ကင်ဂျုံအွန်နဲ့ အဆက်အသွယ် ရှိနေသေးဟု ထရမ့်က မိတ်ဆွေများကို ပြောထား

ဖေဖော်ဝါရီ ၁၁၊ ၂၀၂၂
M-Media

-မြောက်ကိုရီးယားခေါင်းဆောင် ကင်ဂျုံအွန်နဲ့ ဆက်အသွယ်ရှိတယ်လို့ အမေရိကန်သမ္မတဟောင်း ဒေါ်နယ်ထရမ့်က သူနဲ့ ပတ်သက်ဆက်နွယ်သူတွေကို ပြောထားကြောင်း ဂျာနယ်လစ် မက်ဂီ ဟာဘာမန်က CNN သတင်းဌာနကို ဖွင့်ဟခဲ့ပါတယ်။

ဟာဘာမန်ဟာ နယူးယောက်တိုင်းမ်စ်သတင်းဌာနရဲ့ သတင်းထောက်တစ်ဦးဖြစ်ပြီး The Confidence Man ဆိုတဲ့ အမည်နဲ့ ထရမ့်အကြောင်း စာအုပ်ရေးထားကာ မကြာခင် ဖြန့်ချီမှာ ဖြစ်ပါတယ်။

အပြန်အလှန်စာတွေပေးပို့ပြီးတဲ့နောက် သူနဲ့ ကင်ဂျုံအွန်တို့ ချစ်သွားကြပြီလို့ ထရမ့်က ၂၀၁၈ ခုနှစ်မှာ ထုတ်ဖော်ပြောဆိုခဲ့ဖူးပါတယ်။ ဒါပေမယ့် ၃ ကြိမ်တွေ့ဆုံခဲ့ရာမှာ နျူလက်နက်စွန့်ဖို့ ကင်ဂျုံအွန်ကို ထရမ့်တစ်ယောက် မစည်းရုံးနိုင်ခဲ့ပါဘူး။

မြောက်ကိုရီးယားခေါင်းဆောင်နဲ့ အဆက်အသွယ်ရှိတယ်ဆိုတဲ့ ထရမ့်ရဲ့စကားကို အတည်ပြုလို့ ရနိုင်မှာမဟုတ်သလို၊ အမှန်ဟုတ်ချင်မှလည်း ဟုတ်လိမ့်မယ်လို့ ဂျာနယ်လစ် ဟာဘာမန်က ဆိုပါတယ်။

“သူ့စကားနဲ့ တကယ်ဖြစ်နေတာတွေ သိပ်မကိုက်တာ အမြဲတမ်းပါပဲ။ ကင်ဂျုံအွန်နဲ့ စာအဆက်အသွယ်ရှိတယ်၊ ဆွေးနွေးတာမျိုးတွေ ရှိတယ်လို့ သူက လူတွေကို လိုက်ပြောနေပါတယ်”

ကင်ဂျုံအွန်က သူနဲ့အဆက်အသွယ်ရှိတဲ့ တစ်ဦးတည်းသော နိုင်ငံခြားခေါင်းဆောင်ဖြစ်တယ်လို့လည်း ထရမ့်က ဆိုပါတယ်။

အမေရိကန်အစိုးရနဲ့ အိမ်ဖြူတော်ကတော့ ဒီကိစ္စနဲ့ပတ်သက်ပြီး မှတ်ချက်မပေးပါဘူး။ အမေရိကန်ဥပဒေအရ သာမန် အမေရိကန်နိုင်ငံသားတစ်ယောက်ဟာ နိုင်ငံခြားအစိုးရ၊ နိုင်ငံခြားခေါင်းဆောင်တွေနဲ့ အစိုးရခွင့်ပြုချက်မရှိဘဲ ဆွေးနွေးညှိနှိုင်းတာဟာ ရာဇဝတ်မှုမြောက်ပါတယ်။

Ref: Reuters