သြဂုတ် ၁၀၊ ၂၀၁၅
M-Media
– ဘွန်ဒစ်လီဂါ ကလပ်အသင်းဖြစ်သော ဟာသာဘာလင်အသင်း၏ ဘတ်စ်ကားမှာ ယမန်နေ့က သေနတ်သမားတစ်ဦး၏ ပစ်ခတ်မှုကို ခံခဲ့ရသည်ဟု သိရသည်။
ဒုတိယတန်းမှ အာမီနီယာ ဘီလီဖဲလ်အသင်းနှင့် ရှုံးထွက်ပွဲကစားရန် သွားရောက်စဉ် မော်တော်ဆိုင်ကယ်ပေါ်မှ အမျိုးသားတစ်ဦးက သေနတ်ဖြင့် လှမ်းပစ်ခဲ့ခြင်းဖြစ်သည်။ တနင်္လာနေ့တွင် ကစားမည့်ပွဲအတွက် ဟာသာဘာလင် အသင်းသားများမှာ ဘီလီဖဲလ်မြို့သို့ ရထားဖြင့် သွားရောက်ခဲ့ပြီး အဆိုပါဘတ်စ်ကားမှာ ဘူတာရုံမှ ကစားသမားများကို ကြိုရန် သွားရောက်ခြင်းဖြစ်သည်။
ပစ်ခတ်မှုဖြစ်ပွားစဉ် ကားပေါ်၌ ကစားသမားများ ရှိနေခြင်းမရှိဘဲ မည်သူတစ်ဦးတစ်ယောက်မှ ထိခိုက်ဒဏ်ရာရခြင်းလည်း မရှိပေ။ ကျည်ဆံမှာ ကား၏ ရှေ့မှန်အတွင်း စိုက်ဝင်သွားခဲ့သည်။
အသင်းကမူ သေနတ်မှန်ထားသည့် ဘတ်စ်ကား၏ဓာတ်ပုံကို Twitter စာမျက်နှာတွင် လွှင့်တင်ထားပြီး မျက်မြင်သက်သေများအနေဖြင့် ထွက်လာ သတင်းပေးကြရန်လည်း တိုက်တွန်းခဲ့သည်။
“မယုံနိုင်စရာပါပဲ။ ကျွန်တော်တို့အသင်းဟာ ဖလားပွဲအတွက် သွားနေတဲ့လမ်းမှာ အပစ်ခံခဲ့ရပါတယ်။ ဘယ်သူမှ မထိခိုက်ခဲ့ပါဘူး” ဟု အသင်း၏ Twitter စာမျက်နှာတွင် ရေးသားထားသည်။ ရဲတပ်ဖွဲ့ကမူ ပြစ်မှုကျူးလွန်သူကို ရှာဖွေမှုများ ပြုလုပ်နေသည်။
Ref: Goal
Leave a Reply
You must be logged in to post a comment.