NVC လက်ခံသင့် /လက်မခံသင့် ? မြန်မာမွတ်စလင်မ် လူအဖွဲ့အစည်းမှ တုံပြန်မှုများ (၂)

ဒီဇင်ဘာ ၃၀ ၊၂၀၁၆
M-Media
စုစည်းတင်ဆက်သူ- သီဟ

နိုင်ငံသားစိစစ်ခံရမည့်သူ၏ သက်သေခံကတ်ပြား Identity Card for National Verification (NV Card) ထုတ်ပေးခြင်းကိစ္စနှင့် ပတ်သက်ပြီး  အများဆုံးရိုက်ခတ်မှုတွေရှိနေတဲ့ မြန်မာနိုင်ငံသား အစ္စလာမ်ဘာသာဝင်တွေ အကြား အမြင်တွေကို သိရအောင် မြန်မာမွတ်စလင်မ် အဖွဲ့အစည်းများမှ တာဝန်ရှိခေါင်းဆောင်များ၊ ဥပဒေပညာရှင်များနှင့် တက်ကြွလှုပ်ရှားသူများကို အမြင်များကို စုစည်းဖော်ပြလိုက်ပါတယ်။

ဦးဝဏ္ဏရွှေ ( တွဲဘက် အတွင်းရေးမှူးချုပ်၊ အစ္စလာမ်ကောင်စီဌာနချုပ်)

နိုင်ငံသား စိစစ်ရေးကတ်ပြားလျှောက်ထားသူတွေကို NV Card ထုတ်ပေးတာဟာ နောက်ပိုင်း ဒီကတ်ပြားကိုင်ဆောင်ထားသူတွေ အားလုံးကို သိမ်းကျုံးပြီး တရား မဝင် ဝင်ရောက်လာသူတွေလို့ အထင်မှားပြီး  ပြည်သူတွေကြား မှာ စိတ်ဝမ်းကွဲစရာ ဖြစ်ပေါ်လာလိမ့်မယ်။

အရင်တုန်းကလည်း နိုင်ငံသားစိစစ်ခြင်းကိစ္စကို အပြီးအပြတ် ဆောင်ရွက်ပေးခြင်း မပြုခဲ့ဘဲ ယာယီသက်သေခံကတ်ပြား(White Card)များကို ထုတ်ပေးခဲ့ တဲ့အတွက်ကြောင့် ပြည်သူများအကြား စိတ်ဝမ်းကွဲခဲ့ရပြီး အပြစ်မဲ့သူတွေရဲ့အသက် အိုးအိမ် စည်းစိမ်တွေ ဝမ်းနည်းဖွယ်ရာ ဆုံးရှုံးခဲ့ရတယ်။

နိုင်ငံ၏ ပုံရိပ်ကို ထိခိုက်ခဲ့ရပြီး နိုင်ငံဖွံဖြိုးတိုးတက်မှုကို အဟန့်အတားဖြစ်စေခဲ့ရလို့  နိုင်ငံသား ပြည်သူအားလုံး နစ်နာဆုံးရှုံးမှုကြုံတွေ့ခဲ့ရပါတယ်။

နိုင်ငံသားစိစစ်ရေး ကတ်ပြားလျှောက်ထားသူတွေကို NV Card ထုတ်မပေးဘဲ ကျောသားရင်သားမခွဲ တိတိကျကျ  မှန်မှန်ကန်ကန် စိစစ်ပြီး တည်ဆဲဥပဒေများနဲ့အညီ နိုင်ငံသားဖြစ်သူတွေကို ကြန့်ကြာမှုမရှိဘဲ အမြန်ဆုံး နိုင်ငံသား စိစစ်ရေးကတ်ပြား ထုတ်ပေးဖို့ အရေးတကြီးလိုအပ်နေပါတယ်။

အရင်အစိုးရလက်ထက်က မိုးပွင့်စီမံချက်၊အခု အစိုးရ လက်ထက် သစ္စာစီမံချက်တွေနဲ့ နိုင်ငံသားစိစစ်ရေးကတ်ပြားနှဲ့ အိမ်ထောင်စု စာရင်းတွေကို ကွင်းဆင်း  ဆောင်ရွက်ပေးတဲ့နေရာမှာ  အစ္စလာမ်ဘာသာဝင်တွေကို ချန်လှပ်ထားခဲ့တဲ့ကိစ္စနဲ့ အစ္စလာမ်ဘာသာဝင်တွေ  နိုင်ငံသားစိစစ်ရေးကတ်ပြား လျှောက်ထားတဲ့အခါ၊ အိမ်ထောင်စုစာရင်း ရွှေ့ပြောင်းတဲ့အခါ ၊ မွေးတိုးစာရင်း ရေးသွင်းတဲ့အခါမှာလည်း  ကြန့်ကြာမှု ကြုံတွေ့နေရပါတယ်။

နိုင်ငံသား စိစစ်မှု ကြန့်ကြာတဲ့ အတွက်ကြောင့်ပညာသင်ကြားရေးကိစ္စ အခက်အခဲရှိသူတွေကို  အလျင်အမြန် ဦးစားပေး စိစစ်ပေးဖို့လိုပါတယ်။

နိုင်ငံသား စိစစ်တဲ့ကိစ္စ၊ အိမ်ထောင်စုစာရင်း ရွှေ့ပြောင်းတဲ့ ကိစ္စ၊ မွေးတိုး စာရင်းသွင်းတဲ့ကိစ္စများတွေကို တိကျမှန်ကန် မြန်ဆန်စေဖို့ အမြန်ဆုံး ပြုပြင်ပြောင်းလဲ စီမံချက်ချဆောင်ရွက်ပေးဖို့အရေးကြီးပါတယ်။

ဒါကြောင့် မြန်မာနိုင်ငံလုံးဆိုင်ရာ အစ္စလာမ်ဘာသာရေးအဖွဲ့ကြီးက ပြည်သူတွေကြားမှာ စိတ်ဝမ်းကွဲစရာဖြစ်ပေါ်လာစေနိုင်တဲ့ NV Card ထုတ်ပေးနေ တဲ့ကိစ္စ။
တည်ဆဲဥပဒေများနဲ့အညီ နိုင်ငံသားဖြစ်သူတွေ ကြန့်ကြာမှုမရှိစေဘဲ နိုင်ငံသားစိစစ်ရေးကတ်ပြား ရရှိစေရေးကိစ္စ တွေကို နိုင်ငံတော် အကြီးအကဲတွေနဲ့သက်ဆိုင်ရာဝန်ကြီးဌာနတွေကို ရှင်းလင်းတင်ပြတောင်းဆိုနေတာဖြစ်ပါတယ်။

ဒီကိစ္စတွေကို အစ္စလာမ်ဘာသာဝင်တွေလည်း အရှိ အမှန်အတိုင်း  နားလည်သိရှိအာင် ရှင်းလင်းတင်ပြနေပါတယ်။

ကိုမြအေး

ဘာသာခြား (မွတ်စလင်မ်)တစ်ယောက်က မှတ်ပုံတင်သွားလုပ်ရင် ဘယ်တော့မှ အလွယ်တကူ မရဘူး။ မိဘတွေမှာ အထောက်အထားပြည့်စုံရင်တောင် စီစစ်မယ်ဆိုပြီး နှစ်နဲ့ချီခေါက်ထားကြတယ်။တချို့ဆို မှတ်ပုံတင်မရလို့ ဘွဲ့လက်မှတ်မရတာတွေလည်းရှိတယ်။ ဒါတွေက မလိုအပ်တဲ့အမုန်းပွားမှုတွေကို ထိုးဆွပေးနေသလိုဖြစ်နေတယ်။ ကျွန်တော်တို့က နိုင်ငံခြားသားတွေကို နိုင်ငံသားကဒ်ပေးပါလို့ တောင်းဆိုနေတာ မဟုတ်ဘူး။ နိုင်ငံသားဖြစ်ခွင့်ရှိသူတွေ နိုင်ငံသားတွေကိုတော့ ထပ်ပြီး NVC ဘာညာဆိုပြီး ဇာတ်လမ်းမရှုပ်ပါနဲ့။
(DVB သတင်းဌာနသို့ ပြောကြားချက် ၂၈.၁၂.၂၀၁၆)

ဦးအုန်းမောင် (တရားလွှတ်တော်ရှေ့နေ)

မြန်မာနိုင်ငံ အတွင်းနှစ်ပေါင်းများစွာနေထိုင်လျက်ရှိပြီး နိုင်ငံသားစိစစ်ပေးခြင်း မရှိသဖြင့် လည်းကောင်း၊လျှောက်သော်လည်းနည်း အမျိုးမျိုးဖြင့်ငြင်းပယ် ၊လစ်လျူ ရှုခံခဲ့ရသဖြင့် လည်းကောင်း၊ မည်သည့် အထောက်အထားမျှ ကိုင်ဆောင် ခွင့်မရခဲ့ကြသော
နိုင်ငံခြားသား မဟုတ်သည့်၊ ခိုးဝင်မဟုတ်သည့်သူများကိုလည်း ၁၉၈၂ ဥပဒေ ၁၉၈၃ နည်းဥပဒေတို့အရသာ စိစစ်ပေးသင့်ပါသည်။

၁၉၅၁ နည်းဥပဒေ အပိုဒ် ၁၃(၁)အရ ယာယီသက်သေခံလက်မှတ်လုပ်ငန်းစဉ်မရှိတော့သဖြင့် အပိုဒ် ၁၃(၄)အရ NVC လုပ်ငန်းစဉ်လည်း မလိုအပ်တော့ဟု ထင်မြင်ယူဆပါသဖြင့် NVC ထုတ်ပေးရန် မလိုအပ်တော့ဟုသဘောရိုးဖြင့် ယုံကြည်ပါသည်။

(U Ohn Maung ၏ FB စာမျက်နှာတွင်ဖော်ပြချက်မှ ကောက်နှုတ်ဖော်ပြခြင်းဖြစ်ပါသည်။ )

ဆက်စပ်သတင်းနှင့် ဆောင်းပါးများ ဖတ်ရှုဖို့
———————————————

• NVC လက်ခံသင့် /လက်မခံသင့် ? မြန်မာမွတ်စလင်မ် လူအဖွဲ့အစည်းမှ တုံပြန်မှုများ (၁)
  http://www.m-mediagroup.com/news/63862
• NVC ထုတ်ပေးခြင်း ကိစ္စ လ.ဝ.က နှင့် ဆွေးနွေးခဲ့မှု အစ္စလာမ်အဖွဲ့ကြီးမှ သတင်းထုတ်ပြန်
  http://www.m-mediagroup.com/news/63643
• NVC ကိစ္စ မြန်မာမွတ်စလင်မ် အရပ်ဖက် အဖွဲ့အစည်းအချို့ သဘောထားထုတ်ပြန်
  http://www.m-mediagroup.com/news/63725
• NO NVC ! (သူ့အမြင်)
  http://www.m-mediagroup.com/news/63359
• NVC နဲ့ ပုဒ်မ-၆၅ ဆက်စပ်လာရင် နိုင်ငံသားဖြစ်ဖို့ အခွင့်အလမ်း နည်းသွားလိမ့်မယ်
  http://www.m-mediagroup.com/news/59912