Tag: Myanmar Military

သြဂုတ် ၂၇၊ ၂၀၂၃

M-Media

-မြန်မာအာဏာသိမ်းစစ်ကောင်စီက သံအမတ်ကို တိုင်းပြည်က နှင်ထုတ်မှုကို တီမောလက်စ်တေက ရှုတ်ချလိုက်ပါတယ်။ 

တီမောလက်စ်တေ တာ၀န်ရှိသူတွေဟာ မြန်မာနိုင်ငံမှာ စစ်အာဏာသိမ်းမှုနဲ့ ပြည်သူလူထုအပေါ် ဖိနှိပ်ညှင်းပမ်းမှုတွေကို ပြင်းပြင်းထန်ထန် ၀ေဖန်ခဲ့ကြတာပါ။ 

ဒါ့အပြင် အမျိုးသားညီညွတ်ရေးအစိုးရနဲ့ ထိတွေ့ဆက်ဆံမှုတွေလည်း  ပြုလုပ်ထားပါတယ်။

မြန်မာစစ်ကောင်စီရဲ့ နိုင်ငံခြားရေး၀န်ကြီးဌာနက တီမောလက်စ်တေအစိုးရရဲ့ လုပ်ရပ်တွေဟာ တာ၀န်ယူမှုကင်းမဲ့တယ်လို့ ၀ေဖန်ခဲ့ပြီး သံအမတ်ကိုလည်း စက်တင်ဘာ ၁ ရက်နေ့ နောက်ဆုံးထားကာ တိုင်းပြည်ကနေ ထွက်ခွာဖို့ ညွှန်ကြားထားကြောင်း ပြည်တွင်းမီဒီယာတွေက ဖော်ပြပါတယ်။ 

တီမောလက်စ်တေကတော့ စစ်ကောင်စီရဲ့ ဒီလုပ်ရပ်ကို ရှုတ်ချကြောင်း မနေ့က ထုတ်ပြန်ခဲ့ပါတယ်။

မြန်မာနိုင်ငံမှာ ဒီမိုကရေစီ ပြန်လည်ထွန်းကားလာရေး နည်းလမ်းပေါင်းစုံနဲ့ ကြိုးပမ်းဖို့ အရေးကြီးကြောင်းလည်း ထုတ်ပြန်ချက်မှာ ရေးသားထားပါတယ်။ 

စစ်ကောင်စီကိုတော့ လူ့အခွင့်အရေးကို လေးစားဖို့၊ ငြိမ်းချမ်းပြီး အပြုသဘောဆောင်တဲ့ အဖြေတစ်ခုရှာဖို့ တီမောလက်စ်တေက ထည့်သွင်း တိုက်တွန်းခဲ့ပါတယ်။

Ref: Reuters 

သြဂုတ် ၁၉၊ ၂၀၂၃

M-Media 

-ဗြိတိန်နိုင်ငံဆိုင်ရာ မြန်မာသံအမတ်ဟောင်း ဦးကျော်စွာမင်းဟာ လန်ဒန်မှာ ပိုင်နက်ကျူးလွန်မှုနဲ့ စုံစမ်းစစ်ဆေးခံနေရတယ်လို့ သိရပါတယ်။ 

၂၀၂၁ ခုနှစ် ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း လန်ဒန်မှာပြုလုပ်တဲ့ မြန်မာနိုင်ငံသားတွေရဲ့ အာဏာသိမ်းမှုဆန့်ကျင်တဲ့ ဆန္ဒပြပွဲမှာ ဦးကျော်စွာမင်းတစ်ယောက် မျက်နှာ ၀င်ပြခဲ့တာပါ။ 

အဲဒီအတွက် စစ်ကောင်စီက ဒေါသထွက်ကာ သံအမတ်သစ်တစ်ဦး ချက်ခြင်း စေလွှတ်ခဲ့ပါတယ်။ 

လက်ရှိအချိန်မှာ ဦးကျော်စွာမင်းဟာ လန်ဒန်က မြန်မာသံရုံးထဲ ၀င်ရောက်လို့ မရတော့ပေမယ့် သံအမတ်နေအိမ်မှာ ဆက်လက်နေထိုင်နေပြီး ထွက်ခွာပေးဖို့ ငြင်းဆိုနေပါတယ်။ 

ဥပဒေအရ သံအမတ်အိမ်ဟာ မြန်မာနိုင်ငံရဲ့ တရား၀င်ပိုင်ဆိုင်မှုဖြစ်ပြီး စစ်ကောင်စီက ဦးကျော်စွာမင်းကို မောင်းထုတ်ဖို့ ဗြိတိန်အစိုးရကို ဖိအားပေးထားပါတယ်။ 

သြဂုတ်လ ၁၅ ရက်နေ့မှာ လန်ဒန်ရဲတပ်ဖွဲ့က ဦးကျော်စွာမင်းကို ပိုင်နက်ကျူးလွန်မှုကိစ္စအတွက် မေးမြန်းမှု ပြုလုပ်ခဲ့ပါတယ်။ လက်ရှိအချိန်မှာ တရားစွဲမှုတော့ မလုပ်သေးပါဘူး။ 

ဦးကျော်စွာမင်းရဲ့ ရှေ့နေကတော့ သူ့ရဲ့အမှုသည်ဟာ ဒီမိုကရေစီအစိုးရက ခန့်အပ်တဲ့ သံအမတ် ရောက်လာမှ ဒီနေအိမ်ကို ပြန်အပ်မယ်လို့ ပြောဆိုကြောင်း ထုတ်ပြန်ထားပါတယ်။ 

ဗြိတိန်ရဲ့ အခုလိုလုပ်ဆောင်မှုကို အံ့အားသင့်မိတယ်လို့ Myanmar Accountability Project အဖွဲ့က တာ၀န်ရှိသူ ခရစ် ဂန်းနက်စ်က ပြောပါတယ်။ 

“စစ်အာဏာသိမ်းမှုကို ဆန့်ကျင်ပြီး၊ မြန်မာဗိုလ်ချုပ်တွေကို စီးပွားရေး ပိတ်ဆို့မှုတွေ ပြုလုပ်ထားတဲ့ ဗြိတိန်အစိုးရက တရားမ၀င် စစ်အာဏာရှင်ရဲ့ ဒီလုပ်ရပ်ကို ခွင့်ပြုတယ်ဆိုတာဟာ မယုံနိုင်စရာပါပဲ” 

ဗြိတိန်ဖက်ကတော့ အခုကိစ္စအတွက် တိတိကျကျ ထုတ်ပြန်မှု မလုပ်သေးပါဘူး။ 

Ref: The Star

သြဂုတ် ၁၈၊ ၂၀၂၃

M-Media 

-လိုအပ်နေသူတွေကို နိုင်ငံတကာက အကူအညီပေးရာမှာ တားမြစ်ဟန့်တားခြင်းမပြုဖို့ ကုလ လူသားချင်း စာနာထောက်ထားမှုဆိုင်ရာအဖွဲ့ ဒုတိယအကြီးအကဲ မာတင် ဂရစ်ဖစ်က မြန်မာအာဏာသိမ်းစစ်ခေါင်းဆောင်ကို တိုက်တွန်းခဲ့ပါတယ်။ 

ဂရစ်ဖစ်ဟာ ပြီးခဲ့တဲ့ ရက်ပိုင်းအတွင်း မြန်မာနိုင်ငံကို ၃ ရက်ကြာ လာရောက်ခဲ့ပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ပါ တွေ့ဆုံခဲ့ပါတယ်။ 

မြန်မာလူဦးရေရဲ့ ၃ ပုံ ၁ ပုံဖြစ်တဲ့ လူပေါင်း ၁၈ သန်းလောက် အကူအညီတွေ လိုအပ်နေတယ်လို့ ဂရစ်ဖစ်က ပြောပါတယ်။ 

“တစ်ခုပြီးတစ်ခု ဖြစ်နေတဲ့ ပြဿနာတွေကြောင့် မြန်မာနိုင်ငံ လူဦးရေရဲ့ ၃ ပုံ ၁ ပုံလောက်ဟာ လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေပါတယ်။ သူတို့ရဲ့ ခေါင်းဆောင်တွေနဲ့ နိုင်ငံတကာ အသိုင်းအ၀ိုင်းဆီကနေ အကူအညီတွေပိုရဖို့ သူတို့ မျှော်လင့်နေကြပါတယ်” 

၂၀၂၁ ခုနှစ် စစ်တပ်က အာဏာသိမ်းပြီး ဖြစ်ပေါ်လာတဲ့ မတည်မငြိမ်မှုတွေကြောင့် နိုင်ငံအတွင်း အကူအညီလိုအပ်သူ အရေအတွက်ဟာ ၅ ဆ မြင့်တက်လာတယ်လို့ ကုလရဲ့ မှတ်တမ်းတွေက ဆိုပါတယ်။ 

အာဏာသိမ်းစစ်ကောင်စီက နိုင်ငံတကာ အကူအညီတွေကို တားဆီးပိတ်ပင်တာ၊ လုပ်ငန်းဆောင်ရွက်ဖို့ ခက်ခဲအောင်လုပ်ထားတာတွေရှိပြီး ဒါတွေကို ရပ်တန့်ဖို့နဲ့ အကူအညီပေးခွင့် ပိုမိုခွင့်ပြုဖို့ စစ်ခေါင်းဆောင်နဲ့ တွေ့ဆုံစဥ်မှာ ပြောကြားခဲ့ကြောင်း ဂရစ်ဖစ်က ပြောပါတယ်။ 

နိုင်ငံတကာအကူအညီပေးရေးအဖွဲ့အစည်းတွေမှာ ရန်ပုံငွေ နည်းပါးမှုနဲ့ ကြုံတွေ့နေရပြီး ဒီအတွက် အလှူငွေ ပိုမိုထည့်၀င်ကြဖို့လည်း ကမ္ဘာ့နိုင်ငံတွေကို သူက ထည့်သွင်းတိုက်တွန်းခဲ့ပါတယ်။ 

Ref: Reuters 

ဇူလိုင် ၁၃၊ ၂၀၂၃

M-Media 

-မြန်မာနိုင်ငံမှာ ဖြစ်ပွားနေတဲ့ ပဋိပက္ခကို ဖြေရှင်းနိုင်ရေး အာဆီယံ နိုင်ငံခြားရေး၀န်ကြီးတွေ မနေ့က အစည်းအ၀ေး ပြုလုပ်ခဲ့ပါတယ်။ 

အင်ဒိုနီးရှားနိုင်ငံခြားရေး၀န်ကြီး ရတ္တနို မာဆူဒီက အာဆီယံက လက်ခံသဘောတူထားတဲ့ ဘုံသဘောတူညီချက် ၅ ချက်ကို အကောင်အထည်ဖော်ရေး ဆွေးနွေးခဲ့ကြတယ်လို့ ပြောပါတယ်။ 

အကြမ်းဖက်မှုတွေကို မရပ်တန့်နိုင်ရင် တွေ့ဆုံဆွေးနွေးရေးနဲ့ အကူအညီပေးရေး ဆောင်ရွက်နိုင်မယ့် အခြေအနေမျိုး ပေါ်ပေါက်လာမှာမဟုတ်ဘူးလို့ မာဆူဒီက ထည့်သွင်းပြောဆိုခဲ့ပါတယ်။ 

ပြီးခဲ့တဲ့လမှာ ထိုင်းနိုင်ငံက ဦးဆောင်ပြီး မြန်မာ့အရေးဆွေးနွေးပွဲတစ်ခု လုပ်ဆောင်ခဲ့ပြီး အာဏာသိမ်း မြန်မာစစ်ခေါင်းဆောင်တွေကိုပါ ဖိတ်ကြားခဲ့ပါတယ်။ 

ဒီအတွက် အာဆီယံအဖွဲ့၀င်နိုင်ငံတွေက ၀ေဖန်ခဲ့ပါတယ်။ 

ထိုင်နိုင်ငံခြားရေး၀န်ကြီး ဒွန် ပရာမွဒ်၀ီနိုင်းက မြန်မာပြဿနာကြောင့် ထိုင်းနိုင်ငံက ကြုံတွေ့နေရတဲ့ နယ်စပ်ကိစ္စ၊ ကုန်သွယ်ရေးနဲ့ ဒုက္ခသည်ကိစ္စတွေ ပြေလည်စေရေး ကျင်းပရခြင်းဖြစ်တယ်လို့ မနေ့ကအစည်းအ၀ေးမှာ ကာကွယ်ပြောကြားခဲ့ပါတယ်။ 

ဒေါ်စုနဲ့တွေ့ 

ပရာမွဒ်၀ီနိုင်းက မကြာသေးခင်က မြန်မာနိုင်ငံကို သွားရောက်စဥ်အတွင်း မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံခဲ့တယ်လို့ သီးခြားပြောကြားခဲ့ပါတယ်။ 

ထိုင်းနိုင်ငံခြားရေး၀န်ကြီးဟာ မြန်မာနိုင်ငံကို ဧပြီလမှာတစ်ကြိမ်၊ ဇွန်လမှာတစ်ကြိမ် သွားရောက်ခဲ့တာဖြစ်ပါတယ်။ 

ပြီးခဲ့တဲ့ တနင်္ဂနွေနေ့က နောက်ထပ်တစ်ကြိမ် သွားရောက်မှုအတွင်း ဒေါ်အောင်ဆန်းစုကြည်နဲ့ ၁ နာရီကြာ တွေ့ဆုံစကားပြောခွင့်ရခဲ့တယ်လို့ သူက ဆိုပါတယ်။ 

ဒေါ်အောင်ဆန်းစုကြည်ဟာ ကျန်းမာရေးကောင်းမွန်ပြီး၊ လက်ရှိ မြန်မာ့အရေးနဲ့ပတ်သက်လို့ ဆွေးနွေးညှိနှိုင်းဖို့ တိုက်တွန်းခဲ့တယ်လို့ ပရာမွဒ်၀ီနိုင်းက သတင်းထောက်တွေကို ပြောဆိုခဲ့ပါတယ်။ 

ဒီပြောကြားမှုအတွက် ဒေါ်အောင်ဆန်းစုကြည်နဲ့ပတ်သက်တဲ့ အသိုင်းအ၀ိုင်းက မှတ်ချက်ပေးတာမျိုး မရှိသေးပါဘူး။ 

အာဆီယံမူ မပြောင်း 

အင်ဒိုနီးရှားနိုင်ငံခြားရေး မာဆူဒီက မြန်မာ့အရေးနဲ့ ပတ်သက်လာရင် အာဆီယံ ဘုံသဘောတူညီချက် ၅ ချက်ကို ဆက်လက်စွဲကိုင်သွားမှာဖြစ်တယ်လို့ ထပ်လောင်းပြောကြားခဲ့ပါတယ်။ 

“အခြားကြိုးပမ်းမှုတွေဟာ ဘုံသဘောတူညီချက် ၅ ရပ် အကောင်အထည်ဖော်မှုကို ထောက်ခံအားပေးတာမျိုးသာ ဖြစ်ရပါမယ်”

Ref: AFP

ဇူလိုင် ၁၀၊ ၂၀၂၃

M-Media 

– မြန်မာနိုင်ငံက ပဋိပက္ခကို ဖြေရှင်းဖို့အတွက် မိမိတို့ဖက်က လုပ်ကိုင်ဆောင်ရွက်နေတာတွေ ရှိတယ်လို့ အင်ဒိုနီးရှားနိုင်ငံခြားရေး၀န်ကြီး ရတ္တနို မာဆူဒီက ပြီးခဲ့တဲ့တစ်ပတ်မှာ ပြောကြားခဲ့ပါတယ်။ 

အင်ဒိုနီးရှားဦးဆောင်မယ့် အာဆီယံအဖွဲ့ဟာ အခုတစ်ပတ်အတွင်း နိုင်ငံခြားရေး၀န်ကြီးအဆင့် အစည်းအ၀ေးတစ်ခုကို ကျင်းပဖို့ ရှိနေပြီး မြန်မာ့အရေး အဓိက ဆွေးနွေးကြမှာ ဖြစ်ပါတယ်။ 

ဒီအစည်းအ၀ေးမှာ အမေရိကန်၊ တရုတ်နဲ့ ရုရှား နိုင်ငံခြားရေး၀န်ကြီးတို့လည်း တက်ရောက်မှာ ဖြစ်ပါတယ်။ 

သောကြောနေ့ကပြုလုပ်တဲ့ သတင်းစာရှင်းလင်းပွဲမှာ မာဆူဒီက အာဆီယံရဲ့ ဘုံသဘောတူညီချက် ၅ ရပ်ကို အကောင်အထည်ဖော်ဖို့အတွက် သက်ဆိုင်သူတွေနဲ့ လူချင်း၊ အွန်လိုင်းနဲ့ ဖုန်းအစည်းအ၀ေး စုစုပေါင်း ၁၁၀ ခုလောက် လုပ်ဆောင်ခဲ့တယ်လို့ ပြောပါတယ်။

အဲဒီလိုဆွေးနွေးမှုတွေထဲမှာ စစ်ကောင်စီတာ၀န်ရှိသူတွေ၊ NUG တာ၀န်ရှိသူတွေ၊ တိုင်းရင်းသားလက်နက်ကိုင်အဖွဲ့တွေ၊ အရပ်ဖက်အဖွဲ့တွေ ပါ၀င်ပါတယ်။ 

“ဆွေးနွေးပွဲတွေနဲ့ ပြီးသွားဖို့ မဟုတ်ပါဘူး။ ဒါပေမယ့် ရေရှည်တည်တံ့တဲ့ ငြိမ်းချမ်းရေးကို ရရှိရေး အားလုံးပါ၀င်တဲ့ ဆွေးနွေးမှု ဖြစ်လာဖို့ဆိုတဲ့ ရည်ရွယ်ချက်အတွက် ဒါက လမ်းကြောင်းတစ်ခု ဖြစ်ပါတယ်။  အားလုံးပါ၀င်တဲ့ ဆွေးနွေးမှု မရှိဘဲနဲ့ အာလုံးလက်ခံနိုင်တဲ့၊ ငြိမ်းချမ်းတဲ့ အဖြေတစ်ခု ရမှာ မဟုတ်ပါဘူး။ အဲလိုဆိုရင် မြန်မာနိုင်ငံမှာ ငြိမ်းချမ်းရေး ရလာမှာ မဟုတ်ပါဘူး” လို့ မာဆူဒီက ထည့်သွင်းပြောဆိုခဲ့ပါတယ်။ 

အင်ဒိုနီးရှားဟာ အခုနှစ် အာဆီယံ ဥက္ကဌအဖြစ် ဆောင်ရွက်နေတာ ဖြစ်ပါတယ်။ 

Ref: The Diplomat