News @ M-Media

Tag: Rohingya

  • အာချေးရေပြင်တွင်မျောနေသည့် ရိုဟင်ဂျာဒုက္ခသည်များကို အင်ဒိုနီးရှား ကယ်ဆယ်

    အာချေးရေပြင်တွင်မျောနေသည့် ရိုဟင်ဂျာဒုက္ခသည်များကို အင်ဒိုနီးရှား ကယ်ဆယ်

    ဒီဇင်ဘာ ၃၁၊ ၂၀၂၁
    M-Media

    -အာချေးပြည်နယ်က ပင်လယ်ထဲမှာ မျောနေတဲ့ ရိုဟင်ဂျာဒုက္ခသည် စက်လှေကို အင်ဒိုနီးရှားအာဏာပိုင်တွေက ဒီကနေ့မနက် အစောပိုင်းမှာ ကယ်ဆယ်ခဲ့ပါတယ်။

    အမျိုးသမီးနဲ့ ကလေးငယ်အများစုပါဝင်ပြီး လူ ၁၀၀ ကျော်လောက်ရှိတဲ့ အဲဒီစက်လှေဟာ ပြီးခဲ့တဲ့ သီတင်းပတ်ကတည်းက အင်ဒိုနီးရှားရေပြင်မှာ ရှိနေတာပါ။

    အစောပိုင်းက အင်ဒိုနီးရှာအာဏာပိုင်တွေဟာ ဒီဒုက္ခသည်တွေကို လက်မခံဘဲ အစားအစာ၊ ဆေးဝါးနဲ့ လောင်စာဆီတွေထောက်ပံ့ကာ လှေကို ပြင်ဆင်ပြီး ပင်လယ်ထဲ ပြန်မျှောခဲ့ပါတယ်။ ဒါပေမယ့် နိုင်ငံတကာအသိုင်းအ၀ိုင်းက ဒီလုပ်ရပ်ကို ဝေဖန်ပြစ်တင်ခဲ့ပြီးတဲ့နောက် ဒီကနေ့မှာ ပြန်လည် ကယ်ဆယ်ခဲ့တာပါ။

    မိုးသည်းထန်စွာရာသွန်းပြီး လှိုင်းလေထန်နေတာကြောင့် စက်လှေကမ်းကပ်ဖို့နဲ့ လူတွေကို ကယ်ဆယ်ဖို့ ၁၈ နာရီလောက် ကြာမြင့်ခဲ့ပါတယ်။ ကယ်ဆယ်ရေးကို အင်ဒိုနီးရှားရေတပ်က ဦးဆောင်ခဲ့တာဖြစ်ပါတယ်။ ကယ်ဆယ်ပြီးတဲ့နောက် ကိုဗစ် ရှိ၊ မရှိ စစ်ဆေးစောင့်ကြည့်နေတယ်လို့ အင်ဒိုနီးရှားအာဏာပိုင်တွေက ထုတ်ပြန်ပါတယ်။

    အင်ဒိုနီးရှားနဲ့ မလေးရှားက ဒုက္ခသည်တွေကို ကူညီပေးနေတဲ့ Geutanyoe ဖောင်ဒေးရှင်းကို ပူးတွဲတည်ထောင်သူ လီလီယာနီ ဖန်က ရိုဟင်ဂျာ ဒုက္ခသည်တွေကို လူသားချင်း စာနာထောက်ထားမှုဆိုင်ရာ ရှုထောင့်ကနေ ကယ်ဆယ်ပေးခဲ့တဲ့ အင်ဒိုနီးရှားအာဏာပိုင်တွေကို ကျေးဇူးတင်ပြီး စိတ်သက်သာရာလည်း ရတယ်လို့ ပြောကြားခဲ့ပါတယ်။

    “အင်ဒိုနီးရှားဟာ ဒုက္ခသည်တွေအပေါ် လူသားချင်းစာနာမှုရှိတယ်ဆိုတာကို ထပ်မံဖော်ကျူးလိုက်တာပါ။ ဒီလို တာဝန်သိသိ ဆောင်ရွက်မှုကို ချီးကျူးရုံတင်မကဘဲ ပံ့ပိုးကူညီပေးဖို့လည်း လိုအပ်ပါတယ်”

    အင်ဒိုနီးရှားရဲ့ ဒီကယ်ဆယ်မှုကို ကုလသမဂ္ဂ ဒုက္ခသည်များကူညီရေးအဖွဲ့ UNHCR ကလည်း ချီးကျူးခဲ့ပါတယ်။

    ရခိုင်ပြည်နယ်က ရိုဟင်ဂျာတွေဟာ ၁၉၇၀ ပြည့်နှစ်လောက်ကစတင်ပြီး မြန်မာစစ်တပ်ရဲ့ ဖိနှိပ်ညှင်းပမ်း သတ်ဖြတ်မှုတွေကြောင့် အိုးအိမ်စွန့်ခွာ ထွက်ပြေးရပြီး ဘင်္ဂလားဒေ့ရှ်၊ အင်ဒိုနီးရှား၊ မလေးရှား၊ အိန္ဒိယ စတဲ့ နိုင်ငံတွေမှာ ဒုက္ခသည်အဖြစ် ခိုလှုံနေကြရတာ ဖြစ်ပါတယ်။

    ၂၀၁၇ ခုနှစ် ရိုဟင်ဂျာတွေအပေါ် စစ်တပ်က ထပ်မံကျူးလွန်တဲ့ ရာဇဝတ်မှုတွေကို ကမ္ဘာတစ်ဝှမ်းက ပိုမိုအာရုံစိုက်လာခဲ့ပါတယ်။ အဲဒီအဖြစ်အပျက်အတွင်း မြန်မာနိုင်ငံက ရိုဟင်ဂျာ ၈ သိန်းလောက် ဘင်္ဂလားဒေ့ရှ်ဖက် ထွက်ပြေးခဲ့ရပါတယ်။

    Ref: Aljazeera

  • နေရပ်မြန်မာနိုင်ငံကို ပြန်သည့်အချိန်အထိ ရိုဟင်ဂျာဒုက္ခသည်များကို တူရကီ ကူညီမည်

    နေရပ်မြန်မာနိုင်ငံကို ပြန်သည့်အချိန်အထိ ရိုဟင်ဂျာဒုက္ခသည်များကို တူရကီ ကူညီမည်

    နိုဝင်ဘာ ၁၄၊ ၂၀၂၁
    M-Media

    -ဘင်္ဂလားဒေ့ရှ်က ရိုဟင်ဂျာဒုက္ခသည်တွေ နေရပ် မြန်မာနိုင်ငံကို ပြန်နိုင်တဲ့အချိန်အထိ လူသားချင်း စာနာထောက်ထားမှုဆိုင်ရာ အကူအညီတွေ တူရကီက ပေးသွားမယ်လို့ ဘင်္ဂလားဒေ့ရှ်ဆိုင်ရာ တူရကီသံအမတ် မွတ်စ်တာဖာ အိုစမန် သူရန်က ပြောကြားလိုက်ပါတယ်။

    သူရန်ဟာ ဘင်္ဂလားဒေ့ရှ်နိုင်ငံတောင်ပိုင်း ကော့ဆက်ဘဇားဒေသက ရိုဟင်ဂျာဒုက္ခသည်စခန်းကို ဒီကနေ့စတင်ကာ ၂ ရက်ကြာ သွားရောက်ပြီး တူရကီအစိုးရနဲ့ ပြင်ပ အကူအညီပေးရေးအဖွဲ့တွေရဲ့ လုပ်ဆောင်မှုတွေကို ကြည့်ရှုမှာ ဖြစ်ပါတယ်။

    မြန်မာ့စစ်တပ်ရဲ့ ခေတ်အဆက်ဆက် ဖိနှိပ်အကြမ်းဖက်မှုကြောင့် ရခိုင်ပြည်နယ်က ရိုဟင်ဂျာတွေဟာ ဘင်္ဂလားဒေ့ရှ်ဖက် ထွက်ပြေးလာရပြီး လက်ရှိမှာ ၁.၂ သန်းလောက် ဒုက္ခသည်အဖြစ် ခိုလှုံနေရပါတယ်။ ၂၀၁၇ ခုနှစ် မြန်မာစစ်တပ်ရဲ့ အကြမ်းဖက်သတ်ဖြတ်မှုတွေကြောင့် ကမ္ဘာကြီးဟာ ရိုဟင်ဂျာတွေအပေါ် ပိုမို အာရုံစိုက်လာကြပါတယ်။

    ရိုဟင်ဂျာတွေ ဒုက္ခစရောက်တည်းက တူရကီနိုင်ငံဟာ အကူအညီတွေပေးခဲ့ပြီး ရိုဟင်ဂျာတွေ ငြိမ်းငြိမ်းချမ်းချမ်းနဲ့ သိက္ခာရှိရှိ နေရပ် မြန်မာနိုင်ငံကို ပြန်နိုင်ရေး ကုလသမဂ္ဂ၊ သက်ဆိုင်ရာအဖွဲ့အစည်းတွေနဲ့ ပူးပေါင်းဆောင်ရွက်နေတယ်လို့ ဒုက္ခသည်စခန်းကို ရောက်လာတဲ့ သူရန်က ပြောကြားခဲ့ပါတယ်။

    တူရကီအခြေစိုက် အကူအညီပေးရေးအဖွဲ့တွေဖြစ်တဲ့ တူရကီ ပူးပေါင်းဆောင်ရွက်ရေးအဖွဲ့ (TIKA)၊ သဘာ၀ဘေးစီမံခန့်ခွဲရေး အာဏာပိုင်အဖွဲ့ (AFAD), Diyanet ဖောင်ဒေးရှင်း၊ တူရကီလခြမ်းနီအဖွဲ့တို့ဟာ ရိုဟင်ဂျာဒုက္ခသည်စခန်းမှာ ပညာရေး၊ စားဝတ်နေရေး၊ ကျန်းမာရေး၊ အသက်မွေးဝမ်းကြောင်းပညာ စသဖြင့် နယ်ပယ်စုံ ကူညီပေးနေတာ ဖြစ်ပါတယ်။

    တူရကီဟာ ရိုဟင်ဂျာ ဒုက္ခသည်စခန်းမှာ ဆေးရုံတစ်ခုကိုလည်း ဇွန်လ ၁ ရက်နေ့က စတင်ဖွင့်လှစ်ခဲ့ပါတယ်။ အဆင့်မြင့် ကုသရေးပစ္စည်းတွေ တပ်ဆင်ထားတဲ့ အဲဒီဆေးရုံမှာ တစ်ပြိုင်နက်တည်း လူပေါင်း ၃၀ တက်ရောက်နိုင်ပြီး၊ အရေးပေါ်အခြေအနေတွေမှာ လူ ၅၀ အထိ ကုသပေးနိုင်မှာဖြစ်ပါတယ်။

    စတင်ဖွင့်လှစ်ပြီးခဲ့ကတည်းက အဲဒီဒီဆေးရုံမှာ ရိုဟင်ဂျာ ၂ သောင်းလောက်ကို ကုသပေးနိုင်ခဲ့ပြီး နေ့စဉ် လူနာတွေကို လက်ခံ ကုသပေးနေပါတယ်။

    Ref : Anadolu Agency

  • ရိုဟင်ဂျာခေါင်းဆောင် အသတ်ခံရမှုအတွက် လူ ၁၇၀ ကျော်ကို ဘင်္ဂလားဒေ့ရှ် ဖမ်းဆီးထား

    ရိုဟင်ဂျာခေါင်းဆောင် အသတ်ခံရမှုအတွက် လူ ၁၇၀ ကျော်ကို ဘင်္ဂလားဒေ့ရှ် ဖမ်းဆီးထား

    နိုဝင်ဘာ ၁၊ ၂၀၂၁
    M-Media

    ​ကော့ဆက်ဘဇားမှ ရိုဟင်ဂျာဒုက္ခသည်စခန်း

    -ထင်ရှားတဲ့ ရိုဟင်ဂျာခေါင်းဆောင် မိုဟီဘူလာ အသတ်ခံရမှုအတွက် လူပေါင်း ၁၇၂ ဦးကို ဖမ်းဆီးထားတယ်လို့ ဘင်္ဂလားဒေ့ရှ် ရဲတပ်ဖွဲ့က ထုတ်ပြန်ပါတယ်။

    အသက် ၄၈ နှစ်အရွယ် ကျောင်းဆရာ မိုဟီဘူလာဟာ ကော့ဆက်ဘဇားမှာရှိတဲ့ ရိုဟင်ဂျာ ဒုက္ခသည်စခန်းက သူ့ရုံးခန်းရှေ့မှာ စက်တင်ဘာလနှောင်းပိုင်းက သေနတ်နဲ့ ပစ်ခတ်သတ်ဖြတ်ခြင်း ခံခဲ့ရတာပါ။

    ဒီကိစ္စနဲ့ပတ်သက်လို့ ပြီးခဲ့တဲ့သီတင်းပတ်တွေအတွင်း ဘင်္ဂလားဒေ့ရှ် ရဲတပ်ဖွဲ့ဟာ ဒုက္ခသည်စခန်းက လူပေါင်း ၁၇၀ ကျော်ကို ဖမ်းဆီးခဲ့ပါတယ်။ အဲဒီအထဲက ၁၀ ဦးဟာ မိုဟီဘူလာကို သတ်ဖြတ်မှုမှာ ပါဝင်ခဲ့တယ်လို့ သံသယရှိခံရသူတွေဖြစ်ကြောင်း ဘင်္ဂလားလားဒေ့ရှ် အထူးရဲတပ်ဖွဲ့ APB အကြီးအကဲ နိုင်မူလ် ဟက်က ပြောပါတယ်။

    ဒီကိစ္စနဲ့ပတ်သက်ပြီး သက်ဆိုင်သူတွေကို ဆက်လက် ဖမ်းဆီးသွားမယ်လို့လည်း ဟက်က ပြောပါတယ်။ ရိုဟင်ဂျာလက်နက်ကိုင်အဖွဲ့တစ်ခုဖြစ်တဲ့ ARSA ဟာ မိုဟီဘူလာရဲ့ အသက်အန္တရာယ်ကို ခြိမ်းခြောက်တယ်ဆိုတဲ့ သတင်းတွေ အရင်က ထွက်ခဲ့ဖူးပါတယ်။

    မိုဟီဘူလာရဲ့ မိသားစုတွေကိုတော့ ဘင်္ဂလားဒေ့ရှ်ရဲတပ်ဖွဲ့က ဘေးလွတ်ရာကို ပြောင်းရွှေ့ထားပါတယ်။ ဖမ်းဆီးထားသူတွေထဲမှာ ၁၁၄ ဦးက သူတို့ကိုယ်သူတို့ ARSA အဖွဲ့ဝင်တွေလို့ ပြောကြားကြောင်း APB ရဲ့ ထုတ်ပြန်ချက်မှာ ဖော်ပြထားပါတယ်။

    မိုဟီဘူလာဟာ ‘ငြိမ်းချမ်းရေးနဲ့ လူ့အခွင့်အရေးဆိုင်ရာ အာရကန်ရိုဟင်ဂျာအဖွဲ့အစည်း’ (ARPSH) ကို တည်ထောင်ကာ ရိုဟင်ဂျာအရေးကို ဆောင်ရွက်နေသူဖြစ်ပါတယ်။ အမေရိကန်သမ္မတ ဒေါ်နယ်ထရမ့်လက်ထက် နိုင်ငံတကာက အဖိနှိပ်ခံလူမျိုးစု ကိုယ်စားလှယ်တွေကို အိမ်ဖြူတော်မှာ ခေါ်ယူတွေ့ဆုံစဉ်အတွင်း မိုဟီဘူလာတစ်ယောက် ရိုဟင်ဂျာတွေကို ကိုယ်စားပြုပြီး တက်ရောက်ခွင့်ရခဲ့ပါတယ်။

    ၂၀၁၇ ခုနှစ် မြန်မာစစ်တပ်က ရိုဟင်ဂျာတွေကို သတ်ဖြတ်မောင်းထုတ်မှုအပြီး ဖွဲ့စည်းခဲ့တဲ့ ARPSH ဟာ ရိုဟင်ဂျာတွေ ဖိနှိပ်ညှင်းပမ်းခံရမှု၊ စစ်တပ်ရဲ့ သတ်ဖြတ်မှု၊ အဓမ္မကျင့်မှုတွေအကြောင်း မိသားစုတစ်ခုချင်းစီကနေ စနစ်တကျ မှတ်တမ်းယူတာမျိုး လုပ်ဆောင်ခဲ့တဲ့ အဖွဲ့အစည်းလည်း ဖြစ်ပါတယ်။

    ARSA အဖွဲ့ဝင်တွေ ဒုက္ခသည်စခန်းတွေမှာ မရှိဘူးလို့ ဘင်္ဂလားဒေ့ရှ်က အရင်တုန်းက ငြင်းဆိုထားပြီး စခန်းအတွင်း သတ်ဖြတ်မှုတွေဟာ ရာဇဝတ်ဂိုဏ်းတွေ၊ မူးယစ်ဂိုဏ်းတွေကြောင့်ဖြစ်တယ်လို့ ပြောကြားထားတာ ဖြစ်ပါတယ်။

    Ref: Arab News

  • ရိုဟင်ဂျာများအပေါ် စစ်တပ်၏ ကျူးလွန်မှုကို ဂျီနိုဆိုက်အဖြစ်သတ်မှတ်ရန် အမေရိကန်ကို လူ့အခွင့်အရေးအဖွဲ့များ တောင်းဆို

    ရိုဟင်ဂျာများအပေါ် စစ်တပ်၏ ကျူးလွန်မှုကို ဂျီနိုဆိုက်အဖြစ်သတ်မှတ်ရန် အမေရိကန်ကို လူ့အခွင့်အရေးအဖွဲ့များ တောင်းဆို

    ဩဂုတ် ၁၁၊ ၂၀၂၁
    M-Media

    မီးရှို့ဖျက်ဆီးခံခဲ့ရသည့် ရိုဟင်ဂျာကျေးရွာတစ်ခု

    -ရိုဟင်ဂျာလူမျိုးစုအပေါ် မြန်မာစစ်တပ်က ကျူးလွန်မှုတွေကို လူမျိုးတုန်းသတ်ဖြတ်မှု(ဂျီနိုဆိုက်) အဖြစ် ကြေငြာပေးဖို့ လူ့အခွင့်အရေးအဖွဲ့ ၉၅ ခုက အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်ကို မနေ့မှာ တိုက်တွန်းလိုက်ပါတယ်။

    မြန်မာနိုင်ငံအနောက်ပိုင်း ရခိုင်ပြည်နယ်မှာ ရိုဟင်ဂျာလူမျိုးစုတွေဟာ ခေတ်အဆက်ဆက် မြန်မာစစ်အာဏာရှင်တွေရဲ့ ဖိနှိပ်ညှင်းပမ်းမှုဒဏ်ကို ခံခဲ့ရပြီး၊ ၂၀၁၇ ခုနှစ်မှာ မြန်မာစစ်တပ်ရဲ့ ကမ္ဘာသိ သတ်ဖြတ်မောင်းထုတ်မှုကြီး ဖြစ်ခဲ့ပါတယ်။ ဒီအဖြစ်အပျက်အတွင်း ရိုဟင်ဂျာ ထောင်သောင်းချီ အသတ်ခံရပြီး၊ ၈ သိန်းလောက် ဘင်္ဂလားဒေ့ရှ်ဖက်ကို ထွက်ပြေးခဲ့ရတယ်လို့ နိုင်ငံကာအဖွဲ့အစည်းတွေက ပြောပါတယ်။ မြန်မာစစ်တပ်ဟာ ရိုဟင်ဂျာအမျိုးသမီးတွေကို အဓမ္မကျင့်တာ၊ ရွာလုံးကျွတ် မီးရှို့ဖျက်ဆီးတာတွေကိုလည်း လုပ်ဆောင်ခဲ့ပါတယ်။

    လူ့အခွင့်အရေးအဖွဲ့တွေပေါင်းပြီး အမေရိကန်နိုင်ငံခြားရေးဝန်ကြီးကို မ​နေ့က ပေးပို့တဲ့စာမှာ ရခိုင်ပြည်နယ်အတွင်း ဖြစ်ပွားခဲ့တဲ့ ရက်စက်ကြမ်းကြုတ်မှုတွေနဲ့ပတ်သက်လို့ အမေရိကန်အစိုးရရဲ့ သဘောထားကို လူသိရှင်ကြား ထုတ်ပြန်ပေးဖို့ ဆော်ဩထားပါတယ်။

    “ရိုဟင်ဂျာတွေအပေါ် ရက်စက်ကြမ်းကြုတ်တဲ့ စီမံကိန်း ၄ နှစ်နားကို ကပ်လာပြီး နောက်ထပ် ကြမ်းကြုတ်မှုတွေဖြစ်ဖို့ အန္တရာယ်ရှိနေတဲ့အချိန် ဒီကိစ္စနဲ့ပတ်သက်လို့ ဝန်ကြီးတို့ရဲ့ သဘောထားအတိအကျကို လူသိရှင်ကြား ထုတ်ပြန်ပေးဖို့၊ ဒီရာဇဝတ်မှုကို လူသားထုအပေါ် ကျူးလွန်တဲ့ ရာဇဝတ်မှုနဲ့ ဂျီနိုဆိုက်အဖြစ် ရည်ညွှန်းခေါ်ဆိုဖို့ ကျွန်တော်တို့ တိုက်တွန်းပါတယ်”

    အရင် ထရမ့်အစိုးရနဲ့ လက်ရှိ ဘိုင်ဒန်အစိုးရပါ ရိုဟင်ဂျာကိစ္စကို လူသားထုအပေါ် ကျူးလွန်တဲ့ ရာဇဝတ်မှု၊ ဒါမှမဟုတ် ဂျီနိုဆိုက်အဖြစ် တရားဝင် ထုတ်ပြန်ကြေငြာမျိုး မရှိသေးပါဘူး။

    ဒါပေမယ့် မြန်မာစစ်တပ်ရဲ့ လုပ်ရပ်တွေကို အမေရိကန်အာဏာပိုင်တွေက ပြင်းပြင်းထန် ဆန့်ကျင်ရှုတ်ချတာမျိုး ရှိခဲ့ပါတယ်။ ၂၀၁၇ ခုနှစ်က အမေရိကန်နိုင်ငံခြားရေးဝန်ကြီး ရက်စ် တီလာဆန်က ရခိုင်ပြည်နယ်မြောက်ပိုင်းက အခြေအနေတွေဟာ ရိုဟင်ဂျာတွေအပေါ် လူမျိုးစုလိုက် ရှင်းလင်းမှု မြောက်နေတယ်ဆိုတဲ့ ခိုင်မာတဲ့ အထောက်အထားတွေ တွေ့ရှိရတယ်လို့ ပြောကြားခဲ့ပါတယ်။

    ဖေဖော်ဝါရီ ၁ ရက် အာဏာသိမ်းပြီးနောက် မြန်မာစစ်တပ်က တိုင်းရင်းသားတွေနဲ့ ပြည်သူတစ်ရပ်လုံးအပေါ် သတ်ဖြတ်နှိပ်စက်နေတာကိုလည်း လူ့အခွင့်အရေးအဖွဲ့တွေက ဘလင်ကန်ကို ပေးပို့တဲ့စာမှာ ထောက်ပြထားပါတယ်။

    “ဖေဖော်ဝါရီ ၁ ရက်နေ့မှာ အာဏာသိမ်းခဲ့တဲ့ အဲဒီစစ်တပ်ဟာ ရိုဟင်ဂျာတွေအပေါ် အရင်က ကျူးလွန်ခဲ့တဲ့ စစ်တပ်ပါ။ လက်ရှိမှာလည်း ရိုဟင်ဂျာတွေ၊ အခြားတိုင်းရင်းသားလူမျိုးစုတွေနဲ့ မြန်မာပြည်သူလူထု တစ်ရပ်လုံးအပေါ် ရက်စက်ကြမ်းကြုတ်မှုတွေ ကျူးလွန်နေပြီး၊ အရင်က ရိုဟင်ဂျာတွေအပေါ် ကျူးလွန်ခဲ့တဲ့ စစ်တပ်ဟာ ဘယ်လိုစစ်တပ်မျိုးလဲဆိုတာ နားလည်သဘောပေါက်ဖို့ အရေးကြီးကြောင်း ဒီအခြေအနေက မီးမောင်းထိုးပြနေပါတယ်”

    အာဏာသိမ်းပြီးတဲ့နောက် စစ်တပ်ရဲ့လုပ်ရပ်တွေ၊ လက်တလောဖြစ်နေတဲ့ ကိုဗစ်တတိယလှိုင်းတွေက မြန်မာနိုင်ငံရဲ့ လူသားချင်း စာနာထောက်ထားမှုဆိုင်ရာ အခြေအနေတွေကို ပိုမိုဆိုးဝါးစေတယ်လို့လည်း လူ့အခွင့်အရေးအဖွဲ့တွေရဲ့ စာမှာ ဖော်ပြထားပါတယ်။

    ရိုဟင်ဂျာတွေအပေါ် စစ်တပ်ရဲ့ ကျူးလွန်မှုကို အမေရိကန်က လူမျိုးတုန်းသတ်ဖြတ်မှုလို့ သတ်မှတ်လိုက်တာဟာ အာဏာသိမ်းအစိုးရနဲ့ မြန်မာစစ်တပ်အပေါ် နိုင်ငံတကာအသိုင်းအ၀ိုင်းက ပိုမိုစောင့်ကြည့်ရမယ့် လိုအပ်ချက်ကို မီးမောင်းထိုးပြလိုက်တာမျိုးဖြစ်ကြောင်း၊ ရိုဟင်ဂျာတွေတင်မကဘဲ ချင်း၊ ကရင်၊ ကချင်၊ ရခိုင်နဲ့ ရှမ်းလူမျိုးတွေလည်း စစ်တပ်ရဲ့ ရစ်စက်ကြမ်းကြုတ်မှုတွေကို ရင်ဆိုင်ခံစားနေရကြောင်း လူ့အခွင့်အရေးအဖွဲ့တွေက ထည့်သွင်း ပြောဆိုခဲ့ပါတယ်။

    ဘလန်ကန်ကိုပေးပို့တဲ့ ဒီစာကို လက်မှတ်ရေးထိုးခဲ့တဲ့ လူ့အခွင့်အရေးအဖွဲ့နဲ့ NGO အဖွဲ့ ၉၅ ဖွဲ့ထဲမှာ ရခိုင် ငြိမ်းချမ်းရေးနှင့် လူ့အခွင့်အရေးဆိုင်ရာ အင်စတီကျု၊ ရိုဟင်ဂျာ ငြိမ်းချမ်းရေးနှင့် လူ့အခွင့်အရေးဆိုင်ရာ အဖွဲ့၊ ဂျူး-ရိုဟင်ဂျာ တရားမျှတမှု ကွန်ယက်၊ မလေးရှားက Pusat KOMAS အဖွဲ့၊ မြောက်အမေရိက ရိုဟင်ဂျာအသင်း၊ ကမ္ဘာ့ရိုဟင်ဂျာအဖွဲ့တွေလည်း ပါဝင်ပါတယ်။

    Ref: VOA

  • ရိုဟင်ဂျာဒုက္ခသည်များကို ဘင်္ဂလားဒေ့ရှ်က ကိုဗစ်ကာကွယ်ဆေး စထိုးပေး

    ရိုဟင်ဂျာဒုက္ခသည်များကို ဘင်္ဂလားဒေ့ရှ်က ကိုဗစ်ကာကွယ်ဆေး စထိုးပေး

    ​ဩဂုတ် ၁၀၊ ၂၀၂၁

    M-Media 

    -ဘင်္ဂလားဒေ့ရှ်အစိုးရနဲ့ အကူအညီပေးရေးအဖွဲ့တွေ ပူးပေါင်းပြီး ရိုဟင်ဂျာဒုက္ခသည်တွေကို ဒီကနေ့ စတင်ကာ ကိုဗစ်ကာကွယ်ဆေးတွေ ထိုးနှံပေးနေပါတယ်။ 

    ကော့ဆက်ဘဇားခရိုင်မှာ မြန်မာနိုင်ငံက ထွက်ပြေးလာရတဲ့ ရိုဟင်ဂျာဒုက္ခသည် ၁ သန်းလောက် ရှိနေတာပါ။ 

    ဘင်္ဂလားဒေ့ရှ်အစိုးရရဲ့ နိုင်ငံတစ်ဝှမ်း ကိုဗစ်ကာကွယ်ဆေးထိုးရေး စီမံကိန်း တစ်စိတ်တစ်ပိုင်းအဖြစ် ရိုဟင်ဂျာ ဒုက္ခသည်စခန်း ၃၄ ခုမှာ ကာကွယ်ဆေး ထိုးပေးနေတာဖြစ်ပါတယ်။ ဒီအစီအစဉ်ကို ကုလသမဂ္ဂနဲ့ ပူးပေါင်းဆောင်ရွက်တာဖြစ်ပြီး ဘင်္ဂလားဒေ့ရှ် လခြမ်းနီအဖွဲ့နဲ့ စေတနာ့ဝန်ထမ်း ၅၀၀ လောက် ပါဝင်ကူညီပေးနေကြပါတယ်။

    ဘင်္ဂလားဒေ့ရှ်ဟာ လက်ရှိမှာ ကူးစက်ပြန့်နှံ့လွယ်တဲ့ ပုံပြောင်းကိုဗစ် Delta ဒဏ်ကို ခံနေရတာပါ။ 

    ရိုဟင်ဂျာခေါင်းဆောင်တွေ၊ ဒုက္ခသည်စခန်းက ကျန်းမာရေးဝန်ထမ်းတွေ၊ အသက် ၅၅ နှစ်အထက်တွေ ပထမဦးစားပေးစာရင်းမှာ ပါဝင်ပါတယ်။ ပထမအသုတ်မှာ လူ ၆၅၀၀၀ လောက် ထိုးပေးဖို့ စီစဉ်ထားတယ်လို့ ကုလသမဂ္ဂ ဒုက္ခသည်အကူအညီပေးရေးအဖွဲ့ UNHCR က ပြောပါတယ်။ 

    ဘင်္ဂလားဒေ့ရှ်လူဦးရေ စုစုပေါင်း သန်း ၁၆၀ ရှိရာမှာ ၅ ရာခိုင်နှုန်းအောက်သာ ကာကွယ်ဆေးထိုးထားနိုင်ပြီး ဝယ်ထားတဲ့ AstraZeneca ကာကွယ်ဆေးကို အိန္ဒိယက ပေးပို့ဖို့ နောက်ကျတာကြောင့် ဧပြီလကစတင်ကာ ဆေးထိုးမှုကို ခေတ္တ ရပ်ဆိုင်းခဲ့ရပါတယ်။

    လက်ရှိမှာတော့ ဘင်္ဂလားဒေ့ရှ်ဟာ ကာကွယ်ဆေးအများအပြား ရရှိအောင် ဆောင်ရွက်ထားနိုင်ပြီး ကာကွယ်ဆေးထိုးမှုကို စနေနေ့က ပြန်လည်စတင်ခဲ့ကာ ၂ ရက်အတွင်းမှာပဲ လူ ၂ သန်းကို ထိုးပေးနိုင်ခဲ့ပါတယ်။ 

    Ref: AP