ဂါဇာရှိ ခရစ်ယာန်အမျိုးသမီး ၂ ဦးအား ဘုရားကျောင်းထဲတွင် ပစ်သတ်ခဲ့သည့် အစ္စရေးစစ်တပ်

ဒီဇင်ဘာ ၁၇၊ ၂၀၂၃

M-Media 

-ဂါဇာက ဘုရားကျောင်းတစ်ခုမှာ အစ္စရေးစစ်တပ်ဟာ အမျိုးသမီး ၂ ဦးကို ပစ်သတ်ခဲ့တယ်လို့ ဂျေရုစလင်မြို့ လက်တင်ခရစ်ယာန်အသင်းတော်က ထုတ်ပြန်ပါတယ်။ 

“ဒီကနေ့ (ဒီဇင်ဘာ ၁၇ ရက်နေ့) နေ့လည်ပိုင်းမှာ အစ္စရေးစစ်တပ်က စနိုက်ပါသမားတစ်ယောက်ဟာ ဂါဇာက Holy Family Parish ဘုရားကျောင်းထဲမှာ ခရစ်ယာန်အမျိုးသမီး နှစ်ဦးကို သတ်ဖြတ်ခဲ့ပါတယ်။ ဘုရားကျောင်းဟာ အစ္စရေး-ဟားမက်စ်စစ်ပွဲ စကတည်းက ခရစ်ယာန်မိသားစုတွေကို လက်ခံကယ်တင်ထားတဲ့ ကျောင်းပါ” လို့ လက်တင်အသင်းတော်ရဲ့ ထုတ်ပြန်ချက်မှာ ဖော်ပြထားပါတယ်။ 

အသတ်ခံရသူနှစ်ဦးဟာ သားအမိတွေဖြစ်ပါတယ်။ 

“နဟီဒါနဲ့ သမီးဖြစ်သူ ဆာမာရ်တို့ဟာ သီလရှင်ကျောင်းထဲ သွားရောက်တဲ့အချိန် အသတ်ခံလိုက်ရတာပါ။ တစ်ယောက်ထိသွားလို့ နောက်တစ်ယောက်က သွားကယ်တဲ့အချိန် နှစ်ယောက်စလုံး အသတ်ခံခဲ့ရတာဖြစ်ပါတယ်” လို့ လက်တင်အသင်းတော်က ပြောပါတယ်။ 

မပစ်ခင် သတိပေးတာမျိုးမရှိသလို၊ စစ်နဲ့သက်ဆိုင်သူတွေ တစ်ဦးတစ်ယောက်မှမရှိတဲ့ ဘုရားကျောင်းထဲမှာ သွေးအေးအေးနဲ့ ပစ်ခတ်သွားခဲ့တာဖြစ်တယ်လို့လည်း ထုတ်ပြန်ချက်ထဲမှာ ထည့်သွင်းဖော်ပြပါတယ်။ 

ဘုရားကျောင်းထဲကသူတွေဟာ အစ္စရေးစစ်တပ်ရဲ့ ပစ်ခတ်မှုကို တားဆီးဖို့ ကြိုးစားခဲ့ကြပြီး အနည်းဆုံး ၇ ဦး ဒဏ်ရာရရှိခဲ့ပါတယ်။ 

“ကမ္ဘာ့ သက်တမ်းအရင့်ဆုံး ခရစ်ယာန်လူ့အဖွဲ့အစည်းမှာ ခရစ္စမတ်ကာလအတွင်း ရည်ရွယ်လုပ်ဆောင်တဲ့ လူသတ်ပွဲဖြစ်ပါတယ်” လို့ အသတ်ခံရသူ ၂ ဦးရဲ့ မိသာစု၀င် ဟာမန်ဖာရာက ဆိုရှယ်မီဒီယာမှာ ရေးသားခဲ့ပါတယ်။ 

Ref: Aljazeera 

(ဓာတ်ပုံ – အသတ်ခံခဲ့ရသည့် ခရစ်ယာန်အမျိုးသမီး ၂ ဦး)