Tag: India

ဇန်န၀ါရီ ၂၁၊ ၂၀၂၄

M-Media 

-မြန်မာဖက်က ၀င်လာတာတွေကို တားမြစ်ဖို့အတွက် နယ်စပ်ကို ခြံစည်းရိုးကာမယ်လို့ အိန္ဒိယက ပြောပါတယ်။ 

အိန္ဒိယနဲ့ မြန်မာတို့ဟာ ကီလိုမီတာ ၁၂၀၀ ကျော်လောက် နယ်မြေခြင်း ထိစပ်နေကြတာပါ။ ၂၀၂၁ ခုနှစ် စစ်တပ်က အာဏာသိမ်းပြီးနောက်ပိုင်း ဖြစ်ပေါ်လာတဲ့ မတည်ငြိမ်မှုတွေကြောင့် မြန်မာနိုင်ငံကနေ အိန္ဒိယဖက်ကို ထွက်ပြေးသူတွေ ပိုမိုများပြားလာတာပါ။  

တိုင်းရင်းသား မဟာမိတ်တပ်ဖွဲ့တွေရဲ့ အောက်တိုဘာလက စတင်တဲ့ ထိုးစစ်ကြောင့် ရာနဲ့ချီတဲ့ မြန်မာစစ်သားတွေပါ အိန္ဒိယဖက် ထွက်ပြေးခဲ့ရပါတယ်။ 

နိုင်ငံမြောက်ပိုင်း အာသံပြည်နယ်က တာ၀န်ရှိသူတွေနဲ့ စနနေ့တွေ့ဆုံမှုအတွင်း အိန္ဒိယ ပြည်ထဲရေး၀န်ကြီး အေမစ်ရှားက မြန်မာနဲ့ ကပ်နေတဲ့နယ်စပ်ကို ခြံစည်းရိုး ကာသွားမယ်လို့ ပြောကြားခဲ့ပါတယ်။ 

“အိန္ဒိယမြန်မာ နယ်စပ်က ပွင့်နေတဲ့ နေရာအားလုံးကို ခြံစည်းရိုးခတ်ဖို့ အစိုးရက ဆုံးဖြတ်ထားပါတယ်”

ဒီလုပ်ငန်း ဘယ်တော့စတင်မယ်၊ ဘယ်လောက်ကြာမယ်ဆိုတဲ့ အချက်အလက်တွေကိုတော့ အေမစ်ရှားက ထည့်မပြောခဲ့ပါဘူး။ 

နှစ်နိုင်ငံ လွတ်လပ်စွာကူးသန်းခွင့် သဘောတူညီချက်ကိုလည်း ရုပ်သိမ်းသွားမယ်လို့ ပြည်ထဲရေး၀န်ကြီးက ထည့်သွင်းပြောဆိုခဲ့ပါတယ်။ 

Ref: The Star 

ဇန်န၀ါရီ ၇၊ ၂၀၂၃

M-Media 

-အိန္ဒိယရဲ့ နေစူးစမ်းလေ့လာရေး ဂြိုဟ်တု Aditya-L1 ဟာ မနေ့က နေပတ်လမ်းကြောင်းထဲ အောင်မြင်စွာ ၀င်ရောက်နိုင်ခဲ့ပြီး ဒါဟာ အိန္ဒိယ အာကာသစီမံကိန်းရဲ့ နောက်ထပ် အောင်မြင်တစ်ခု ဖြစ်ပါတယ်။ 

Aditya-L1 ဂြိုဟ်တုကို စက်တင်ဘာလမှာ လွှတ်တင်ခဲ့တာဖြစ်ပြီး ၄ လတာကြာမြင်ခဲ့ပြီးတဲ့နောက် နေပတ်လမ်းကြောင်းထဲ ၀င်ရောက်နိုင်ခဲ့တာ ဖြစ်ပါတယ်။ 

ကမ္ဘာနဲ့ နေကြား အကွာအ၀ေးရဲ့ ၁၀၀ ပုံ ၁ ပုံဖြစ်တဲ့ မိုင်ပေါင်း ၉ သိန်း ၃ သောင်းအထိ ရောက်ရှိခဲ့တာပါ။ Lagrange Point 1 ဆိုတဲ့နေရာကနေ နေကိုလှည့်ပတ်ကာ နေရဲ့ အပြင်ဆုံးအလွှာကို လေ့လာသွားမှာ ဖြစ်ပါတယ်။ 

အာကာသရာသီဥတုအပေါ် နေရဲ့ သက်ရောက်မှု၊ နေနဲ့ ကမ္ဘာကြား ဆက်နွယ်ပတ်သက်မှု လျှို့၀ှက်ချက်တွေကိုလည်း ဒီဂြိုဟ်တုကနေ သိရှိရမှာဖြစ်ပါတယ်။ 

Aditya-L1 ဂြိုဟ်တုရဲ့သက်တမ်းဟာ ၅ နှစ်ရှိမှာဖြစ်ပါတယ်။ 

အိန္ဒိယဟာ ပြီးခဲ့တဲ့နှစ် သြဂုတ်လက လရဲ့တောင်ဘက်၀င်ရိုးစွန်းကို စူးစမ်းရေးယာဥ် ပို့ဆောင်နိုင်တဲ့ ပထမဆုံး နိုင်ငံအဖြစ် မှတ်တမ်း၀င်ခဲ့ပြီး၊ အခုတစ်ကြိမ်မှာလည်း နေရဲ့ပတ်လမ်းအတွင်း လေ့လာရေးယာဥ်လွှတ်နိုင်တဲ့ ပထမဆုံး အာရှနိုင်ငံအဖြစ် မှတ်တမ်းတင်နိုင်ခဲ့ပါတယ်။ 

Ref: Aljazeera

အောက်တိုဘာ ၁၊ ၂၀၂၃

M-Media 

-အခုနှစ်အတွင်း အိန္ဒိယနိုင်ငံရဲ့ မိုးရွာသွန်းမှုဟာ ၂၀၁၈ ခုနှစ်နောက်ပိုင်း အနိမ့်ဆုံးဖြစ်ခဲ့ပြီး လယ်ယာထွက်ကုန်တွေအပေါ် ထိခိုက်မှု ရှိမယ်လို့ ကျွမ်းကျင်သူတွေက သုံးသပ်ပါတယ်။ 

အိန္ဒိယတစ်နိုင်ငံလုံးရဲ့ စိုက်ပျိုးရေးလုပ်ငန်းအတွက် အရေးပါတဲ့ ရေအရင်းအမြစ်ရဲ့ ၇၀ ရာခိုင်နှုန်းကို မိုးရာသီကနေ ရရှိတာပါ။ လယ်ယာလုပ်ငန်းရဲ့ တစ်၀က်လောက်ဟာ ဆည်မြောင်းစနစ် မရှိတာကြောင့် မိုးရေကိုသာ အဓိက အားထားရတာ ဖြစ်ပါတယ်။ 

ဒါပေမယ့် အလ်နီညိုကြောင့် အခုနှစ်ဟာ ၅ နှစ်အတွင်း မိုးအနည်းဆုံး ဖြစ်ခဲ့ပါတယ်။ အိန္ဒိယရဲ့ မိုးရာသီဟာ ဇွန်လကနေ ဒီဇင်ဘာအထိ ကြာမြင့်ပါတယ်။ 

လက်ရှိအချိန်အထိ မိုးရွာသွန်းမှုဟာ ၉၄ ရာခိုင်နှုန်းသာ ရှိပါတယ်။  

သြဂုတ်လက မိုးအနည်းဆုံးဖြစ်ခဲ့ပြီး ပျမ်းမျှရွာသွန်းမှုရဲ့ ၃၆ ရာခိုင်နှုန်းသာ ရှိခဲ့ပါတယ်။ မိုးလေ၀သ ပညာရှင်တွေက အောက်တိုဘာကနေ ဒီဇင်ဘာလအတွင်း ပုံမှန် မိုးရွာကာ အခုနှစ်အတွင်း စုစုပေါင်း မိုးရွာသွန်းမှု ၄ ရာခိုင်နှုန်း နည်းနိုင်တယ်လို့ ခန့်မှန်းထားပါတယ်။ 

မိုးနည်းမှုကြောင့် စိုက်ပျိုးရေးထွက်ကုန်တွေ ကျဆင်းကာ အဓိက စားသောက်ကုန်တွေ စျေးကြီးတာ၊ ပြည်ပတင်ပို့မှု ကျဆင်းတာတွေ ဖြစ်မယ့်အနေအထား ရှိနေပါတယ်။ 

Ref: Aljazeera 

သြဂုတ် ၂၄၊ ၂၀၂၃

M-Media 

-အိန္ဒိယ လစူးစမ်းရေးဂြိုဟ်တု Chandrayaan-3 က ဂြိုဟ်ဆင်းယာဥ်ငယ်ဟာ သြဂုတ်လ ၂၃ ရက် ဗုဒ္ဓဟူးနေ့မှာ လမျက်နှာပြင်ပေါ်ကို အောင်မြင်စွာ ဆင်းသက်နိုင်ခဲ့ပါတယ်။ 

ရေခဲမြစ်တွေနဲ့ ရေအရင်းအမြစ် ကြီးကြီးမားမားရှိနိုင်တယ်လို့ သိပ္ပံပညာရှင်တွေက ယူဆထားတဲ့ လတောင်၀င်ရိုးစွန်းကို ဆင်းသက်ခဲ့တာပါ။ 

လတောင်၀င်ရိုးစွန်းကို ရောက်ရှိတဲ့ ကမ္ဘာ့ပထမဆုံး နိုင်ငံအဖြစ် မှတ်တမ်း၀င်ခဲ့ပြီး၊ အာကာသစူးစမ်းရေးမှာ အင်အားကြီးတဲ့ နိုင်ငံတစ်ခု ဖြစ်လာကြောင်း အိန္ဒိယက သက်သေပြနိုင်ခဲ့တာလည်း ဖြစ်ပါတယ်။  

ရက်ပိုင်းအရင်ကပဲ ရုရှားက ဒီနေရာမှာ အာကာယာဥ်ဆင်းဖို့ ကြိုးပမ်းခဲ့ပေမယ့် မအောင်မြင်ခဲ့ပါဘူး။ 

အိန္ဒိယဟာ အမေရိကန်၊ တရုတ်နဲ့ ရုရှားတို့ပြီးတဲ့နောက် လပေါ်ကို အာကာယာဥ်ခြေချနိုင်နဲ့ စတုတ္ထမြောက်နိုင်ငံလည်း ဖြစ်ပါတယ်။ 

၁၉၆၀ က စတင်ခဲ့ 

အိန္ဒိယရဲ့ အာကာသ စူးစမ်းရေး စီမံကိန်းဟာ ၁၉၆၀ ပြည့်နှစ်တွေကတည်းက စတင်ခဲ့တာပါ။ 

နှစ်ပေါင်း ၆၀ ကာလအတွင်း အရပ်ဖက်နဲ့ စစ်ဖက်သုံး ဂြိုဟ်တုပေါင်းများစွာကို ကမ္ဘာပတ်လမ်းထဲ အောင်မြင်စွာ လွှတ်တင်နိုင်ခဲ့ပါတယ်။ 

အိန္ဒိယဟာ လက်ရှိမှာ ပြည်တွင်းဖြစ်ဒုံးပျံနဲ့ အခကြေးငွေယူပြီး နိုင်ငံတကာ ဂြိုဟ်တုတွေကို လွှတ်တင်ပေးတဲ့ ၀န်ဆောင်မှုလည်း ပေးနေပါတယ်။ 

၂၀၀၈ ခုနှစ် Chandrayaan-1 အမည်နဲ့ လစူးစမ်းရေး ဂြိုဟ်တု လွှတ်တင်မှုမှာ တောင်၀င်ရိုးစွန်းအတွင်း ရေခဲတွေရှိကြောင်း ရှာဖွေတွေ့ရှိခဲ့ပါတယ်။ 

၂၀၁၉ ခုနှစ်မှာ ဂြိုဟ်ဆင်းယာဥ်ငယ် ဆင်းသက်ဖို့ ကြိုးစားခဲ့ပေမယ့် မအောင်မြင်ခဲ့ပါဘူး။ 

Chandrayaan-3 ရဲ့ အခုအောင်မြင်မှုဟာ အိန္ဒိယကို အဖက်ဖက်က အားကောင်းလာစေမှာ ဖြစ်ပါတယ်။ အခြားနိုင်ငံကြီးတွေနဲ့ယှဥ်ရင် စားရိတ်အလွန်သက်တာတဲ့ ဂြိုဟ်တုလွှတ်တင်မှုစနစ်ကြောင့် ကမ္ဘာ့ အာကာသစူးစမ်းလေ့လာရေးကုမ္ပဏီတွေ အိန္ဒိယကို၀င်ရောက်ဖို့ တာဆူနေကြပါပြီ။ 

အာကာသလေ့လာမှုနဲ့အတူ အကာကသနေ ကမ္ဘာမြေကို ပြန်လည်စောင့်ကြည့်တဲ့ စနစ်တွေလည်း အားကောင်းလာပြီး ရာသီဥတုပြောင်းလဲမှုဒဏ် ခံစားနေရမှုကို ပိုမို စနစ်တကျ ကိုင်တွယ်လာနိုင်တော့မှာ ဖြစ်ပါတယ်။ 

Ref: Reuters, Foreign Policy