News @ M-Media

ချန်ပီယံလိဂ်ဝင်ခွင့်အတွက် မသေချာသေးဟု မာတာပြော

ဧပြီ ၁၃၊ ၂၀၁၅
M-Media

mata

– ဒါဘီပွဲအနိုင်ရရှိပြီး အဆင့် ၅ နေရာနှင့် ၉ မှတ် ကွာဟနေသော်လည်း ချန်ပီယံလိဂ် ၀င်ခွင့်အတွက် မသေချာသေးဟု မန်ယူကွင်းလယ်လူ ဂျူအန်မာတာက ပြောကြားလိုက်သည်။

အိုထရက်ဖို့ဒ်တွင် ကစားခဲ့သည့် ယမန်နေ့ပွဲတွင် မန်ယူမှာ မန်စီးတီးအား ၄ ဂိုး ၂ ဂိုးဖြင့် ပြတ်ပြတ်သားသား အနိုင်ရခဲ့ပြီး ပရီးမီးယားလိဂ် ၆ ပွဲဆက်အနိုင်လည်း ဖြစ်သည်။ လက်ရှိအချိန်တွင် မန်ယူမှာ အဆင့် ၅ မှ ဆောက်သက်တမ်အား ၉ မှတ်ဖြတ်ထားပြီး တတိယနေရာတွင် ရှိနေသည်။

လက်ကျန် ၆ ပွဲတွင် မန်ယူမှာ ချယ်ဆီး၊ အာဆင်နယ်တို့နှင့် ကစားရန် ကျန်ရှိနေပြီး မာတာကမူ မိမိတို့၏ ချန်ပီယံလိဂ်ဝင်ခွင့်နေရာရရှိရေး ကြိုးပမ်းမှုမှာ မပြီးဆုံသေးဟု ပြောကြားခဲ့သည်။

“ချန်ပီယံလိဂ်နေရာအတွက် ခြေတစ်လှမ်း လိုနေပါသေးတယ်။ အဲဒါဟာ(မန်းစီးတီးအနိုင်ဟာ) ကြီးမားတဲ့နိုင်ပွဲပါ။ ပြီးတော့ ယုံကြည်မှုကိုလည်း မြင့်မားစေပါတယ်။ ဒါပေမယ့် အာဆင်နယ်ဟာ အသင်းကောင်းတစ်သင်းဖြစ်ပြီး မန်စီးတီးနဲ့ လီဗာပူးလ်တို့ကလည်း နောက်ဆုံးအထိ တိုက်ပွဲဝင်သွားမယ့် အသင်းတွေပါ” ဟု မာတာက Sky Sports သို့ ပြောကြားခဲ့သည်။

မန်ယူနည်းပြ ဗန်ဂါးလ်ကမူ ယမန်နေ့နိုင်ပွဲမှာ မိမိတို့အသင်းက လက်ရှိချန်ပီယံ မန်စီးတီးထက် ပိုကောင်းသည်ကို သက်သေပြနိုင်ခြင်းဖြစ်ကြောင်း ပြောကြားခဲ့ပြီး အသင်းပရိတ်သတ်များကိုလည်း ချီးကျူးခဲ့သည်။

Ref: Goal.com

Comments

Leave a Reply