မေ ၇၊ ၂၀၁၅
M-Media
– ဒီနေ့မနက် နျူးကမ့်မှာ ကစားခဲ့တဲ့ ချန်ပီယံလိဂ် ဆီမီးဖိုင်နယ် ပထမအကျော့မှာ အသင်းဟောင်းကို ပြိုင်ဘက်အနေနဲ့ ပြန်လည်ရင်ဆိုင်ခဲ့ရတဲ့ ဂွါဒီယိုလာတစ်ယောက် မျက်နှာပန်းမလှခဲ့ပါဘူး။
၂၀၁၃ ခုနှစ်ဆီမီးဖိုင်နယ်တုန်းက နှစ်ကျော့ပေါင်း ၇ ဂိုးပြတ်နဲ့ ဘာကာကို ဘိုင်ယန်တို့ ဖြုတ်ချနိုင်ခဲ့ဖူးပေမယ့် ဒီနေ့ပွဲမှာတော့ လုံးဝ ကွာခြားသွားခဲ့ပါတယ်။ ပွဲအစကတည်းက ဘာကာတို့ တရပ်စပ် ထိုးဖောက်တိုက်စစ်ဆင်ခဲ့ပြီး ဘိုင်ယန်ဂိုးသမား နျူအာ ကောင်းလွန်းတာကြောင့်သာ ဒီထက်ပိုပြီး ဂိုးမပြတ်ခဲ့တာ ဖြစ်ပါတယ်။
ဘိုင်ယန်ကတော့ တစ်ပွဲလုံးမှာ အပိုင်ကန်သွင်းခွင့် ၁ ကြိမ်တောင် မရခဲ့ပါဘူး။ အိမ်ရှင်တို့ရဲ့ ခြိမ်းခြောက်မှုကို ဘိုင်ယန်တို့ ဒုတိယပိုင်းအထိ အကောင်းဆုံး ကာကွယ်ထားနိုင်ခဲ့ပေမယ့် ၇၇ မိနစ်မှာ ဂိုးစပေးလိုက်ရပါတယ်။ ဒီဂိုးကိုတော့ ဒီပွဲရဲ့ အကောင်းဆုံး ကစားသမားဖြစ်ခဲ့တဲ့ မက်ဆီက သွင်းယူပေးခဲ့တာဖြစ်ပြီး မိနစ် ၈၀ မှာလည်း သူကပဲ နောက်ထပ်တစ်ဂိုး ထပ်သွင်းပေးခဲ့ပါတယ်။ ပွဲအပြီး နာကျင်အချိန်ပို နောက်ဆုံး မိနစ်မှာတော့ မက်ဆီရဲ့ ဖန်တီးပေးပို့မှုကတစ်ဆင့် နေးမာက တတိယမြောက်ဂိုးကို သွင်းယူပေးခဲ့ပါတယ်။
ဘာကာတို့ကတော့ နောက်တစ်ဆင့်တက်ရေး တော်တော်လေး အခြေအနေကောင်းသွားပြီး ဒုတိယအကျော့မှာ ဘိုင်ယန် ဖောင်ဖျက်ကစားရပါလိ့မ်မယ်။
ဂွါဒီယိုလာက မိမိတို့အသင်းဟာ အချိန်အတိုင်းအတာတစ်ခုအထိ ကောင်းခဲ့ပေမယ့် မက်ဆီက သူ့ရဲ့အဆင့်အတန်းကို ပြသသွားခဲ့တယ်လို့ ပွဲအပြီးမှာ ပြောကြားခဲ့ပါတယ်။
“ဘာကာဟာ သိပ်ကောင်းပါတယ်။ သူတို့ လိုချင်တိုင်း နေရာလွတ်တွေကို ရှာလို့ရပါတယ်။ ဒါဟာ သူတို့အသင်းရဲ့ ပါရမီဖြစ်ပြီး ကျွန်တေ်ာတို့အတွက် အရှုံးကို ဖြစ်စေခဲ့တာပါပဲ။ နျူးကမ့်မှာ ကစားရတာ သိပ်ကို ခက်ခဲပါတယ်။ ဒါပေမယ့် ဘာကာရဲ့ ပထမဆုံးဂိုး မရခင်အထိ ကျွန်တော်တို့က ပွဲကို ထိန်းချုပ်နိုင်ခဲ့တယ်လို့ ကျွန်တော်ထင်ပါတယ်။ အဲဒီနောက်မှာတော့ ကျွန်တော်တို့အသင်း
မထိန်းနိုင်တော့ပါဘူး။ ဒါပေမယ့် ကစားသမားတွေကို ကျွန်တော် အပြစ်တင်မှာ မဟုတ်ပါဘူး။ အသင်းဟာ ဒီနှစ်အတွင်းမှာ ခက်ခဲတဲ့ အခြေအနေတွေကို ဖြတ်သန်းခဲ့ရပါတယ်” လို့ ဂွါဒီယိုလာက ဆိုပါတယ်။
ဘာကာနည်းပြ လူးဝစ်အန်းရစ်ကတော့ တစ်သင်းလုံးကို ချီးကျူးခဲ့ပါတယ်။
“ဂွါဒီယိုလာရဲ့ နည်းစနစ်တွေဟာ သူ့ရဲ့ပုံစံ၊ သူ့ရဲ့ဒဿနနဲ့ သူ့ရဲ့အသင်းအနေအထားအတိုင်း ဖြစ်သလို့ ကျွန်တော်တို့ကလည်း အမြဲတမ်းကစားနေကြအတိုင်း ကစားခဲ့တာပါပဲ။ မက်ဆီက ကျွန်တော့်ကို ထွေထွေထူးထူး မအံ့သြစေခဲ့ပါဘူး။ သူ့မှာ ပြင်းပြတဲ့ဆန္ဒနဲ့ မွတ်သိပ်မှုတွေ ရှိပါတယ်။ ဒါပေမယ့် မက်ဆီကသာ အသင်းရဲ့ တစ်ဦးတည်းသော ဗိသုကာလို့ ကျွန်တော် ပြောမှာ မဟုတ်ပါဘူး။တစ်သင်းလုံးရဲ့ စွမ်းဆောင်ရည်က လက်ဖျားခါလောက်စရာဖြစ်ပြီး အဓိကတစ်ချက်က ကျွန်တော်တို့ တစ်ဂိုးမှ မပေးလိုက်ရတာပါပဲ။ ကျွန်တော်တို့ အခု ဗိုလ်လုပွဲနဲ့ နည်းနည်း ပိုနီးလာပါပြီ။ ဒါဟာ ပြည့်စုံတဲ့ရလဒ် ဖြစ်ခဲ့ပြီး ဘာလင်နဲ့ ပိုနီးစေခဲ့ပါတယ်။ ဒါပေမယ့် ကျွန်တော်တို့ ကျော်ဖြတ်ဖို့ ဒုတိယအကျော့ ရှိနေပါသေးတယ်” လို့ အန်းရစ်က ပွဲအပြီးမှာ ပြောကြားခဲ့ပါတယ်။
ဘိုင်ယန်နဲ့ ဘာစီလိုနာတို့ရဲ့ ဒုတိယအကျော့ကိုတော့ လာမယ့် အင်္ဂါနေ့ညမှာ မြူးနစ်မှာ ကစားမှာဖြစ်ပါတယ်။
Leave a Reply
You must be logged in to post a comment.