Tag: iraq

ဒီဇင်ဘာ ၉၊ ၂၀၂၁
M-Media

-နိုင်ငံအတွင်း အမေရိကန်ရဲ့ စစ်ရေးလှုပ်ရှားမှုတွေ အဆုံးသတ်သွားပြီလို့ အီရတ်နိုင်ငံက ဒီကနေ့မှာ ကြေငြာပါတယ်။

စစ်ရေးလှုပ်ရှားမှု အဆုံးသတ်ပြီး အီရတ်တပ်ဖွဲ့ကို အကြံပေးတဲ့ တာဝန်သာ ဆောင်ရွက်ပေးဖို့ အမေရိကန်နဲ့ဆွေးနွေးမှု ပြီးဆုံးသွားတဲ့အချိန်မှာ အီရတ် အမျိုးသားလုံခြုံရေးအကြံပေး ကာစင် အလ်-အရဂျ်က Twitter စာမျက်မှာ ​​ရေးသားခဲ့တာ ဖြစ်ပါတယ်။

“မဟာမိတ်အဖွဲရဲ့ စစ်ရေးလှုပ်ရှားမှုတွေ အဆုံးသတ်ပြီလို့ တရားဝင်ကြေငြာလိုက်ပါတယ်။ လေ့ကျင့်သင်ကြားရေး၊ အကြံပေးရေးနဲ့ စွမ်းရည်မြှင့်တင်ရေးတွေမှာတော့ နိုင်ငံတကာမဟာမိတ်အဖွဲ့နဲ့ ဆက်လက်ပူးပေါင်းလုပ်ဆောင်သွားမှာပါ”

အီရတ်ရဲ့ ဒီထုတ်ပြန်ချက်နဲ့ပတ်သက်ပြီး အမေရိကန်ဖက်က တုန့်ပြန်ပြောဆိုတာမျိုး မရှိသေးပါဘူး။ ဒါပေမယ့် နှစ်ကုန်မှာ အီရတ်က စစ်ရေးလှုပ်ရှားမှုအားလုံး အဆုံးသတ်မယ်ဆိုတဲ့ ကတိကဝတ်ကို စောင့်ထိန်းမယ်လို့ အမေရိကန် ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဂျွန်ကီရ်ဘီက မနေ့မှာ ထုတ်ပြန်ပါတယ်။

ဘဂ္ဂဒတ်က ဆွေးနွေးပွဲကိုတက်ခဲ့တဲ့ ကာ့ဒ်တပ်ဖွဲ့က ဗိုလ်မှူးချုပ် ဟဇ်ဟာ အစ္စမာအီလ်က စစ်ရေးလှုပ်ရှားမှု အခုနှစ်ကုန်မှာ အဆုံးသတ်မယ်ဆိုတဲ့ ကတိကဝတ်ကို အကောင်ထည်ဖော်ဖို့ အဆင်သင့် ဖြစ်နေတဲ့အကြောင်း ဟာမိတ်အဖွဲ့က ပြောခဲ့တယ်လို့ ဆိုပါတယ်။

‘အကြမ်းဖက်တိုက်ဖျက်ရေးစစ်ပွဲ’ ခေါင်းစဉ်နဲ့ အီရတ်ကို အမေရိကန်က ၂၀၀၃ ခုနှစ်မှာ ကျူးကျော်တိုက်ခိုက်ခဲ့တာ ဖြစ်ပါတယ်။ အီရတ်က အမေရိကန်စစ်သားအရေအတွက်ဟာ ၂၀၀၇ ခုနှစ်မှာ ၁ သိန်း ၇ သောင်းအထိ ရောက်ခဲ့ပြီး ၂၀၁၁ ခုနှစ်နောက်ပိုင်း ပြန်လျှော့ခဲ့ကာ လက်ရှိမှာတော့ အမေရိကန်စစ်သား ၂၅၀၀၊ မဟာမိတ်စစ်သား တစ်ထောင်လောက်သာ ကျန်ရှိပါတယ်။

Ref: Aljazeera

ဒီဇင်ဘာ ၂၁၊ ၂၀၂၀
M-Media

-မြို့တော် ဘဂ္ဂဒတ်မှာရှိတဲ့ အမေရိကန်သံရုံးဟာ မနေ့က ဒုံးကျည် ၈ လုံးနဲ့ တိုက်ခိုက်ခံလိုက်ရတယ်လို့ အီရတ်အစိုးရက ထုတ်ပြန်ပါတယ်။

နိုင်ငံတကာသံရုံးတွေရှိတဲ့ ဘဂ္ဂဒတ်က ရပ်ကွက်ကို အစိမ်းရောင်ဇုန်အဖြစ် အီရတ်အစိုးရက သတ်မှတ်ထားတာပါ။ မနေ့က တိုက်ခိုက်မှုကြောင့် အီရတ်လုံခြုံရေးအစောင့်တစ်ဦးဒဏ်ရာရခဲ့ကာ ကားအချို့နဲ့ အနီးအနားက လူမနေတဲ့ နေအိမ်အချို့ ထိခိုက်ပျက်ဆီးခဲ့တယ်လို့ ဆိုပါတယ်။

အမေရိကန်သံရုံးက ထုတ်ပြန်တဲ့ကြေငြာချက်မှာ တိုက်ခိုက်မှုဖြစ်ကြောင်း အတည်ပြုခဲ့ပြီး ဒုံးခွင်းစနစ် C-RAM ကို အသုံးပြုခဲ့ရကြောင်း၊ ဒီလိုတိုက်ခိုက်မှုမျိုး နောက်မဖြစ်အောင် တားဆီးဖို့နဲ့ တိုက်ခိုက်သူကို အရေးယူဖို့အတွက် အီရတ်အစိုးရနဲ့ နိုင်ငံ​ရေးခေါင်းဆောင်တွေကို တိုက်တွန်းကြောင်း ဖော်ပြထားပါတယ်။ တိုက်ခိုက်မှုကြောင့် သံရုံးအဆောက်အဦး ပျက်ဆီးခဲ့တယ်လို့လည်း ကြေငြာချက်က ဆိုပါတယ်။

အခုနှစ် ဇန်နဝါရီက အီရန်ဗိုလ်ချုပ် ကာစင်ဆိုလိုင်မာနီကို အမေရိကန်က အီရတ်မှာ လုပ်ကြံ သတ်ဖြတ်ခဲ့ပြီးတဲ့နောက်ပိုင်း ဘဂ္ဂဒတ်က အမေရိကန်သံရုံးကို လက်နက်ကိုင်အဖွဲ့အချို့က ပစ်မှတ်ထားတိုက်ခိုက်မှု လုပ်လာတဲ့အတွက် အမေရိကန်ဟာ C-RAM ဒုံးခွင်းစနစ်ကို အခုနှစ်အစောပိုင်းမှာ တပ်ဆင်ခဲ့တာပါ။

ဆိုလိုင်မာနီ လုပ်ကြံမှု တစ်နှစ်ပြည့်မှာ လက်တုန့်ပြန်တိုက်ခိုက်မှုတွေ ဖြစ်လာနိုင်တယ်ဆိုတဲ့ စိုးရိမ်မှုတွေကြောင့် သံရုံးဝန်ထမ်းတစ်ချို့ကို အခုလအစောပိုင်းမှာ အမေရိကန်က ပြန်ခေါ်ခဲ့ပါတယ်။

ဘဂ္ဂဒတ်က အမေရိကန်သံရုံး အရင်က တိုက်ခိုက်ခံရမှုတွေမှာ အီရန်ကျောထောက်နောက်ခံပြု လက်နက်ကိုင်အဖွဲ့ Kataib Hezbollah လုပ်တာလို့ သတင်းတွေထွက်ခဲ့ပြီး မနေ့က တိုက်ခိုက်မှုကတော့ သူတို့လက်ချက်မဟုတ်ဘူးလို့ ဒီအဖွဲ့က ထုတ်ပြန်ထားပါတယ်။

Ref: Aljazeera