News @ M-Media

Tag: China

  • ဖေဖော်၀ါရီ ၁၇ ရက်နေ့ နိုင်ငံတကာသတင်းများ

    ဖေဖော်၀ါရီ ၁၇ ရက်နေ့ နိုင်ငံတကာသတင်းများ

    M-Media

    တရုတ်သမ္မတ ရှီကျင့်ဖျင်

    မလေးရှားတွင် ဟာလာလ်လိုဂို အလွဲသုံးစားပြုမှု ဖြစ်ပွား
    ———————–
    မလေးရှား စားသောက်ကုန်လုပ်ငန်းတစ်ခုဖြစ်တဲ့ Shake and Bake Cafe ဟာ သူတို့ထုတ်တဲ့ အသားညှပ်ပေါင်မုန့်တွေမှာ အစိုးရရဲ့ ခွင့်ပြုချက်မရှိဘဲ ဟာလာလ်လိုဂိုတွေ အသုံးပြုခဲ့တာကြောင့် တရားစွဲဆိုခြင်း ခံထားရပါတယ်။

    မလေးရှားရဲ့ အကြီးဆုံးတက္ကသိုလ် Universiti Malaya က KK ကုန်စုံဆိုင်တွေမှာ ရောင်းချတဲ့ အသားညှပ်ပေါင်မုန်တွေကနေတစ်ဆင့် ဒီကိစ္စကို သိရှိသွားတာဖြစ်ပါတယ်။ တူနာ၊ အာလူး၊ ကြက်သားတို့အပါအ၀င် အသားညှပ်ပေါင်မုန့် အမျိုးပေါင်း ၃၆၀ ကျော်လောက်ကို ဒီကုမ္ပဏီက ထုတ်လုပ်ပါတယ်။ ကုမ္ပဏီပိုင်ရှင်ကတော့ သူတို့ရဲ့ ထုတ်ကုန်တွေမှာ ဟာလာလ်မဟုတ်တဲ့ ပစ္စည်းတွေ ဘာမှ အသုံးမပြုထားတာကြောင့် အပြစ်မရှိဘူးလို့ တရားရုံးမှာ လျှောက်လှဲခဲ့ပါတယ်။

    Ref: CNA

    တရုတ်သမ္မတ ရှီကျင့်ဖျင် စီးပွားရေးလုပ်ငန်းရှင်များနှင့် တွေ့ဆုံ
    ———————
    နိုင်ငံစီးပွားရေး ကျဆင်းနေပြီး အမေရိကန်နဲ့ ကုန်သွယ်ရေးတင်းမာမှုတွေ ပိုဆိုးလာနိုင်ချေ ရှိနေတဲ့အချိန် တရုတ်သမ္မတ ရှီကျင့်ဖျင်ဟာ ပြည်တွင်းစီးပွားရေးလုပ်ငန်းရှင်တွေနဲ့ ဖေဖော်၀ါရီ ၁၇ ရက်နေ့မှာ တွေ့ဆုံဆွေးနွေးခဲ့ပါတယ်။ တရုတ်အစိုးရနဲ့ အဆင်သိပ်မပြေတဲ့ Alibaba ပိုင်ရှင်ဂျက်မာ၊ Huawei ပိုင်ရှင် ရန်ကျန်ဖေး၊ Xiaomi သူဌေး လီဂျွန်၊ BYD ပိုင်ရှင် ၀မ်ချွမ်ဖူးတို့ အပါအ၀င် ထိပ်တန်းလုပ်ငန်းရှင် တော်တော်များများ တက်ရောက်ခဲ့ပါတယ်။ တရုတ်လုပ်ငန်းရှင်တွေအနေနဲ့ ပြည်တွင်း၊ ပြည်ပမှာ လုပ်ငန်းတွေ ချဲ့ထွင်ကြဖို့ ရှီက ပြောကြားခဲ့ပြီး အသေးစိတ်အချက်အလက်တွေကို ထုတ်ပြန်ခြင်း မရှိပါဘူး။

    Ref: CNA

    အိန္ဒိယရထားဘူတာတွင် လူအုပ်တိုး၀ှေ့၍ သေဆုံးမှုဖြစ်
    ————————–
    နိုင်ငံမြောက်ပိုင်းမှာ ၁၂ နှစ်တစ်ကြိမ် ပြုလုပ်တဲ့ Kumbh Mela ဘုရားပွဲကို သွားဖို့အတွက် နယူးဒေလီမြို့က ဘူတာရုံမှာ ရထားပေါ်တက်ဖို့ တိုး၀ှေ့ရာကနေ လူအုပ်ပြိုမှုတစ်ခု ဖေဖော်၀ါရီ ၁၅ ရက်နေ့မှာ ဖြစ်ပွားခဲ့ပြီး အနည်းဆုံး ၁၅ ဦး သေဆုံးခဲ့တယ်လို့ သိရပါတယ်။ ဘုရားပွဲကို နိုင်ငံတစ်၀ှမ်းက လူပေါင်းသန်းချီ သွားရောက်မှာပါ။ ပြီးခဲ့တဲ့လကလည်း ယမုံနာနဲ့ ဂင်္ဂါမြစ်မှာပြုလုပ်ပြီး လူသန်းချီ ပါ၀င်တဲ့ ဘုရားပွဲတော်အတွင်း လူအုပ်တိုး၀ှေ့မှု ဖြစ်ပွားတာကြောင့် အနည်းဆုံး လူ ၃၀ လောက် သေဆုံးခဲ့ပါတယ်။

    Ref: CNA

  • ဒီဇင်ဘာ ၂၇ ရက်နေ့ နိုင်ငံတကာသတင်းများ

    ဒီဇင်ဘာ ၂၇ ရက်နေ့ နိုင်ငံတကာသတင်းများ

    M-Media

    တောင်ကိုရီးယားတွင် ယာယီသမ္မတ ဖြုတ်ချခံရ
    —————
    ယာသီသမ္မတ ဟန်ဒက်ဆူးကို တောင်ကိုရီးယား လွှတ်တော်က အယုံအကြည်မရှိအဆို တင်သွင်းမဲခွဲပြီး ဒီကနေ့မှာ ဖြုတ်ချလိုက်ပါတယ်။ အခြေခံဥပဒေခုံရုံးက လစ်လပ်နေတဲ့ တရားသူကြီး ၃ ဦးနေရာကို ခန့်အပ်ဖို့ ယာယီသမ္မတက နှောင့်နှေးနေတာကြောင့် ဒီလို ဖြုတ်ချခံလိုက်ရတာဖြစ်ပါတယ်။ လက်ရှိမှာ ဘဏ္ဏာရေး၀န်ကြီး ချွိုင်ဆန်မော့က်က ယာယီသမ္မတ ဖြစ်လာမှာပါ။ တောင်ကိုရီးယားသမ္မတ ယွန်ဆက်ယိုလည်း မာရှယ်လော ကြေငြာမှုအတွက် ပြီးခဲ့တဲ့ ၂ ပတ်မှာ လွှတ်တော်ရဲ့ ဖြုတ်ချမှုကို ခံခဲ့ရပါတယ်။

    အသက်ရှုလမ်းကြောင်းဆိုင်ရာ ရောဂါစောင့်ကြည့်မှုကို တရုတ်က တိုးမြှင့်လုပ်ဆောင်
    ———–
    ဒီဇင်ဘာလ၀က်ကနေစပြီး အဆုပ်ရောင်ရောဂါတစ်မျိုး ကူးစက်ဖြစ်ပွားမှု မြင့်တက်လာခဲ့တဲ့နောက် အနီးကပ် စောင့်ကြည့်လေ့လာရေးစနစ်တစ်ခုကို အကောင်အထည်ဖော် ဆောင်ရွက်နေပြီလို့ တရုတ်အာဏာပိုင်တွေက ထုတ်ပြန်ပါတယ်။ ကူးစက်မှု ဘယ်လောက်ရှိနေပြီဆိုတာ မပြောသေးဘဲ ဆောင်းရာသီနဲ့ နွေဦးရာသီတွေမှာ ပိုမိုမြင့်တက်လာနိုင်တယ်လို့ အာဏာပိုင်တွေက ခန့်မှန်းထားပါတယ်။

    ရုရှားလက်ချက်ကြောင့် အဇာဘိုင်ဂျန်လေယာဥ်ပျက်ကျ
    ———————-
    ကာဇက်စတန်နိုင်ငံမှာ ဗုဒ္ဓဟူးနေ့က ပျက်ကျခဲ့တဲ့ အဇာဘိုင်ဂျန် ခရီးသည်တင်လေယာဥ်ဟာ ရုရှားရဲ့ ဒုံးကျည်နဲ့ ပစ်ချမှုကို ခံလိုက်ရတာ ဖြစ်နိုင်တယ်လို့ အဇာဘိုင်ဂျန်နဲ့ အမေရိကန်အာဏာပိုင်တွေက ထုတ်ပြန်ပါတယ်။ ဒီပျက်ကျမှုမှာ ခရီးသည် ၃၈ ဦး သေဆုံးခဲ့ပါတယ်။ ယူကရိန်းဒရုန်းတွေ လှုပ်ရှားနေတဲ့ နေရာအနီးကနေ ပျံသန်းတာကြောင့် မှားယွင်းပစ်ခတ်ခံရတာ ဖြစ်မယ်လို့ သုံးသပ်မှုတွေရှိနေပါတယ်။ ရုရှားကတော့ စုံစမ်းစစ်ဆေးမှုမပြီးခင် မစွပ်စွဲဖို့ သတိပေးထားပါတယ်။

    Ref: CNA

  • အောက်တိုဘာ ၁၅ ရက် နိုင်ငံတကာသတင်းများ

    အောက်တိုဘာ ၁၅ ရက် နိုင်ငံတကာသတင်းများ

    M-Media

    (ဓာတ်ပုံ – တောင်တက်သမိုင်းတွင် စံချိန်သစ်ရခဲ့သည့် နီပေါနိုင်ငံသား ရှာပါရ်)

    တရုတ်၏ ထိုင်၀မ်ပေါ်လစီ မပြောင်းလဲသေး
    ———-
    ထိုင်၀မ်နဲ့ ငြိမ်းချမ်းစွာပေါင်းစည်းရေး လိုလားပေမယ့် လိုအပ်ရင် စစ်အင်အားသုံးသိမ်းပိုက်မယ့် မိမိတို့ရဲ့ မူ၀ါဒ ပြောင်းလဲမှု ရှိမှာမဟုတ်ဘူးလို့ ထိုင်၀မ်းကျွန်းကို ၀ိုင်းပတ်ပြီး ၄ ကြိမ်မြောက်ပြုလုပ်တဲ့ စစ်ရေးလေ့ကျင်မှုအပြီးမှာ တရုတ်နိုင်ငံက ထုတ်ပြန်ပါတယ်။ မေလမှာ အာဏာရလာတဲ့ ထိုင်၀မ်သမ္မတ လိုင်ချင်တေဟာ ထိုင်၀မ် လွတ်မြောက်ရေး ပိုမိုပြောဆိုလာပြီး တရုတ်ကတော့ ခွဲထွက်ရေးသမားအဖြစ် တံဆိပ်ကပ်ပါတယ်။

    တောင်တက်သမိုင်းမှာ စံချိန်တင်တဲ့ နီပေါနိုင်ငံသား
    —————
    နီပေါ နိုင်ငံသား အသက် ၁၈ နှစ်အရွယ် နီမာရင်ဂျီ ရှာရ်ပါဟာ နီပေါ၊ ပါကစ္စတန်၊ တိဘတ်နဲ့ အိန္ဒိယနိုင်ငံတို့က မီတာ ၈၀၀၀ မြင့်တဲ့ တောင်ပေါင်း ၁၄ ခုကို အောင်မြင်စွာ တက်ရောက်နိုင်တဲ့ ကမ္ဘာ့အသက်အငယ်ဆုံး လူသားအဖြစ် မှတ်တမ်း၀င်ခဲ့ပါတယ်။ တောင်တက်မိသားစုမျိုးက ဆင်းသက်လာတဲ့ ရှာရ်ပါဟာ လွန်ခဲ့တဲ့ ၂ နှစ်ကမှ တောင်တက်လောကထဲ ၀င်ရောက်လာခဲ့ပြီး အသက် ၁၆ နှစ်အရွယ်မှာကတည်းက အမြင့်ဆုံး တောင်တွေကို တက်နိုင်ခဲ့သူ ဖြစ်ပါတယ်။

    နိုင်ငံခြားသားမျှော်ပြီး အိမ်ယာစီမံကိန်းထပ်လုပ်မယ့် ဘန်ကောက်
    —————-
    ၂၀၂၅ နှစ်လယ်ပိုင်းကစပြီး ဘန်ကောက်မြို့လယ်ကောင်မှာ ဇိမ်ခံကွန်ဒိုစီမံကိန်း ၄ ခုထက်မနည်း ထိုင်းအစိုးရက ထပ်လုပ်ဖို့ ရှိနေပါတယ်။ ထိုင်းနိုင်ငံမှာ အိမ်ယာစျေးကွက် ကျဆင်းနေပေမယ့် နိုင်ငံခြားသားတွေရဲ့ ၀ယ်မှုနှုန်းက မြင့်တက်လာခဲ့ပြီး အထူးသဖြင့် ထိုင်၀မ်နဲ့ တရုတ်နိုင်ငံသားတွေ အဓိက ၀ယ်ယူတာဖြစ်ပါတယ်။ ၂၀၂၅ ခုနှစ်မှာ နိုင်ငံခြားသား၀ယ်ယူသူတွေကို အဓိကစွဲဆောင်နိုင်ဖို့ ထိုင်းအစိုးရက မျှော်လင့်နေပါတယ်။


  • စက်တင်ဘာ ၂၂ ရက်နေ့ နိုင်ငံတကာသတင်းများ

    စက်တင်ဘာ ၂၂ ရက်နေ့ နိုင်ငံတကာသတင်းများ

    M-Media

    (ဓာတ်ပုံ – အင်ဒိုနီးရှားမှ ကမ္ဘာ့အမြင့်ဆုံး ခရစ်တော်ရုပ်ထု)

    အင်ဒိုနီးရှားတွင် ကမ္ဘာ့အမြင့်ဆုံး ခရစ်တော်ရုပ်တု ဖွင့်လှစ်
    ———–
    မြောက်ဆူမားတြားပြည်နယ်က နာမည်ကျော် တိုဘာကန် တောင်စောင်းမှာ ၆၁ မီတာမြင့်တဲ့ ယေရှုခရစ်ရုပ်ထုကို စက်တင်ဘာ ၁၉ ရက်နေ့မှာ ဖွင့်လှစ်ခဲ့ပါတယ်။ မြောက်ဆူမားတြားဟာ ခရစ်ယာန်ဘာသာ၀င် အများစုရှိရာ ဒေသဖြစ်ပြီး ဒီရုပ်တုကို နှစ်ချီ ဆောက်လုပ်ခဲ့ရတာပါ။ ကမ္ဘာပေါ်က အမြင့်ဆုံး ခရစ်တော်ရုပ်တုအဖြစ်လည်း မှတ်တမ်း၀င်ပါတယ်။

    ထိုင်းစစ်တပ်ခေါင်းဆောင်များ အပြောင်းအလဲလုပ်မည်
    ———–
    ထိုင်းစစ်တပ်က အရာရှိအရာခံ စုစုပေါင်း ၈၀၈ ဦးကို အပြောင်းအလဲလုပ်မှာ ဖြစ်ပြီး ဒီစာရင်းကို ထိုင်း၀န်ကြီးချုပ်ရုံးက နန်တော်ကို တင်သွင်းထားကာ ဘုရင်အတည်ပြုရင် အောက်တိုဘာ ၁ ရက်နေ့မှာ စတင် အသက်၀င်မှာဖြစ်ပါတယ်။ အခုပြောင်းအလဲမှာ လကုန်ပင်စင်ယူတော့မယ့် ထိုင်းကြည်းတပ်ဗိုလ်ချုပ်နဲ့ ရေတပ်ဗိုလ်ချုပ်နေရာကို အစားထိုးမှုလည်း ပါ၀င်မှာ ဖြစ်ပါတယ်။

    တရုတ်ဆော့ဖ်၀ဲသုံးကားများကို အမေရိကန်ပိတ်မည်
    ————-
    တရုတ်ထုတ်ဆော့ဖ်၀ဲတွေ ထည့်သွင်းထားတဲ့ ကားတွေအားလုံးကို တင်သွင်းခွင့် ပိတ်ပင်မယ့် အမိန့်တစ်ခုကို အမေရိကန်က နောက်တစ်ပတ်မှာ ထုတ်ပြန်ကြေငြာဖို့ ရှိပါတယ်။ အမေရိကန်ယာဥ်မောင်းတွေရဲ့ အချက်အလက်တွေကို တရုတ်ကုမ္ပဏီတွေက ခိုးယူမှာ စိုးရိမ်တာကြောင့်ဖြစ်ပြီး ဒါဟာ နိုင်ငံတော် လုံခြုံရေးကိုပါ ထိခိုက်လာနိုင်တယ်လို့လည်း ဆိုပါတယ်။ အမေရိကန်ဟာ တရုတ်ထုတ် လျှပ်စစ်ကားတွေကို အခွန်တိုးကောက်ဖို့လည်း အမိန့်ထုတ်ထားပါတယ်။

    Ref: CNA, Jakarta Post


  • စက်တင်ဘာ ၂၀ ရက်နေ့ သတင်းတို

    စက်တင်ဘာ ၂၀ ရက်နေ့ သတင်းတို

    M-Media

    အာဆီယံ ၄ နိုင်ငံ ဓာတ်အားလိုင်းမှ စင်ကာပူက ဓာတ်အားထပ်တိုးယူ
    —————
    လာအို-ထိုင်း-မလေးရှား-စင်ကာပူ မဟာဓာတ်အားလိုင်းကနေ ဓာတ်အား မီဂါ၀ပ် ၁၀၀ ကို စင်ကာပူက ထပ်တိုးယူခဲ့ပြီး စုစုပေါင်း မီဂါ၀ပ် ၂၀၀ ရယူ သုံးစွဲနေပြီဖြစ်ပါတယ်။ ၂၀၂၂ ခုနှစ် ဇွန်လ လာအိုကနေ မီဂါ၀ပ် ၁၀၀ စင်ကာပူက စယူတဲ့အချိန် ဒီစီမံကိန်းကို စတင်ခဲ့တာပါ။ လက်ရှိမှာ မလေးရှားကလည်း ဒီမဟာဓာတ်အားလိုင်းကနေ ရယူသုံးစွဲနေပြီး နောက်ပိုင်းမှာ အာဆီယံ ၁၀ နိုင်ငံစလုံးအထိ ချိတ်ဆက်သွားဖို့ ရှိနေပါတယ်။

    ဂေါ်ဖီရှားပါးမှုကြောင့် ကိုရီယားကင်ချီလုပ်ငန်း ထိခိုက်လာ
    ———
    ကင်ချီရဲ့ အဓိကပါ၀င်ပစ္စည်းဖြစ်တဲ့ ဂေါ်ဖီဟာ တောင်ကိုရီးယား အပူလှိုင်းကြောင့် ပြီးခဲ့တဲ့နှစ်ကထက်စာရင် ၇၀ ရာခိုင်နှုန်းနီးပါး စျေးတက်လာပြီး ကမ္ဘာကျော် ကင်ချီထုတ်လုပ်မှုလုပ်ငန်းပါ ထိခိုက်လာပါတယ်။ ဒီလိုအနေအထားအတိုင်း ဆက်သွားရင် ၂၀၉၀ ခုနှစ်အရောက် တောင်းကိုရီးယားမှာ ဂေါ်ဖီလုံး၀ စိုက်လို့ရတော့မှာ မဟုတ်တဲ့အတွက် ပညာရှင်တွေက နည်းလမ်းသစ်တွေရှာဖွေကာ ကင်ချီလုပ်ငန်းကို ထိန်းသိမ်းဖို့ ကြိုးပမ်းနေကြပါတယ်။

    တရုတ်ပြည်တွင် ဂျပန်လူမျိုးများ စိုးရိမ်စိတ်မြင့်တက်လာ
    ———–
    ရှန်ဇန်းမြို့မှာ ပြီးခဲ့တဲ့ရက်ပိုင်းက ၁၀ နှစ်အရွယ် ဂျပန်ကလေးငယ် ဓားထိုးသတ်ဖြတ်ခံရပြီးနောက်ပိုင်း တရုတ်မှာရှိနေတဲ့ ဂျပန်လုပ်ငန်းတွေက သူတို့ရဲ့ ဂျပန်၀န်ထမ်းတွေနဲ့ မိသားစုတွေကို နေရပ်ပြန်ဖို့ ရွေးချယ်မှုတွေ ပေးလာပါတယ်။ တရုတ်မှာ ဂျပန်မုန်းတီးရေးစိတ်ဓာတ်ဟာ အခုအချိန်အထိ ကျန်ရှိနေသေးပြီး ပြီးခဲ့တဲ့ လအနည်းငယ်အတွင်း တိုက်ခိုက်ခံရတဲ့ ဂျပန်နိုင်ငံသား အနည်းဆုံး ၂ ဦး ရှိပါတယ်။

    (ဓာတ်ပုံ- တောင်ကိုရီးယား ဂေါ်ဖီ)