ ၅၀ လောက် သေဆုံးသွားပါတယ်။ 

၁၉၄၈ ခုနှစ် ဂျူးလက်နက်ကိုင်တွေက ပါလက်စတိုင်းတွေကို သတ်ဖြတ်မောင်းထုတ်ကာ အစ္စရေးနိုင်ငံ ထူထောင်မှုကြောင့် အိုးအိမ်စွန့်ခွာ ထွက်ပြေးလာရသူတွေ ဒီဒုက္ခသည်စခန်းမှာ နေထိုင်နေတာဖြစ်ပါတယ်။ 

အောက်တိုဘာ ၇ ရက်နေ့က စတင်တဲ့ အစ္စရေးရဲ့ ဂါဇာကို တိုက်ခိုက်မှုမှာ ဒုက္ခသည်စခန်းတွေဟာ အကြိမ်ကြိမ် ပစ်မှတ်ထားခံခဲ့ရတာပါ။ 

မနေ့က ဂျာဘာလီယာ ဒုက္ခသည်စခန်းကို တိုက်ခိုက်မှုကြောင့် လူ ၅၀ လောက် သေဆုံးခဲ့ပြီး၊ နေအိမ်အများအပြားလည်း ပြိုကျ ပျက်ဆီးသွားပါတယ်။ အပျက်အဆီးတွေအကြား ပိတ်မိနေသူတွေလည်း ရှိတာကြောင့် သေဆုံးသူ ထပ်တိုးလာနိုင်တယ်လို့ ကျန်းမာရေး တာ၀န်ရှိသူတွေက ပြောပါတယ်။

တိုက်ခိုက်မှုအတွင်းဒဏ်ရာရသူက ၄၀၀ လောက် ရှိပါတယ်။ 

နိုင်ငံတကာအသိုင်းအ၀ိုင်းက အစ္စရေးရဲ့ ရက်စက်ကြမ်းကြုတ်မှုတွေကို ပိုမို ၀ေဖန်လာကြပါတယ်။  

“(ဂျာဘာလီယာ ဒုက္ခသည်စခန်းကို) တိုက်ခိုက်မှုဟာ နောက်ထပ် စိတ်ပျက်စရာတစ်ခုဖြစ်ပြီး ကမ္ဘာ့ခေါင်းဆောင်တွေနဲ့ နိုင်ငံရေးသမားတွေ နိုးထရမယ့် ကိစ္စလည်း ဖြစ်ပါတယ်။ နိုင်ငံတကာဥပဒေကို လိုက်နာပါဆိုတဲ့ သူတို့ရဲ့ ၀တ်ကျေတန်းကျေ ပြောကြားမှုကို အစ္စရေးက လုံး၀ ဂရုမစိုက်တဲ့အပြင် မြင်မြင်သမျှ တိုက်ခိုက်သတ်ဖြတ်တဲ့ ရက်စက်ယုတ်မာမှုတွေကိုသာ ပိုလုပ်လာပါတယ်” လို့ အကျိုးအမြတ်မယူတဲ့ ကျန်းမာရေးဆိုင်ရာ အကူအညီပေးရေးအဖွဲ့ Medical Aid for Palestinians (MAP) က ထုတ်ပြန်ပါတယ်။ 

နယ်စည်းမခြား ဆရာ၀န်များအဖွဲ့ MSF ကလည်း ဒီလိုအကြမ်းဖက်မှုတွေကို ရှုတ်ချကြောင်း၊ ဂါဇာကမ်းမြှောင်မှာ ချက်ခြင်းအပစ်ရပ်ဖို့ တိုက်တွန်းကြောင်း ထုတ်ပြန်ပါတယ်။ 

အလ်ရှာတီနဲ့ နူစီရတ်ဒုက္ခသည်စခန်းတွေလည်း မနေ့က တိုက်ခိုက်ခံခဲ့ရပြီး လူအများအပြား သေဆုံးခဲ့ပါတယ်။ 

Ref: Aljazeera