ငတ်မွတ်ခေါင်းပါးမှုကို လက်နက်အဖြစ် အသုံးချနေသည့် အစ္စရေး

ဒီဇင်ဘာ ၁၈၊ ၂၀၂၃

M-Media 

-ဂါဇာကို အစ္စရေးရဲ့ တိုက်ခိုက်မှုမှာ ငတ်မွတ်ခေါင်းပါးမှုကို လက်နက်သဖွယ်အသုံးပြုနေတယ်လို့ လူ့အခွင့်အရေး စောင့်ကြည့်အဖွဲ့ HRW က ပြောကြားလိုက်ပါတယ်။ 

ဟားမက်စ်ရဲ့ တိုက်ခိုက်မှုကို တုန့်ပြန်တယ်ဆိုတဲ့ ခေါင်းစဥ်နဲ့ အောက်တိုဘာ ၇ ရက်နေ့ကစတင်ပြီး ဂါဇာက ပါလက်စတိုင်းပြည်သူတွေကို အစ္စရေးက တိုက်ခိုက်သတ်ဖြတ်မှုတွေ လုပ်ဆောင်နေတာပါ။ 

လက်ရှိအချိန်အထိ လူပေါင်း ၁၉၀၀၀ နီးပါး အသတ်ခံခဲ့ရပြီး အများစုက ကလေးငယ်တွေနဲ့ အမျိုးသမီးတွေ ဖြစ်ပါတယ်။

ဒီကနေ့ထုတ်ပြန်တဲ့ HRW ရဲ့ အစီရင်ခံစာမှာ ပါလက်စတိုင်းပြည်သူတွေအပေါ် အစ္စရေးက စားနပ်ရိက္ခာဖြတ်တောက် ညှင်းပမ်းမှုကို ဖော်ထုတ်ထားပါတယ်။ 

ပါလက်စတိုင်းပြည်သူတွေ စားနပ်ရိက္ခာ၊ သောက်သုံးရေနဲ့ အသက်ရှင်ရပ်တည်ရေး လိုအပ်တဲ့ အခြေခံပစ္စည်းတွေ မရအောင် အစ္စရေးက ရည်ရွယ်ချက်ရှိရှိလုပ်ဆောင်နေတယ်လို့ HRW က ပြောပါတယ်။ 

အရပ်သားပြည်သူတွေကို ဆာလောင်မွတ်သိပ်အောင် လုပ်ဆောင်မှုဟာ စစ်ရာဇ၀တ်မှုမြောက်ပြီး၊ နိုင်ငံတကာခေါင်းဆောင်တွေက တားဆီးအရေးယူပေးဖို့လည်း လူ့အခွင့်အရေး စောင့်ကြည့်အဖွဲ့က တိုက်တွန်းခဲ့ပါတယ်။ 

အစ္စရေးအစိုးရက ထုတ်ပြန်တဲ့ ကြေငြာချက်၊ တိုက်ခိုက်သတ်ဖြတ်မှုကနေ လွတ်မြောက်လာသူတွေကို တွေ့ဆုံမှု၊  အကူအညီပေးရေး အဖွဲ့အစည်းတွေရဲ့ ထုတ်ပြန်ချက်တွေ၊ ဂြိုဟ်တုဓာတ်ပုံတွေကို လေ့လာခဲ့ရာမှာ အစ္စရေးဟာ ပါလက်စတိုင်းပြည်သူတွေ နေ့စဥ်ရပ်တည်ရေး လိုအပ်တဲ့ ရင်းမြစ်တွေ မရအောင် တားဆီးတဲ့မူ၀ါဒမျိုးကို ရည်ရွယ်ချက်ရှိရှိ အသုံးပြုနေတာကို တွေ့ရတယ်လို့လည်း HRW က ပြောပါတယ်။ 

“၂ လကျော်အတွင် အစ္စရေးဟာ ဂါဇာပြည်သူတွေ စားနပ်ရိက္ခာနဲ့ သောက်သုံးရေ ခက်ခဲအောင် လုပ်ဆောင်နေပြီး၊ ဒါဟာ အစ္စရေး ထိပ်ပိုင်း တာ၀န်ရှိသူတွေ ချမှတ်တဲ့ မူ၀ါဒ ဖြစ်ပါတယ်။ အရပ်သားတွေ ငတ်မွတ်ခေါင်းပါးအောင်လုပ်တာကို စစ်ပွဲနည်းလမ်းတစ်ခုဖြစ် ဆောင်ရွက်နေတာပါ။ ဂါဇာပြည်သူတွေကို ဆိုးဆိုးရွားရွား ထိခိုက်စေတဲ့ ဒီလို စက်ဆုပ်စရာ စစ်ရာဇ၀တ်မှုကို ကမ္ဘာ့ခေါင်းဆောင်တွေက ဆန့်ကျင်ပြောဆိုဖို့ လိုအပ်ပါတယ်”

အစ္စရေးဟာ ဂါဇာအပြင် ပါလက်စတိုင်းပိုင်နက် နောက်တစ်ခုဖြစ်တဲ့ အနောက်ဖက်ကမ်းမှာလည်း ပါလက်စတိုင်းပြည်သူတွေကို ပစ်မှတ်ထားတဲ့ တိုက်ခိုက်သတ်ဖြတ်မှုတွေ တိုးမြှင့်လုပ်ဆောင်နေပါတယ်။ 

Ref: Aljazeera