စက်တင်ဘာ ၇၊ ၂၀၁၇
M-Media
– ကင်ဆာ တစ်ရှူးကို ၁၀ စက္ကန့်အတွင်းမှာ ဖော်ထုတ်နိုင်မယ့် ကိရိယာတစ်ခုကို တီထွင်နိုင်ခဲ့ပြီလို့ အမေရိကန်ပြည်ထောင်စု တက္ကဆက်တက္ကသိုလ်က သိပ္ပံပညာရှင်တွေက ပြောကြားလိုက်ပါတယ်။
MasSpec Pen လို့ အမည်ပေးထားတဲ့ ဘောပင်ပုံစံ အဲဒီကိရိယာဟာ ကင်ဆာအကျိတ်ကို လျင်လျင်မြန်မြန်၊ အန္တရာယ်ကင်းကင်းနဲ့ တိတိကျကျ ဖယ်ရှားဖို့အတွက် အထောက်အကူဖြစ်မှာဖြစ်သလို၊ ကင်ဆာဆဲလ်တွေ ကျန်ခဲ့မှာလည်း စိတ်မပူရတော့ဘူးလို့ ဆိုပါတယ်။
ကင်ဆာဆဲလ်တွေရဲ့ ဓာတုဓာတ်ပြောင်းလဲမှုတွေကို အခြေခံ ဖော်ထုတ်ပေးမယ့် ဒီကိရိယာဟာ ၉၆ ရာခိုင်နှုန်းလောက် တိကျတယ်လို့ တီထွင်သူတွေက ပြောပါတယ်။
ကင်ဆာသံသယရှိတဲ့နေရာမှာ ကိရိယာကိုထောက်လိုက်တဲ့အခါ အရည်တစ်စက် ကျလာမှာဖြစ်ပြီး ဆဲလ်နဲ့ဓာတ်ပြုပြီးတဲ့နောက် ဒီအရည်ကို ကိရိယာက ပြန်လည်စုပ်ယူကာ ကင်ဆာ ဆဲလ် ဟုတ်၊ မဟုတ် ဖော်ထုတ်ပေးမှာ ဖြစ်ပါတယ်။
လက်ရှိအချိန်မှာ ဆရာဝန်တွေအတွက် အဓိက စိန်ခေါ်မှုက ကင်ဆာဆဲလ်နဲ့ သာမန်ဆဲလ်တွေကို ခွဲရခက်တာပါ။ ဒါပေမယ့် MasSpec Pen ကတော့ ဒီအခက်အခဲကို ကျော်လွှားရာမှာ အထာက်အကူ ဖြစ်စေမှာ ဖြစ်ပါတယ်။
တက္ကသိုလ်ရဲ့ ဓာတုဗေဒဌာနက လက်ထောက် ပရော်ဖက်ဆာ လီဗီယာ အီဘာလင်က ဒီကိရိယာလေးဟာ ဆေးဘက်ဆိုင်ရာ လိုအပ်ချက်ကို ဖြည့်ဆည်းပေးမှာဖြစ်ပြီး ခွဲစိတ်ဆရာဝန်တွေလက်ထဲ မကြာခင် ရောက်ရှိတော့မှာဖြစ်တယ်လို့ ဆိုပါတယ်။
Ref: BBC