Category: မြန်မာမွတ်စ်လင်မ်သမိုင်း

ဇူလိုင် ၁၂ ရက် ၂၀၁၂

M-Media

ဓါတ်ပုံနှင့် အင်တာဗျူး- သုတမောင်

မန္တလေးမြို့၊ အမရပူရမြို့နယ်၊ အိုးတော်ရပ်ကွက်တွင် လွန်ခဲ့သော နှစ်ပေါင်း (၂၀၀)ကျော်မှစ၍တည်ရှိခဲ့သော လင်းဇင်းကုန်း မွတ်စလင် သုဿန် ဥယျာဉ်တော်အား ဖျက်သိမ်းတော့မည်ဖြစ်ကြောင်း ၂၀၁၂-ခု ဇွန်လ ၁-ရက်ကနေ ၃-ရက်အထိ သတင်းစာထဲတွင်ပါရှိခဲ့တဲ့ လင်းဇင်းကုန်းသုဿာန်အား (၁-၇-၂၀၁၂)ရက်တွင် အပြီးပိတ်သိမ်းမည့် ကြေငြာချက်နဲ့ ပတ်သက်ပြီး လင်းဇင်းကုန်းသုဿာန်သို့ သွားရောက်လေ့လာခဲ့မှုအပေါ် ပြန်လည်ရေးသားခြင်းဖြစ်ပါသည်။

 

မေး –  လင်းဇင်းကုန်း ကဘာရ်စတာန်(သုဿာန်)ရော ဒါရ်ဂါဟ်နဲ့ရော ပတ်သက်ပြီးတော့ သိချင်တာလေးမေးချင်ပါတယ်။ ဦးလေးတို့အနေနဲ့ ပြောပြလုိ့ရမလား ခင်ဗျ။
ဖြေ – ကျွန်တော်တို့က ဒါရ်ဂါဟ်ကိုတာဝန်ယူပါတယ်။ လူငယ်တွေကတော့ သုဿာန်အတွက် တာဝန်ယူထားကြတယ်။

မေး – ဟိုတစ်လောက သုဿာန်ကိုဖျက်သိမ်းတော့မယ်လို့သိရတယ်။ သတင်းစာထဲမှာတော့ ပိတ်သိမ်းမယ်လို့ကြေငြာတယ်။ ဒါပေမယ့် ဖျက်သိမ်းမယ်လို့လည်းသတင်းကြားတယ်။ အဲဒါ အခု ဘယ်လိုအခြေအနေရှိပါသလဲ။
ဖြေ – အဲဒါကိုတော့ ဒီနေရာဟာ သမိုင်းဝင်နေရာဖြစ်တာကြောင့် နိုင်ငံတော်သမ္မတကြီးဆီထိရောက်အောင် စာပို့ထားပါတယ်။ နောက်ပြီးတော့ အစ္စလာမ့်အဖွဲ့ကြီး (၅)ဖွဲ့ကလည်း ၀ိုင်းထောက်ခံပြီးတော့ စာတင်ထားပါတယ်။ ဒီတော့ ပိတ်သိမ်းဖျက်သိမ်းမယ့်ကိစ္စကို ဘာမှဆက်မပြောပဲ လောလောဆယ် ဒီအတိုင်းပဲ ခဏထားထားပါတယ်။

မေး – ဒီသင်္ချိုင်းမြေအကြောင်း နည်းနည်းလောက် ပြောပြပေးလို့ရမလားခင်ဗျာ။
ဖြေ – ဒီဘက်မှာ အခုမြင်နေရတဲ့အ၀န်းအ၀ိုင်းကတော့ အာဗစ်ရှားဟိုစိုင်နီသခင့်ကိုလေးစားတဲ့အနေနဲ့လူတွေက ၀ိုင်းပြီး ဒဖွနာ(မြှုပ်နှံ)လိုက်လို့ ကဘာရ်စတာန်ဆိုပြီးဖြစ်သွားတယ်။ မြန်မာလိုဆိုရင်တော့ သင်္ချိုင်းပေါ့။ အမှန်က မွတ်စလင်မ်သင်္ချိုင်းက ဟိုးကမြင်နေရတဲ့ အုတ်တံတိုင်းဘေးလမ်းရဲ့ ဟိုဘက်မှာ။ အရင်တုန်းကတော့ အဲဒီမှာ ဇရပ်တွေရှိတယ်။ ဒါပေမယ့် စစ်အစိုးရလက်ထက်မှာ အဲဒီဘက်ခြမ်းက မွတ်စလင်မ်သင်္ချိုင်းကို ခရစ်ယာန်ဘက်ကိုသွင်းလိုက်တယ်။ ဒီဘက်က စကားဝါဥယျာဉ်ကို သင်္ချိုင်းလို့သတ်မှတ်ပေးလိုက်တာပါ။ စကားဝါဥယျာဉ်ကိုတောင် မွတ်စလင်မ်သင်္ချိုင်းလို့ အပြည့်အ၀ မသတ်မှတ်ပေးဘူး။ အမရပူရ အ.ထ.က(၁) တည်ထောင်တဲ့ ဆရာကြီး ဦးE-ကိုကိုကြီးရဲ့ဇနီး အုတ်ဂူဒေါ်ဒေါ်ရန်အုတ်ဂူရဲ့ ဒီဘက်ကိုပဲပေးတယ်။ ဟိုဘက်ကကျန်တာကို ဗုဒ္ဓဘာသာဆိုပြီးလုပ်လိုက်တယ်။

မေး – ဟုတ်ကဲ့။ မွတ်စလင်မ်သင်္ချိုင်းအနေနဲ့က ဟိုးက မြင်နေရတဲ့ အုတ်တံတိုင်းထိရှိတာလား။
ဖြေ – ဟုတ်ကဲ့ အဲဒီအုတ်တံတိုင်းလုပ်ရင်းနဲ့ တားလို့ ကျွန်တော်တို့ အုတ်တံတိုင်းက အပြီးထိ မရောက်လိုက်ဘူး။ အုတ်တံတိုင်းက အကုန်လုံးပြီးပြီးပြီ။ နည်းနည်းလေးပဲကျန်တော့တာ။ အမှန်ကတော့ တားလိုက်လို့ ဆက်လုပ်လို့မရတော့တာ။

မေး – ဒါဆို မွတ်စလင်မ်သင်္ချိုင်းက အဲဒီအုတ်တံတိုင်းအထိတော့ရှိတယ်ပေါ့။ အုတ်တံတိုင်းရဲ့ ဟိုဘက်က ခရစ်ယာန်သင်္ချိုင်းလား။
ဖြေ – အုတ်တံတိုင်းရဲ့ဟိုဘက်မှာ လမ်းရှိသေးတယ်။ လမ်းရဲ့ဟိုဘက်က ခရစ်ယာန်သင်္ချိုင်းပါ။ ခရစ်ယာန်ရော၊ တရုတ်ရော၊ လူမျိုးစုံရှိတယ်။ အမှန်ကတော့ မွတ်စလင်မ်သင်္ချိုင်းမြေကို ခရစ်ယာန်ကို ပေးလိုက်ပြီး ဒီဘက်က စကားဝါဥယျာဉ်ကို မွတ်စလင်မ်သင်္ချိုင်းအဖြစ်ပေးလိုက်တာ။
မွတ်စလင်မ်အများစုကလည်း ဒီစကားဝါဥယျာဉ်မှာ မြှုတ်နေတော့ ဒီဘက်က ဒါရ်ဂါဟ်လို့ကို မသတ်မှတ်တော့ဘဲ သုဿာန်လိုဖြစ်နေပြီး သူတို့က သုဿာန်လို့သတ်မှတ်လိုက်ကြတာ။ စစ်အစိုးရလက်ထက်မှာပါ။ ဒါက ဘယ်လိုမှလည်း ပြောခွင့်မှ မရှိခဲ့တာ။

မေး – ဟုတ်ကဲ့ ဒါဆို စကားဝါဥယျာဉ်ဆိုတာ အဲဒီနာမည်နဲ့ ဟိုးအရင်ကတည်းကရှိခဲ့တာလား။ ဘယ်လိုသတ်မှတ်ပြီး ဖြစ်လာတာလဲ။
ဖြေ – အဲဒါက ဘိုးတော်ဘုရား လက်ထက်ကတည်းက အာဗစ်ရှာဟိုစိုင်နီသခင်ကြီးက ဒီစကားဝါဥယျာဉ်ထဲမှာလာပြီးတော့ အမလ်ထိုင်(တရားထိုင်)နေတော့ ပုဏ္ဏားဝန်ကနေ စကားဝါဥယျာဉ်ကိုဝယ်ပြီး သခင့်ကိုလှူလိုက်တယ်။ အာဗစ်ရှာဟိုစိုင်နီသခင်က မိန့်တော်မူတယ် “ငါကွယ်လွန်ရင် ဒီစကားဝါပင်အောက်မှာ မြှုပ်နှံပေးပါ”ဆိုပြီးတော့။ ဒါကြောင့် သခင့်တပည့်ဖြစ်တဲ့ ပုဏ္ဏားဝန်မင်းကြီး ဒီစကားဝါမြေကိုဝယ်ပြီး သခင့်ကို ၀ကားဖ်(လှူဒါန်း)လုပ်တယ်။ ကျွန်တော်တို့ အစ္စလာမ်မှာ အခုလို သူတော်စင်များရဲ့ပတ်ဝန်းကျင်အ၀န်းအ၀ိုင်းမှာ ၂၄-နာရီပတ်လုံး ကရုဏာတော် မပြတ်မစဲ ရွာသွန်းတယ်လို့ရှိတယ်လေ။ အဲဒီအကျိုးထူးရလိုတာကြောင့် သခင့်အနားတစ်ဝိုက်မှာ မြှုပ်နှံကြရင်း မွတ်စလင်မ်သင်္ချိုင်းဆိုပြီး ဖြစ်သွားတယ်။

 

မေး – ဒါဆို ဒီသင်္ချိုင်းမြေရော၊ ဒါရ်ဂါဟ်မြေနေရာအပါအ၀င်ဆို စုစုပေါင်း ဧကဘယ်လောက်ကျယ်ဝန်းပါသလဲ။
ဖြေ – ဒီဘက်က ဒါရ်ဂါဟ်ပိုင်ယာမြေ ၃-ဧကကျော်ကျော်၊ သင်္ချိုင်းမြေနေရာက ၃-ဧက ဆိုတော့ အားလုံး ၆-ဧကကျော်ရှိပါတယ်။

 

မေး – ဟုတ်ကဲ့ပါ။ ဒီတော့ ဒီလင်းဇင်းကုန်းသင်္ချိုင်းဆိုတာက သမိုင်းဝင်နေရာလို့သိထားပါတယ်။

ဖြေ။  ဟုတ်ပါတယ်။ အာဗစ်ရှာဟိုစိုင်နီသခင်ကြီးဆိုလည်း သမိုင်းဝင်ပုဂ္ဂိုလ်ပါ။ ဘိုးတော်မင်းတရားကြီးကိုယ်တိုင် သူ့လက်ထက်မှာ အစ္စလာမ်သာသနာနဲ့ပတ်သက်ပြီး သာသနာပိုင်အဖြစ်ခန့်အပ်ခြင်းခံခဲ့ရသူတစ်ဦးပါ။ နောက် ဆရာကြီးဦးနု၊ ဆရာကြီးဦးနုဆိုတာကလည်း သမိုင်းဝင်းပုဂ္ဂိုလ်ကြီးပါ။ အစ္စလာမ်သာသနာရေးရာနဲ့ပတ်သက်တာတွေကို မြန်မာစာပေနဲ့ပြန်ဆိုရေးသားခဲ့ပြီး၊ အစ္စလာမ်သာသနာနဲ့ပတ်သက်တာတွေကို ဘုရင့်ထံ သံတော်ဦးတင်တဲ့ သံတော်ဦးတင်လွှာကျမ်းကိုရေးသားခဲ့ပြီး ဘိုးတော်မင်းတရားကြီးကပေးအပ်တဲ့တာဝန်တွေကို ကျေပွန်စွာထမ်းဆောင်ခဲ့လို့ ရမ္မာဝတီမြို့ဝန်အဖြစ် ခန့်အပ်ခြင်း ခံခဲ့ရသူလည်းဖြစ်တယ်။

မေး – နောက် တစ်ခြား သမိုင်းဝင်ပုဂ္ဂိုလ်ဘယ်သူတွေများ ရှိပါသေးသလဲ။
ဖြေ – အာဗစ်ရှာဟိုစိုင်နီသခင်ကြီးရှိတယ်၊ ဆရာကြီးဦးနုရှိတယ်၊ နောက် ဦးပိန်တံတားကြီးကိုဆောက်လုပ်ခဲ့တဲ့ ဦးပိန်ရှိတယ်။ မြို့ဝန်ဦးဘိုင်ဆပ်ရှိတယ်။ နောက် ဟိုဘက်မှာ သွေးသောက်ကြီးဦးရန်အောင်ရှိတယ်။ နောက် ပုဏ္ဏားဝန်ရှိတယ်။

မေး – ဟုတ်ကဲ့ ပုဏ္ဏားဝန်က အာဗစ်ရှာဟိုင်နီသခင်ကြီးရဲ့ ဘေးကပ်လျက်က ပေါ့နော်။ နောက်ထပ် ဘယ်သူတွေများ မြှုပ်နှံထားတာရှိပါသေးလဲ။
ဖြေ – အထောက်အထားအနေနဲ့က ဒီလောက်တော့ရှိတယ်။ ဒီဘက်ခေတ်မှာဆိုရင် ဦးE-ကိုကိုကြီးတို့ရှိတယ်။

မေး – ဟုတ်ကဲ့ပါ။ ဦးE-ကိုကိုကြီး က ဘယ်လိုပုဂ္ဂိုလ်မျိုးပါလဲ ပြောပြပေးပါလားခင်ဗျာ။
ဖြေ – ဦးE-ကိုကိုကြီးဆိုတာ အမရပူရက အ.ထ.က ကျောင်းကြီးကို စတင်တည်ထောင်ခဲ့သူပါ။ ကျောင်းကြီးဖြစ်ပေါ်လာဖို့ စပြီး ကိုယ်ကျိုးစွန့်အနစ်နာခံပြီး ကြိုးပမ်းခဲ့သူပါ။

မေး – ဟုတ်ကဲ့ အမရပူရ အ.ထ.က ဆိုတာ ဘယ်ကျောင်းကိုပြောတာပါလဲ။ ဒီနားလေးက အ.ထ.က ကိုပြောတာပါလား။ အဲဒီကျောင်းကို ဦးE-ကိုကိုကြီးက စပြီးတည်ထောင်ခဲ့တာပေါ့နော်။
ဖြေ – ဟုတ်ပါတယ်။ အမရပူရ အ.ထ.က(၁)ပါ။ အခုဆို ကျောင်းရဲ့ ရွှေရတုသဘင်အခမ်းအနားမှာ ကျောက်စာလည်းရေးထိုးထားပါတယ်။ ဟိုတုန်းမှာ မန္တလေးမှာ အစ္စလာမ်မီယာနေရှင်နယ်ဆိုပြီး ဆရာကြီးဦးထွန်းတို့က တည်ထောင်လိုက်သေးတယ်။ ဒါကြောင့် ဒီမှာလည်း ဆရာကြီး ဦးE-ကိုကိုကြီးက ဒီကျောင်းကို စတည်ထောင်ခါစတုန်းက နေရှင်နယ်အမျိုးသားကျောင်းဆိုပြီးခေါ်တွင်လိုက်သေးတယ်။ နောက် နေရှင်နယ်တွေမဟုတ်တော့ဘူး အစိုးရအထက်တန်းကျောင်းဆိုပြီးပြောင်းတယ်ဆိုတော့ အစိုးရအထက်တန်းကျောင်း-အမရပူရဆိုပြီးဖြစ်လာတယ်။ အခုတော့ အ.ထ.က(၁) အမရပူရ ဖြစ်သွားပါပြီ။ မြစ်ငယ်က အ.ထ.က(၂)ဖြစ်သွားတာပေါ့။

မေး – ဟုတ်ကဲ့ပါ။ ဒါဆို ခုနက အကြောင်းအရာကို ပြန်မေးကြည့်ချင်ပါတယ်။ ဒီသင်္ချိုင်းမြေပိတ်သိမ်းမှုနဲ့ပတ်သက်ပြီး အခုဆို ဦးလေးတို့က နိုင်ငံတော်သမ္မတကြီးဆီ စာတင်ထားတယ်ပေါ့နော်။
ဖြေ – သမ္မတကြီးဆီတော့ တိုက်ရိုက်မဟုတ်သေးပါဘူး။ ၀န်ကြီးချုပ်တို့၊ ဌာနဆိုင်ရာ အဆင့်ဆင့်တို့ကို ပို့တာတွေကို မိတ္တူအနေနဲ့ ပို့တာပါ။ သမ္မတဆီစာတင်ဖို့ရာက ဒီသမိုင်းဝင်နေရာ ဖျက်သိမ်းမှာကို ကန့်ကွက်တဲ့အနေနဲ့ မေတ္တာရပ်တဲ့အနေနဲ့ လူ ၃၀၀၀ နီးပါးလောက် လက်မှတ်ထိုးထားတယ်။ နောက်ဆုံးအဆင့်မှ သမ္မတကြီးဆီ တင်ရမှာပါ။

မေး – ဒါဆို အခုက သမ္မတဆီထိ မရောက်သေးဘူး။ ၀န်ကြီးအထိ ပို့ထားပြီဆိုတော့ ၀န်ကြီးဆိုတာ သာသနာရေးဝန်ကြီးဌာနလား။
ဖြေ – သာသနာရေးဝန်ကြီးရော၊ မန္တလေးတိုင်းဝန်ကြီးချုပ်ဆီပါ ပို့ထားပါတယ်။

မေး – ဟုတ်ကဲ့ အခုလို စာပို့တဲ့အခါမှာ သူတို့ဘက်က ဘယ်လိုအကြောင်းပြန်စာပေးပါသလဲ။ ဘာမှမပြောပဲ ဒီအတိုင်းပဲ အသာရပ်ထားတာလား။
ဖြေ – အခုကတော့ ဒီအတိုင်းလေးပဲ ဖျက်လည်းမဖျက်ပါဘူး။ ဘာမှလည်းမလုပ်ပါဘူး။ အေးအေးဆေးဆေးလေးပဲ နေကြပါတဲ့ အဲဒီလောက်တော့ဖြေထားတယ်။ အစ္စလာမ့်အဖွဲ့ကြီး ၅-ဖွဲ့ကလည်း ဒီနေရာကိုမဖျက်ဖို့၊ လက်ရှိအခြေအနေအရ
ဖျက်လည်းမဖျက်သင့်ကြောင်း၊ နောက် အစ္စလာမ်သာသနာဟာ သင်္ချိုင်းမြေနဲ့ပတ်သက်ပြီးဖျက်လို့မရတဲ့အကြောင်းတွေရှိတယ်၊ သမိုင်းဝင်နေရာဖြစ်တယ်ဆိုတာ ၀ိုင်းပြီး မေတ္တာရပ်ခံကြတယ်လေ။

မေး – ဟုတ်ကဲ့ ဦးလေးတို့ပြောသလို အေးအေးဆေးဆေးပဲနေပါ မဖျက်ပါဘူးဆိုတာက တရားဝင် စာနဲ့ အကြောင်းပြန်တာလား။ ဒါမှမဟုတ် နှုတ်နဲ့ပဲ ပြောတာလား။
ဖြေ – နှုတ်နဲ့ပဲပြောတာပါ။

မေး – အဲဒီတော့ ဘယ်က ပြန်ပြောတာလဲ။ သာသနာဝန်ကြီးဌာနကလား၊ မန္တလေးတိုင်းဝန်ကြီးဆီကလား။
ဖြေ – သာသနာရေးဝန်ကြီးဌာနကပြောပါတယ်။ တိုင်းဒေသကြီး သာသနာရေးဝန်ကြီးဌာနကပါ။ သာသနာရေးဝန်ကြီးက ဦးသန်းစိုးမြင့်၊ မန္တလေးတိုင်းဝန်ကြီးချုပ်ကတော့ ဦးရဲမြင့်ပါ။

မေး – ဟုတ်ကဲ့ပါ။ သိရသလောက် ဒီ ဒါရ်ဂါဟ်က ၁၉၉၇-အဓိကရုဏ်းဖြစ်စဉ်က မီးရှို့ဖျက်ဆီးခြင်းခံရတယ်လို့သိရတယ်။ အခုပြန်လည်ပြင်ဆင်လာတာ ဒီလောက်အခြေအနေပြန်ရောက်လာတယ်။ အခုလက်ရှိအခြေအနေကနေ ဆက်ပြီးဘာလို့ မပြင်ဖြစ်တာလဲ။ ပြင်ခွင့်မရလို့လား။
ဖြေ – ဟုတ်ပါတယ်။ ပြန်လည်ပြင်ဆင်ခွင့်က တားမြစ်ခံထားရပါတယ်။ ၉၇-ခု ဖျက်ဆီးခံရပြီးခါစက ပြင်ဆင်လိုက်သေးတယ်။ အဲဒီတုန်းကပြင်လိုက်တာ အခုမြင်နေရတဲ့ အခြေအနေပါ။ အဲဒီနောက် ဆက်ပြီးပြင်ဆင်ခွင့်မရပါဘူး။ တားဆီးခံထားရပါတယ်။ အရင် တိုင်းမှူးလက်ထက်ကပါ။ ပြင်ဆင်ခွင့်ရဖို့ တိုင်းမှူးနဲ့တွေ့ဖို့လည်း ကြိုးစားပါတယ်။ တိုင်းမှူးကအတွေ့မခံတာကြောင့် ဒီအတိုင်းလက်စနဲ့ ရပ်ထားရတာပါ။ ပြင်ဆင်ဖို့ခွင့်ပြုတုန်းက တပ်မတော်အစိုးရလက်ထက်က စာနဲ့ပေနဲ့ ခွင့်ပြုတယ်။ တားဆီးတဲ့အခါကျ တရားဝင်စာနဲ့မဟုတ်ပဲ နှုတ်မိန့်နဲ့သာ တားဆီးခဲ့တာပါ။ ဘာမှ မလုပ်ပါနဲ့ဆိုပြီး။ အခု ဒီလက်ထက်ရောက်တော့လည်း စည်ပင်သာယာက ဘာမှ မလုပ်ပါနဲ့ဆိုတာပဲ ပြောတယ်။ ကျွန်တော်တို့ဆီကို အထောက်အထားနဲ့စာနဲ့ပေနဲ့တစ်ခုမှ မတားဘူး။

မေး – ဒါဆို တရားဝင်တားမြစ်ပိတ်ပင်တာမျိုးမရှိဘူးပေါ့။
ဖြေ – ဟုတ်ကဲ့ တရားဝင်အထောက်အထားနဲ့ တားမြစ်တာမျိုးမရှိပါဘူး။ နှုတ်မိန့်နဲ့သာ တားမြစ်တာပါ။ အဲဒါကို ရပ်မထားရင်လည်း အဆိုးပဲဖြစ်မယ်လေ။ ဒါပေမယ့် အတတ်နိုင်ဆုံးဖြစ်အောင်လို့တော့ ကြိုးစားနေကြပါတယ်။ အခုက ဒီဘက်ခေတ်မှာ ဒီမိုကရေစီအခွင့်အလမ်းလည်း နည်းနည်းပွင့်လန်းလာပြီဆိုတော့ အခြေအနေတော့ နည်းနည်းကောင်းလာပါပြီ။

မေး – ဟုတ်ကဲ့ပါ။ ဒါဆို ဒီမှာက လုံးဝသဂြိုဟ်လို့ မရတော့ဘူးလား။ ဘယ်မှာ သွားပြီး မြှုပ်နှံရသလဲ။
ဖြေ – အမရပူရကလူတွေက ဒီကနေဆိုရင် မြို့နယ်(၄)ခုကိုဖြတ်ပြီး ကြာနီကန်သုဿာန်ထိ သွားရောက်သဂြိုဟ်ရပါတယ်။ အရင်ကလိုဆိုရင်တော့ မြို့နယ်တစ်ခုနဲ့တစ်ခု အလောင်းတောင်သယ်လို့ရတာမဟုတ်ဘူး။ အခုတော့ မြို့နယ်(၄)မြို့နယ်ကိုဖြတ်၊ ရံဖန်ရံခါ VIP လာတဲ့အခါဆို မြို့နယ် (၅)ခုကိုဖြတ်ပြီး ကြာနီကန်သုဿာန်အထိ သွားရပါတယ်။

မေး – ဒါဆို အမရပူရက မန္တလေးမြို့ရဲ့တောင်ဘက်ထိပ်မှာဆိုတော့ မန္တလေးမြို့ရဲ့မြောက်ဘက်ထိပ်ထိ သွားရောက်ရတာပေါ့။
ဖြေ – ဟုတ်ပါတယ်။ လိုက်ပို့တဲ့သူတွေအတွက် ငှားရတဲ့ ကားခကိုက ကားတစ်စီးကို လေးသောင်းခွဲ ငါးသောင်းပေးရပါတယ်။

မေး – ဟုတ်ကဲ့ မေးခွန်းတစ်ခုမေးပါရစေ။ ဒီ အမရပူရ လင်းဇင်းကုန်းသင်္ချိုင်းတစ်ဝိုက်မှာလည်း ဘုန်းတော်ကြီးကျောင်းတွေ အများကြီးရှိတယ်လေ။ အဲဒီကဘုန်းတော်ကြီးတွေနဲ့ရော ဘယ်လိုဆက်သွယ်မှုမျိုးရှိပါသလဲ။
ဖြေ – ဟုတ်ပါတယ်။ ဒီနားတစ်ဝိုက်မှာက ဘုန်းတော်ကြီးကျောင်းတွေက ပတ်ပတ်လည်ပါပဲ။ ဒီမဟာဂန္ဓာရုံကျောင်းတိုက်ကြီးကို စတင်တည်ထောင်ခဲ့တဲ့ ဆရာတော် ဦးဇန္နကသာရာဘိဝံသ ဆိုရင်လည်း ရာပြည့်ခလီဖွှဟ် ဦးမောင်မောင်ကြီး ရှိစဉ်ကတည်းက အလွန်ကို ခင်မင်ရင်းနှီးခဲ့ကြသူတွေပါ။ နောက် အခုဆို တောင်လေးလုံးတိုက်က ဆရာတော်ဦးပညာဇောတ(ကိုပညာ-အမရပူရ)ဆိုရင်လည်း ဦးပညာရေးတဲ့စာအုပ်မှာ ဒီဒါရ်ဂါဟ်အကြောင်းကို ထည့်ရေးခဲ့ပါတယ်။ ဒီအနားဝန်းကျင်မှာရှိတဲ့ဘုန်းတော်ကြီးကျောင်းက ဘုန်းတော်ကြီးတွေက နားလည်ကြပါတယ်။ ဘုန်းတော်ကြီးတွေနဲ့လည်း ခင်မင်ရင်းနှီးကြတယ်။ တစ်ခါတစ်လေမှာ ခင်မင်နေတဲ့ဘုန်းတော်ကြီးကျောင်းတွေကို ဆွမ်းချိုင့်ပို့ပေးတာမျိုးလည်းရှိပါတယ်။ ဒီအမရပူမှာနေထိုင်ကြသူတွေက ဘာသာတရားအချင်းချင်း အပြန်အလှန်လေးစားမှုရှိကြပါတယ်။

မေး – ဟုတ်ကဲ့ ဒါဆို နောက်ဆုံးအနေနဲ့ တစ်ခုမေးပါရစေ။ ခုနက ဦးလေးပြောတယ် ဒီအမရပူရမှာ ဘာသာအချင်းချင်း အပြန်အလှန်လေးစားမှုရှိတယ်လို့ပြောတယ်။ ၁၉၉၇-ခု အဓိကရုဏ်းမှာ ဒီဒါရ်ဂါဟ်မီးရှို့ဖျက်ဆီးတာခံရတယ်။ အဲဒါကျတော့ဦးလေး ဘယ်လိုများပြောချင်ပါသလဲ။
ဖြေ – ဟုတ်ပါတယ်။ အဲဒီတုန်းက မီးရှို့ဖျက်ဆီးခြင်းခံရတာကလည်း။ ကျွန်တော်တို့ပြောနိုင်ပါတယ်။ ဒီအနီးအနားတစ်ဝိုက်က သူတွေမဟုတ်ပါဘူး။ ဒီနားတစ်ဝိုက် ဘုန်းတော်ကြီးကျောင်းက ၀ါကြီးတဲ့ဘုန်းတော်ကြီးက ကိုယ့်ကျောင်းက ရဟန်းသံဃာ၊ ဦးဇင်းတွေကို ထိန်းသိမ်းနိုင်စွမ်းရှိကြပါတယ်။ ဒါကြောင့် ဒီအနီးအနားတစ်ဝိုက်က မဟုတ်ဘူးဆိုတာ ပြောလို့ရပါတယ်။

မေး – ဟုတ်ကဲ့ပါ။ အခုလိုပြောပြပေးတာတွေအတွက် ကျေးဇူးအများကြီးတင်ပါတယ်။ ပြီးခဲ့တဲ့လက ကြားသိရတဲ့သတင်းအရ လင်းဇင်းကုန်းသုဿာန်ပိတ်သိမ်းဖျက်သိမ်းမယ်ဆိုတော့ ဖျက်သိမ်းခဲ့ရင်တောင် မှတ်တမ်းအထောက်အထားသမိုင်းကျန်ရှိစေဖို့ရယ်၊ လူငယ်အများစုကဒီသမိုင်းကြောင်းကို မသိကြတော့ဘူး။ ဒါကြောင့် လူငယ်တွေလည်း အသိရစေဖို့ မေးမြန်းရတာဖြစ်ပါတယ်။
ဖြေ – ဦးလေးတို့ကလည်း ၀မ်းသာပါတယ်။ ဒါက အာဗစ်ရှားဟ်ဟိုစိုင်နီသခင်ရဲ့ အတ္ထုပ္ပတ္တိစာအုပ်လေးပါ။ ဒါရ်ဂါဟ်နဲ့ပတ်သက်ပြီးလည်း သိနိုင်ပါတယ်။

 

= = = = = = = = = = = = = = = = =

ကိုပညာ(အမရပူရ)အမည်ခံ တောင်လေးလုံးကျောင်းတိုက် ဆရာတော်ဦးပညာဇောတ၏ “တောင်သမန်ဝန်းကျင် သမိုင်းဝင်နေရာများ” (နောက်ဆက်တွဲ) ပထမအကြိမ်၊ ရန်ကုန်မြို့၊ ဖေဖော်ဝါရီ-၁၉၉၆ (စာမျက်နှာ-၇၄-၇၅)တွင်ဖော်ပြချက်
“ဒါရ်ဂါဟ်တော်”
ဒါရ်ဂါဟ်တော်သည် သခင်ကြီး အာဗျစ်ရှာဟိုစိုင်နီဒ ဂူဗိမာန်ဖြစ်သည်။ မယ်ဇယ်တန်းမြောက်ဘက် ဘုရားနီဘုရားအနောက်ဘက် အိုးတော်ရပ်ကွက် မှိုက်စုရပ်၏ အရှေ့စွန်း လင်းဇင်းကုန်းသုဿာန်မြေတွင် တည်ရှိသည်။
အာဗျစ်ရှာဟိုစိုင်နီသည် သက္ကရာဇ် ၁၁၃၇-ခုနှစ်တွင် ဖွားမြင်သည်။
အမရပူရနေပြည်တော်သို့ (၁၉)နှစ်သားအရွယ် (၁၁၅၆-ခု)ရောက်ရှိသည်။
အသက်(၃၉)နှစ် သက္ကရာဇ် ၁၁၇၆-ခုတွင် ဘ၀တစ်ပါးပြောင်းကြွသည်။
အမရပူရဘိုးတော်မင်းတရားလက်ထက် နှစ်ပေါင်း(၂၀)တိတိ အစ္စလာမ်သာသနာပိုင်အဖြစ် ခန့်အပ်ထမ်းဆောင်ခဲ့သည်။
နှစ်ပေါင်း (၂၀)အတွင်း အစ္စလာမ်ကျမ်းပေါင်း (၃၀)ရေးသားပြုစုခဲ့သည်။ မိုရီးဒ်တပည့်မတစ်ဦးဒ (မိုင်ယစ်တ်) အသုဘအခမ်းအနားတွင် လိုက်ပါပို့ဆောင်ရာ ယခုဒါရ်ဂါဟ် တည်ရှိသော ပတ်ဝန်းကျင်တွင် ဥယျာဉ်များစိုက်ပျိုးထားသည်ကို တွေ့ရှိလေသည်။ တစ်ခုသော စကားဝါဥယျာဉ်ထဲတွင် သခင်နေထိုင်နေတော်မူရာ၊ အေးဆေးငြိမ်းချမ်းလှသဖြင့် ‘ငါကွယ်လွန်လျှင် ဤနေရာတွင် (ဒဖွနာ)သဂြိုဟ်ခြင်းပြုရမည်’ဟု (၀စွီယတ်)မှာထားခြင် ပြုတော်မူ၏။
ပုဏ္ဏားဝန်မင်းက ထိုဥယျာဉ်မြေကို ၀ယ်ယူ၍ သခင့်နာမည်ဖြင့်လှူ၏။ ကွယ်လွန်သောအခါ ထိုနေရာ၌ မြှုပ်နှံသည်။ ဒါရ်ဂါဟ်၏အဓိပ္ပါယ်မှာ‘ကွန်းခိုရာ’ဟု အဓိပ္ပါယ်ရသည်။

x x x x x x x

အထက်ပါ ဖော်ပြချက်ကို ယင်းသမိုင်းစာအုပ် စာမျက်နှာ (၁၄၈)တွင် သမိုင်းပါမောက္ခ ဒေါက်တာသန်းထွန်း၏ အင်္ဂလိပ်ဘာသာပြန်ဆိုချက်
“THE DARAGA DAW”
Arbhisha Hussaini’s tomb is commonly called the Daraga Daw. (Durgah is Persian meaning a royal court; with an extended meaning in India it is used to mean a shrine of a Mohammedian saint for prayer.) It is located on the north of Mezabin (Madhuca longifolia) avenue, west of “Red Pagoda” (Shwe Mutthaw Thein Hpaya), east of the wards called O-daw (Royal Potters) and Hmite Su (People engaed in reclaiming gold dust from the refuses collected from pagoda precincts and goldsmith’s workshop) and in the Lin Zin Gon cemetery.
Arbhisha Hussaini was born 1776 and came at the age of nineteen to Amarapura in 1795. He died at the age of only thirty nine in 1815 after serving the king as the leader of the Islamic people for twenty years.
He had written thirty books on Mohaedanism. At a funeral of a female devotee or Moree he came to sit under a Zagawa (Michelia champaca) tree and as he was so pleased with that place in the garden he said:
“I wish a would be buried here”. Surely his wish was fulfilled and a Durgah was built in his memory at his tomb under the Zagawa tree that he had chosen.
The Ponna Wun (Officer – in – Charge of Brahmins) bought the gardenand gave it to him before he died.

ဒါရ်ဂါဟ်တော် အုပ်ချုပ်ရေးအဖွဲ့မှ အဖွဲ့ဝင်များအတွက် ထုတ်ဝေသည့် “ဘိုးတော်ဦးဝိုင်း(ဗဒုံမင်း)လက်ထက် အစ္စလာမ်သာသနာပိုင်ဆရာတော်ဘုရားဘွဲ့ရ ဟသွရတ်-စိုက်ယစ်ဒ်-ခါဂျာ-ဟာဖွစ်ဇ်-မို့ဟမ္မဒ် ရှရီးဖ် အာဗစ်ဒ်ရှာဟ် ဟို့စိုင်နီ အတ္ထုပ္ပတ္တိအကျဉ်း” စာအုပ် (စာမျက်နှာ ၃၄-၃၅-၃၆) မှ ကူးယူဖော်ပြပါသည်။