အမေရိကန်၏ ဘီလီယံတန် လေဆာလက်နက်ကို တစ်ဒေါ်လာတည်းနှင့် ကာကွယ်မည့် တရုတ်

မေ ၃၀၊ ၂၀၂၄

M-Media 

-အမေရိကန်က ဒေါ်လာဘီလီယံချီ အကုန်အကျခံ ထုတ်လုပ်ထားတဲ့ လေဆာလက်နက်တွေကို တစ်ဒေါ်လာတန် ဓာတုပစ္စည်းနဲ့ အန်တု ကာကွယ်ဖို့ တရုတ်ပညာရှင်တွေက ကြိုးစားနေပါတယ်။ 

ဘေဂျင်းနည်းပညာတက္ကသိုလ်က သုတေသနပညာရှင်တွေဟာ လေဆာလက်နက်ကို ကာကွယ်ရေးမှာ လူလုပ်ရော်ဘာတု Resin နဲ့ ကာကွယ်နိုင်ဖို့ လေ့လာမှုတွေ ပြုလုပ်နေပါတယ်။ 

ဓာတုဗေဒအမည် BPR လို့ခေါ်တဲ့ Resin ဟာ ၂ ဒဿမ ၂ ပေါင်ကို တစ်ဒေါ်လာသာ ကျသင့်မှာပါ။ တရုတ်နိုင်ငံဟာ ကမ္ဘာမှာ BPR အများဆုံးထုတ်တဲ့ နိုင်ငံလည်း ဖြစ်ပါတယ်။ 

လေဆာလက်နက်တွေဟာ အရာ၀တ္ထုတွေကို အပူချိန် အလွန်မြင့်မားတဲ့ လေဆာရောင်ခြည်နဲ့ လောင်ကျွမ်းပျက်ဆီးစေတာ ဖြစ်ပါတယ်။ 

တရုတ်ပညာရှင်တွေဟာ လေဆာလက်နက်က ထွက်လာမယ့် အပူချိန်ကို Resin ရော်ဘာနဲ့ ကာကွယ်အန်တုနိုင်အောင် ကြိုးစားနေပါတယ်။ Resin ရော်ဘာဟာ အပူချိန်နဲ့ ဖိအားကို ခံနိုင်တဲ့ ဓာတ်တုပစ္စည်းဖြစ်ပြီး လက်ရှိ စက်မှုလက်မှုနယ်ပယ်မှာ ကျယ်ကျယ်ပြန့်ပြန့် အသုံးပြုနေပါတယ်။ 

စက်ဖက်နယ်ပယ်မှာတော့ ဒုံးကျည်တွေ၊ ဒရုန်းတွေမှာ အပူခံအလွှာအဖြစ် Resin ကို အသုံးပြုနေကြပါတယ်။ 

တရုတ်ပညာရှင်တွေက ပုံမှန် Resin ကို စျေးကွက်ထဲမှာ အလွယ်တကူ၀ယ်လို့ရတဲ့ စီလီကွန် ကာဘိုက်၊ ဇီခရွန်နီယမ် အောက်ဆိုက်၊ ကာဘွန်ဘလက်နာနိုအမှုန့် စတဲ့ ဓာတုပစ္စည်းတွေ ထပ်ပေါင်းကာ လေဆာလက်နက်ရဲ့ အပူဒဏ်ကို ခံနိုင်အောင် စမ်းသပ်နေကြပါတယ်။ 

ဒီ Resin အသစ်ကို BPR1 လို့ အမည်ပေးထားပါတယ်။ BPR1 ရော်ဘာ ၀ ဒဿမ ၁ လက်မကို၊ တစ်စကွဲယားစင်တီမီတာ ၅၀၀ ၀ပ်ရှိတဲ့ လေဆာရောင်ခြည်ပူနဲ့ ထိုးခွဲစမ်းသပ်ရာမှာ မပေါက်တာကို တွေ့ခဲ့ရပါတယ်။ 

၃ မီဂါ၀ပ်ရှိတဲ့ လေဆာလက်နက်က ထုတ်လုပ်နိုင်တဲ့ လေဆာရောင်ခြည်ရဲ့ အပူဟာ တစ်စကွဲယားစင်တီမီတာကို ၃၀၀ သာရှိပါတယ်။ ဒါ့ကြောင့် တရုတ်ပညာရှင်တွေ စမ်းသပ်တဲ့ အပူဟာ လေဆာလက်နက်ကထွက်တဲ့ အပူထက် ပိုမိုများပြားတာကြောင့် BPR1 ကို လေဆာလက်နက် ကာကွယ်ရေး အလားအလာရှိတဲ့ ပစ္စည်းတစ်ခုအဖြစ် မှတ်ယူလာကြပါတယ်။ 

လက်ရှိ လေဆာလက်နက်နယ်ပယ်ကို အမေရိကန်က ဦးဆောင်နေတာဖြစ်ပါတယ်။ အမေရိကန်ဟာ အမြင့်ဆုံး ၃၀၀ ကီလို၀ပ်အားရှိတဲ့ လေဆာလက်နက်ကိုသာ ထုတ်ပြထားပြီး လက်ရှိမှာ မီဂါ၀ပ်အဆင့်ရှိတဲ့ လက်နက်တွေကို ထုတ်လုပ်နေပါတယ်။ 

Ref: Interesting Engineering