– မွတ်စလင်မယ်ကမ္ဘာ ၂၀၁၄ (World Muslimah Award) ပြိုင်ပွဲ ဇာတ်စင်နောက်တွင် အီရန်ကိုယ်စားပြု အလှမယ်တစ်ယောက် လှပခြင်းနှင့် ညှို့ယူဖမ်းစားနိုင်ခြင်းတို့အကြား ခြားနားချက်ကို ရှင်းပြနေကာ မိမိကိုယ်နေဟန်ထားကိုလည်း ပိုမိုအချိုးကျအောင် ဆောင်ရွက်နေသည်။
အသက် ၂၅ နှစ်အရွယ်ရှိပြီဖြစ်ပြီး စက်မှုဒီဇိုင်နာတစ်ယောက်ဖြစ်သည့် အဆိုပါ အီရန်မယ်က သူမ၏ အချိုးအစားမှာ အလှမယ်တစ်ယောက်ပုံစံမျိုး မဟုတ်သော်လည်း မွတ်စလင်မယ်ပြိုင်ပွဲက ခန္ဓာကိုယ်အလှကို ပြသရခြင်းမျိုး၊ သို့မဟုတ် အဖော်အချွတ်ဖြင့် ယှဉ်ပြိုင်ရခြင်းမျိုး မဟုတ်သည့်အတွက် ၀င်ရောက်ယှဉ်ပြိုင်ရန် ဆုံးဖြတ်ခဲ့ခြင်းဖြစ်သည်ဟု ၀န်ခံပြောကြားခဲ့သည်။
အဆိုပါ ပြိုင်ပွဲကို အင်ဒိုနီးရှား တီဗီအစီအစဉ်ကြေညာသူဟောင်း အီကာရှန်တီက ၂၀၁၁ ခုနှစ်တွင် စတင် ကျင်းပခဲ့ခြင်းဖြစ်သည်။ သူမမှာ ရိုက်ကူးရေးလုပ်ငန်းများအတွင်း ဟီဂျဘ်ဝတ်ဆင်ခြင်း မပြုရဟူသော တားမြစ်ချက်ကြောင့် အလုပ်မှထွက်ခဲ့သူဖြစ်သည်။ ထိုပြိုင်ပွဲ၏ တရားဝင်အမည်မှာ မွတ်စလင်မယ်ကမ္ဘာဆု (World Muslimah Award) ဖြစ်သော်လည်း မွတ်စလင်မယ် (Miss Muslimah) အဖြစ်ကျော်ကြားလူသိများလေသည်။ ထိုသို့ ကျော်ကြားခြင်းမှာ မယ်ကမ္ဘာပြိုင်ပွဲ ပုံစံမျိုးကို အစ္စလာမ့် သွန်သင်ချက်နှင့်အညီ ကျင်းပခြင်းကြောင့်လည်း ဖြစ်ကောင်းဖြစ်နိုင်သည်။
စတင်ကျင်းပကတည်းက အဆိုပါ မွတ်စလင်မယ်ပြိုင်ပွဲမှာ ဟီရိသြတ္တပတရား အပြည့်အ၀ရှိနေသည်ဟု အသက် ၂၆ နှစ်အရွယ် စင်ကာပူမွတ်စလင်မယ် မက်စ်တူရာဟ် ဘင်သီ ဂျာမီလ်က ဆို၏။
`မယ်ကမ္ဘာပြိုင်ပွဲမှာဆိုရင် ပိတ်စနှစ်စပဲဝတ်ထားရပြီး အားလုံးဖော်ထားရတာပါ။ ဒါမျိုးကို ကျွန်မတို့သာသနာက ခွင့်မပြုပါဘူး။ ဒါ့ကြောင့် ဒီပြိုင်ပွဲဟာ မွတ်စလင်အမျိုးသမီးတွေအတွက် သီးသန့်ပြိုင်ပွဲပါပဲ´ ဟု သူမက ပြောကြားခဲ့သည်။
ဘီကီနီဝတ်စုံဖြင့် ဟန်ရေးပြခြင်း၊ ၀ှက်ထားသည့် အရာများကို လိုက်ရှာရခြင်း စသည့် ပြိုင်ပွဲများအစား မွတ်စလင်မယ်ပြိုင်ပွဲတွင် ကုရ်အာန်ကျမ်းတော်မြတ်မှ ပါဒတော်များကို ရွတ်ဖတ်သရဇ္ဈာယ်ခြင်း၊ အစ္စလာမ့်နည်းကျ ဈေးဝယ်ထွက်ခြင်းနှင့် လက်သည်းအရောင်တင်မှုမှာ `ဟရမ်´ ဖြစ်၊ မဖြစ်ကို ဆွေးနွေးငြင်းခုံခြင်း စသည့် ပြိုင်ပွဲများပါဝင်လေသည်။
ကမ္ဘာပေါ်တွင် အစ္စလာမ်ဘာသာဝင်အများဆုံးရှိရာ အင်ဒိုနီးရှား၌ ၂၀၁၁ ခုနှစ်က စတင်ကျင်းပခဲ့သော အဆိုပါပြိုင်ပွဲမှာ ယခုအချိန်တွင် နိုင်ငံတကာအဆင့်၌ ဆွဲဆောင်လာနိုင်သည့် ပြိုင်ပွဲတစ်ခုဖြစ်လာခဲ့ပေပြီ။ ယခုနှစ်တွင် ပြုလုပ်ခဲ့သည့် ပြိုင်ပွဲတွင် ထိုင်း၊ နိုက်ဂျီးရီးယား၊ အီရန်၊ တူနီးရှား၊ ယူကေနှင့် အရှေ့တောင်အာရှ နိုင်ငံများကပါ ၀င်ရောက်ယှဉ်ပြိုင်ကြသည်။
၁၂ ရက်တာ စခန်းပိတ် ယှဉ်ပြိုင်ရသည့် ပြိုင်ပွဲတစ်လျှောက် မွတ်စလင်မယ်များမှာ နံနက် ၅ နာရီထကာ ပြင်ဆင်ရသည်။ ထို့နောက် ၃ လက်မအမြင့်ရှိသည့် ဒေါက်ဖိနပ်ကိုစီးကာ အားလပ်ချိန်နည်းပါသည့် အစီအစဉ်များကို အချိန်မီလုပ်ဆောင်ရင်း တစ်နေ့တာကို ကုန်ဆုံးရလေသည်။ ထိုအစီအစဉ်များထဲတွင် ဆင်းရဲသားရပ်ကွက်သို့ သွားရောက်လေ့လာခြင်း၊ သက်ကြီးဝါကြီးများ၏ အိမ်သို့သွားရောက်ကာ ပြုစုခြင်း၊ ပြိုင်ပွဲအား စပွန်ဆာပေးသူများထံသို့ သွားရောက်လည်ပတ်ခြင်းတို့လည်း ပါဝင်သည်။ ထိုသို့ နိစ္စဓူဝ ဆောင်ရွက်မှုများအတွင်း ဘာသာတရား၏ အဆုံးအမကို လေးစားလိုက်နာမှုနှင့် ပတ်သက်၍လည်း အကဲဖြတ်အမှတ်ပေးလေသည်။
တစ်နေကုန်ပင်ပန်းနွမ်းလျပြီး ညဘက်အနားယူစဉ်အချိန်တွင်လည်း မွတ်စလင်မယ်များမှာ အစ္စလာမ်တွင် မလုပ်အနေရအဖြစ် သတ်မှတ်ထားသည့် ငါးကြိမ်ဝတ်ပြုမှုအလွန် ထပ်ဆောင်းဝတ်ပြုမှုအတွက် နံနက် ၂ နာရီတွင် ထရသည်။ တစ်ခါတစ်ရံတွင် ၎င်းတို့မှာ တစ်ညတာအိပ်စက်ချိန် ၃ နာရီလောက်သာ ရှိလေ၏။ အီရန်မယ်ကမူ သူမအနေဖြင့် တွေးတောဖို့ပင် အချိန်မရဟု ၀န်ခံခဲ့သည်။
`ကမ္ဘာပေါ်က သန်းပေါင်းများစွာသော မွတ်စလင်အမျိုးသမီးတွေရဲ့ ကိုယ်စားပြု စံပြအမျိုးသမီးဖြစ်နိုင်ဖို့အတွက် ကိုယ်ရည်ကိုယ်သွေးကောင်းတွေကို ရရှိဖို့ ကျွန်မတို့ ကြိုးစားနေတာပါ။ တကယ်တော့ မိမိရဲ့ အရည်အချင်းကို စမ်းသပ်တာဖြစ်ပြီး စိတ်ဖိစီးမှုလည်း ရှိပါတယ်။ ဒါပေမယ့် ထိုက်တန်တယ်လို့ ကျွန်မထင်ပါတယ်´
ပါလက်စတိုင်း၊ အီဂျစ်၊ ဂျာမနီနှင့် အမေရိကန်တို့မှ မွတ်စလင်မယ်များကတော့ ဗီဇာအခက်အခဲနှင့် မိသားစုကိစ္စများကြောင့် ထိုပြိုင်ပွဲသို့ ၀င်ရောက်ယှဉ်ပြိုင်နိုင်ခြင်းမရှိခဲ့။ ထို့ကြောင့် မွတ်စလင်မယ်ကမ္ဘာပြိုင်ပွဲဝင် အရေအတွက်မှာ စုစုပေါင်း ၁၈ ဦးသာ ရှိလေသည်။
ကံကောင်းသည့် မွတ်စလင်အမျိုးသမီးတစ်ဦးက ကန်ဒေါ်လာ ၁၀၀၀၀ တန်ဖိုးနှင့် ညီမျှသည့် ရွှေဒင်္ဂါးပြားကို ရရှိမည်။ ထို့ပြင် ရွှေလက်ပတ်နာရီ၊ တောင်ကိုရီးယားသို့ အလည်အပတ် သွားရောက်ခွင့်နှင့် မက္ကာသို့ဟဂ်ျဘုရားဖူးခွင့်များလည်း ရရှိဦးမည်။
ကနဦးပြိုင်ပွဲမှာ အစ္စလာမ့်ဖက်ရှင်များကို ပြသရသည့်ပြိုင်ပွဲဖြစ်ပြီး မွတ်စလင်မယ်များမှာ ထိုအချိန်မှစ၍ လူသားချင်းစာနာထောက်ထားမှုဆိုင်ရာ ရည်ရွယ်ချက်များဖြင့် ပြုလုပ်သော ပြိုင်ပွဲများ၌ တစ်ဆင့်ပြီးတစ်ဆင့် ၀င်ရောက်ယှဉ်ပြိုင်ရလေသည်။
ယခုနှစ်တွင် ပြိုင်ပွဲဝင်များမှာ ပြိုင်ပွဲအသစ်တစ်ခုကို ယှဉ်ပြိုင်ရပြီး ထိုပြိုင်ပွဲမှာ ကမ္ဘာတစ်ဝှမ်းရှိ ၎င်းတို့၏ မွတ်စလင်ညီအကိုမောင်နှမများ၏ လူမှုဘ၀များ ဖွံ့ဖြိုးတိုးတက်ရေးအတွက် ၎င်းတို့၏ အမြင်ကို ချပြရခြင်းဖြစ်သည်။
ကန့်လန့်ကာနောက်ကွယ်တွင်တော့ ဆရာဝန်ဘွဲ့ရကာစ အသက် ၂၆ နှစ်အရွယ် ဘင်္ဂလားဒေ့ရ်ှမယ် သက်စ်နီမာ တာရန်နမ် ခရစ်ရှမာက ရေပန်းအစားဆုံးထဲမှ တစ်ယောက်ဖြစ်သည်။
ခရစ်ရှမာမှာ အမျိုးသမီးရောဂါဆိုင်ရာ ကုသရေးဌာနတွင် အလုပ်များနေသောကြောင့် ၎င်း၏ ပြိုင်ပွဲဝင်ဖောင်ကို နောက်ဆုံးမှ ပေးပို့ခဲ့သူဖြစ်သည်။ ဘင်္ဂလားဒေ့ရ်ှတွင် အမျိုးသမီးများအား မျိုးပွားစက်ပစ္စည်းတစ်ခုအဖြစ် ရှုမြင်မှုကို ပြောင်းလဲပစ်ရန် ယခုပြိုင်ပွဲအား ၀င်ရောက်ယှဉ်ပြိုင်ခြင်းဖြစ်သည်ဟု သူမက ပြောကြားခဲ့သည်။
ထို့ပြင် ဘင်္ဂလားဒေ့ရ်ှအမျိုးသမီးများအတွက် အခြေခံပညာရေးနှင့် ကျန်းမာရေးစောင့်ရှောက်မှု နည်းပါးခြင်းကို တုန်လှုပ်မိသည်ဟုဆိုပြီး မလူးသာမလွန့်သာ အခြေအနေမျိုး ရောက်ရှိနေသောအခါတွင်ပင် မိသားစုများက အမျိုးသမီးများအား လေးစားမှုမရှိဟုလည်း သူမက ဖွင့်ဟခဲ့လေသည်။
`သူတို့ရဲ့ခင်ပွန်းတွေက `ရတယ်။ ငါ နောက်ထပ်မိန်းမတစ်ယောက်၊ သမီးတစ်ယောက် ရနိုင်သေးတယ်။ သူ့ကို ဂရုစိုက်ဖို့ မလိုပါဘူး´ လို့ ပြောကြပါတယ်။ တစ်ချို့တွေဆို သူတို့ရဲ့ ဇနီးသည်တွေ၊ ချွေးမတွေကို ပစ်သွားကြပြီး ဒါမျိုးတွေကို ကျွန်မတို့က ပြုပြင်ရပါမယ်´
အိန္ဒိယမှ အသက် ၂၁ နှစ်အရွယ် နဇက်ရင်းမှာ စိတ်ပညာကျောင်းသူဖြစ်ပြီး အမျိုးသမီး ၂၅ ဦးကို အခမဲ့ ပညာသင်ကြားပေးနေသူဖြစ်သည်။ ပဟေဠိပျြိင်ပွဲတွင် အမှတ်အများဆုံးရခဲ့သူ နက်ဇရင်းက စနေ၊ တနင်္ဂနွေတိုင်း သူမ၏ ကျောင်းသားများကို အင်္ဂလိပ်၊ အူရဒူ၊ ဟင်ဒီ၊ သင်္ချာနှင့် ပုံဆွဲခြင်းအတတ်ပညာကို သင်ပေးနေသူဖြစ်လေသည်။
IS အဖွဲ့မှ ကျူးလွန်သော ရက်စက်ယုတ်မာမှုများက ကမ္ဘာ့သတင်းများ၏ ခေါင်းကြီးပိုင်းတွင် လွှမ်းမိုးနေသည့်အချိန်တွင် မွတ်စလင်မယ်ပြိုင်ပွဲက အစ္စလာမ်နှင့်ပတ်သက်သည့် အပြုသဘောဆောင်သော အကြောင်းအရာများ ဖော်ပြရန်အတွက် အခွင့်အရေးဖြစ်လာနိုင်သည်ဟု စီစဉ်သူများက မျှော်လင့်နေလေ၏။
ဟီဂျဘ်ဝတ်ဆင်မှုကြောင့် ပီအိက်ခ်ျဒီစာတမ်းတင်သွင်းမှုအား ပြင်သစ်တက္ကသိုလ်မှ ပယ်ချမှုကို ခံခဲ့ရသည့် တူနီးရှားမွတ်စလင်မယ်က သူမ၏ မွေးစားနိုင်ငံတွင် အစ္စလာမ်ကြောက်ရောဂါ ပြန့်နှံ့မှုအတွက် ၀မ်းနည်းမိသည်ဟု ပြောကြားခဲ့သည်။
`ပြစ်သစ်မှာ ပုဝါဆောင်းတဲ့အခါ လူတွေဟာ တစ်နည်းတစ်ဖုံနဲ့ ကြည့်ကြပါတယ်။ ဥရောပတစ်ဝှမ်းမှာ ဒါက ပြဿနာပါ။ လူတွေက ရိုးရိုးမွတ်စလင်နဲ့ အကြမ်းဖက်သမားကို မခွဲခြားတတ်ပါဘူး´ ဟု အသက် ၂၅ နှစ်အရွယ်ရှိ အဆိုပါ တူနီးရှားမယ် ဖာသွေမာ ဘင် ဂူဖရာချီက ပြောကြားခဲ့လသည်။
ဘော်ဂျယ်ကျောက်သံပတ္တမြားများဖြင့် ချယ်သထားသည့် အ၀တ်အစားများကို ၀တ်ဆင်ကာ မျက်တောင်တုများဖြင့် မွတ်စလင်မယ်များမှာ အစ္စလာမ့်ဝတ်စုံများနှင့် လှချင်တိုင်းလှနေကြသည်။
အစ္စလာမ်က သတ်မှတ်သော အလှတရားတွင် စိတ်မနောလှပမှုကို ထည့်သွင်းတွက်ချက်ပြီး ဟိဂျဘ်ကလည်း အမျိုးသမီးများ၏ အိနြေ္ဒသိက္ခာအတွက် လိုအပ်လေသည်။ ထိုအချက်များအပြင် မွတ်စလင်မယ်များက မိတ်ကပ်ခြယ်သမှုများအတွက် နာရီအတော်ကြာ ကုန်ဆုံးကြပြီး ၎င်းတို့၏ ရုပ်ပိုင်းဆိုင်ရာ အခြေအနေအတွက် မကြာခဏ ချီးကျူးခြင်းခံရလေသည်။
`အလှမယ်တစ်ယောက်လို ဖြစ်ဖို့တော့ မရည်ရွယ်ပါဘူး။ ဒါပေမယ့် ကြည့်ပျော်ရှုပျော်ရှိအောင်လို့တော့ ပြင်ဆင် ရတာပဲလေ။ ဖျော်ဖြေမှုတစ်ခု ပုံစံမျိုးပေါ့´ ဟု ရယ်ရွှင်ဖွယ်ရာအမူအရာဖြင့် အီရန်မယ်က ပြောကြားခဲ့သည်။
တစ်ချို့မယ်များကတော့ အနည်းငယ် စိတ်ကသိကအောက်ဖြစ်ခဲ့ပြီး မိမိ၏ ထုတ်ကုန်ကို ကြေညာပေးရန်အတွက်သာ အားသန်နေကြသည့် အလှအပ ပစ္စည်း စပွန်စာများကို ဝေဖန်မှုလည်း ရှိခဲ့သည်။ သူတို့က နိုက်ဂျီးရီးယားနှင့် ဘင်္ဂလားဒေ့ရ်ှမယ်တို့အပါအ၀င် အလှမယ်များအားလုံးကို အသားဖြူခရင်မ်ပေးကာ အသုံးပြုခိုင်းခဲ့သည်။
ထိုပြိုင်ပွဲတွင် အမျိုးသမီးများအား စွမ်းရည်မြှင့်တင်ပေးရေးအတွက် ဆွေးနွေးမှုများလည်းရှိခဲ့ပြီး ထိုဆွေးနွေးမှုအတွင်း ကမ္ဘာတစ်ဝှမ်း အမျိုးသမီးအရေးကိစ္စများကိုဆောင်ရွက်နေသော မွတ်စလင်ပညာရှင်များလည်း ပါဝင်ခဲ့လေသည်။ အလ်ဂျီးရီးယားမှ ပါမောက္ခတစ်ဦးကမူ ဆော်ဒီအာရေဗျရှိ အမျိုးသမီးများမှာ ကားမမောင်းရခြင်မှလွဲ၍ လွတ်လပ်မှုရှိကြသည်ဟု ပြောကြားခဲ့သည်။
ပြိုင်ပွဲ၏ နောက်ဆုံးနေတွင်တော့ ဒီဇိုင်နာနှင့် ဘလော့ဂါဖြစ်သူ ယူကေမယ် ဒီနာ တော်ကီယာက ၎င်း၏အမြင်ကို ပွင့်ပွင့်လင်းလင်းပင် ဖွင်ဟခဲ့လေသည်။
`သာမန်မယ်ပြိုင်ပွဲနဲ့ အခုဒီပြိုင်ပွဲရဲ့ တစ်ခုတည်းသောခြားနားချက်ဟာ အမည်ပဲဖြစ်ပါတယ်။ ပြီးတော့ ကျွန်မတို့ ဦးခေါင်းပေါ်မှာ ဟီဂျဘ်ဝတ်ဆင်ထားတာလည်း ခြားနားမှုပါပဲ´
ပြိုင်ပွဲအတွက် ဖိအားများမြင့်တက်လာသည့်အချိန်တွင် မိမိတို့နိုင်ငံအလိုက် ယဉ်ကျေးမှုဆိုင်ရာ ပြကွက်များပြသရန် အခွင့်အရေးမရမှုအတွကလည်း ဝေဖန်မှုများရှိခဲ့သည်။
ဥပမာအားဖြင့် နောက်ဆုံးရမှတ်၏ ၂၀ ရာခိုင်နှုန်းတွင် ထည့်သွင်းတွက်ချက်မည့် မိမိတို့၏ ကိုယ်ပိုင်ပါရမီကို လက်ဗွေစကန်ဖတ်ခြင်းဖြင့် ဆုံးဖြတ်သော Talents Spectrum Assessment စနစ်ကို မည်သည့်အတွက်ကြောင့် ထည့်သွင်းထားသနည်းဆိုသည်မှာ မေးစရာဖြစ်ခဲ့သည်။
နောက်ဆုံး ၁၀ ဦးစလုံးကို အကဲဖြတ်အမှတ်ပေးမည့် အချိန်တွင် ကုရ်အာန်ကျမ်းတော်မြတ် ရွတ်ဖတ်သရဇ္ဈာယ်ခြင်းကို အဘယ့်ကြောင့် အသံအကောင်းဆုံး တစ်ဦးတည်းကိုသာလျှင် ဦးဆောင်စေခဲ့သနည်း။
ထို့ပြင် အင်ဒိုနီးရှားရိုးရာ pawang hujan ပြိုင်ပွဲနှင့် စိတ်ပိုင်းဆိုင်ရာ စမ်းသပ်မှုပြိုင်ပွဲတွင်လည်း ပြိုင်ပွဲဝင်များအတွက် ကသိကအောက်များဖြစ်ခဲ့လေသည်။
သို့ရာတွင် မွတ်စလင်အမျိုးသမီးများအတွက် အလားအလာကောင်းများ ရှိသည်ကတော့ အမှန်ပင်ဖြစ်၏။
`ဒီ မွတ်စလင်မယ်ပြိုင်ပွဲဟာ မွတ်စလင်အမျိုးသမီးတွေအတွက် တကယ့်ကို အကျိုးဖြစ်ထွန်းမယ့် အလားအလာ ရှိနေပါတယ်။ ဒါပေမယ့် အခုအချိန်မှာတော့ အနည်းငယ် ရှက်စရာကောင်းနေတယ်လို့ ခံစားရပါတယ်´ ဟု တိုကီရာက ပြောကြားခဲ့သည်။
ယိုဂျာကားတားရှိ သမိုင်းဝင် Prambanan ဟိန္ဒူဘုရားကျောင်း ပရ၀ုဏ်အတွင်း ကျင်းပပြုလုပ်မည့် ဖိုင်နယ်ပွဲမတိုင်မီ အားလုံးက စိတ်လှုပ်ရှားနေကြသည်။
အ၀တ်လဲခန်းတွင်လည်း ရွှေရောင်ဒေါက်မြင့်ဖိနပ်ဘူးများဖြင့် ပျာယာခတ်နေကြသည်။ ဒီဇိုင်နာများ၏ ၀တ်စုံများက ပျံဝဲနေကြ၏။ ပြိုင်ပွဲဝင်များကလည်း မှန်ရှေ့မှမခွာကြ။ ပြိုင်ပွဲတွင် အကောင်းဆုံးယှဉ်ပြိုင်နိုင်ရန်အတွက် ကုရ်အာန်ကျမ်းတော်မြတ်မှ လမ်းညွှန်မှုများကို အချို့က ရှာဖွေဖတ်ရှုနေကြသည်။
အီရန်မယ်ကတော့ သူမရရှိသည့် ၀တ်ရုံရှည်က သူမခန္ဓာကိုယ်ထက် ၃ ဆ မျှ ကြီးနေသည့်အတွက် မကျေမနပ်ဖြစ်နေသည်။ ထို့ပြင် ဘင်္ဂလားဒေ့ရ်ှမယ်ကလည်း မျက်တောင်အတုများမှာ ချုံပုတ်များနှင့်တူသည်ဟု ပြောပြန်သည်။
ယမန်နှစ်က မွတ်စလင်မယ်အဖြစ် ရွေးချယ်ခံရသူနှင့်အတူ ကုရ်အာန်ကျမ်းတော်မြတ်အား တစ်နာရီခန့် လေ့လာပြီးသည့်နောက် အိန္ဒိယမယ်က ၎င်း၏ စလွယ်မှာ ဟိုတယ်တွင် ကျန်ခဲ့သည်ကို သိရပြီး ပူပန်မှုများ ဖြစ်ခဲ့သည်။
ပြိုင်ပွဲစရန် ၅ မိနစ်သာလိုတော့သည်ဟု ပြောကြားသည့်အခါမှာတော့ မလေးရှားမယ်က အလွန်ပင် စိတ်လှုပ်ရှားသွားခဲ့သည်။ ထိုအချိန်တွင် KLCC တာဝါက ခုန်ချတော့မည့်အချိန်တွင် ခံစားရသကဲ့သို့ ဖြစ်ပွားခဲ့သည်ဟု သူမက ဖွင့်ဟခဲ့လေသည်။
ကြမ်းပြင်ထိသည်အထိ ရှည်လျားသည့် ဂါဝန်၊ ဇာထည်၊ အနားသတ်များနှင့် ခြယ်သထားသည့် နှစ်လွှာပါသော ဟီဂျဘ်တို့ ၀တ်ဆင်ထားကာ ကျက်သရေရှိလှသည့် မွတ်စလင်မယ်များမှာ ကနုတ်ပန်းများဖြင့် ဆင်ယင်ထားသည့် စင်မြင့်ပေါ်သို့ ထွက်လာကြသည်။ ထို့နောက် လှည့်ပတ်လျှောက်ခဲ့ကြပြီး ကုရ်အာန်ကျမ်းတော်မြတ်မှ ပါဒတော်တစ်ချို့ကို ရွတ်ဖတ်သရဇ္ဈာယ်ကြလေသည်။
နှစ်ပတ်တာကြာမြင့်ခဲ့သည့် ပြိုင်ပွဲ၏ အဆုံးသတ်တွင်တော့ မည်သူက နောက်ဆုံး အနိုင်ရသူဖြစ်မည် နည်းဟူသည့် မေးခွန်းများမှာလည်း ပေါ် ထွက်လာခဲ့သည်။ နှစ်သက်မြတ်နိုးဖွယ်ကောင်းပြီး၊ အရှိကို အရှိအတိုင်းဖွင့်ဟတတ်သည့် ယူကေမယ်လား? မော်ဒယ်သဏ္ဍာန်နှင့် အင်ဂျင်နီယာဖြစ်သူ တူနီးရှားမယ်လား? သို့မဟုတ် ကိုယ်ကျိုးမကြည့်သည့် ဆရာဝန်ငယ် ဘင်္ဂလားဒေ့ရ်ှမယ်လား?
နောက်ဆုံး ၅ ဦးအဆင့်သို့ ရောက်ရှိချိန်အထိ အေးအေးဆေးဆေးပင်ဖြစ်ပြီး ထိုငါးဦးအထဲမှ ၃ ဦးပင် ယှဉ်ပြိုင်ပြီးသွားပြီဖြစ်သည်။ ထို့နောက် နောက်ဆုံးအပြောင်းအလဲတစ်ခုအဖြစ် အိန္ဒိယမယ်ကို စင်မြင့်ထက်သို့ ဖိတ်ခေါ်ခဲ့လေသည်။ ထို့ကြောင့် နောက်ဆုံး ၅ ဦး မဟုတ်ဘဲ နောက်ဆုံး ၆ ဦး ဖြစ်လာခဲ့ပြီး ပြိုင်ပွဲက အကြိတ်အနယ်ဖြစ်လာခဲ့သည်။
ပြိုင်ပွဲဝင်များအား မဲပေးရန်အတွက် ဖိတ်ခေါ်ထားသည့် မိဘမဲ့နှင့် ချို့တဲ့သည့် အသိုင်းအ၀ိုင်းမှ လူငယ် ၁၀၀ က မဲပေးသည့် အချိန်တွင်တော့ အိန္ဒိယနှင့် တူနီးရှားမှ မွတ်စလင်မယ်များက အပြိုင်အဆိုင်ဖြစ်လာခဲ့ပြီး ၎င်းတို့ နှစ်ဦးသား စင်မြင့်အပေါ်၌ နောက်ဆုံး အဖြေအတွက် ရင်ခုန်စွာ စောင့်မျှော်နေကြလေသည်။
မဲအရေအတွက် ၅၁-၄၉ ဖြင့် တူနီးရှားမယ် ဖာသွေမာ ဘင် ဂူဖရာချီတစ်ယောက် အနိုင်ရခဲ့သည်။ သူမမှာ မယုံနိုင်အောင်ဖြစ်ခဲ့ရပြီး ဆုတံဆိပ်နှင့် ဂုဏ်ပြုပန်းများ လာရောက်အပ်နှင်းသည်အထိ ပီတိသောမနဖြင့် မျက်ရည်ဝိုင်းနေပြီး မည်သည့်စကားမှ ပြောမထွက်နိုင်သေး။
၂၀၁၄ ခုနှစ် မွတ်တစ်လင်မယ်ကမ္ဘာဖြစ်သူ သူမအား အိန္ဒိယမယ်က ဖက်လှဲတကင်း ဂုဏ်ပြုခဲ့ပြီးနောက် ဂူဖရာချီက ကမ္ဘာတစ်ဝှမ်းက အာရုံစူးစိုက်မှုနည်းသည့် ပြဿနာများ ပြေလည်ရန် မိမိနေဖြင့် အားပေးထောက်ခံပါကြောင်း ပြောဆိုသွားခဲ့လေသည်။
“မွတ်စလင်ကမ္ဘာအတွက် အရေးပါတဲ့ အရာတွေထဲက အချို့ကို လုပ်ဆောင်နိုင်ဖို့ ကျွန်တော်မျိုးမအား အလ္လာဟ်အရှင်မြတ် ကူညီစောင်မတော်မူပါစေ´ လို့ ကျွန်မဆုတောင်းချင်ပါတယ်။ နောက်ပြီး ပါလက်စတိုင်း၊ ဂါဇာ၊ ဆီးရီးယားနဲ့ ကမ္ဘာတစ်ဝှမ်းမှာ အတိဒုက္ခရောက်နေကြတဲ့ မွတ်စလင်တွေအတွက် ဆုတောင်းပေးကြပါလို့ ပရိသတ်တွေကို ကျွန်မ တောင်းဆိုချင်ပါတယ်´
စာနာမှုအပြည့်၊ ဂရုဏအပြည့်ဖြင့် ဂူဖရာချီက ပြောကြားခဲ့လေသည်။
Ref: Al Jazeera
.လေးမောင် ဘာသာပြန်ဆို တင်ဆက်သည်။
Leave a Reply
You must be logged in to post a comment.