ရန်ကုန်ရေမကြီးရေး ငွေကျပ် ၁ ဘီလီယံ အသုံးပြု ဆောင်ရွက်နေ

ဇွန် ၂၃၊ ၂၀၁၆
M-Media

– မြို့တွင်း ၆ မြို့နယ်အပါအ၀င် ရန်ကုန်မြို့ရှိ မြို့နယ်ပေါင်း ၁၅ ခုတွင် ရေကြီးရေလျှံမှု မဖြစ်ပေါ်စေရေးအတွက် ရေမြောင်းများ ရှင်းလင်းရေးလုပ်ငန်းများကို ငွေကျပ် ၁ ဘီလီယံ အသုံးပြု၍ ဆောင်ရွက်နေသည်ဟု သိရသည်။

ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ပထမဦးစားပေးလုပ်ငန်းအဖြစ် သတ်မှတ်ထားသည့် အဆိုပါစီမံကိန်းကို ပြည်ထဲရေးဝန်ကြီးဌာန၏ အထွေထွေ အုပ်ချုပ်ရေး ဦးစီးဌာနမှတစ်ဆင့် ပုဂ္ဂလိက လုပ်ငန်းရှင်များဖြင့် ဆောင်ရွက်နေသည်ဟု ရန်ကုန် အရှေ့ပိုင်းခရိုင် အုပ်ချုပ်ရေးမှူး ဦးသောင်းတင်ထွေးက ပြောကြားခဲ့သည်။

ထို့ပြင် ရေမြောင်းများပိတ်ဆို့မှုမှာလည်း အလွန်ဆိုးဝါးသည်ဟု ၎င်းက ဆိုသည်။

“မြောင်းတစ်ခုဆိုရင် ဆိုဖာတစ်လုံးနဲ့ ပိတ်နေတာပါ။ ၅ ပေအနက်ရှိတဲ့ မြောင်းတစ်ခုမှာ နုန်းတွေက ၄ ပေလောက် ရှိနေပါတယ်။ ကျွန်တော်တို့က ပုတ်ပြတ်ပေးပြီး ခိုင်းသလို၊ ရပ်ကွက်အုပ်ချုပ်ရေးအဖွဲ့ကတစ်ဆင့်လည်း ခေါ်ပြီးခိုင်းပါတယ်။ ကုန်ကျစားရိတ်ကိုတော့ ရန်ကုန်မြို့တော် စည်ပင်သာယာရေးကော်မတီရဲ့ ဘတ်ဂျက်ကနေ သုံးပါတယ်”

အနောက်ပိုင်းခရိုင် အုပ်ချုပ်ရေးမှူး ဦးသန်းထွဋ်ဦးကလည်း မိမိတို့မှာ ရေမြောင်းများအခြေအနေစာင့်ကြည့်သည့် ကော်မတီတစ်ခုကို ဖွဲ့စည်းထားသည်ဟု ပြောကြားခဲ့သည်။

လက်ရှိအချိန်တွင် ရန်ကုန်မြို့ ရေကြီးရေလျှံသည့်ပြဿနာများကို လွှတ်တော်သို့ တင်ပြနိုင်ရန်အတွက် ဒေသတွင်း လွှတ်တော်ကိုယ်စားလှယ်အချို့မှာ အခြေအနေကို စောင့်ကြည့်နေကြသည်ဟု သိရသည်။

Ref : mmtimes