ဧပြီ ၂၃၊ ၂၀၁၇
M-Media
– အမေရိကန်ကို နျူလက်နက်များဖြင့် ‘အင်အားကုန်စစ်ပွဲ’ စစ်နွှဲသွားမည်ဟု မြောက်ကိုရီးယားက ယမန်နေ့တွင် ထပ်မံပြောကြားလိုက်ပြီး အမေရိကန်၏ လေယာဉ်တင်သင်္ဘော USS Carl Vinson ကိုရီးယားကျွန်းဆွယ်အနီးသို့ ရောက်ရှိတော့မည့်အချိန်တွင် ပေါ်ထွက်လာခြင်းလည်းဖြစ်သည်။
မြောက်ကိုရီးယားက ဒုံးကျည် စမ်းသပ်ပစ်လွှတ်မှုများ လုပ်ဆောင်ခဲ့ပြီးနောက် ပြီးခဲ့သည့် သီတင်းပတ်များအတွင်း အမေရိကန်နှင့် မြောက်ကိုရီးယားတို့အကြား တင်းမာမှုများမှာ မြင့်တက်လာခဲ့ပြီး သမ္မတ ဒေါ်နယ်ထရမ့်နှင့် အမေရိကန် အစိုးရတာဝန်ရှိသူများက မြောက်ကိုရီးယားကိစ္စနှင့်ပတ်သက်၍ စစ်ရေးအရ အရေးယူရန် နည်းလမ်းအပါအ၀င် နည်းလမ်းအားလုံးကို စဉ်းစားနေသည်ဟု ပြောကြားထားသည်။
မိမိတို့၏ လေယာဉ်တင်သင်္ဘော USS Carl Vinson မှာ ရက်ပိုင်းအတွင်း ဂျပန်ပင်လယ်ပြင်ကို ရောက်လာတော့မည်ဟု အမေရိကန်ဒုတိယသမ္မတ မိုက်ပန့်စ်က ယမန်နေ့တွင် ပြောကြားခဲ့သည်။
မြောက်ကိုရီးယားကမူ အမေရိကန်၏ အဆိုပါ အင်အားပြမှုကို ဆန့်ကျင်ခဲ့သည်။
“အမေရိကန်ရဲ့ နျူကလီးယားခြိမ်းခြောက်မှုကို ကာကွယ်ဖို့အတွက် ကျွန်တော်တို့မှာလည်း အင်အားကောင်းတဲ့ နျူစွမ်းအားကို ပိုင်ဆိုင်ထားပါတယ်။ အင်အားကုန် စစ်ပွဲကို၊ အင်အားကုန် စွမ်းအားနဲ့၊ နျူ ကလီးယားစစ်ပွဲကို ကိုယ်ပိုင်ပုံစံ နျူတိုက်ခိုက်မှုနဲ့ ကြောက်ရွံ့မနေဘဲ တုန့်ပြန်သွားမှာပါ။ ပြီးတော့ အမေရိကန်ရဲ့ နောက်ဆုံးစစ်ပွဲမှာ ကျွန်တော်တို့ဟာ အောင်မြင်သူအဖြစ် ပေါ်ထွက်လာမှာ ဖြစ်ပါတယ်” ဟု မြောက်ကိုရီးယား နိုင်ငံခြားရေးဝန်ကြီးဌာနမှ ယမန်နေ့က ထုတ်ပြန်သော ကြေငြာချက်တွင် ဖော်ပြထားသည်။
မြောက်ကိုရီးယားမှာ ကိုရီးယားပြည်သူ့တပ်မတော် တည်ထောင်မှု ၈၅ နှစ်မြောက် နှစ်ပတ်လည် အခမ်းအနားကို အင်္ဂါနေ့တွင် ကျင်းပသွားမည်ဖြစ်ပြီး ယခင်က အဆိုပါ အခမ်းအနားနေ့တွင် ဒုံးကျည်ပစ်လွှတ်မှုများ၊ နျူလက်နက်စမ်းသပ်မှုများ ပြုလုပ်ခဲ့ဖူးသည်။
မြောက်ကိုရီးယား၏ တရားဝင်သတင်းစာ Rodong Sinmun ကလည်း အမေရိကန်မှာ လုံးဝ ရူးနှမ်းသွားပြီဖြစ်ကြောင်း၊ ရန်စလာပါက မိမိတို့မှာ ကြိုတင်လက်ဦးမှု ရယူတိုက်ခိုက်သွားရန် လက်တွန့်နေမည်မဟုတ်ကြောင်း စနေနေ့က ဖော်ပြခဲ့သည်။
Ref: Aljazeera