News @ M-Media

ရုရှားကို ထိပ်တန်းလျှို့ဝှက်ချက် အသိပေးမှုအတွက် ထရမ့်က ကာကွယ်ပြောဆို

မေ ၁၆၊ ၂၀၁၇
M-Media

– ရုရှားနိုင်ငံခြားရေးဝန်ကြီးအား တိုင်းပြည်၏ ထိပ်တန်းလျှို့ဝှက်ချက်ကို အသိပေးခဲ့သည့် ကိစ္စအတွက် အမေရိကန်သမ္မတ ဒေါ်နယ်ထရမ့်က ကာကွယ်ပြောဆိုလိုက်ပြီး မိမိ၏လုပ်ရပ်မှာ မှန်ကန်သည့်လုပ်ရပ်ဖြစ်သည်ဟု ပြောကြားလိုက်သည်။

ပြီးခဲ့သည်တစ်ပတ် အိမ်ဖြူတော်၌ ရုရှားနိုင်ငံခြားရေးဝန်ကြီး ဆာဂျီ လာဗရော့နှင့် တွေ့ဆုံစဉ်အတွင်း ထရမ့်မှာ IS အကြမ်းဖက်အဖွဲ့နှင့်ပတ်သက်​၍ လျှို့ဝှက်ချက်တစ်ခုကို အသိပေးခဲ့သည်ဟု ၀ါရှန်ပို့စ်သတင်းစာက ယမန်နေ့တွင် ဖော်ပြခဲ့သည်။

လေယာဉ်ပေါ်တွင် အီလက်ထရောနစ်ပစ္စည်းများ အသုံးပြုခြင်းနှင့်ပတ်သက်သည့် ကိစ္စဖြစ်ပြီး ထရမ့်မှာ ပြောပိုင်ခွင့်မရှိသူ တစ်ဦးထံမှ တစ်ဆင့်စကားဖြင့် ထိုကိစ္စကို သိထားခြင်းဖြစ်သည်။

အင်္ဂါနေ့မနက်ပိုင်းက ထရမ့်မှာ Twitter စာမျက်နှာတွင် “သမ္မတစ်ယောက်အနေနဲ့ (တရားဝင်စီစဉ်ထားတဲ့ အိမ်ဖြူတော်အစည်းအဝေးမှာ) အကြမ်းဖက်ဝါဒ၊ လေယာဉ်ပျံသန်းမှု ဘေးအန္တရာယ်ကင်းရှင်းရေးနဲ့ ပတ်သက်တဲ့ အချက်အလက်တွေ ရုရှားကို မျှဝေချင်ခဲ့ပြီး အဲဒီလို လုပ်ပိုင်ခွင့်လည်း ကျွန်တော်မှာ လုံးဝ ရှိပါတယ်။ လူသားချင်းစာနာထောက်ထားမှုဆိုင်ရာ အကြောင်းအရင်းကြောင့်ဖြစ်ပြီး၊ (IS) နဲ့ အကြမ်းဖက်ဝါဒကို တိုက်ဖျက်ရေးမှာ ရုရှားကို ကျွန်တော် အရှိန်မြှင့်စေချင်တာလည်း ပါပါတယ်” ဟု ၎င်း၏ လုပ်ရပ်ကို ကာကွယ်ရေးသားခဲ့သည်။

ဝါရှန်တန်ပို့စ်သတင်းစာက ထိုအချက်ကို ထုတ်ဖော်ခဲ့ပြီးနောက်ပိုင်း အမေရိကန်အစိုးရ လုံခြုံရေးတာဝန်ရှိသူ တစ်ဦးနှင့် ထရမ့်၏ လုံခြုံရေးအကြံပေးတို့က ထိုသတင်းမှာ သတင်းမှားသာ ဖြစ်သည်ဟု ပြောကြားခဲ့သည်။

အမေရိကန်သမ္မတစ်ယောက်အနေဖြင့် နိုင်ငံတော် ထိပ်တန်း လျှို့ဝှက် အချက်အလက်များကို ထုတ်ဖော် ပြောဆိုခြင်းမှာ တရားဝင်သော်လည်း ထရမ့်၏ ယခုလုပ်ရပ်ကို ဒီမိုကရက်များက ဝေဖန်ခဲ့ကာ ၎င်း၏ ရီပက်ဘလစ်ကန် ပါတီကလည်း ဖြေရှင်းချက်ပေးရန် တောင်းဆိုထားသည်။

Ref: BBC