စက်တင်ဘာ ၂၀၊ ၂၀၁၃
M-Media
လင်းလင်း
လားရှိုး ။ ။ ရှမ်းပြည်နယ်မြောက်ပိုင်း လားရှိုးမြို့ သိန္နီလမ်းမကြီးပေါ်တွင် မောင်းနှင်လာသော ကုန်တင်ကားကြီးတစ်စီးမှ ဘရိတ်ပေါက်ပြီး အရှိန်မထိန်းနိုင် သောကြောင့် ကုန်းဆင်းတလျှောက် ယာဉ်များအား မနေ့က နေ့လည် ၃-နာရီခွဲခန့်က တိုက်မိခဲ့သော ယာဉ်တိုက်မှု ဖြစ်ပွားခဲ့ကြောင်း သတင်းရရှိသည်။
၎င်းကုန်တင်ကားကြီးမှာ မန္တလေး မူဆယ်လမ်း တလျှောက်မောင်းနှင်လာပြီး လားရှိုးမြို့ မြို့တော်ခန်းမ အလွန်တွင် ဘရိတ်ပေါက်ကာ ကားအရှိန်မထိန်းနိုင်တော့ပဲ ကုန်းဆင်း တလျှောက်ရှိ ကား(၁၀)စီးနှင့် မော်တော်ဆိုင်ကယ် (၁)စီးအား ဆက်တိုက် ဆင့်၍ တိုက်မိခဲ့ကြောင်း သိရသည်။
အဆိုပါ ယာဉ်တိုက်မှုကြောင့် အသက်အန္တရာယ် ထိခိုက်မှုများ မရှိခဲ့သော်လည်း ထိခိုက်ဒဏ်ရာရမှုနှင့် ပျက်စီး ဆုံးရှုံးမှုများရှိခဲ့ပြီး ယာဉ်မောင်းအား လားရှိုးမြို့ အမှတ်(၁) ရဲစခန်းမှ ပုဒ်မ ၂၇၉/၃၃၈ ဖြင့် အမှုဖွင့်အရေးယူထားကြောင်း သိရသည်။
ထိုကုန်တင်ကားကြီးသည် မူဆယ်မြို့သို့ တင်ပို့ရန် နှမ်းများ တင်ဆောင်ကာ မန္တလေးမြို့မှ မောင်းနှင်လာခြင်းဖြစ်ကြောင်းလည်း သိရသည်။
Leave a Reply
You must be logged in to post a comment.