News @ M-Media

နိုဝင်ဘာ ၁ အားကစားသတင်းများ

နိုဝင်ဘာ ၁၊ ၂၀၁၃
M-Media

ကာတာတွင်ပြသထားသည့် ဇီဒိန်း၏ ရုပ်ထုအား ပြန်လယ်ဖယ်ရှားခဲ့

အကြမ်းဖက်မှုကို အားပေးနေခြင်းဖြစ်သည်ဟု ဘာသာရေးနှင့် လူမှုရေးအရ မကျေနပ်မှုများ ပေါ်ပေါက်လာသောကြောင့် ပြင်သစ် ဂန္တ၀င်ဘောလုံးသမား ဇီဒိန်း၏ ခေါင်းဖြင့် တိုက်ခဲ့သော ရုပ်ထုအား ကာတာနိုင်ငံက ပြန်လည် ဖယ်ရှားပေးခဲ့သည်ဟု သိရသည်။

၅ မီတာအမြင့်ရှိသည့် အဆိုပါကြေး ရုပ်ထုမှာ ၂၀၀၆ ခုနှစ်ကမ္ဘာ့ဖလားပြိုင်ပွဲ ဗိုလ်လုပွဲတွင် ပြင်သစ်ကွင်းလယ်လူ ဇီဒိန်းက အီတလီနောက်ခံလူ မာကို မာတာရာဇီအား ခေါင်းဖြင့်တိုက်ခဲ့သော အပြုအမူအား ပုံဖော်ထုလုပ်ထားခြင်းဖြစ်ပြီး အောက်တိုဘာ ၃ ရက်နေ့တွင် ဖွင့်လှစ်ခဲ့ခြင်းဖြစ်သည်။ ထိုရုပ်တုအား အလ်ဂျီးရီးယားဖွား ပြင်သစ်နိုင်ငံသား ပန်းပုပညာရှင် အဒီလ် အဘ်ဒက်စ်စီမ်းက ၂၀၁၂ ခုနှစ် ထုလုပ်ခဲ့ခြင်းဖြစ်ပြီး ကာတာနိုင်ငံသို့ သယ်ဆောင်လာခြင်း မပြုမီ ပဲရစ်ရှိ Pompidou စင်တာတွင် ပြသခဲ့ပြီး ကာတာတွင် ကျင်းပပြုလုပ်မည့် ၂၀၂၂ ကမ္ဘာ့ဖလားပွဲ ကြော်ငြာအဖြစ် ကာတာ အာဏာပိုင်များက ယူဆောင်လာခဲ့ခြင်းဖြစ်သည်။

သို့သော်လည်း ထိုရုပ်ထုအားဖွင့်လှစ်ပြီး သီတင်းပတ်အနည်းအငယ်အကြာတွင်ပင် ဘာသာရေး အဖွဲ့အစည်းများက ထိုရုပ်တုမှာ ရုပ်တုဆင်းတု ကိုးစား ယုံကြည်မှုကို အားပေးသကဲ့သို့ဖြစ်နေပြီး၊ ရုပ်တု၏ ဟန်ပန်မှာလည်း အကြမ်းဖက်မှုကို မြှင့်တင်ပေးရာ ရောက်နေသည်ဟု ဝေဖန်ခဲ့ကြပြီး၊ ရုပ်တုအား ဖယ်ရှားပစ်ရန် ဖိအားပေးခဲ့ကြသောကြောင့် ပြန်လည်ဖယ်ရှားခဲ့ခြင်းဖြစ်သည်။

Ref: OnIslam

Qatar Removes Zidane’s Infamous Statue———————————

ပြင်သစ်ကလပ်များရှိ လစာမြင့်ဘောလုံးသမားများ ၀င်ငွေ ၇၅ ရာခိုင်နှုန်းကို အခွန်ဆောင်ရမည်

လစာမြင့်ကစားသမားများအား မြင့်မားသောဝင် အခွန်များကောက်ခံရန် စီစဉ်မှုကို ပြန်လည်စဉ်းစားရန်အတွက် ပြင်သစ်ရှိ ဘောလုံးကလပ် အသင်းများနှင့် ပြင်သစ် သမ္မတတို့၏ ဆွေးနွေးမှုမှာ အောင်မြင်ခဲ့ခြင်းမရှိဟုသိရသည်။

ထိုဝင်ငွေခွန်သတ်မှတ်ချက်အား ပြင်ဆင်မပေးပါက ယခုလအတွင်း ကစားမည့် ဘောလုံးပွဲများအား မကစားဘဲ သပိတ်မှောက်မည်ဟု ကလပ်အသင်းများက ပြောကြားထားသော်လည်း ယမန်နေ့ကပြုလုပ်ခဲ့သော အဆိုပါဆွေးနွေးမှုတွင် ပြင်သစ်သမ္မတ ဖရန်စီအို့စ် ဟော်လန်ဒေးက တစ်နှစ်လျှင် ယူရို ၁ သန်းထက် ၀င်ငွေရရှိသည့် ဘောလုံးသမားများအား ၇၅ ရာခိုင်နှုန်းအခွန်ကောက်ခံမည့်ကိစ္စအား ပယ်ဖျက်ရန် အစီအစဉ်မရှိဟု ပြောကြားခဲ့သည်။

ပဲရစ်မြို့ရှိ Elysee နန်းတော်တွင်ပြုလုပ်ခဲ့သည့် ထိုဆွေးနွေးမှုအပြီးတွင် ပြင်သစ်ဘောလုံးအဖွဲ့ချုပ်ဥက္ကဌဖြစ်သူ နိုအယ်လ်လီဂရာအီတ်က ဟော်လန်ဒေးမှာ ၎င်းတို့၏ တောင်းဆိုမှုအား မလိုက်လျောခဲ့ကြောင်း၊ အနာဂတ်တွင် မည်ကဲ့သို့ ဆက်လက်ဖြစ်မည်ကို မသိကြောင်း ပြောကြားခဲ့သည်။

ထိုကဲ့သို့ ပြောကြားလိုက်ခြင်းမှာ နိုဝင်ဘာ ၂၉ ရက်မှ ဒီဇင် ၂ ရက်နေ့အထိ ပြုလုပ်မည့် ဘောလုံးပွဲများအား မကစားဘဲ သပိတ်မှောက်ရန် စီစဉ်ထားသည့် ဘောလုံးအသင်းများ၏ ဆုံးဖြတ်ချက်အား ပိုမိုတွန်းအားပေးသကဲ့သို့ ဖြစ်သွားစေသည်။

Ref:aljazeera

——————————————

ချယ်ဆီးအသင်းက ၎င်းအား ယုံကြည်မှုမရှိခဲ့ခြင်းကြောင်း လီဗာပူးလ်အသင်းသို့ ပြောင်းရွှေ့ခဲ့ခြင်းဖြစ်ကြောင်း စတားရစ်ခ်ျဖွင့်ဟ

ယခုအချိန်အထိ လီဗာပူးလ်အသင်းနှင့် ၂၄ ပွဲကစားခဲ့ပြီး ၂၁ ဂိုး သွင်းယူပေးထားသည့် တိုက်စစ်မှူး စတားရစ်ချစ်က ချယ်ဆီးအသင်းတွင်ရှိနေစဉ် အသင်းက ၎င်းအား မယုံကြည်ခဲ့သောကြောင့် လီဗာပူးလ်အသင်းသို့ ပြောင်းရွှေ့ရန် ဆုံးဖြတ်ခဲ့ခြင်းဖြစ်ကြောင်း ပြောကြားခဲ့သည်။

လီဗာပူးလ်အသင်းတွင် ပြသသောခြေစွမ်းကောင်းများကြောင့် အင်္ဂလန်အသင်း၏ နံပါတ် ၉ ဂျာစီအား ၀င်ခွင့်ရခဲ့သော စတားရစ်ချစ်မှာ ချယ်ဆီးအသင်းတွင် ၄ နှစ်ကြာကစားခဲ့ပြီး ယခုနှစ် ဇန်န၀ါရီလတွင်မှ လီဗာပူးလ်အသင်းသို့ ရောက်ရှိလာခဲ့ခြင်းဖြစ်သည်။

သူ့အားယုံကြည်သည့် နည်းပြလက်အောက်တွင် ကစားနေရခြင်းမှာ မတော်တဆဖြစ်ရပ်မဟုတ်ကြောင်း ပြောကြားခဲ့သည့် စတားရစ်ခ်ျက

“ကျွန်တော်ဘာလိုအပ်တယ်ဆိုတာ ဘရန်ဒန်ရော်ဂျာ(လီဗာပူးလ်နည်းပြ)က သိပါတယ်။ တိုက်စစ်မှူးအဖြစ်ကစားဖို့ ယုံကြည်ချက်ကို ကျွန်တော်လိုအပ်နေတာပါ။ ချယ်ဆီးမှာ အဲဒီယုံကြည်မှုမျိုးကို ကျွန်တော်မရခဲ့ပါဘူး” ဟု ပြောကြားခဲ့သည်။

Ref:mirror.

 

Comments

Leave a Reply